Luka
10 Hanyima yayumiyi, Mwanta watondeli atumbanji amakwawu 70 nakuyitemesha ayedi-ayedi kuya munyisumba yejima nimumaluña ejima oku kwayileñayi niyena. 2 Kuhiñahu, wayilejeli nindi: “Chalala, mudimu wakwaañula weneni, ilaña akwakukalakala anakehi. Dichi, mulembelelenu Mwini mudimu wakwaañula kulonda yatemeshi akwakukalakala kumudimu windi wakwaañula. 3 Yenu! Tiyenu, inakuyitemesha neyi anyikoku mukachi kawatuñwidi. 4 Bayi musenda chikwama chamali hela ipakumuna dayakuda hela nkwabiluku, cheñi bayi mwimusha muntu niwumu* munjilaku. 5 Mwitala dejima mumukwiñila, sambilenu kuhosha nenu: ‘Mudinu itala mwiikali kuwunda.’ 6 Neyi mudi muntu wakeña kuwunda, kuwunda kwenu kukwikala hadi yena. Ilaña neyi mwosi, kuwunda kwenu kukuyifuntila. 7 Dichi, shakamenu munodu itala, denu nikunwa yuma yikuyiloñeshelawu, muloña mukwakukalakala watelela kumwinka wufwetu windi. Bayi mutuntujokeña kufuma mwitala dimu nakuya mwitala dikwawuku.
8 “Cheñi nawa, neyi mwiñila mumusumba wudi wejima nawa ayitambwila, denu yakuda yinayiloñesheliwu 9 nikuuka akata adimu nakuyileja nenu: ‘Wanta waNzambi wunenzi dehi kwakwihi nanenu.’ 10 Ilaña, neyi mwiñila mumusumba wudi wejima nawa kuyitambwila nehi, yenu munyikwakwa yamaneni yamunowu musumba nakuhosha nenu: 11 ‘Tunayitotomweni nilunkuñu lwalamata kunyendu yetu lwamumusumba wenu. Hela chochu, ilukenu chumichi nenu, Wanta waNzambi wunenzi dehi kwakwihi.’ 12 Inakuyileja nami hanodu ifuku, ituña daSodoma akaditiyila luwi nankashi kubadika owu musumba.
13 “Oyihuñu yiwakamona eyi Korazini! Oyihuñu yiwakamona eyi Betesayida! muloña neyi nyidimu yañovu yinakoñeliwu mudi enu ayikoñeleli muTira nimuSidoni, mutenowu adi kubalumuka munyichima yawu nakuvwala yisasa nikushakama mumawuti. 14 Dichi, hampinji yakusompesha, musumba waTira niwaSidoni akawutiyila luwi nankashi kubadika enu. 15 Nawa eyi Kaperinamu, komana amba kakutuumbakesha nakushika mwiwulu tahindi? Wakakunkumukila Mwijamu!*
16 “Muntu wejima wukuyitiyilila, dikwila nawu nantiyilili ninami nawa. Nimuntu wejima wukuyidiwula, dikwila nawu nandiwuli ninami nawa. Cheñi, muntu wejima wukundiwula, dikwila nawu nadiwuli niNowu wantemesheli.”
17 Dichi, atumbanji 70 afuntili iku anazañalali, nakuhosha nawu: “Mwanta, niandemoni anakutwovwahila muloña wakuzatisha ijina deyi.” 18 Chatiyiliyi chumichi, wayilejeli nindi: “Namumoni dehi Satana naholoki neyi nzaji yinafumi mwiwulu. 19 Tiyenu! Nayinki wuswa wakudata tupela nitunjimbu niñovu yakwimika mushindu ñovu yejima yachilumbu nawa kwosi chuma chikayikatishaku. 20 Hela chochu, bayi muzañalala muloña wakwila andemoni anakuyovwahila enuku, ilaña zañalalenu muloña wakwila majina enu anayisoneki mwiwulu.” 21 Hayoyina ora, spiritu yajila yamuleñeleli kuzañalala nankashi nakuhosha nindi: “Tata, Mwanta wewulu niiseki, nakuhameki hamesu awantu, muloña akwamaana niantu adiza wayijinda chikupu yumiyi nakuyisolola kudi anyana anyanya. Mwamweni Tata, muloña ichi dichuma chiwatiyili kuwaha. 22 Tata yami wanyinka yuma yejima nawa kwosi muntu wamwiluka Mwana, chiña Tata, nawa kwosi muntu wamwiluka Tata, chiña Mwana, nimuntu wejima anakeñiyi Mwana nindi yamwiluki Tata.”
23 Hohenohu, washetumukilili kudi atumbanji nakuyileja kwakankawawu nindi: “Adi namuzañalu wowu mesu amonaña yuma yimunakumona enu. 24 Muloña inakuyileja nami, atuprofwetu amavulu nianyanta afwilileña kumona yuma yimunakumona enu, ilaña hiyayimweniku, cheñi afwilileña kutiya yuma yimunakutiya enu, ilaña hiyayitiyiliku.”
25 Hohenohu, iyala welukili Nshimbi chikupu wanyamukili kulonda yamweseki, wamwihwili nindi: “Ntañishi, chumanyi chinatela kwila hakwila nawu nakekali nawumi wahaya nyaaka?” 26 Yena wamwakwili nindi: “MuNshimbi asonekamu nawudi? Watañañamu neyidi?” 27 Yena wamwakwili nindi: “‘Keñaku Yehova Nzambi yeyi namuchima weyi wejima, nawumi* weyi wejima, nañovu jeyi jejima niyitoñojoka yeyi yejima’ nawa ‘keñaku mukwenu neyi chiwadikeña eyi aweni.’” 28 Yesu wamwakwili nindi: “Wunakuli mwalala; twalekakuhu kwila mwenimu nawa wakekala nawumi.”
29 Ilaña hakufwila kudimwekesha nindi waloña, iwu iyala wamwihwili Yesu nindi: “Indi mukwetu hinyi?” 30 Yesu wamwakwili nindi: “Kwadiña muntu wakunkumukileña kufuma kuYerusalema nakuya kuYeriku nawa amulukukili kudi atupondu, amuvuulili nikumweta, nkumininaku, ayili nawa amushiyili kwakwihi nakufwa. 31 Kukashimuka, muyoyenoyu njila mwadiña kapristu wahitileña, ilaña chamumweniyi iwu iyala, wamutondolweleli. 32 KaLevi niyena welili mwomumu, chashikiliyi hanodu iluña nawa chamumweniyi, wamutondolweleli. 33 Ilaña kaSamariya wumu wahitileña muyoyenoyu njila, chashikiliyi hadiña owu iyala nawa chamumweniyi, wamutiyilili wushona. 34 Dichi waswinini kudi owu iyala nakumukasakasa hayilonda, wahuñunwininihu manji nivinyu. Kuhiñahu, wamukandamishili hakanyama kindi nakumutwala kwitala kwashikenaña enyi nakumuhembelaku. 35 Hefuku dalondelelihu, wanoneli madenari ayedi nakwinka nhembi wetala mwashikenaña enyi, nakumuleja nindi: ‘Wumuhembi chiwahi nawa mali ejima iwukuzatisha akubadika hanawa innakwinki, nakakufuntishilawu neyi nafunti.’ 36 Hadi awa antu asatu, wumu yodihi iwunamoni neyi diyi wadiña mukwawu kudi iwu muntu alukukiliwu kudi atupondu?” 37 Yena wamwakwili nindi: “Ona muntu wamutiyilili luwi.” Kuhiñahu, Yesu wamulejeli nindi: “Yaña nineyi wileña mwomumu.”
38 Dichi chayileñawu, weñilili mumukala wumu. Mwenomu mwadiña mumbanda wejina daMata owu wamutambwilili Yesu kwikala mwenyi mwitala dindi. 39 Iwu mumbanda wadiña namwanyikindi wamumbanda ateneneñawu nawu Mariya washakamini kunyendu yaMwanta nakutiyilila chahosheleñayi.* 40 Ilaña Mata, wakasikili nanyidimu yayivulu. Dichi wenjili kudi yena nakuhosha nindi: “Mwanta, komana hiwunamoni mwanyikami wamumbanda chinanlekeliyi nyidimu kankawamiku? Muleji yenzi yankwashiku.” 41 Mwanta wamulejeli nindi: “Mata, Mata, wunakameni nikuluwankana nayuma yayivulu. 42 Hela chochu, yuma yantesha hohu hela chimu, diyi yinakukeñeka. Hakwila Mariya, yena natondihu chuma chachiwahi* nawa kwosi wakamutambulachuku.”