Kudiza 13

Wunatweshi Nahi Kuwana Kwitiya Kwalala?

Komana kwitiya kwejima kwamuzan̂aleshan̂a Nzambi, ntahindi kumuhohu? (1)

Mulon̂adi kunekalili kwitiya kwakuvulu kwaditenan̂a kwikala akwa Kristu? (2)

Wunatweshi n̂ahi kuyiluka akwa Kristu alala? (3-7)

1. Yesu watachikili kwitiya kwalala kumu kwawakwa Kristu. Komana mafuku alelu kwatela kwikala hohu izaza dimu dawakwakumulomba Yehova Nzambi alala. (Yowanu 4:23, 24; Aefwesesa 4:4, 5) Bayibolu yatan̂ishan̂a nawu antu antesha hohu diwu adi munjila yanyanya yakuwumi.—Matewu 7:13, 14.

2. Bayibolu yashimwinan̂ahu dehi nawu chamba kafwawu apostolu, ntan̂ishilu yakuluwalala ni yililu yabula kwikala yawakwa Kristu yakenzan̂a chovuchovu muchipompelu chawakwa Kristu. Antu akadikokela akwakwitiya awenawu mwilun̂a daKristu. (Matewu 7:15, 21-23; Yililu 20:29, 30) Owu diwu mulon̂a wutunakumwena kwitiya kwakuvulu kwaditenan̂a kwikala akwa Kristu. Tukuyilukan̂ahi akwa Kristu alala?

3. Chinjikijilu chabadikahu chawakwa Kristu alala chakwila nawu akweti kuken̂a hakachi kawu. (Yowanu 13:34, 35) Hiyalejewa kuton̂ojoka nawu wena ekela amawahi kuhita hadi antu amakwawu akweti ikowa dachen̂i hela muchidi wachen̂iku. Nawa hiyayileja kuhela antu afuma kumuza wachen̂iku. (Yililu 10:34, 35) Nochu hiyalwan̂a njitaku. Akwa Kristu alala ekala neyi manakwamuntu na muhelamuntu kudi wumu na mukwawu.—1 Yowanu 4:20, 21.

4. Chinjikijilu chikwawu chakwitiya kwalala chakwila nawu antu ekalamu akweti kavumbi keneni kakulemesha Bayibolu. Ayitija nawu hi Izu daNzambi nawa akuhwelela yejima yahoshan̂a Bayibolu. (Yawanu 17:17; 2 Timotewu 3:16, 17) Ahemba izu daNzambi kwikala dalema nankashi kubadika yiton̂ojoka yawantu hela tushidikilu. (Matewu 15:1-3, 7-9) Esekan̂a kwimbujola Bayibolu munshakaminu yawu yamafuku ejima. Hiyelan̂a ashimwina chuma chen̂i nawa hiyakuzata chuma chen̂iku.—Titusa 1:15, 16.

5. Kwitiya kwalala kwatela nawa kulemesha ijina daNzambi. (Matewu 6:9) Yesu wamwekesheli ijina daNzambi, Yehova, kudi antu amakwawu. Akwa Kristu alala atela kwila chochimu. (Yowanu 17:6, 26; Aroma 10:13, 14) Hiyantu anyi alejan̂aku akwawu kwiluka ijina daNzambi oku kumwashakamina?

6. Akwa Kristu alala atela kushimwina Wanta waNzambi. Dicheliliyi Yesu. Wahoshelen̂a ha Wanta mpiji yidi yejima. (Luka 8:1) Wakambijili atumbanji twindi kushimwina iyi nsan̂u mwahita iseki dejima. (Matewu 24:14; 28:19, 20) Akwa Kristu alala akuhwelela nawu Wanta waNzambi hohu diwu wambakaleta kuwunda kwalala ni kujikilila hanu heseki.—Masamu 146:3-5.

7. Atumbaji twa Yesu hiyatela kwikala ampata yinu yatamaku. (Yowanu 17:16) Hiyadibombelan̂a munsanu jamatun̂a nachuyulu na yikonkojola yayinu mpataku. Atodwelelan̂a n̂endelu yawubanji, yisela, ni yaaku oyu yinavuli muyinu mpata. (Yakoba 1:27; 4:4) Komana wunatweshi kwiluka akakwitiya alala akweti iyi yinjikijilu yawiniKristu okuwashakamina?

[Nyevulu yidi hefu 26, 27]

Akwa Kristu alala aken̂an̂ana, alemesha Bayibolu, nawa ashimwinan̂a Wanta waNzambi