Matewu
11 Yesu chamanishiliyi kuleja atumbanji twindi 12 nshimbi, wafumini kwenoku nakuya nakutañisha nikushimwina munyisumba yikwawu.
2 Ilaña Yowanu henohu wudi mukaleya, watiyili nyidimu yakalakeleñayi Kristu, dichi atumbanji twindi wayitemesheli 3 kulonda amwihuli Yesu nawu: “Komana Yeyi itwatalilaña nawu wunakwinza tahindi kudi wacheñi?” 4 Yesu wayakwili nindi: “Funtenu kudi Yowanu mwakamuleji yuma yimunakutiya nikumona nenu: 5 Amputamesu anakumona, akwakubalakata anakwenda, akwambumba anakuyitookesha, ajika matu anakutiya, afu anakuyisañula nawa atuzweñi anakuyishimwina nsañu yayiwahi. 6 Wudi namuzañalu yowu muntu wabulaña kuwana chuma chakumuhukesha mudi ami.”
7 Chelili awa hiyakuya, Yesu watachikili kuleja mazaza awantu hansañu yaYowanu nindi: “Chumanyi chimwayili nakutala mumasaña? Iteti dalelukileña nampepela tahindi? 8 Chumanyi dinu chimwayili nakutala? Muntu wavwalili yakuvwala yayiwahi tahindi? Muloña antu avwalaña yakuvwala yayiwahi ekalaña mumatala awanyanta. 9 Hanu dinu, mwayililidi? Nakutala kaprofwetu tahindi? Inakuyileja nami, Yowanu hikaprofwetu, ilaña yena walema kubadika nikaprofwetu. 10 Iwu diyi ona asonekawu hadi yena nawu: ‘Tiyaña! Ami nukutemeshañahu dehi ntemesha yami kuwunakuya,* wakakuloñeshelañahu dehi njila yeyi!’ 11 Inakuyileja chalala nami, hadi antu avwalika kudi ambanda, kanda kwikaleñahu dehi muntu wamubadika Yowanu Mupapatishiku, ilaña muntu wakehelamu muWanta wamwiwulu wamubadika yena. 12 Kufuma tuhu mumafuku aYowanu Mupapatishi nakushika nikulelu, antu afwilaña Wanta wamwiwulu nawa antu awufwilaña awuwanaña. 13 Muloña yuma yejima, Nshimbi nimazu awaTuprofwetu, ayiprofweteli kushika nimpinji yaYowanu; 14 nawa neyi munakeñi kuchiteja, diyi ‘Elija wakenza.’ 15 Dichi muntu wukweti matu, yatiyi.
16 “Indi idi ikiñu nukudesekeja kudanyi? Didi neyi anyana anyanya anashakami hayisankanu anakubidika akwawu, 17 nawu: ‘Twayimbila mapeleli, ilaña enu mwahañana wanyi; twakaloka nyitetu, ilaña enu mwadishona wanyi.’ 18 Chochimu, Yowanu chenjiliyi, hadiileña hela kunwaku, ilaña antu ahoshaña nawu, ‘Wudi nandemoni.’ 19 Mwana kamuntu chenzayi wadaña nikunwa, ilaña antu ahoshaña nawu, ‘Talenu! Muntu wafwa hakuda nawa wanwaña vinyu, ibwambu dawakwakutambula nyisonku niakwanshidi.’ Hela chochu, yuma yaloña yelañayi muntu, diyamwekeshaña nawu wukweti maana.”
20 Dichi watachikili kusawula nyisumba mwakoñeleliyi nyidimu yindi yañovu, muloña antu hiyabalumukili munyichimaku, nindi: 21 “Oyihuñu yiwakamona eyi Korazini! Oyihuñu yiwakamona eyi Betesayida! muloña neyi nyidimu yañovu yakoñeleliwu mudi enu ayikoñeleli muTira nimuSidoni, mutenowu adi kubalumuka munyichima yawu nakuvwala yisasa nikushakama mumawuti. 22 Ilaña inakuyileja nami, Hefuku daKusompesha, musumba waTira niwaSidoni akawutiyila luwi nankashi kubadika enu. 23 Nawa eyi Kaperinamu, komana amba kakutuumbakesha nakushika mwiwulu tahindi? Wakakunkumukila Mwijamu;* muloña neyi nyidimu yañovu yakoñeleliwu mudi eyi ayikoñeleli muSodoma, mutenowu wadi kwikalaku nikwifuku dalelu. 24 Ilaña inakuyileja nami, Hefuku daKusompesha, ituña daSodoma akaditiyila luwi nankashi kubadika enu.”
25 Hanoyu mpinji Yesu wahosheli nindi: “Tata, Mwanta wewulu niiseki, nakuhameki hamesu awantu, muloña akwamaana niantu adiza wayijinda yumiyi nakuyisolola kudi anyana anyanya. 26 Mwamweni Tata, muloña ichi dichuma chiwatiyili kuwaha. 27 Tata yami wanyinka yuma yejima nawa kwosi muntu wamwiluka Mwana chikupuku, chiña Tata; nawa kwosi muntu wamwiluka Tata chikupuku, chiña Mwana, nimuntu wejima anakeñiyi Mwana nindi yamwiluki Tata. 28 Twayenu kudi ami, enu ejima munakukabakana nawa munasendi yiteli yalema, nukuyihizumwisha. 29 Sendenu mpaanda yami nawa dizilenu kudi ami, muloña ami nadikehesha nikudizoza mumuchima nawa mukuhizumuka. 30 Muloña mpaanda yami yaswayi kusenda nawa chiteli chami chapepela.”