Yeremiya
42 Kuhiñahu, akulumpi ejima awamashidika niYohanani+ mwana kaKareya, Yezaniya mwana kaHoshaya niantu ejima, kutachikila kudi muntu wabula kulema nakushika kudi walema, ayili kudi 2 kaprofwetu Yeremiya nakumwila nawu: “Mwani, tiyaku kulomba kwetu kwakututiyila luwi, nawa wutulombeliku kudi Yehova Nzambi yeyi, wuyilombeliku awa ejima ashalahu, muloña anashali hohu antesha,+ neyi chiwunamoni. 3 Yehova Nzambi yeyi atuleji njila yitwatela kwendamu niyuma yitwatela kwila.”
4 Kaprofwetu Yeremiya wayakwili nindi: “Natiyi mumunahoshi, dichi nukulomba kudi Yehova Nzambi yenu kwesekeja nakulomba kwenu; nawa mazu ejima akuyakulayi Yehova, nukuyileja. Hinukuyiswekahu izu hela dimuku.”
5 Wena amulejeli Yeremiya nawu: “Yehova ekali chinsahu chetu walala nawa washinshika wakutufwisha namuloña neyi tubula kwila kwesekeja namwejima mukutulejayi Yehova Nzambi yeyi kuhitila mudi eyi. 6 Hela chakwila izu dikutulejayi dadiwahi hela datama, etu tukwovwahila izu daYehova Nzambi yetu, kutunakukutemesha, kulonda yuma yituwahili muloña tukwovwahila izu daYehova Nzambi yetu.”
7 Chimwahitili mafuku 10, izu daYehova denjili kudi Yeremiya. 8 Dichi wamutambikili Yohanani mwana kaKareya niakulumpi ejima awamashidika adiñayi nawu niantu ejima, kutachikila kudi muntu wabula kulema nakushika kudi walema.+ 9 Wayilejeli nindi: “Yehova Nzambi yaIsarela, kumwantemesha nakuyilombelaku nenu ayitiyili luwi, nahoshi nindi: 10 ‘Neyi mwamweni mukushakamaña mudinu ituña, nakayituña nawa hinakayihumunaku, nakayitumba nawa hinakayibwitaku, muloña nakaditoñesha* hayihuñu yinnayileteli.+ 11 Bayi mutiya woma muloña wamwanta waBabiloni imwachiinañaku.’+
“Yehova nahoshi nindi, ‘Bayi mumutiya womaku, muloña ami nidi nanenu, nakuyamwina nikuyipulwisha muchikasa chindi. 12 Nawa nukuyitiyila luwi,+ niyena wukuyitiyila luwi nakuyifuntisha kwituña denu.
13 “‘Ilaña neyi mukuhosha nenu, “Etu hitukushala mudinu ituñaku!” nawa mukaana kwovwahila izu daYehova Nzambi yenu 14 nakuhosha nenu, “Etu kwetu tukuya kwituña daEjipitu,+ kutwakabula kumona njita hela kutiya chivumina chaluseñu hela kutiya nzala; kweniku dikutukushakamaña,” 15 dichi enu ashalahu amuYuda, tiyenu izu daYehova. Yehova wamazaza, Nzambi yaIsarela, nahoshi nindi: “Neyi munakufwila chikupu kuya kuEjipitu nawa muya kwenoku nakushakamaku,* 16 dichi mpoku yakabali yimunakuchiina yakayiwana kwenoku mwituña daEjipitu, ninzala yakapwelendendi yimunakuchiina yakayilondela kuEjipitu, nawa dikumwakafwila.+ 17 Nawa antu ejima anakufwila kuya kuEjipitu nakushakamaku akafwa nampoku yakabali, nanzala yakapwelendendi ninachipupu.* Hakachi kawu hosi hela wumu wakapuluka hela wakatemuka yihuñu yinakaleta hadi wenaku.”’
18 “Muloña Yehova wamazaza, Nzambi yaIsarela, nahoshi nindi: ‘Neyi chahuñunukilili kuzuwa kwami nikulendumuka kwami hadi antu ashakamaña muYerusalema,+ dichikahuñunukila kuzuwa kwami nihadi enu neyi muya kuEjipitu. Nawa mwakekala ishiñu, chuma chakuhayama chikupu, ashiñewa, asawuka+ nawa himwakadimonahu cheñi adinu ituñaku.’
19 “Enu ashalahu amuYuda, Yehova nashimuni yuma yakayimwekena. Bayi muya kuEjipituku. Ilukenu chikupu nenu dalelu nayisoñamishi 20 nami chiluwa chenu chakajahisha mawumi enu. Muloña mwantemesheli kudi Yehova Nzambi yenu, nakunleja nenu, ‘Tulombeliku kudi Yehova Nzambi yetu, nawa wutuleji yuma yejima yikuhoshayi Yehova Nzambi yetu, nawa etu tukwilamu.’+ 21 Nawa ami nayileji dalelu, ilaña himwakwovwahila izu daYehova Nzambi yenu hela kwila mwejima munantemeshiyi nindi niyilejiku.+ 22 Dichi, ilukenu chikupu nenu mwakafwa nampoku yakabali, nanzala yakapwelendendi ninachipupu mwituña mumunakufwila kuya nakushakama.”+