Matewu
7 “Lekenu kusompesha akwenu kulonda ninenu abuli kuyisompesha; 2 muloña njila yimwasompeshelañamu akwenu diyi yakayisompeshelamu ninenu nawa, nichesekelu chimunakwesekelaku nachu akwenu, dichi chakayesekelawu nachu ninenu nawa. 3 Muloñadi chiwatalilaña kachibalabala kadi mudisu damanakweyi ilaña chibalu chidi mudisu deyi eyi aweni kuchimona nehi? 4 Hela wukuleja ñahi manakweyi neyi, ‘Tutali nukufumishi kachibalabala kadi mudisu deyi,’ hakwila eyi mudisu deyi eyi aweni mudi chibalu? 5 Eyi nfwikiji! Sambilaku kufumisha chibalu chidi mudisu deyi eyi aweni kulonda wumoni chiwahi chiwatela kufumisha kachibalabala kadi mudisu damanakweyi.
6 “Bayi mwinka atuwa yuma yajila hela kunatila angulu* mperola jenuku kulonda abuli kuyidatola nanyendu yawu, nakuyibalumukila enu nakuyikatisha nankashi.
7 “Twalekenuhu kulomba, akayinkachu; twalekenuhu kukeñakeña, mwakawana; twalekenuhu kudondomwena, akayenzunwinaku; 8 muloña muntu wejima walombaña, watambwilaña, muntu wejima wakeñakeñaña, wawanaña, nimuntu wejima wadondomwenaña, amwenzunwinañaku. 9 Kuhosha hohu chalala, hinyi hakachi kenu wukwila neyi mwanindi namulombi dinkendi yena hakumwinka ilola? 10 Hela neyi namulombi inshi, komana wukumwinka kapela? 11 Dichi neyi enu akwanshidi mweluka kwinka anyanenu yawaana yayiwahi, dikwila nawu Tata yenu wekala mwiwulu wayinkaña antu amulombaña yuma yayiwahi.
12 “Dichi yuma yejima yimunakukeña nenu antu ayilili enu, ninenu nawa mwatela kuyilila mwomumu. Kafwampi, dimwatalisha Nshimbi nimazu awaTuprofwetu.
13 “Iñililenu muchiisu chanyanya, muloña chiisu cheneni ninjila yabwambwañana yatwalaña kukujilumuka nawa amavulu dimu mweñililañawu; 14 ilaña chiisu chanyanya ninjila yanyanya yatwalaña kuwumi nawa antesha diwu ayiwanaña.
15 “Babalenu nawatuprofwetu akutwamba enzaña kudi enu iku anavwali yitembi yanyikoku, ilaña mukachi hiyatuñwidi afwa hakuda. 16 Mukuyilukila kunyikabu yawu. Komana antu akumunaña nyivinyu kumutondu wanyiña hela nyikuyu kumubambañoma? 17 Chochimu, mutondu wejima wawuwahi wasoñaña nyikabu yayiwahi, ilaña mutondu wejima watama wasoñaña nyikabu yatama. 18 Mutondu wawuwahi hiwasoñaña nyikabu yatamaku, nimutondu watama hiwasoñaña nyikabu yayiwahiku. 19 Mutondu wejima wabulaña kusoña nyikabu yayiwahi, awutemaña nakuwunatila mukesi. 20 Chalala antu wenawa mukuyilukila kunyikabu yawu.
21 “Bayi neyi muntu wejima wantenaña nindi, ‘Mwanta, Mwanta,’ wakeñila muWanta wamwiwuluku, chiña hohu muntu welaña nkeñelu yaTata yami wekala mwiwulu diyi wakeñilamu. 22 Hanodu ifuku amavulu akañila nawu: ‘Mwanta, Mwanta, komana hitwaprofweteli mwijina deyiku, hitwafumishili andemoni mwijina deyiku nawa hitwakoñeli nyidimu yayivulu yañovu mwijina deyiku?’ 23 Hohenohu nakayileja nami: ‘Hinayilukili hela hantiku! Fumenu kudi ami enu mwakoñaña yuma yakuluwalala!’
24 “Dichi, muntu wejima wukutiya awa mazu ami nakwilamu, wakekala neyi muntu wamaana watuñilili itala dindi helola. 25 Nvula yanokeli nawa dibaji denjili nimpepela yakunkili nakweta hanodu itala, ilaña hidahumukiliku, muloña adituñilili helola. 26 Cheñi nawa, muntu wejima wunakutiya awa mazu ami nakubula kwilamu, wakekala neyi muntu wasupa watuñilili itala dindi hawusekulula. 27 Nvula yanokeli nawa dibaji denjili nimpepela yakunkili nakweta hanodu itala nawa dahumukili nakukisika chikupu.”
28 Yesu chamanishiliyi kuhosha awa mazu, mazaza awantu ahayamini chikupu nantañishilu yindi, 29 muloña wayitañishileña neyi muntu wukweti wuswa, bayi neyi ansoneki awuku.