Luka
5 Mpinji yimu, izaza dawantu chidatiyilileña kudi Yesu hatañishileñayi izu daNzambi kuchikumu chejiya daGenesareta,* datachikili kumuwuuña. 2 Dichi wamweni maatu ayedi anayikuñiki kuchikumu chejiya, ilaña ayibinda janshi afuminimu, adiña nakukosa tuleñi twawu. 3 Chakandaminiyi muwatu wumu wadiña waShimona, wamulejeli nindi yawuswijiku hahalehi chanti nachikumu. Kuhiñahu, washakamini nawa watachikili kutañisha mazaza awantu iku wudi muwatu. 4 Chamanishiliyi kuhosha, wamulejeli Shimona nindi: “Twalaku watu kwakunama nawa mulalumwinihu tuleñi twenu kulonda mukwati inshi.” 5 Ilaña Shimona wamulejeli nindi: “Ntañishi, tunakabakani wufuku wejima nawa hitunakwatihu inshiku, ilaña kwesekeja nachiwunanleji, nukulalumwinahu tuleñi.” 6 Cheliliwu mwayilejeliyi, akwatili inshi jajivulu nankashi. Nituleñi twawu twatachikili kutaboka. 7 Dichi atambikili* akwawu mwazatilileñawu hamu adiña muwatu wukwawu nawu enzi nakuyikwashaku nawa enjili, enzesheli maatu ejima ayedi chakwila atachikili nikujiya. 8 Shimona Petulu chamweniyi chumichi, wadibukili heseki kumanuñu aYesu nakumwila nindi: “Mwanta, fumaku kudi ami, muloña ami nidi mukwanshidi.” 9 Muloña Shimona ninowu adiñayi nawu ahayamini nankashi hanshi jajivulu jiyakwatiliwu, 10 dichi chichadiña nikudi anyana kaZebedewu awamayala, Yakoba niYowanu azatilileña hamu naShimona. Ilaña Yesu wamulejeli Shimona nindi: “Lekaku kutiya woma. Kufuma dalelu wukwikala chibinda chawantu.” 11 Dichi afuntishili maatu kuchikumu nawa ashiyili yuma yejima nakumulondela.
12 Mpinji yikwawu hadiñayi mumusumba wumu, kukashimuka, kwadiña iyala wadiña nambumba. Chamumweniyi Yesu, wadinatili chamesu heseki nakumulembelela nindi: “Mwanta, neyi wunakeñi, wunateli kuntookesha.”* 13 Dichi, cholweliyi chikasa chindi, wamukwatili nakuhosha nindi: “Nakeñi! Tookaku.” Hohenohu mbumba yamufumini. 14 Kuhiñahu, wamulejeli iwu iyala yabuli kulejaku muntu, dichi wamulejeli nindi: “Ilaña yaña wakadimwekeshi kudi kapristu nawa wulambuli mulambu muloña wakutookeshewa kweyi, neyi chayilejeliyi Mosi kulonda wukayilili wunsahu kudi wena.” 15 Mpuhu yindi yatwalekelihu nakutiyakana kwejima nawa mazaza amaneni awantu adipompesheleña hamu nakutiyilila nikuyuuka yikatu yawu. 16 Hela chochu, kakavulu wayileña kwakankawindi nakulomba.
17 Hefuku dimu munowu mafuku hampinji yatañishileñayi, aFwarisi niantañishi aNshimbi afumini munyikala yejima yamuÑaliliya niyamuYudeya niyamuYerusalema niwena adiña hohu; nawa Yehova wamwinkeli ñovu yakuuka. 18 Hohenohu, kwenjili amayala asendeli iyala wakata kalepa akaamikiliwu hachileyi* nawa afwilileña kumwiñija mukachi kulonda amuleti kudi Yesu. 19 Chakañenyiwu kuwana hakumwiñijila mukachi muloña antu avulili nankashi, akandamini hewulu detala nawa azenzumwini muntu wakata kalepa hachileyi* mwiluña mwalamwiniwu nakumushikejela kumesu awantu adiña kumbidi yaYesu. 20 Chamweniyi chikuhwelelu chawu, wahosheli nindi: “Eyi iyala, nshidi jeyi anakwanakeniju.” 21 Kuhiñahu, ansoneki nawaFwarisi atachikili kudihoshesha nawu: “Indi yeniwu wunakuhosha mazu akasawuntu hinyi? Komana Nzambi hidiyi hohu wunateli kwanakena nshidiku?” 22 Ilaña Yesu chelukiliyi yitoñojoka yawu, wayakwili nindi: “Munakutoñojokadi munyichima yenu? 23 Komana chuma chaswayi chidihi, kuhosha nami, ‘Nshidi jeyi anakwanakeniju,’ tahindi kuhosha nami, ‘Nyamukaku wendi’? 24 Ilaña hakwila mwiluki nenu Mwana kamuntu wukweti wuswa wakwanakena nshidi hamaseki,” wamulejeli iyala wakata kalepa nindi: “Inakukuleja nami, Nyamukaku, nonaku chileyi* cheyi wuyi kwitala.” 25 Hohenohu wanyamukili iku antu anakumona namesu kapu, wanoneli chileyi* hakaamineñayi, wayili kwitala henohu nakumulemesha Nzambi. 26 Dichi wejima wawu ahayamini nankashi, atachikili kumulemesha Nzambi nawa atiyili muzañalu nankashi nakuhosha nawu: “Tunamoni yuma yayiwahi dalelu!”
27 Hanyima yachumichi, wayili nawa wamweni mukwakutambula nyisonku wejina daLevi nashakami mukasanji mwakutambwila nyisonku, wamwilili nindi: “Ikalaku mukwakunlondela.” 28 Dichi, chashiyiliyi yuma yejima, wanyamukili nakutachika kumulondela. 29 Kuhiñahu, Levi wamuloñesheleli Yesu chawija cheneni mwitala dindi, mwadiña niizaza deneni dawantu dawakwakutambula nyisonku niantu amakwawu adiileñayi nawu hamu.* 30 Hohenohu, aFwarisi niansoneki jawu atachikili kuyitoobela atumbanji twindi nawu: “Muloñadi chimwadiilaña nikunwa hamu nawakwakutambula nyisonku niakwanshidi?” 31 Yesu wayakwili nindi: “Antu akola hiyakeñaña ndotoluku, chiña akata hohu. 32 Ami nenzi nakutambika akwanshidi kulonda abalumuki munyichima yawu, bayi aloñaku.”
33 Wena amulejeli nawu: “Atumbanji twaYowanu niatumbanji twawaFwarisi kakavulu ashakamaña chakadi kuda nawa alombaña nakulembelela, ilaña atumbanji tweyi adaña nikunwa.” 34 Yesu wayihwili nindi: “Komana munateli kwilisha amabwambu jakalemba kushakama chakadi kuda henohu kalemba wudi nawu? 35 Ilaña mpinji yakashika yakamufumishawu kalemba kudi wena nawa diyi mpinji yakashakamawu chakadi kuda.”
36 Cheñi wayilejeli chakutalilahu nindi: “Kwosi muntu watabulaña chikamba* kuchakuvwala chahewulu chachiha nakuchichimina hachakuvwala chachikuluku. Neyi yachichiminahu, chikamba chachiha chikutabula chakuvwala chachikulu nawa chikamba chinafumi kuchakuvwala chachiha chikushiyashana nachakuvwala chachikulu. 37 Cheñi nawa, kwosi muntu waloñaña vinyu yayiha mumapakumuna avinyu amakuluku. Neyi yaloñamu, vinyu yayiha yikubusa mapakumuna avinyu, dichi vinyu yikumwañika nawa mapakumuna avinyu akukisika. 38 Ilaña vinyu yayiha atela kuyiloña mumapakumuna avinyu amaha. 39 Kwosi muntu welaña neyi yanwa vinyu yayikulu hakukeña yayihaku, muloña wahoshaña nindi, ‘Vinyu yayikulu diyi yayiwahi.’”