Hanenu Magazini Ashimunaña Nsañu Yalala
1. Mudimwinyi wazataña Kaposhi Kakutalila niAwake!?
1 Kaposhi Kakutalila Kanakubidika Wanta waYehova nimagazini, yaAwake! diyi yitwa yamaneni yitwazatishaña mumudimu wakushimwina Wanta nikwilisha atumbanji. (Mat. 24:14; 28:19, 20) Mpinji yejima twazañalalaña hakuhana awa magazini ayedi hampinji yitwakalakalaña munjila jashiyashana jamudimu waWanta.
2. Kuhimpikanyi kudi muKaposhi Kakutalila niAwake!, nawa muloñadi?
2 Hadi yaaka yayivulu yinahituhu tunamoni kuhimpika kudi hakuvula kwamagazini nikwanyitu yansañu yidi mumagazini nijinjila jitwazatishaña hakuyihana. Iku kuhimpika kunekaliluku kulonda magazini yiletesheña nankashi ikoku nikusoña nyikabu yayiwahi, kulonda nsañu yaWanta yishikeña hanyichima ‘yawantu ejima akahandi nawa eluki nsañu yalala chikupu.’—1 Tim. 2:4.
3. Indi magazini akuyizatishaña ñahi mumudimu wakushimwina?
3 Kufuma tuhu muJanuary 2006 tunenjilili kuzatisha njila jamboka-mboka hakuhana magazini yaAwake! yenzaña kamu hakakweji. Ichi tukuzatishaña jinjila jashiyashana hakuhana magazini yimu hohu hakachi kamagazini ayedi akwidikaña hakakweji aKaposhi Kakutalila Kanakubidika Wanta waYehova mumudimu wetu wakushimwina. Yakutalilahu yamwakuhanina magazini yekalaña hefu dakukumishaku daMudimu Wetu waWanta. Kakavulu yakutalilahu yeniyi yalumbululaña yibaba yakutachikilahu yidi mumagazini, mpinji jikwawu yekalaña nimuyibaba yikwawu yakeñawu antu. Jinjila jasonekawu jinateli kuzatika chiwahi neyi twiluka nsañu yidi muchibaba chidi nachakutalilahu chamwakuhanina magazini nikuyihosha mumazu etu kwesekeja nachidi iluña detu mutwashimwinaña.
4. Muloñadi chichalemena kuzatisha njila jikwawu mwakuhanina magazini kubadika jasonekañawu muMudimu Wetu waWanta?
4 Hela chakwila Mudimu Wetu waWanta mwekala jinjila jiyedi mumagazini yidi yejima, mwatela kuzatisha njila jikwawu. Muloña wakwilila mwenimu wudi wakwila nawu chibaba chimu hayibaba yikwawu, chinateli kuzatika chikupu mwiluña denu dimwashimwinañamu. Hadaha munatoñojoki nenu munateli kuloñesha mwakuhanina magazini chachiwahi kuhitila mukuzatisha chibaba chimunakeñi chikupu.
5. Chumanyi chimwatela kwila henohu kanda muloñeshi mwakuhanina magazini?
5 Chakuloñesha Mwakuhanina Magazini Yenu: Chatachi, mwatela kwiluka chikupu chibaba chimunakukeña kuhoshahu. Hamwaha, mpinji yejima himunateli kwiluka chibaba chidi chejima chidi mumagazini henohu kanda mutachiki kuchizatisha mumudimu wamwihaku. Hela chochu, mwatela kumwekesha muzañalu nikashinshi kutalisha kuchibaba chimunakukeña kuzatisha. Munateli kwila mwenimu neyi muneluki nsañu yimunakukeña kuhosha.
6. Twatela kuloñesha ñahi mwakuhanina magazini?
6 Chamuchiyedi, ilukenu mwakuhoshela hampinji yimukutachika kuhosha. Munateli kutachika kuhanjeka nalwihu lwaluwahi lunatweshi kusañumuna muntu nawa lunesakani nachibaba. Mpinji yejima shindamenenu hañovu Yezu daNzambi kulonda kushika hamuchima. (Heb. 4:12) Tondenu nsona yinesakani nansañu yimukuhosha, sweje-e nsona yinatenuwu hela yinasombololuwu muchibaba chimukuhanjekahu. Mwatela kwiluka chakwesekeja nsona nachibaba.
7. Tunateli kwilukilaku ñahi mwakuhanina magazini?
7 Mpinji Yidi Yejima Yitunakoolekeli: Hakwiluka chakuhana magazini chachiwahi, chiña tuhitulukañamu. Mwatela kuzataña nachipompelu mumudimu wakuhana magazini Hamposu. Hanenu magazini kudi antu etejeli nyikanda yikwawu kumpinji yakunyima. Mpinji yejima hanenu magazini kudi atudizi enu aBayibolu nikudi antu amakwawu anateli kwikalahu hampinji yimunakufuntilaku. Munateli kuhana magazini kudi antu yimwahoshaña nawu hampinji yimwayaña nakulanda yuma, yimudi halwendu, hela hampinji yimunakuhembelela kudimona nandotolu mukasanji kindi. Mwatela kwilukilaku chakuhana magazini hampinji yimukuhanaña kakweji kejima.
8. Indi Kaposhi Kakutalila niAwake! yahoshaña yuma yoyimu munjila?
8 Kaposhi Kakutalila nimagazini yaAwake yahoshaña yuma yoyimu. Atumbakeshaña Yehova hamu neyi Mwanta waleñeli yuma yejima. (Yil. 4:24) Akundejaña antu nansañu yayiwahi yaWanta waNzambi nikuyikolesha kulonda kukuhwelela mudi Yesu Kristu. (Mat. 24:14; Yil. 10:43) Kubombelahu, ashinshikaña hayuma yamwekanaña mukaayi kulonda kushikija wuprofwetu wamuBayibolu. (Mat. 25:13) Kwashenu antu amwiluña denu kuhetela munawa magazini kuhitila mukuloñesha kulonda kuyihana hampinji yidi yejima yashikila yimunakoolekeli.
9. Tunateli kwala ñahi chikuku chakufuntilaku?
9 Neyi munatweshi kuhana magazini hela kuhanjeka hayuma yakuspiritu namuntu, loñeshenu lwihu hela nsañu yinateli kumusañumuna kulonda kuwana njila yakufuntilaku kulonda kuhanjeka hayuma yikwawu yakuspiritu. Neyi twikala namuzañalu wakukuwa mbutu yachalala, tunateli kukuhwelela netu Yehova wakaleñela nyichima yawantu anakukeñesha kumwiluka kulonda kumukalakela.—1 Kor. 3:6.