Matewu
2 Hanyima yakwila Yesu navwaliki dehi muBetelemi yamuYudeya mumafuku ayuulileñayi mwanta Herodi,* akwakuhoña natutumbwa* enjili kuYerusalema kufuma Kumusela, 2 elili nawu: “Indi mwanta wawaYudeya wunavwaliki wudi kudihi? Muloña twamweni katumbwa kindi hampinji yitwadiña Kumusela, tunenzi kulonda tudifukuli* kudi yena.” 3 Chelili Mwanta Herodi niantu ejima amuYerusalema atiyi iyi nsañu, akameneni. 4 Chapompesheliyi akulumpi jawatupristu ejima niansoneki jawantu, wayihwili kwateleleli kuvwalikilayi Kristu.* 5 Amwakwili nawu: “MuBetelemi yamuYudeya, muloña ichi dichasonekeliwu kuhitila mudi kaprofwetu nawu: 6 ‘Eyi Betelemi wamwituña daYuda, hiwudi musumba wakehelamu hakachi kawanguvulu amuYudaku, muloña mudi eyi dimwakafuma nyuuli, wamba kabiña antu jami aIsarela.’”
7 Kuhiñahu, Herodi wayitambikili akwakuhoña natutumbwa kwakankawawu nawa wayihwili nakanañachima mpinji yamwekeni katumbwa. 8 Hakuyitemesha kuBetelemi, wayilili nindi: “Yenu mwakamukeñakeñi owu mwana wanyanya nawa neyi munamuwani, mwakenzi nakunleja kulonda ninami nakayi nakudifukula kudi yena.” 9 Chamanishiliwu kutiyilila mwahosheliyi mwanta, anyamukili nakuya, hohenohu amweni katumbwa kamweniwu hadiñawu Kumusela kanayitwaminini hambidi yawu kushika nichikemeni hewulu hadiña owu mwana wanyanya. 10 Chamweniwu katumbwa, azañaleli chikupu. 11 Cheñililiwu mwitala, amweni owu mwana wanyanya wadiña naMariya mama yindi nawa adibukili heseki nakudifukula* kudi yena. Ajikwili mwadiña yuma yawu yalema nawa amwinkeli yawaana yawuru, libona nimora. 12 Hela chochu, chelili ayisoñamishili kudi Nzambi muchilota nawu bayi afunta kudi Herodiku, afuntilili njila yacheñi hakuya kwituña dawu.
13 Chelili ananyamuki dehi, kañelu kaYehova wamwekeni muchilota kudi Yosefu nakumuleja nindi: “Nyamukaku, sendaku mwana wanyanya nimama yindi wutemukili kuEjipitu wakashakamiku sampu nakuleji mwakwilila, muloña Herodi keña yatachiki kumukeñakeña mwana wanyanya kulonda yamujahi.” 14 Dichi Yosefu wanyamukili nawufuku, wasendeli mwana wanyanya nimama yindi nakuya kuEjipitu. 15 Washakamini kwenoku kushika nichafwiliyi Herodi. Chumichi chashikijili mazu ahosheliyi Yehova kuhitila mudi kaprofwetu kindi nindi: “Natambikili mwanami kufuma muEjipitu.”
16 Herodi chamweniyi nindi akwakuhoña natutumbwa anamudimbi, wahilili nankashi nawa watemesheli antu kuya nakujaha anyana awamayala ejima amuBetelemi nimujinkambi jamuBetelemi jejima, kutachikila hadi anyana adiña nayaaka yiyedi nakufunta mwishina kwesekeja nachehwiliyi nakanañachima kudi akwakuhoña natutumbwa. 17 Dichi mazu ahosheliwu kuhitila mudi kaprofwetu Yeremiya ashikijeweli, wahosheli nindi: 18 “MuRama mwatiyakeni izu dakudila nimakumbu aweni. Racheli diyi wadilileña anyanindi nawa hetejeli kumukundejaku, muloña anyanindi afwili.”
19 Chelili Herodi nafwi dehi, kañelu kaYehova wamwekeni muchilota kudi Yosefu muEjipitu 20 nawa wamulejeli nindi: “Nyamukaku, sendaku mwana wanyanya nimama yindi wuyi mwituña daIsarela, muloña antu akeñeleña wumi wamwana wanyanya afwa dehi.” 21 Dichi wanyamukili nawa wasendeli mwana wanyanya nimama yindi nakwiñila mwituña daIsarela. 22 Ilaña chatiyiliyi nindi Akelawusi diyi wayuulileña muYudeya nawa wamuswanini tata yindi Herodi, watiyili woma wakuyaku. Cheñi, chamusoñamishiliwu kudi Nzambi muchilota, wayili mwiluña damuÑaliliya. 23 Wayili nakushakama mumusumba waNazareta kulonda mazu ahosheleliwu kuhitila mudi atuprofwetu ashikijewi, nawu: “Akamutena nawu wakuNazareta.”*