Matewu
15 Kuhiñahu aFwarisi nawansoneki enjili kudi Yesu kufuma kuYerusalema, amwihuli nawu: 2 “Muloñadi atumbanji tweyi chamotokelañawu chaaku chawantu akushankulu? Chakutalilahu, adaña chakadi kwisuka.”*
3 Dichi yena wayakwili nindi: “Muloñadi chimwamotokelaña nshimbi jaNzambi hamuloña wayaaku yenu? 4 Chakutalilahu, Nzambi wahosheli nindi, ‘Lemeshaku tata yeyi nimama yeyi,’ nawa, ‘Muntu wejima wukumuhosha chatama* tata yindi hela mama yindi, amujahi.’ 5 Ilaña enu mwahoshaña nenu, ‘Muntu wejima wukumuleja tata yindi hela mama yindi nindi: “Chuma chejima chinikweti chinateli kukukwasha eyi, hichawaana chakumwinka Nzambi,” 6 hatelela kumulemesha tata yindiku.’ Dichi muloña wayaaku yenu, munaleñeli izu daNzambi kwikala damukunkulwayi. 7 Enu anfwikiji, Isaya waprofweteli chachiwahi hadi enu nindi: 8 ‘Awa antu anlemeshaña hohu nanyivumbu yawu, ilaña nyichima yawu yidi kwakulehi nanami. 9 Kudifukula kwadifukulañawu kudi ami kwamukunkulwayi, muloña ntañishilu yawu yashindamena hanshimbi jawantu.’” 10 Muloña wachumichi, watambikili izaza dawantu dinzi kwakwihi nakuyila nindi: “Tiyililenu mwiluki munatalishi awa mazu: 11 Yuma yeñilaña mukanwa kamuntu hiyamutamishañaku, chiña yuma yafumaña mukanwa kindi diyi yamutamishaña.”
12 Kuhiñahu, atumbanji enjili kudi yena nakumwila nawu: “Wuneluki ntahi neyi aFwarisi ahila chiyatiyawu mazu iwahosha?” 13 Yesu wayakwili nindi: “Mutondu wejima wabulili kutumbawu kudi Tata yami wekala mwiwulu akawuchañula. 14 Yilekenu ahileña. Hiyanlomboli amputamesu. Muloña neyi mputamesu yalombola mukwawu mputamesu, wejima wawu akuholokela mwibuku.” 15 Petulu wamwakwili nindi: “Tulumbulwili chachiwahi munatalishi chakutalilahu chiwashimuna hakusambila.” 16 Dichi wayihwili nindi: “Komana ninenu himuneluki muchinatalishiku? 17 Komana enu mweluka wanyi nenu chuma chejima cheñilaña mukanwa kamuntu chahitaña muchipumba, kuhiñahu chiya mumusalanyiku?* 18 Ilaña, yuma yejima yedikaña mukanwa kamuntu yafumaña kumuchima nawa yumoyu diyi yamutamishaña muntu. 19 Chakutalilahu, mumuchima dimwafumaña yitoñojoka yatama, kujahañana, wujila, wuvumbi,* wukombi, wunsahu wakutwamba nimatuka. 20 Iyi diyuma yamutamishaña muntu; ilaña kuda chakadi kwisuka* hikwamutamishaña muntuku.”
21 Yesu chafuminiyi kwenoku, wayili munkambi yaTira niyaSidoni. 22 Kutala! hikukwinza mumbanda kaFwenisa wamunodu iluña, hakubilela nindi: “Mwanta, Mwana kaDavidi, ntiyili luwi. Mwanami wamumbanda anakumuyandisha nankashi kudi ndemoni.” 23 Ilaña yena hamwakwiliku. Dichi atumbanji twaYesu enjili nakumwila nawu: “Muleji yayeña, muloña natwalekihu nakutudilila.” 24 Yena wayakwili nindi: “Hiyantemesheli kwinza kudi muntu wudi wejimaku, chiña hohu kudi antu amwitala daIsarela adi neyi anyikoku ajimbala.” 25 Dichi iwu mumbanda wenjili nakudifukula* kudi Yesu, nindi: “Mwanta, nkwashi!” 26 Yena wamwilili nindi: “Chachiwahi wanyi kunona yakuda yawanyana nakunatila anyana katuwa.” 27 Iwu mumbanda wahosheli nindi: “Omu tuhu diimu Mwanta, ilaña anyana katuwa niwena adaña nkuuku yayakuda* yaholokaña kumesa jawankaaka jawu.” 28 Kuhiñahu Yesu wamwakwili nindi: “Eyi mumbanda, chikuhwelelu cheyi cheneni; dichi chuma chiwunakukeña chizatiki.” Nawa hayoyenoyu mpinji mwanindi wamumbanda amuukili.
29 Yesu chafuminiyi kwenoku, wayili kwakwihi naKaluñalwiji kaÑaliliya, dichi wayili hampidi nawa washakamini kwenoku. 30 Kuhiñahu mazaza amaneni awantu enjili kudi yena nawa amuleteleli akwakubalakata, ayifwayi, amputamesu, atumama niantu amakwawu amavulu adiña akata, ayileteli kunyendu yindi nawa yena wayuukili. 31 Izaza dawantu dahayamini hakumona atumama anakuhosha, ayifwayi anayikoleshi, akwakubalakata anakwenda, amputamesu anakumona, dichi izaza dawantu damulemesheli Nzambi yaIsarela.
32 Kuhiñahu, Yesu watambikili atumbanji twindi kwinza kudi yena nakuyileja nindi: “Ami natiyili wushona izaza dawantu, muloña anashakami nanami mafuku asatu nawa yakuda yinamani. Hinnakukeña kuyileja ayi nanzalaku,* akenda kafwa chinzeya munjila.” 33 Ilaña atumbanji amwilili nawu: “Kudinu iluña hikwashakamaña antuku, dichi kudihi kutukuwana mankendi amavulu akudiisha idi izaza dawantu?” 34 Yesu chatiyiliyi chumichi, wayihwili nindi: “Mukweti mankendi añahi?” Amwakwili nawu: “Tukweti mankendi 7 nituyishi twanyanya twantesha.” 35 Chelili naleji dehi izaza dawantu nindi ashakami heseki, 36 wanoneli owu mankendi 7 niinshi, chalombeliyi nakusakilila, wahumwini owu mankendi nakwinka atumbanji, atumbanji niwena enkeli mazaza awantu. 37 Dichi wejima wawu adiili nawa ekutili chakwila anoneli yakuda yashalilihu nakuyisha muyimpaya 7 nawa yenzeli* to-o. 38 Antu adiili adiña 4,000, amayala niambanda kushilahu nianyana anyanya. 39 Nkumininaku, chelili naleji dehi mazaza awantu kuya kwawu, wakandamini muwatu nakuya kwiluña damuMañadana.