Mukanda waYuda
1 Ami Yuda, nduñu yaYesu Kristu, ilaña mana kwaYakoba,+ inakusonekela enu atondewa+ akeñawu kudi Nzambi Tata nawa ahembelawu Yesu Kristu:+
2 Luwi, kuwunda nikukeña kuyivulili enu.
3 Enu akwetu itwakeña, hela chakwila nafwilileña chikupu kuyisonekela hawamwinu wutukweti wejima wetu,+ ilaña ichi namoni nami chachiwahi kuyisonekela nakuyikonkomwena kulonda muzuñili chikupu chikuhwelelu+ chayinkeliwu akakujila kamu hohu kunahu. 4 Nayisonekeli muloña antu amakwawu anadiñiji mukachi kenu, owu atoñweleliwu dehi kunyima muNsona nawu akayisompesha naniwu wunsompeshi; hiyantu abulaña kumwakama Nzambi abalumunaña luwi lwasweja lwaNzambi yetu nakukoñelamu yilwilu yawukapwa nsonyi,*+ nawa amukaanaña nkaaka yetu wumu hohu nawa Mwanta, Yesu Kristu.+
5 Hela chakwila mweluka chikupu chumichi, inakukeña kuyanukishaku nami Yehova,* chelili naamwini dehi antu mwituña daEjipitu,+ wajilumwini antu ejima abulili chikuhwelelu.+ 6 Nawa añelu abulili kuhemba yifulu yadiñawu nayu nakudiwula maluña awu amawahi akushakamamu,+ wayikasa mumaleñi* ahaya nyaaka nakuyihembela mumwidima wasweja kulonda akayisompeshi hefuku deneni.+ 7 Munjila yoyimu, Sodoma naGomora ninyisumba yayinyeñumukili niyena yadiñijili muyilwilu yawuvumbi* yawuzondu nikufwila yuma yatama yafwilaña mujimba.+ Ayibabesheli kuhitila mukuyocha mukesi kahaya nyaaka kulonda ekali akutalilahu kudi etu.+
8 Hela chochu, awa antu anakulota niyilota, anakutamisha mujimba, anakudiwula akawuswa nikuyihosha antu alemeshawu mazu akasawuntu.+ 9 Ilaña hampinji yelili Mikeli+ mukulumpi wawañelu+ ambokelimu naDiyabolu nikutaadeka hamujimba waMosi,+ yena hesekelihu hela chanti kumusompesha nikumuhosha mazu akasawuntuku,+ ilaña wamwilili nindi: “Yehova* akuzuwili.”+ 10 Ilaña awa antu anakuhosha mazu akasawuntu hayuma yejima yabulañawu kutiyishisha.+ Adi neyi anyama abulaña kutoñojoka nawa muyuma yejima yelañawu elaña neyi anyama,+ nakuditamisha awenawu.
11 Chinayitamini nankashi awa antu, muloña anakulondela njila yaKena+ nawa anatemukili muyilwilu yatama yaBalami+ muloña wakufwila wufwetu, nawa anajilumuki nanhoshelu yakudikaña+ yaKora.+ 12 Awa antu himalola aswama kwishina damenji hampinji yimunakuda nawu yawija yenu yakukeña,+ hiyatubiña adidiishaña awenawu chakadi woma;+ himavu akadi nvula anakuleloka nampepela;+ hinyitondu yakadi nyikaabu muchilaaka chakusoñelamu, yinafwi kayedi* nawa yinabwitiwu; 13 himankanda azuwa ahakaluñalwiji atupulaña ifulolu dansonyi yawu;+ hitutumbwa twahitañanaña hohu, ayihembela mwidima wiyila bwi-i mwakekalañawu haya nyaaka.+
14 Enoki,+ muntu wamu 7 mundonda kufuma kudi Adama, niyena waprofweteli hadi awa antu chahosheliyi nindi: “Tiyenu! Yehova* wenjili namazaza* awañelu jindi ajila+ 15 nakusompesha nikuhiisha ejima+ abulaña kumwakama Nzambi, muloña wanyidimu yawu yatama yakoñeleñawu chakadi kumwakama Nzambi niyuma yejima yakuhayamisha yatama yamuhosheleñawu kudi akanshidi abulaña kumwakama Nzambi.”+
16 Awa antu hiyakakutooba,+ adidilashanaña nayuma yikwetiwu, alondelaña kufwila kwawu aweni,+ nawa tunwa twawu twahoshaña mazu amaneni akudisamba, iku anakudimbeka antu kulonda ahetelimu.+
17 Ilaña enu akwetu itwakeña, mwanukeña mazu ahosheliwu dehi* apostolu aMwanta wetu Yesu Kristu, 18 ayilejeleñawu nawu: “Mumpinji yakukuminina mwakenza akakuseha, akalondelaña kufwila kwawu kwayuma yakubula kumwakama Nzambi.”+ 19 Awa diwu aletaña chaambu,+ akweti yilwilu yawunyama,* hiyasha maana kuyuma yakuspirituku.* 20 Ilaña enu akwetu itwakeña, dituñenuña enu aweni muchikuhwelelu chenu chajila chikupu nikulomba naspiritu yajila,+ 21 kulonda mushakameña mukukeña kwaNzambi+ iku munakutalila luwi lwaMwanta wetu Yesu Kristu lwalombolaña kuwumi wahaya nyaaka.+ 22 Cheñi nawa, twalekenuhu kutiyila luwi+ antu amakwawu ajinokaña;+ 23 yamwinenu+ kuhitila mukuyihukula mukesi. Ilaña twalekenuhu kutiyila luwi antu amakwawu, mwileña mwenimu nawoma, nikuhela chakuvwala chawu chinatamishiwu nanyidimu yawu yatama.*+
24 Ilaña kudi yena wunateli kuyikiña kulonda mubuli kuhukana nawa wunateli kuyikwasha kwikala akadi ihuji+ kumesu indi kwalema namuzañalu wasweja, 25 kudi Nzambi wumu hohu Chamwinu chetu kuhitila mudi Yesu Kristu Mwanta wetu, kwikaleña kulema, wukeleñi, ñovu niwuswa kufuma kuyaaka yakunyima yejima, nihayinu mpinji nihaya nyaaka nanyaaka. Ameni.