Luka
19 Kuhiñahu, weñilili muYeriku nawa wadiña hohu nakuhitamu. 2 Mwenomu mwadiña iyala wejina daZakewu; wadiña mukulumpi wawakwakutambula nyisonku nawa wadiña waheta. 3 Yeniwu iyala wafwilileña kumumona Yesu, ilaña hatwesheli kumumonaku, muloña wezaza dawantu, nawa chelili wadiña wamwihi. 4 Dichi wayili lufuchi kumbidi nakukandama kumutondu wachikuyu* kulonda yamumoni, muloña wadiña kwakwihi nakuhita munoyu njila. 5 Yesu chashikiliyi hanodu iluña, watalili kwiwulu nakumuleja nindi: “Zakewu, sulukaku swayi-swayi, muloña ifuku dalelu natela kushakama mwitala deyi.” 6 Chatiyiliyi mwenimu, wasulukili swayi-swayi nawa watiyili kuwaha kumutambwila Yesu kwikala mwenyi windi. 7 Antu chamweniwu chumichi, wejima wawu atachikili kumuhosha chatama nawu: “Nayi nakwikala mwenyi mwitala damuntu mukwanshidi.” 8 Ilaña Zakewu wemeni nakumuleja Mwanta nindi: “Mwanta, talaña! Chibalu chayuma yami, inakwinka atuzweñi, nawa yuma yejima yinatambwili kudi muntu wejima munjila yawupwapoki, nukumushilahu yikwawu yiwana.” 9 Yesu chatiyiliyi awa mazu, wamulejeli nindi: “Dalelu wamwinu wunenzi mudinu itala, chineli niyena himwana kaAbarahama. 10 Muloña Mwana kamuntu wenjili nakukeñakeña antu ajimbeli kulonda yayamwini.”
11 Chadiña nakutiyililawu kuyumiyi, wayilejeli chakutalilahu chikwawu, muloña wadiña kwakwihi naYerusalema nawa atoñojokeleña nawu Wanta waNzambi wukumwekana hohenohu. 12 Dichi Yesu wahosheli nindi: “Muntu wumu wamuchisaka chawanta wayili kwituña dakwakulehi nakutambula ñovu jawanta nakufunta cheñi. 13 Owu muntu chatambikiliyi anduñu jindi 10, wayinkeli mamina* 10 nakuyileja nindi, ‘Yizatishenuña mumudimu wakulanda nakulandulula sampu nichinakenza.’ 14 Ilaña antu jindi amuheleli nawa atemesheli izanvu dawañimeni kudi yena nakumuleja nawu, ‘Hitunakukeña iwu muntu kwikala mwanta wetuku.’
15 “Chafuntiliyi iku natambuli dehi ñovu jawanta,* watambikili anduñu owu enkeliyi mali kulonda yamoni mali* iyawanininihu mumudimu wawu wakulanda nakulandulula. 16 Dichi, watachi wenjili nakuhosha nindi, ‘Mwanta, hamina yeyi yimu, nawaninihu mamina amakwawu 10.’ 17 Yena wamulejeli nindi, ‘Wuzataña, eyi nduñu wamuwahi! Chineli wunamwekeshi kashinshi muyuma yantesha, ikalaku nawuswa hanyisumba 10.’ 18 Kuhiñahu, wamuchiyedi niyena wenjili nakuhosha nindi, ‘Mwanta, hamina yeyi yimu, nawaninihu mamina amakwawu atanu.’ 19 Mwanta wamulejeli iwu nduñu niyena nindi, ‘Nineyi ikalaku nawuswa hanyisumba yitanu.’ 20 Ilaña nduñu mukwawu nawa wenjili nakuhosha nindi, ‘Mwanta, tambulaku mina yeyi iyi yinaswekeli mwihina. 21 Tiyaña, nakutiyili woma, muloña wudi muntu wakala; wasendaña mali iwabulili kusha mubanki,* nawa wamunaña yiwabulili kukuwa.’ 22 Mwanta wamulejeli nindi, ‘Nakusompeshi namazu eyi iwunahoshi, eyi nduñu watama. Komana welukili neyi ami nidi muntu wakala, nasendaña mali inabulili kusha mubanki* nawa namunaña yinabulili kukuwa? 23 Hanu dinu muloñadi chiwabulilili kusha mali* ami mubanki?* Kulonda chinadi kwinza nadi kutambwilahu mali amakwawu.’
24 “Hamuloña wachumichi, walejeli antu emeni kwakwihi nindi, ‘Mutambulenu mina mwinki owu wukweti mamina 10.’ 25 Ilaña owu antu amulejeli nawu, ‘Mwanta, iwu muntu wudi dehi namamina 10!’—26 ‘Inakuyileja nami, muntu wejima wukweti, akamwinkelahu jikwawu, ilaña muntu wunabuli, nichikwetiyi akamutambula. 27 Cheñi nawa, letenu owu ayilumbu jami abulili kukeña ami kwikala mwanta wawu kulonda muyijahili hamesu ami.’”
28 Chamanishiliyi kuhosha yumiyi, watwalekelihu kukanduka nakuya kuYerusalema. 29 Nawa chashikiliyi kwakwihi naBetefwaji niBetani hampidi yatenañawu nawu Mpidi yaMaolivi, watemesheli atumbanji ayedi, 30 nakuyileja nindi: “Yenu mumukala wudi hambidi, chimweñilamu, mukuwana mwana kachimbulu wakukasa iyabula kwendelahu dehi kudi muntu. Mumukasununi, mumuleti kunu. 31 Neyi kudi muntu wukuyihula nindi, ‘Munakumukasunwinadi?’ mumuleji nenu, ‘Mwanta diyi wunakumukeña.’” 32 Owu antu atemesheliyi, ayili nawa awanini mwana kachimbulu kwesekeja nachayilejeliyi. 33 Dichi chakasunwineñawu mwana kachimbulu, eni chimbulu ayihwili nawu: “Munakumukasunwinadi mwana kachimbulu?” 34 Wena ahosheli nawu: “Mwanta diyi wunakumukeña.” 35 Kuhiñahu, aleteli mwana kachimbulu kudi Yesu, ashili yakuvwala yawu yahewulu hamwana kachimbulu nawa Yesu washakaminihu.
36 Chayileñayi, antu alileña yakuvwala yawu yahewulu mumukwakwa. 37 Chashikiliyi kwakwihi namukwakwa wakunkumuka kufuma kuMpidi yaMaolivi, izaza dawatumbanji dejima datachikili kuzañalala nikumuhameka Nzambi nezu datiyakana muloña wanyidimu yejima yañovu yamweniwu, 38 nawu: “Wakiswilewa yowu Mwanta wenjilaña mwijina daYehova! Mwiwulu mwiikali kuwunda nawa kulema kwiikali kudi eyi wekala mwiwulu!” 39 Hela chochu, aFwarisi amu adiña hezaza dawantu amulejeli nawu: “Ntañishi, yizuwili atumbanji tweyi.” 40 Ilaña yena wayilili nindi: “Inakuyileja nami, neyi chakwila awa akumwenahu, malola akubidika.”
41 Chashikiliyi kwakwihi, wamweni musumba nawa wawudililili, 42 nindi: “Kachi eyi weluka hefuku dalelu yuma yinateli kuleta kuwunda, ilaña dinu anayijindi kumesu eyi. 43 Muloña mafuku akenza hadi eyi hakatuñawu ayilumbu jeyi mpwembu yanyitondu yasoñoloka nakukunyeñumuka nikukulukuka* kumbadi jejima. 44 Akakunata heseki hamu nawanyaneyi adi mudi eyi, nawa hiyakashiya ilola nidimu hewulu delola dikwawu mudi eyiku, muloña hiwelukili mpinji yakukuhempulaku.”
45 Kuhiñahu, weñilili mutembeli, watachikili kuhañamu antu alandishilaña, 46 nakuyileja nindi: “Chasonekewa nawu, ‘Itala dami dakekala itala dakulombelamu,’ ilaña enu munadibalumuni kwikala iyeñu dawatupondu.”
47 Watwalekelihu nakutañisha mutembeli hefuku-hefuku. Dichi akulumpi jawatupristu niansoneki nianlomboli jawantu akeñeleña kumujaha; 48 ilaña, hiyawaninihu njila yakumujahilamuku, muloña antu ejima atwalekelihu nakuhwila kulonda atiyilileña kudi yena.