“Ditwikenu Mpanda Yami”
1 Mukanu kaayi munenzali kukala nikwakamena, tukweti muzañalu walala hakwiteja mutambi waYesu wakuwana kunooka kwenkañayi antu ekala mumpanda yindi. (Mat. 11:29, 30) Kwiteja mpanda yakwikala kambanji hikwabombelamu kuzata mudimu wakala hohuku, ilaña kwabombelamu kuzata mudimu waletaña cheñi muzañalu. Wabombelamu kushimwina nsañu yayiwahi yaWanta nikukwasha amakwawu kuwana kunooka kutukweti mumpanda yaYesu yaswayi.—Mat. 24:14; 28:19, 20.
2 Kuwana Kunooka muMudimu waKushimwina: Yesu hayilejeli atumbanji twindi kusenda yisenda yawu kubombela hachisenda chadi kuyinkayuku. Wayilejeli kuhimpa yisenda yawu yalema nachisenda chindi chapepela. Kwakama nimakabi adi mukanu kaayi hiyatwizeyeshaku; nawa hitwakalakelaña maheta abulaña kushakamaku. (Luka 21:34; 1 Tim. 6:17) Hela chakwila twadikitaña nyidimu kulonda tuwani yuma yitwakeñaña muchihandilu chetu, ilaña twalemesha chikupu kudifukula kudi Nzambi muwumi wetu. (Mat. 6:33) Neyi tutwalekahu kushinshika yuma yabadika kuwaha, tukuwanaña kunooka mumudimu wakushimwina mpinji yejima nawa hiwukwikala chisendaku.—Fwi. 1:10.
3 Kwesekeja nachatuleñawu, twatiyaña kuwaha kuhosha yuma yayiwahi yekala kumuchima wetu. (Luka 6:45) AkwaKristu ejima amwakamenaña Yehova chikupu ninkisu yaWanta yakanayi. Dichi, kuhosha ‘nsañu yayiwahi yayuma yayiwahi’ kwatuzañaleshaña nawa kwatuleñelaña kuleka kwakamena yuma yamuwumi hampinji yitunakushimwina. (Rom. 10:15) Hela chochu, chitwasweja kuzata chuma, dihu hitukusweja kuchilukisha nawa tukudiluñisha chikupu. Kafwampi kuzata mpinji yeneni mumudimu wakushimwina, neyi tunatweshi, kukatuleñela kwikala namuzañalu chikupu. Nawa chatuzañaleshaña neyi antu atiyilila nsañu yitwashimwinaña. (Yil. 15:3) Chili tuwana antu adiwulaña nsañu yitwashimwinaña hela ikañesha, mudimu wakushimwina watukoleshaña lwakuspiritu neyi twanuka netu mudimu wetu wamuzañaleshaña Yehova nawa netu nkisu yindi diyi yaleteshaña kusoña nyikabu yayiwahi.—Yil. 5:41; 1 Kor. 3:9.
4 Kuhitila mukwiteja mutambi waYesu, twadiluñishaña kukooleka kwakukalakela hamu nindi neyi aYinsahu jaYehova. (Isa. 43:10; Chim. 1:5) Kwosi chuma chasweja kuwaha kubadika mutambi waYesuku.