‘Nyakalenu Kwila Nyidimu Yayiwahi Yejima’
1 Hampinji yatachikiliyi Yesu mudimu wawuha wakushimwina, wadiña nampinji yakuleja atumbanji twindi mwakuzatila. (Mat. 10:5-14) Hela chakwila wejima wetu tukweti nyidimu, kwikala nampinji yakuloñesha henohu kanda tuyi mumudimu wakwitala nikwitala chikutukwasha kuzata chachiwahi.—2 Kor. 9:6.
2 Chakuloñesha: Hakwila nawu tuloñeshi chachiwahi chiña tusambila kwiluka nsañu yidi munyikanda yitunakukeña kuhana. Twatela cheñi kutoñojoka hadi antu ekala mwiluña detu dakushimwinamu. Kukalanyi kunakwakamenawu? Ntañishilwinyi yamunsakililu yakuhwelelawu? Tunateli kutala jinjila mwakuhanina nyikanda jekala muMudimu Wetu waWanta nimumukanda waUkupelulula Ukufuma Mu Malembo.
3 Kutiyililaña nakanañachima yimwenu yahoshañawu haKupompa kwaMudimu kunateli cheñi kutukwasha. Neyi twilukisha kuzatisha njila yakushimwinamu, hitukumanishaña mpinji yeneni nakuloñeshaku. Hela chochu, henohu kanda tuyi nakushimwina, neyi tutoñojoka hansañu yitunakuya nakuhosha nikuwahisha njila yakushimwinamu tukushimwinaña chachiwahi. Twatela cheñi kutala mwipakumuna detu damumudimu wakushimwina neyi mudi nyikanda yejima yitukukeña kuzatisha.
4 Chumanyi chikutukwasha kwanuka njila yakushimwinamu? Kuhoshela hewulu nsañu yitukushimwina kukutukwasha kwanuka njila yakushimwinamu. Amakwawu atiyaña kuwaha kuhitulukamu hampinji yakudiza kwachisaka. Amakwawu chayikwashaña kwanuka neyi asoneka hachipapilu mazu antesha akuhoshawu nakutalahu henohu kanda ashiki hetala dinakuya nakushimwinawu.
5 Chichawahila Kuloñesha: Kuloñesha chiwahi kwaleñelaña kushimwina chachiwahi nikwikala namuzañalu mumudimu wakushimwina. Kwatukwashaña kuwundisha muchima nikubula woma hakushimwina kwitala. Kwila mwenimu kukutuleñela kumusha kashinshi chikupu mwiniitala kubadika kutoñojoka hohu hansañu yitunakukeña kuhosha. Kubombelahu, kwiluka nsañu yidi munyikanda kukutukwasha kuhosha neyena chikupu hampinji yitunakuhana mukanda.
6 Nyikanda yatukoleshaña ‘kunyakala kwila nyidimu yayiwahi yejima.’ (Tit. 3:1) Kwosi mudimu wawuwahi wabadika mudimu wakushimwina nsañu yayiwahuku. Kuhitila mukuloñesha chachiwahi twalemeshaña mwiniitala wuneteji kutiyilila nsañu yitunakushimwina, niYehova, Nzambi wutwemenañaku.—Isa. 43:10.