Matewu
6 “Babalenu kulonda chimukuzataña nyidimu yenu yayiwahi abuli kuyimona kumesu awantu; neyi nehi, Tata yenu wekala mwiwulu hakayinka wufwetuku. 2 Dichi neyi wuhana yawaana yaluwi,* bayi wuvumisha mpuña kuwunakuyaku neyi chelañawu anfwikiji mumasinagogi nimunyikwakwa kulonda ayilemesheña kudi antu. Inakuyileja chalala nami, anatambuli dehi wufwetu wawu wejima. 3 Ilaña enu neyi munakuhana yawaana yaluwi, chikasa chenu chachimunswa bayi chiluka chuma chinakwila chikasa chenu chachidiiluku, 4 kulonda yawaana yenu yaluwi yiikali yakujinda. Dichi Tata yenu wamonaña yuma yejima wakayifweta.
5 “Cheñi nawa, neyi munakulomba, bayi mwila neyi chelañawu anfwikijiku, muloña akeñaña kulomba henohu anemani mumasinagogi nihamaakenu* anyikwakwa yamaneni kulonda ayimoneña kudi antu. Inakuyileja chalala nami, anatambuli dehi wufwetu wawu wejima. 6 Ilaña eyi neyi hiwukulomba, iñilaku mukapeka keyi kamukachi nawa neyi wunenzeli dehi chenzelu, lombaku kudi Tata yeyi wabulaña kumonawu. Dichi Tata yeyi wamonaña yuma yejima wakakufweta. 7 Neyi hiwukulomba, bayi wufuntisha-funtishahu mazu wowamu neyi chelañawu antu akunyuzaku, muloña atoñojokaña nawu neyi avulisha mazu akuyitiya. 8 Dichi bayi mwikala neyi wenaku, muloña Tata yenu neluki yuma yimunakaankili henohu kanda mumulombi.
9 “Ichi dichimwatela kulomba, nenu:
“‘Tata yetu wekala mwiwulu, ijina deyi diikali dajila.* 10 Wanta weyi winzi. Nkeñelu yeyi ayili hamaseki neyi chayilañawu mwiwulu. 11 Twinki yakuda yitunakukeña yefuku dalelu; 12 nawa twanakeni nyikudi yetu* neyi chitunanakeni adi nanyikudi yetu. 13 Nawa tukwashi kulonda kweseka kubuli kutuzeyesha,* ilaña twamwini* kudi watama.’
14 “Muloña neyi mukwanakena antu yuma yatama yelañawu, Tata yenu wekala mwiwulu niyena wukuyanakena; 15 ilaña neyi mubula kwanakena antu yuma yatama yelañawu, Tata yenu niyena hakuyanakena nshidi jenuku.
16 “Neyi mushakama chakadi kuda, bayi mudihomba kumesu neyi chelañawu anfwikijiku, muloña atamishaña kumesu awu* kulonda ayimoni kudi antu nawu anashakami chakadi kuda. Inakuyileja chalala nami, anatambuli dehi wufwetu wawu wejima. 17 Ilaña eyi neyi hiwukushakama chakadi kuda, wayaku manji kumutu weyi nawa welaku kumesu eyi, 18 kulonda antu abuli kukumona nawu wunakushakama chakadi kuda, ilaña chiña akumonaña kudi Tata yeyi wabulaña kumonawu. Dichi Tata yeyi wamonaña yuma yejima wakakufweta.
19 “Lekenu kudilumbikila maheta hamaseki hekala tunzembula nindala janoñeshaña nawa hekala amakombi eñilaña nakwiya. 20 Ilaña, dilumbikilenu maheta mwiwulu mwabula tunzembula hela ndala janoñeshaña nawa mwabulaña kwiñilawu amakombi nakwiya. 21 Muloña kudi maheta eyi, dikukwikala nimuchima weyi nawa.
22 “Inoñu damujimba hidisu. Dichi neyi disu deyi datala mumu hohu,* mujimba weyi wejima wukutoñekaña.* 23 Ilaña neyi disu deyi didi nalwisu,* mujimba weyi wejima wukwikala mwidima. Neyi chejeji chidi mudi eyi himwidima waweni, yenowu mwidima wukusweja chikupu!
24 “Hikudi muntu wunateli kukalakela anyanta ayediku; watela kuhelahu wumu nakukeñahu mukwawu, hela wukukakelahu wumu nakusekeshahu mukwawu. Himunateli kukalakela Nzambi hampinji yoyimu niMahetaku.
25 “Dichi inakuyileja nami: Lekenu kwakama hawumi wenu hayuma yimukuda hela yimukunwa, hela kwakama hanyijimba yenu hayuma yimukuvwala. Komana wumi hiwalema kubadika yakudaku nawa mujimba hiwalema kubadika yakuvwalaku? 26 Shinshikenu chiwahi atuda amuluzwizu; hiyakuwaña mbutu hela kumuna hela kusha munkalañaku, ilaña Tata yenu wekala mwiwulu wayidiishaña. Komana enu himwayibadika kulemaku? 27 Hinyi hakachi kenu hamuloña wakwakama wunateli kunuñaku kyubiti yimu kuwumi windi hela chantesha? 28 Cheñi nawa, muloñadi chimunakwakamina hansañu yayakuvwala? Dizilenu kunkenu yamwisaña chiyakulaña; hiyakabakanaña hela kuchima yakuvwalaku; 29 Ilaña inakuyileja nami hela tuhu Solomoni muchiyuulu chindi chejima, havwalilihu yakuvwala yidi neyi iyi nkenu hela yimuku. 30 Neyi Nzambi wavwikaña yuma yamenaña mwisaña muniyi njila, yelaña lelu yidi kwoku, kumadiki ayinatila mukesi, komana wukukañanya kuyivwika enu chakubadikahu, enu mukweti chikuhwelelu chantesha? 31 Dichi bayi mwakama nakuhosha nenu, ‘Tukudadi?’ hela nenu, ‘Tukunwadi?’ indi kwiji nenu, ‘Tukuvwaladiku?’ 32 Muloña yuma yejimiyi diyi yafwilañawu chikupu akwanyuza. Tata yenu wekala mwiwulu weluka nindi mwakeñaña yuma yejimiyi.
33 “Dichi, twalekenuhu kusambila kukeña Wanta nikuloña kwindi, nawa yuma yejimiyi yikwawu akayishilahu. 34 Bayi mwakama nayuma yefuku dakumadikiku, muloña ifuku dakumadiki dikekala nakwakama kwadu. Ifuku niifuku dikweti kukala kwadu.