Luka
4 Kuhiñahu, Yesu chenzeliyi naspiritu yajila, wafumini kuYodana nawa spiritu yamutwalili mwisaña 2 hadi mafuku 40 nakumweseka kudi Diyabolu. Mumafuku wenowu hadiilihu yakudaku, chamanini owu mafuku, watiyili nzala. 3 Hohenohu Diyabolu wamulejeli nindi: “Neyi wudi mwana kaNzambi, ilaku idi ilola dibalumuki dinkendi.” 4 Ilaña Yesu wamwakwili nindi: “Chasonekewa nawu, ‘Muntu hatela kuhanda namankendi hohuku.’”
5 Kuhiñahu, wamukandamishili hewulu nakumuleja mawanta ejima ahamaseki mukapinji kantesha. 6 Dichi Diyabolu wamwilili nindi: “Nukukwinka wuswa hamawanta ejima awa nikulema kwawu, muloña anayinyinkiwu ami nawa nenkaña muntu wejima inakeñi. 7 Neyi wukudifukula kudi ami kamu hohu, yuma yejimiyi yikwikala yeyi.” 8 Yesu wamwakwili nindi: “Chasonekewa nawu, ‘Watela kudifukula kudi Yehova Nzambi yeyi nawa yena hohu diyi iwatela kukalakela mudimu wajila.’”
9 Kuhiñahu, wamutwalili muYerusalema nakumwimika hewulu dambañu yatembeli* nawa wamulejeli nindi: “Neyi wudi mwana kaNzambi, fumaku hanu wudinatili heseki, 10 muloña chasonekewa nawu, ‘Wakaleja añelu jindi hadi eyi kulonda akakukiñi,’ 11 nawa, ‘Akakwaka mumakasa awu kulonda idatilu deyi dikabuli kuhuma kwilola.’” 12 Yesu wamwilili nindi: “Chahoshewa nawu, ‘Bayi wumweseka Yehova Nzambi yeyiku.’” 13 Diyabolu chamanishiliyi kumweseka, wamushiyili sampu nimpinji yikwawu yatelela.
14 Hohenohu, Yesu wafuntili kuÑaliliya nawa spiritu yadiña hadi yena. Niyuma yayiwahi yashimwineñawu antu hadi yena yatiyakeni mumaluña amukamwihi ejima. 15 Cheñi, watachikili kushimwina mumasinagogi awu nawa antu ejima amulemesheleña.
16 Kuhiñahu, wayili kuNazareta kwakulililiyi, weñilili musinagogi nawa wemeni kulonda yatañi Nsona neyi chochelileñayi hefuku daSabata niSabata. 17 Dichi amwinkeli muvuñilu wakaprofwetu Isaya, wawuvuñulwili owu muvuñilu nawa wawanini hasonekeliwu nawu: 18 “Spiritu yaYehova yidi hadi ami, muloña wanwayishili kulonda nishimwini nsañu yayiwahi kudi atuzweñi. Wantemesheli nakuleja ankoli nsañu yakuyisubula nikutonesha amputamesu nikuumbaku antu akabishañawu. 19 Wantemesheli cheñi kulonda niyileji mpinji yakayikiswilawu cheñi kudi Yehova.” 20 Chamanishiliyi kutaña owu muvuñilu, wawuvuñili nakumufuntishila nhembi nawa washakamini; dichi antu ejima adiña musinagogi amushinshikili chikupu. 21 Kuhiñahu, watachikili kuyileja nindi: “Dalelu, iyi nsona yimunatiyi yinashikijewi.”
22 Nawa wejima wawu atachikili kushimuna wunsahu wawuwahi hadi yena nikuhayama namazu amawahi afumineña mukanwa kindi, dichi ahosheleña nawu: “Iwu diyi mwana kaYosefu, hidimuku?” 23 Hohenohu wayilejeli nindi: “Chakadi nikujina mukunhoshela nanawa mazu nenu, ‘Ndotolu, duuki eyi aweni. Yuma yitunatiyi yiwakoñeli muKaperinamu, yikoñi nikunu kumukala wenu nawa.’” 24 Kuhiñahu, wahosheli nindi: “Inakuyileja chalala nami, kaprofwetu hiyamwitejaña mumukala wawuku. 25 Chakutalilahu, inakuyileja chalala nami: Kwadiña ambanda amavulu anfwila muIsarela mumafuku aElija helili iwulu adenzeli hadi yaaka yisatu natukweji 6 nawa mwaholokeli nzala yakapwelendendi munodu ituña dejima. 26 Hela chochu, Elija hiyamutemesheli kuya kudi awa ambandaku, ilaña amutemesheli kuya hohu kudi mumbanda nfwila muZarefwati mwituña daSidoni. 27 Cheñi, muIsarela mwadiña akwambumba amavulu mumafuku akaprofwetu Elisha; ilaña hakachi kawu hosi niwumu atookesheliwuku,* chiña Nayamani hohu wakuSiriya.” 28 Antu ejima adiña musinagogi chatiyiliwu iyi nsañu, ahilili nankashi, 29 dichi anyamukili nakumutwala hanji yamusumba swayi-swayi nawa amutwalili kumukumu wampidi* kwatuñililiwu musumba wawu kulonda amukunwiniku.* 30 Ilaña yena wahitili hakachi kawu nakudiyila kwindi.
31 Kuhiñahu, wakunkumukilili kuKaperinamu, musumba wamuÑaliliya. Nawa watañishileña antu haSabata, 32 dichi ahayamini chikupu nantañishilu yindi, muloña wahosheleña nawuswa. 33 Musinagogi mwadiña muntu wadiña nandemoni nawa wabidikili nezu datiyakana nindi: 34 “Aha-a! Muloñadi chiwunakutukabishila eyi Yesu wakuNazareta? Wunenzi nakutujilumuna tahindi? Nakwiluka chiwahi, yeyi Wajila Wambala waNzambi.” 35 Ilaña Yesu wamuzuwilili owu ndemoni nindi: “Mwena, fumaku mudi owu muntu.” Dichi owu ndemoni chamudimbwishiliyi owu iyala mukachi kawu, wafuminimu mudi owu iyala chakadi kumukatisha. 36 Hohenohu antu ejima ahayamini nankashi nawa atachikili kuhanjeka mulwawu nawu: “Indi iyi hinhoshelu yamuchidinyi? Muloña walejaña andemoni nawuswa niñovu nawa afumaña!” 37 Dichi mpuhu yindi yatiyakeneña mumaluña amukamwihi ejima.
38 Chafuminiyi musinagogi, weñilili mwitala daShimona. Muku waShimona wamumbanda wakatili mashika asweja nankashi, antu amulejeli Yesu nawu yamukwashi. 39 Dichi wemeni kwadiña owu mumbanda nakuzuwila mashika nawa amumanini. Hohenohu wahindukili nakutachika kuyiloñeshela yakuda.
40 Itena* chidayileña nakuhuma, antu ejima adiña nawantu akata yikatu yeñi-nayeñi ayileteli kudi yena. Wayinañikili makasa nakuyuuka wejima wawu. 41 Andemoni niwena afumini mudi antu amavulu nakubidika nawu: “Eyi wudi Mwana kaNzambi.” Ilaña chayizuwililiyi, hayitejeli kuhoshaku, muloña amwilukili nawu hiKristu.
42 Hela chochu, chikwelili mwaana, wayili kwakankawindi. Ilaña mazaza awantu atachikili kumukeñakeña nawa enjili kwadiñayi, amukaanishileña nawu bayi yayishiyaku. 43 Ilaña yena wayilejeli nindi: “Natela cheñi kushimwina nsañu yayiwahi yaWanta waNzambi kunyisumba yikwawu, muloña ichi dichantemesheleliwu.” 44 Dichi watwalekelihu nakushimwina mumasinagogi amuYudeya.