Luka

6 Chahitileñayi mumaha atidiku hasabata, atumbanji twindi akotweleña nyitu yatidiku nakuyichikita mumakasa awu nikuyiida. 2 Dichi, aFwarisi amu chamweniwu anakwila mwenimu, ahosheli nawu: “Munakwililadi chuma chakaanishawu munshimbi kwila haSabata?” 3 Ilaña Yesu wayakwili nindi: “Enu komana kanda mutañeñahu dehi chuma chakoñeliyi Davidi helili yena niamayala adiñayi nawu atiyi nzala? 4 Nicheñililiyi mwitala daNzambi nakutambula mankendi akutenteka kumesu aNzambi nakuyiida nawa wayinkelihu amayala adiñayi nawu mankendi amakwawu, mankendi akaanishiliwu munshimbi muntu kuyiida, chiña hohu atupristuku?” 5 Kuhiñahu, wayilejeli nindi: “Mwana kamuntu diyi Mwanta waSabata.”

6 Hasabata yikwawu, weñilili musinagogi nawa watachikili kutañisha. Nawa mwenomu mwadiña iyala walepa chikasa chachidiilu. 7 Dichi ansoneki nawaFwarisi adiña nakumutala Yesu chikupu amoni neyi wukuuka haSabata kulonda awani njila yakumwinkelamu muloña. 8 Hela chochu, yena welukili yitoñojoka yawu, dichi wamwilili owu iyala walepa chikasa nindi: “Nyamukaku wimani hakachi.” Hohenohu wanyamukili nakwimana hakachi. 9 Kuhiñahu Yesu wayilili nindi: “Enu antu lekenu niyihuliku, komana nshimbi yeteja kwila chuma chachiwahi haSabata tahindi kwila chuma chatama, kwamwina wumi tahindi kuwujilumuna?” 10 Hanyima yakuyitala wejima wawu, wamulejeli owu iyala nindi: “Ololaku chikasa cheyi.” Dichi owu iyala welili mwomwenomu, nawa chikasa chindi chakoleli nakwikala neyi chichadiña. 11 Ilaña wena ahilili nankashi nawa atachikili kuhanjeka wumu namukwawu chuma chatela kumwilawu Yesu.

12 Hefuku dimu munowu mafuku wayili kumpidi nakulomba, dichi walombeli kudi Nzambi wufuku wejima. 13 Chikwachili, watambikili atumbanji twindi nawa hakachi kawu watondelihu adi 12 atumbiliyi cheñi nindi apostolu: 14 Shimona atumbiliyi cheñi nindi Petulu nimanakwindi Anderi, niYakoba, niYowanu, niFwilipu, niBatolomewu, 15 niMatewu, niTomasi, niYakoba mwana kaAlafwewu, niShimona ateneneñawu nawu “wadikita,” 16 niYudasi mwana kaYakoba, niYudasi Isakaroti owu wamufukejeleli.

17 Dichi, wakunkumukili nawu nakwimana heluña hesekana nawa kwadiña izaza deneni dawatumbanji twindi niantu amavulu nankashi afuminini kumaluña ejima amuYudeya niamuYerusalema niakuchikumu chaTira niSidoni, enjili nakutiyilila kudi yena nikuyuuka yikatu yawu. 18 Niantu akabishileñawu kudi andemoni niwena ayuukili. 19 Izaza dawantu dejima dafwilileña kumukwata, muloña ñovu yafumineña mudi yena nakuyuuka wejima wawu.

20 Dichi chayitaliliyi atumbanji twindi, wayilejeli nindi:

“Enu atuzweñi mudi namuzañalu, muloña Wanta waNzambi wenu.

21 “Mudi namuzañalu enu munakutiya nzala makonu, muloña akayikutisha.

“Mudi namuzañalu enu munakudila makonu, muloña kumbidi mwakazañalala.

22 “Mudi namuzañalu enu neyi antu ayihela, kuyihaña hakachi kawu, kuyihosha kasawuntu nikuyitena kutama kukoola Mwana kamuntu. 23 Mwakazañalali nikutiya kuwaha hanodu ifuku, muloña wufwetu wenu weneni mwiwulu, yumiyi diyi yelileñawu niankakulula jawu kudi atuprofwetu.

24 “Oyihuñu yimwakamona enu aheta, muloña munakutambwila chadimu wufwetu wenu wejima.

25 “Oyihuñu yimwakamona enu munakwikuta makonu, muloña mwakatiya nzala.

“Oyihuñu yimwakamona enu munakuzañalala makonu, muloña mwakaneña nikudila.

26 “Oyihuñu yimwakamona enu neyi antu ayihameka, muloña ichi dicheliliwu niankakulula jawu kudi atuprofwetu akutwamba.

27 “Ilaña enu munakutiyilila, ami inakuyileja nami: Twalekenuhu kukeña ayilumbu jenu, antu anakuyihela yililenuña yuma yayiwahi, 28 anakuyishiña yikiswilenuña, anakuyituka yilombelenuñaku. 29 Muntu wunakweti kwikidi dimu, mushetumwini nikudikwawu nawa; nimuntu wukukutambula chakuvwala cheyi chahewulu, mwinki nichakuvwala cheyi chamukachi. 30 Muntu wunakukulomba mwinki, nimuntu wunakukutambula yuma yeyi, bayi wumuleja neyi yakufuntishiliku.

31 “Cheñi, yuma yejima yimunakukeña nenu antu ayilili enu, ninenu nawa yililenu mwomumu.

32 “Neyi mukukeña hohu antu ayikeña, mukuwanamu wufwetwinyi? Muloña akwanshidi niwena akeñaña hohu antu ayikeña. 33 Nawa neyi mwilila hohu yuma yayiwahi antu ayililaña yuma yayiwahi, mukuwanamu wufwetwinyi? Muloña akwanshidi niwena dichiyelañawu. 34 Cheñi nawa, neyi mwakongweshaña* hohu antu imunakuhweleli nenu akuyifuntishila, mukuwanamu wufwetwinyi? Muloña akwanshidi niwena akongweshaña* akwawu akwanshidi kulonda atambuli kwesekeja nachinahaniwu. 35 Ilaña enu, keñenuña ayilumbu jenu nikwila yuma yayiwahi nikukongwesha* chakadi kukuhwelela kutambula chuma chidi chejima; wufwetu wumukatambula weneni nankashi nawa mwakekala anyana kaMukwakubadika Chikupu, muloña yena wamwekeshaña luwi kudi antu atama niabulaña kusakilila. 36 Dichi ikalenuña akwaluwi neyi Tata yenu chekalayi mukwaluwi.

37 “Cheñi, lekenu kusompesha akwenu kulonda ninenu akabuli kuyisompesha; nawa lekenu kwinka akwenu nyiloña kulonda ninenu akabuli kuyinka nyiloña. Anakenenuña akwenu kulonda ninenu akayanakeni. 38 Hanenuña, ninenu antu akuyinkaña. Akahuñunwina muyisweku yenu chesekelu chachiwahi, chakushikija, chakunyikumuna nawa chinakusumpoka. Muloña chesekelu chimunakwesekelaku nachu akwenu, dichi chakayesekelawu nachu ninenu nawa.”

39 Wayilejeli cheñi chakutalilahu nindi: “Komana mputamesu nateli kulombola mukwawu mputamesu? Komana wejima wawu ayedi hiyakuholokela mwibukuku? 40 Kadizi* habadika ntañishi yindiku, ilaña kadizi wejima anadizishiwu chiwahi wekalaña neyi ntañishi yindi. 41 Muloñadi chiwatalilaña kachibalabala kadi mudisu damanakweyi ilaña chibalu chidi mudisu deyi eyi aweni kuchimona nehi? 42 Wukuleja ñahi manakweyi neyi, ‘Manakwami, tutali nukufumishi kachibalabala kadi mudisu deyi,’ hakwila eyi chibalu chidi mudisu deyi eyi aweni hiwunakuchimonaku? Eyi nfwikiji! Sambilaku kufumisha chibalu chidi mudisu deyi eyi aweni kulonda wumoni chiwahi chiwatela kufumisha kachibalabala kadi mudisu damanakweyi.

43 “Muloña kwosi mutondu wawuwahi wasoñaña nyikabu yatamaku nawa kwosi mutondu watama wasoñaña nyikabu yayiwahi. 44 Muloña mutondu wejima awilukilaña kunyikabu yindi. Chakutalilahu, antu hiyakumuña nyikuyu kunyiñaku, hela kukumuna nyivinyu kuchiputa chanyiñaku. 45 Muntu wamuwahi wahoshaña yuma yayiwahi yidi mumuchima windi, ilaña muntu watama wahoshaña yuma yatama yidi mumuchima windi; muloña yuma yayivulu yidi mumuchima wamuntu, diyi yahoshaña kanwa kindi.

46 “Hanu dinu, muloñadi chimwantenenaña nenu ‘Mwanta! Mwanta!’ ilaña himwelaña yuma yinahoshañaku? 47 Muntu wejima wenzaña kudi ami nikutiya mazu ami nakwilamu, nukuyileja muntu wafwanayi: 48 Wekala neyi muntu welili hakutuña itala yasambili kupunda chakunama nakwaala chikuku chetala helola. Dibaji chidenjili, cheji cheteli hanodu itala, ilaña hichatwesheli kunyinkesha odu italaku, muloña adituñili chiwahi. 49 Ilaña muntu wejima watiyaña mazu ami nakubula kwilamu, wudi neyi muntu watuñilili itala heseki chakadi kwaala chikuku. Cheji chicheteli hanodu itala, hohenohu dahumukili nakukisika chikupu.”