Maku
11 Dichi chelili hiyakushika kwakwihi naYerusalema, kuBetefwaji niBetani haMpidi yaMaolivi, watemesheli atumbanji twindi ayedi, 2 wayilejeli nindi: “Yenu mumukala wudi hambidi, chimweñilamu, mukuwana mwana kachimbulu wakukasa iyabula kwendelahu dehi kudi muntu kushika nikulelu. Mumukasununi, mumuleti kunu. 3 Nawa neyi kudi muntu wukuyihula nindi, ‘Munakwiladi?’ mumuleji nenu, ‘Mwanta diyi wunakumukeña nawa wukumufuntisha katataka.’” 4 Dichi ayili nawa awanini mwana kachimbulu anamukasili hambidi yachiisu chetala dadiña kwakwihi nanjila nawa amukasunwini. 5 Ilaña antu amu emeni kwenoku ayihwili nawu: “Munakumukasunwinadi mwana kachimbulu?” 6 Wena ayilejeli awa antu neyi mwomwayilejeliyi Yesu nawa ayitejeli nawu ayi.
7 Kuhiñahu, aleteli mwana kachimbulu kudi Yesu, ashilihu yakuvwala yawu yahewulu nawa yena washakaminihu. 8 Cheñi, antu amavulu alili yakuvwala yawu yahewulu mumukwakwa, ilaña amakwawu akotweli nyitayi yamafu kunsa yamukwakwa. 9 Nawa antu atwamininiku niadiña nakulondela hanyima abidikileña nawu: “Tunakukulomba netu mwamwini! Wakiswilewa yowu muntu wenjilaña mwijina daYehova! 10 Wakiswilewa wowu Wanta wunakwinza watata yetu Davidi! Eyi wekala mwiwulu, tunakukulomba netu mwamwini!” 11 Kuhiñahu, weñilili muYerusalema nakuya mutembeli nawa watalili yuma yejima, ilaña chelili mpinji yamanini, wedikili nakuya kuBetani hamu nawapostolu 12.
12 Chafumineñawu muBetani hefuku dalondelelihu, watiyili nzala. 13 Chadiñayi hahalehi chanti, wamweni mutondu wachikuyu wadiña namafu, wayili kunowu mutondu nindi yamoni neyi wukuwanaku nyikabu. Ilaña chashikiliyi kunowu mutondu, hawaniniku nyikabuku, kwadiña hohu mafu, muloña hichadiña chilaaka chanyikuyuku. 14 Dichi walejeli owu mutondu nindi: “Bayi muntu yakadaku cheñi nyikabu kudi eyiku.” Nawa atumbanji twindi atiyileña chahosheleñayi.
15 Kuhiñahu, ashikili kuYerusalema. Kwenoku weñilili mutembeli, watachikili kuhañamu antu alandishileña nikulanda yuma mutembeli, wahinwini nijimesa jawakwakuhimpa mali niyitwamu yawantu alandishileña tupompa,* 16 nawa hetejeli muntu kusenda chuma nakuhita nachu mutembeliku. 17 Watañishileña nikuyileja nindi: “Komana hichasonekewa nawu, ‘Itala dami akaditena nawu itala dakulombelamu kudi antu akunyuza yejimaku,’ tahindi? Ilaña enu munadibalumuni kwikala iyeñu dawatupondu.” 18 Dichi akulumpi jawatupristu niansoneki chatiyiliwu chumichi, atachikili kukeñakeña njila yakumujahilamu; muloña amutiyileña woma chelili izaza dawantu dejima dahayamini nanochu chatañishileñayi.
19 Chikwelili melela, afuminimu mumusumba. 20 Chahitileñawu nabudidi, amweni mutondu wachikuyu wunomi dehi kufuma kunyiji. 21 Petulu chanukiliyi iwu mutondu, wamulejeli Yesu nindi: “Rabi, talaña! mutondu wachikuyu iwashiñili wunomi.” 22 Yesu wayilili nindi: “Mukuhwelelenu Nzambi. 23 Inakuyileja chalala nami, muntu wejima wukuleja iyi mpidi nindi, ‘Fumaku aha wudinatili mukaluñalwiji,’ nawa yabula kujinoka mumuchima windi ilaña yakuhwelela nindi chuma chinahoshiyi chikumwekana, chalala chikumwekana. 24 Dichinayilejelaña nami, yuma yejima yimwalombaña, kuhwelelenu nenu munayitambwili dehi nawa mukekala nayu. 25 Nawa neyi mwimana nakulomba, anakenenuña akwenu nshidi jawu kulonda Tata yenu wekala mwiwulu niyena yayanakeneña nshidi jenu.” 26 ——
27 Kuhiñahu, enjili cheñi muYerusalema. Chendeleñayi mutembeli, akulumpi jawatupristu, ansoneki niakulumpi enjili 28 kudi yena nakumwihula nawu: “Yuma yejimiyi wayikoñaña nawuswa wanyi? Hela hinyi wakwinkeli iwu wuswa wakukoña yumiyi?” 29 Yesu wayakwili nindi: “Niyihuliku lwihu. Neyi muñakuli, ninami nukuyileja kunafumishaña wuswa wunakoñaña nachu yumiyi. 30 Komana ñovu yaYowanu yakupapatisha, yafumini mwiwulu tahindi kudi antu? Ñakulenu.” 31 Dichi wena atachikili kuhanjeka mulwawu nawu: “Neyi tuhoshi netu, ‘Mwiwulu,’ yena wukutwihula nindi, ‘Hanu dinu, muloñadi chimwabulilili kumukuhwelela?’ 32 Indi kwiji tuhoshi netu, ‘Yafumini kudi antu’?” Atiyili woma kuhosha mwenimu muloña antu ejima elukili chikupu nawu Yowanu wadiña kaprofwetu. 33 Dichi amwakwili Yesu nawu: “Tuneluki wanyi.” Yesu niyena wayilejeli nindi: “Ninami nawa nukuyileja wanyi kunafumishaña wuswa wunakoñaña nachu yumiyi.”