Luka
17 Kuhiñahu, walejeli atumbanji twindi nindi: “Chakadi nikujina, yuma yinateli kuhukesha antu yakenza. Hela chochu, oyihuñu yakamonayi muntu muyakenjila! 2 Chikuwaha owu muntu kumukasila ilola dakuhalilaku munshiñu nakumuumbila mukaluñalwiji, kubadika yahukeshi wumu hadi awa akehelamu. 3 Dichi babalenu. Neyi manakweyi navulumuni, muzuwili, nawa neyi nabalumuki mumuchima, mwanakeni. 4 Hela chakwila yakuvulumuna mapampa 7, nawa yenza kudi eyi mapampa 7 nakuhosha nindi, ‘Nabalumuki mumuchima,’ watela kumwanakena.”
5 Dichi apostolu amulejeli Mwanta nawu: “Tuvulishili chikuhwelelu.” 6 Kuhiñahu, Mwanta wayilejeli nindi: “Neyi mwadiña nachikuhwelelu chesekana naluchacha lwamositadi,* mwadi kuleja iwu mutondu wamalubeni nenu, ‘Bwitikaku wuditumbi mukaluñalwiji!’ niwena wadi kuyovwahila.
7 “Hinyi hakachi kenu wukweti nduñu wunakudima nawañombi hela wunakubiña yimuna wukumuleja neyi nafunti kufuma kumaha nindi, ‘Twaya kunu swayi-swayi kulonda wudi yakuda kumesa’? 8 Komana, hakumuleja nindi, ‘Nloñesheli kuda kwamelela nawa vwalaku ihina, wunyinki yakuda sampu namanishi kuda nikunwa, kuhiñahu dinu nineyi wudi nikunwaku’? 9 Komana yena wukumuhameka iwu nduñu hamuloña wakwila nazati mudimu wamwinkayi tahindi? 10 Chochimu ninenu nawa, neyi muzata nyidimu yinayinkiwu, hoshenu nenu: ‘Tudi hohu anduñu amukunkulwayi. Yuma yitunakoñi diyi yitwatela kwila.’”
11 Chayileñayi kuYerusalema, wahitili hakachi kaSamariya naÑaliliya. 12 Dichi cheñilileñayi mumukala, amubulakeni kudi amayala 10 adiña nambumba, ilaña emeneni hahalehi. 13 Nawa abileleli nawu: “Yesu, Ntañishi, tutiyili luwi!” 14 Chayimweniyi, wayilejeli nindi: “Yenu mwakadimwekeshi kudi atupristu.” Dichi chayileñawu, ayuukili. 15 Wumu hakachi kawu, chamweniyi nindi anamuuki, wafuntili nakumulemesha Nzambi nezu datiyakana. 16 Kuhiñahu, wadinatili chamesu heseki kunyendu yaYesu nakumusakilila. Nawa iwu muntu wadiña kaSamariya. 17 Yesu wamwihwili nindi: “Komana antu ejima 10 hidiwu okewaku? Hanu dinu amakwawu 9 adi kudihi? 18 Komana kwosi muntu mukwawu wunafunti nakumulemesha Nzambi chiña hohu iwu iyala wakumuza wacheñi tahindi?” 19 Kuhiñahu, wamulejeli nindi: “Nyamukaku wuyeña; chikuhwelelu cheyi chinakukoleshi.”
20 AFwarisi chamwihwiliwu mpinji yakenza Wanta waNzambi, yena wayakwili nindi: “Wanta waNzambi hiwunakwinza munjila yinelukiwu antu ejimaku; 21 hela antu hiyakahosha nawu, ‘Talenu hanu!’ hela, ‘Hanaku!’ Muloña tiyenu! Wanta waNzambi wudi hakachi kenu.”*
22 Kuhiñahu, walejeli atumbanji nindi: “Mafuku akenza imwakafwilaña kumona ifuku danowu mafuku aMwana kamuntu, ilaña himwakadimonaku. 23 Nawa antu akayilejaña enu nawu, ‘Talenu hana!’ hela, ‘Talenu hanu!’ Bayi mwakaya hela kuyilondelaku. 24 Neyi chochakenaña nzaji kukabadi kamu kewulu nakukenena cheñi kukabadi kakwawu kewulu, dichakekalayi niMwana kamuntu mwifuku dindi. 25 Hela chochu, watela kusambila kuhita mumakabi amavulu nikumukaana kudi idi ikiñu. 26 Neyi chochichadiña mumafuku aNowa, dichichakekala nimumafuku aMwana kamuntu: 27 antu adiileña, anwineña, amayala asumbwileña, ambanda asumbukileña kushika nihanodu ifuku deñililiyi Nowa muwatu, nawa Dibaji denjili nakuyijilumuna wejima wawu. 28 Chochimu nawa, neyi chochichadiña mumafuku aLoti: adiileña, anwineña, alandileña, alandishileña, atumbileña mbutu, atuñileña. 29 Ilaña hefuku dafuminiyi Loti muSodoma, kwanokeli nvula yakesi nimulañi wakesi kamalola abutukaña kesi ahileña kufuma mwiwulu nawa ayijilumwini wejima wawu. 30 Dichichakekala nihanodu ifuku dakamusololawu Mwana kamuntu.
31 “Hanodu ifuku, muntu wakekala hewulu detala nawa wakekala nayuma yindi mwitala, bayi yakasuluka nakusenda yumiyiku, chochimu nawa, nimuntu wakekala mwiha, bayi yakafunta nakusenda yuma yakashiyayi kunyimaku. 32 Anukenu ñoda Loti. 33 Muntu wejima wunakukeña kupulwisha wumi windi, wakawujimbesha, hakwila muntu wejima wukujimbesha wumi windi, wakawupulwisha. 34 Inakuyileja nami, hawuna wufuku, antu ayedi akekala hakadidi kamu; wumu akamusenda, ilaña mukwawu akamushiya. 35 Kwakekala ambanda ayedi akahalilaña helola dimu; wumu akamusenda, ilaña mukwawu akamushiya.” 36 —— 37 Dichi, hakumwakula amwihwili nawu: “Mwanta, kudihi kwenoku?” Yena wayakwili nindi: “Kudi chuma chinafwi, dikwahwilaña nimakubi.”