KUDIZA 18
Chakwiluka akaKristu Alala
Antu amavulu aditenaña nawu hiyakaKristu. Ilaña hiyakuhwelela yuma yoyimu hela kulondela nshimbi jojimuku. Hanu dinu, tunateli kuyiluka ñahi akaKristu alala?
1. AkaKristu hiyanyi?
AkaKristu hiyatumbanji hela akakumulondela Yesu Kristu. (Tañenu Yilwilu 11:26.) Amwekeshaña ñahi nawu hiyatumbanji twaYesu? Yesu wahosheli nindi: “Neyi mukutwalekahu kuhemba mazu ami, chalala mudi atumbanji twami.” (Yowanu 8:31) Ichi chinatalishi mukwila nawu akaKristu alala atela kwovwahila ntañishilu yaYesu. Neyi chashindameneneñayi haNsona mpinji yatañishileñayi, akaKristu alala niwena ashindamenaña haBayibolu hakulumbulula yuma yakuhwelelawu.—Tañenu Luka 24:27.
2. AkaKristu alala amwekeshaña ñahi kukeña?
Yesu wayilejeli akakumulondela nindi: “Mukeñañani neyi chinayikeña enu.” (Yowanu 15:12) Yesu wamwekesheli ñahi nindi wayikeñeli atumbanji twindi? Wadiña nampinji yakuhanjeka nawu, kuyikolesha nikuyikwasha. Wahanini niwumi windi kukoola wena. (1 Yowanu 3:16) Munjila yoyimu, akaKristu alala hiyakuminaña dakuhosha hakukeñaku. Amwekeshaña nawu adikeña mumazu nimuyuma yelañawu.
3. Mudimwinyi wazataña akaKristu alala?
Yesu wayinkeli atumbanji twindi mudimu watela kuzatawu. “Wayitemesheli nakushimwina Wanta waNzambi.” (Luka 9:2) AkaKristu akusambila ashimwinineña mumaluña awu akudifukwila, kumaluña kudi antu amavulu nikumatala awantu. (Tañenu Yilwilu 5:42; 17:17.) AkaKristu alala niwena makonu ashimwinaña chalala chamuBayibolu kwejima kwawanikaña antu. Akeña akwawu antu, dichi azatishaña mpinji niñovu yawu kuyileja nsañu yamuBayibolu yakuchiñeja nawa yakukundeja.—Maku 12:31.
SANDUJOLENU CHIKUPU
Talenu chimunateli kwaambula akaKristu alala nawantu abulaña kulondela ntañishilu yaYesu niyuma yelileñayi.
4. Akeñakeñaña chalala chamuBayibolu
AkaKristu akusambila alemesheli Izu daNzambi
Bayi neyi antu ejima aditenaña nawu hiyakaKristu alemesha chalala chamuBayiboluku. Vumishenu VIDIYO, kuhiñahu hanjekenu halwihu lunalondelihu.
Machechi amakwawu aditenaña nawu hiyakaKristu akañanyaña ñahi kutañisha yuma yatañishileñayi Yesu?
Yesu watañishileña chalala chaMwizu daNzambi. Tañenu Yowanu 18:37, kuhiñahu hanjekenu hanilu lwihu:
Kwesekeja nachahosheliyi Yesu, tunateli kwiluka ñahi akaKristu ‘akeña chalala’?
5. Ashimwinaña chalala chamuBayibolu
AkaKristu akusambila alemesheli ashimwinineña antu nawa
Henohu Yesu kanda ayi mwiwulu, wenkeli akakumulondela mudimu wunatwalekihu nimakonu. Tañenu Matewu 28:19, 20 niYilwilu 1:8, kuhiñahu hanjekenu hanilu lwihu:
Mudimu wakushimwina akawuzata kushika hadihi?
6. Elaña yuma yashimwinañawu
Chumanyi chamuletesheli iyala wumu wejina daTom kwiluka chikupu nindi nawani kudifukula kwalala kwawakaKristu? Vumishenu VIDIYO, kuhiñahu hanjekenu hamalwihu analondelihu.
Muniyi vidiyo, chumanyi chayiletesheli aTom aleki kuya kumachechi?
Chumanyi chinayileteshi kwiluka chikupu nawu anawani chalala?
Yuma yitwelaña yamwekeshaña yuma yitwalemesha. Tañenu Matewu 7:21, kuhiñahu hanjekenu hanilu lwihu:
Yumanyi yalema nankashi kudi Yesu, yuma yitwahoshaña netu yitwakuhwelela tahindi yuma yitwamwekeshaña muyuma yitwelaña?
7. Adikeña wumu namukwawu
AkaKristu akusambila alemesheli adikeñeli wumu namukwawu
Komana mwamweni akaKristu ashaña wumi wawu muwubanji kukoola akwawu akaKristu? Vumishenu VIDIYO, kuhiñahu hanjekenu hamalwihu analondelihu.
Muniyi vidiyo, chumanyi chaletesheli Lloyd kusha wumi windi muwubanji kukoola Manakwetu Johansson?
Munakutoñojoka nenu welili neyi chatela kwila mukaKristu walala?
Tañenu Yowanu 13:34, 35, kuhiñahu hanjekenu hanawa malwihu:
Atumbanji twaYesu (akaKristu alala) ayimonaña ñahi antu ekowa dacheñi hela akwituña dacheñi?
Elaña ñahi mwenimu mumpinji yanjita?
AMAKWAWU AHOSHAÑA NAWU: “AkaKristu aneli yuma yatama nankashi yayivulu, hanu anateli kwikala ñahi nakudifukula kwalala?”
Nsonanyi yimunateli kumutañila muntu yinakushimuna chitwatela kwiluka akaKristu alala?
YUMA YIMUNADIZI
AkaKristu alala alondelaña chatañishaña Bayibolu, amwekeshaña kukeña kwalala nawa ashimwinaña chalala chamuBayibolu.
Kuhitulukamu
Yuma yakuhwelelawu akaKristu alala yashindamena hachumanyi?
Chilwilwinyi chakuyilukilaku akaKristu alala?
Mudimwinyi wazataña akaKristu alala?
ILUKILENUHU NSAÑU YIKWAWU
Ilukilenuhu nsañu yikwawu hadi izanvu dawantu dazataña nañovu kulondela yuma yelileñayi Yesu Kristu niyatañishileñayi.
Talenu mumbanda wayileña muKatolika chawaniniyi “chisaka chakeñeli yuma yakuspiritu.”
“Akwileña Malwihu Ami Ejima Kuzatisha Bayibolu!” (Kaposhi Kakutalila, April 1, 2014)
Talenu akaKristu alala chamwekeshañawu kukeña kudi akwawu akakudifukula adi mukukaankila.
Kukwasha Amanakwetu Adi muWubanji Wadimwekenaña—Kachibalu (3:57)
Talenu akaKristu akusambila niakaKristu alala makonu chamwekeshañawu mazu ahosheliyi Yesu akwilukilaku akakumulondela.
“Yumanyi Yakuyilukilaku AkaKristu Alala?” (Kaposhi Kakutalila, March 1, 2012)