Chakuloñesha Mwakuhanina Magazini

1. Muloñadi chichawahila kuloñesha njila yahalwetu yakuhaninamu magazini chatela kuhembela kumutu jinjila jasonekawu mumudimu Wetu waWanta?

¹ Munateli kudihula nenu ‘muloñadi chinatela kuloñeshela mwakuhanina magazini, chineli jinjila mwakuhanina magazini ajisonekaña muMudimu Wetu waWanta wudi wejima?’ Hela chakwila amavulu anachiwani neyi jinjila jamwekeshaña chakuhana magazini jinakuzatika chiwahi, kuloñesha kwahalwetu nikwena kunakukeñeka. Njila yinateli kuzatika kwiluña dimu hiyinateli kuzatika kwiluña dikwawuku. Dichi, hitwatela kutoñojoka netu hakuhana magazini chiña tulondela chikupu jinjila jasonekawu mwakuhanina magazinuku. Hela chakwila tunafuukuluhu kuzatisha jinjila jamwekeshaña chakuhana magazini, chikuwaha kujihosha mumazu etu.

2. Chumanyi chakeñekaña hakusakula chibaba chimwatela kuhoshahu?

² Sakulenu Chibaba: Neyi munakumishi dehi kutaña magazini yejima, sakulenu chibaba chinateli kuzatika mwiluña denu nawa chinayitiyishi kuwaha nankashi. Chikuhwelelu nimuzañalu wumukweti hakuhana ichi chibaba kukukojeja mwiniitala niyena kukeña kuchitaña. Hela neyi mukuhosha hachibaba chikukeñawu antu amavulu mwiluña denu, yibaba yikwawu yidi mumagazini niyena mwatela kuyiluka chikupu. Ichi chikuyikwashaku kuhimpa njila yimunakuzatisha neyi muwana muntu wukukeñesha mutu wansañu wukwawu.

3. Ntachikilu yamuchidinyi mwafumaña yuma yayiwahi yimwazatishaña?

³ Ihulenu Lwihu: Kulondelahu, loñeshenu chiwahi mazu akutachika nachu. Ntachikilu yenu yalema. Chinateli kukwashana neyi mumwihula mwiniitala lwihu kulonda kumusañumuna yakeñi chibaba chimunasakuli kuhoshahu. Malwihu akwiluka yitoñojoka yamuntu kakavulu azatikaña chiwahi. Bayi mwihula chuma chikuletesha mwiniitala yadihombi hela yaleti ntadi muloña wakufwila kuhakwila yitoñojoka yinduku.

4. Kuwahanyi kwekala mukutañila mwiniitala nsona neyi chakwila chinatwesheki?

⁴ Tañenu Nsona: Nkumininaku, sakulenu nsona yakutaña neyi chakwila mwiniitala wudi nampinji, hadaha munateli kusakula nsona yidi muchibaba chimunakuhana. Kutaña nsona kukumukwasha mwiniitala kwiluka nindi nsañu yitunakushimuna yinakufuma Mwiizu daNzambi. (1 Tesa. 2:13) Nsona yatela kumwinka cheñi wunsahu hela chakwila nakaani magazini. Amakwawu asañumunaña mpwila yamwiniitala kuhitila mukutaña nsona henohu kanda ehuli lwihu lwalweni. Munateli kuhosha ñane neyi himukutena nsona, “Nakufwila kwiluka chimwatoñojokaña hansañu yasonekawu muniyi vasi yamuBayibolu.” Kuhiñahu mulejenu muntu chikuma chinesekaniku chidi mumagazini nawa nikuhosha mazu antesha akusañumuna mpwila yindi nankashi henohu kanda mumwinki.

5. Nshimbinyi yalema yimwatela kwiluka yinateli kuyilombola neyi himukuloñesha chakuhana magazini?

⁵ Hikwekala nshimbi yakola kutalisha hamazu akuzatisha hakuhana magazinuku. Kakavulu, chachiwahi kuzatisha jinjila japela nawa jajihi. Zatishenu njila yayipelela nawa mukufuma yuma yayiwahi. Hoshenu hayuma yalema yayiwahi yidi mumagazini, nawa ikalenu neyena. Neyi munadiloñeshi dehi chiwahi, dihu dinu himukutwesha kuhana chiwahi magazini yaUlupungu lwa kwa Kalinda niLoleni! kudi ana “afuukwilawu dehi kumona wumi wahaya nyaka.”—Yil. 13:48.