Isaya

18 Oyihuñu yakamona ituña mwavumaña mpuula yatububu

Mwiluña datuloña twamuEtiyopiya!+

 2 Datemeshaña antemesha hakaluñalwiji,

Nakuzambuka hamenji namaatu anyilela, nakutuleja nawu:

“Yenuña, enu antemesha mwatemuka,

Kumuza wukweti antu amalehi nawa akweti makowa asenena,

Kudi antu atiyañawu woma kwejima,+

Kumuza wakola, wemikaña mushindu,*

Wukweti ituña dakumpwiliwu kudi tuloña.”

 3 Enu antu ejima mwashakamaña mwituña ninenu antu ashakama hamaseki,

Chuma chimwakamona chakekala neyi chinjikijilu* chinemikiwu hajimpidi,

Nawa mwakatiya chivumina neyi chivumina chaluseñu.

“Kwosi wakanluwañesha nikutala* heluña dami dinnakoleshiku,

Neyi iyena detena dinakutoñeka,

Neyi mavu awuumi hikwataataña muchilaaka chakwaañula.

 5 Muloña henohu kwaañula kanda,

Neyi nkenu yinakukumuki nawa wuluya wunekali dehi nyivinyu yaha,

Tuneñuneñu akatukunkula nayitwa yakukunkula nachu

Nawa nyintomboloñu akayiketula nakuyifumishaku.

 6 Yibimbi yawu akayishila atuda akujimpidi adaña mbiji

Nikudi anyama ahamaseki.

Akayidaña kudi atuda adaña mbiji mumpinji yanooña,

Nawa akayidaña kudi anyama ahamaseki mumpinji yakwaañula.

 7 Hanoyu mpinji, akamuletela Yehova wamazaza chawaana,

Kufuma kumuza wukweti antu amalehi nawa akweti makowa asenena,

Kufuma kudi antu atiyañawu woma kwejima,

Kufuma kumuza wakola, wemikaña mushindu,*

Wukweti ituña dakumpwiliwu kudi tuloña

Nakuchileta kwiluña dikweti ijina daYehova wamazaza, Mpidi yaZiyona.”+