Luka

9 Kuhiñahu, watambikili apostolu 12 kwinza hamu nawa wayinkeli ñovu niwuswa wakufumisha andemoni nikuuka nyisoñu. 2 Dichi, wayitemesheli kuya nakushimwina Wanta waNzambi nikuuka, 3 nawa wayilejeli nindi: “Bayi musenda chuma nichimu halwenduku, chili mukombu hela ipakumuna dayakuda hela mankendi hela mali;* hela yakuvwala yiyediku*. 4 Ilaña mwitala dejima mumukwiñila, shakamenu mwenomu sampu munafumimu. 5 Nawa kwejima kukubula kuyitambwilawu kudi antu, hakufuma munowu musumba, mutotomoneña lunkuñu kunyendu yenu kulonda kwakayilili wunsahu.” 6 Dichi, ayili kumukala nimukala nakushimwina nsañu yayiwahi nikuuka antu kumaluña ejima.

7 Herodi* nyuuli wankambi watiyili nsañu yejima yamwekeneña nawa wakamini nankashi muloña antu amu ahosheleña nawu Yowanu anamusañuli kufuma mudi afu, 8 ilaña antu amakwawu ahosheleña nawu Elija namwekani cheñi, amakwawu niwena nawu wumu wahadi atuprofwetu akushankulu diyi wunasañuki kufuma mudi afu. 9 Herodi wahosheli nindi: “Yowanu namuketwili dehi mutu. Hanu dinu, hinyi yeniwu wunakukoña yumiyi yinnakutiya?” Dichi wafwilileña nindi yamumoni.

10 Apostolu chafuntiliwu, amulejeli Yesu yuma yejima yakoñeliwu. Hohenohu, wayisendeli nakuya nawu hamu kwakankawawu mumusumba watenañawu nawu Betesayida. 11 Ilaña mazaza awantu chelukiliwu chumichi, amulondeleli. Dichi wayitambwilili chachiwahi nakutachika kuyileja haWanta waNzambi nawa wokili antu ejima akeñeleña nawu ayuuki. 12 Chelili itena* hidikuya nakuhuma, apostolu 12 enjili nakumwila nawu: “Lejaku izaza dawantu diyi munyikala yamukamwihi nimumaluña amukamwihi kulonda awani hakukaama niyakuda, muloña kudinu iluña kutudi hikwashakamaña antuku.” 13 Ilaña yena wayilejeli nindi: “Yowenenu yinkenu yakuda.” Wena amwilili nawu: “Etu tukweti hohu mankendi atanu niinshi jiyedi, kwiji neyi etu tuyi nakulanda yakuda yawantu ejima awa.” 14 Kafwampi, adiña amayala kwakwihi na 5,000. Ilaña walejeli atumbanji twindi nindi: “Yilejenu ashakami mumazanvu, antu 50 mwizanvu dimu.” 15 Dichi elili mwayilejeliwu nawa ashakamishili antu ejima. 16 Chanoneliyi owu mankendi atanu niinshi jiyedi, watalili mwiwulu nawa wajikiswilili. Kuhiñahu, wayihumwini nakuyinka atumbanji kulonda enki izaza dawantu. 17 Dichi wejima wawu adiili nawa ekutili chakwila anoneli yakuda yashalilihu nakuyisha muyimpaya* 12.

18 Chimwahitili mpinji, iku Yesu nakulomba kankawindi, atumbanji enjili kudi yena nawa wayihwili nindi: “Indi mazaza awantu ahoshaña nawu yaminyi?” 19 Wena amwakwili nawu: “Yowanu Mupapatishi, amakwawu ahoshaña nawu Elija, amakwawu niwena ahoshaña nawu wumu wahadi atuprofwetu akushankulu diyi wunasañuki.” 20 Kuhiñahu, yena wayihwili atumbanji nindi: “Indi enu mwahoshaña nenu yaminyi?” Petulu wamwakwili nindi: “Yeyi Kristu waNzambi.” 21 Dichi, wayikonkomweneni chikupu nindi bayi alejaku muntu niwumu chumichiku, 22 ilaña wahosheli nindi: “Mwana kamuntu watela kuhita mumakabi amavulu nakumukaana kudi akulumpi niakulumpi jawatupristu niansoneki nikumujaha nawa hefuku damuchisatu akamusañula.”

23 Kuhiñahu, watwalekelihu nakuyileja wejima wawu nindi: “Neyi muntu nakukeña kunlondela, yadibondi yomweni nakusenda mutondu windi wakuyandishila* hefuku-hefuku nawa yatwalekihu kunlondela. 24 Muloña muntu wejima wunakukeña kwamwina wumi windi, wakawujimbesha, hakwila muntu wejima wukujimbesha wumi windi kukoola ami, wakawamwina. 25 Kuhosha hohu chalala, chumanyi chikuwaninamu muntu neyi yaheta kaayi kejima ilaña yajimbesha wumi windi hela kuwukisañana? 26 Muloña muntu wejima watiyaña nsonyi kwikala kambanji kami nawa wabulaña kukuhwelela mazu ami, Mwana kamuntu niyena hampinji yakenzayi mukulema kwindi nikwaTata yindi nikwawañelu ajila, wakamutiyila nsonyi owu muntu. 27 Ilaña inakuyileja chalala nami, hakachi kanawa antu anemani hanu, hadi amu akabula kufwa sampu asambila kumona Wanta waNzambi.”

28 Chimwahitili mafuku 8 hanyima yakuhosha awa mazu, Yesu wasendeli Petulu, Yowanu niYakoba nakukanduka nawu hampidi kulonda alombi. 29 Chalombeleñayi, mmwekenu yindi yakumesu yahimpikili niyakuvwala yindi yatookeli to-o nikukekema. 30 Hohenohu, amweni amayala ayedi ahanjekeleña nindi; adiña Mosi niElija. 31 Awa amayala amwekeni mukulema nawa atachikili kuhanjeka hakuya kwindi oku kwadi kushikijilayi kuYerusalema. 32 Dichi Petulu ninowu adiñayi nawu anoñokeleña, ilaña tulu chitwayimanini, amweni kulema kwindi niantu ayedi anemani nindi. 33 Nawa awa amayala chambukileñawu nindi, Petulu wamulejeli Yesu nindi: “Ntañishi, kunu kwakuwahi etu kushakama. Dichi tulemenu matenti asatu, dimu deyi, dikwawu daMosi nawa dikwawu daElija.” Petulu helukili yuma yahosheleñayiku. 34 Ilaña chahosheleñayi yumiyi, kwenjili ivu nawa datachikili kuyibuta. Cheñililiwu mwivu, atiyili woma. 35 Kuhiñahu, atiyili izu dafumini munodu ivu nadu: “Iwu diyi Mwanami, inatondi. Mutiyililenu.” 36 Odu izu chidatiyakeneña, Yesu washalili nkawindi. Ilaña wena amweneni kwanzo-o nawa hiyalejelihu muntu niwumu mumafuku wenowu yuma yejima yamweniwuku.

37 Hefuku dalondelelihu, chelili anakunkumuki dehi kufuma hampidi, wadibulakeni nezaza deneni dawantu. 38 Hohenohu, iyala wumu wabidikili nindi: “Ntañishi, nakulembeleli mutali mwanami weyala, muloña diyi mwanami wumu hohu. 39 Tiyaña, ndemoni wamukwataña, dichi hohenohu washikenaña kukaluka nawa ndemoni wamukonyeshaña nikumutupwisha kafulolu kukanwa, neyi namukatishi dehi, hakeñaña kumufuma swayiku. 40 Nayilembelela atumbanji tweyi nami amufumishi, ilaña amukañanya.” 41 Yesu waakwili nindi: “Eyi ikiñu dabula chikuhwelelu nawa datama, nakatwalekahu kushakama naneyi nikudiwula yilwilu yeyi kushika mpinjinyi? Muleti kunu owu mwaneyi.” 42 Ilaña nihampinji yaswinineñayi kwakwihi naYesu, owu ndemoni wamudimbwishili iwu mwana heseki nakumukonyesha chikupu. Hela chochu, Yesu wamuzuwilili ndemoni nawa wamuukili iwu mwana nakumufuntisha kudi tata yindi. 43 Dichi antu ejima ahayamini nankashi hañovu yaNzambi yabadika.

Henohu antu ejima achidi kuhayama hayuma yejima yelileñayi, wayilejeli atumbanji twindi nindi: 44 “Tiyililenu nakanañachima nawa mwanukeña awa mazu, muloña Mwana kamuntu akumuhana mumakasa awantu.” 45 Ilaña wena hiyelukili mwatalishili mazu ahosheleñayiku. Kafwampi, mazu wenawa ayijindiliwu kulonda abuli kuyiluka muyalumbulukila, nawa atiyili woma wakumwihula hanawa mazu.

46 Kuhiñahu, atachikili kuditaadikisha mulwawu kulonda eluki wadiña muneni chikupu hakachi kawu. 47 Yesu chelukiliyi yuma yatoñojokeleñawu munyichima yawu, wanoneli mwana wanyanya, nakumwimika kwakwihi nayena, 48 nawa wayilejeli nindi: “Muntu wejima wukutambwila iwu mwana wanyanya muloña wejina dami dikwila nawu nantambwili ninami nawa; nimuntu wejima wukuntambwila ami, natambwili niWantemesheli. Muloña muntu wukudikehesha hakachi kanenu ejima, diyi muneni.”

49 Yowanu wamwilili nindi: “Ntañishi, twamona muntu wafumishaña andemoni mwijina deyi, tweseka kumukaanisha muloña hatulondelañaku.” 50 Ilaña Yesu wamulejeli nindi: “Bayi mweseka kumukaanishaku, muloña muntu wejima wabulaña kuyimakena wudi kukabadi kenu.”

51 Mafuku indi akuya mwiwulu chiyaswinineña kwakwihi,* wafwilileña chikupu kuya kuYerusalema. 52 Dichi, watemesheli antemesha. Ayili nawa eñilili mumukala wawaSamariya nakumuloñeshela kwakushikena. 53 Ilaña wena hiyamutambwililiku, muloña wafwilileña chikupu kuya kuYerusalema. 54 Atumbanji twindi aYakoba niYowanu chamweniwu chumichi, amwilili nawu: “Mwanta, wunakukeña tutambiki kesi kafumi mwiwulu kulonda kayijilumuni tahindi?” 55 Ilaña yena washetumukili nakuyizuwila. 56 Dichi ayili mumukala wacheñi.

57 Chayileñawu munjila, muntu wumu wamwilili nindi: “Nukukulondela kwejima kuwukuya.” 58 Ilaña Yesu wamulejeli nindi: “Anyumbu ekala namena nawa atuda amuluzwizu ekala nayisakala,* hakwila Mwana kamuntu hakweti nihakushachila mutu windiku.” 59 Kuhiñahu, walejeli muntu mukwawu nindi: “Ikalaku mukwakunlondela.” Owu iyala wahosheli nindi: “Mwanta, ñiteji nisambili kuya nakujiika tata yami.” 60 Ilaña yena wamulejeli nindi: “Lekaku afu ajiiki afu awu aweni, ilaña eyi yaña wakashimwini Wanta waNzambi kwejima.” 61 Muntu mukwawu niyena wahosheli nindi: “Mwanta, nukukulondela, ilaña ñiteji nisambili kuya nakushalisha amwitala dami.” 62 Yesu wamulejeli nindi: “Muntu welaña iku nakwati kupulawu* hakutala cheñi kuyuma yidi kunyima, hatelela Wanta waNzambiku.”