Kushindulula Watachi

11 Chimwahitili mpinji, aIsarela ejima apompeli kudi Davidi kuHebironi+ nakuhosha nawu: “Talaña! Etu tudi ifwaha deyi nawa mujimba weyi.*+ 2 Kunyima henohu Sawulu wuchidi mwanta, eyi yeyi walombweleña aIsarela kumajita awu.*+ Nawa Yehova Nzambi yeyi wakulejeli nindi: ‘Eyi wakabiñaña antu jami aIsarela nawa wakekala nlomboli yawantu jami aIsarela.’”+ 3 Dichi akulumpi ejima amuIsarela enjili kudi mwanta kuHebironi nawa Davidi watiyañeni nawu chitiyañenu muHebironi kumesu aYehova. Kuhiñahu, amuwayishili Davidi kwikala mwanta waIsarela+ kwesekeja nezu daYehova dahosheliyi kuhitila mudi Samweli.+

4 Mukuhita kwampinji, Davidi hamu nawaIsarela ejima anyamukili nakuya kuYerusalema, kuYebusi,+ mwituña mwashakamineñawu aYebusi.+ 5 Antu ashakamineña muYebusi amusupishili Davidi nawu: “Eyi hiwamba keñila munuku!”+ Hela chochu, Davidi watambwili musumba wakiñewa waZiyona,+ wunakutenawu chayinu mpinji nawu Musumba waDavidi.+ 6 Dichi Davidi wahosheli nindi: “Yowu wakatachikilahu kutapa aYebusi, wakekala mukulumpi* wanjita nawa chilolu.” Dichi Yowabi+ mwana kaZeruwiya diyi watachikililihu kuya nawa wekalili mukulumpi wanjita. 7 Kufumahu, Davidi watachikili kushakama mwiluña dakiñewa. Dihafumini aditeneña nawu Musumba waDavidi. 8 Watachikili kutuña musumba nakuwunyeñumwisha, kufuma haMulumba* nakushika kumaluña awunyeñumukili, nawa Yowabi watuñulwili iluña damusumba dashaliliku. 9 Dichi Davidi watwalekelihu kukolelaku chikupu+ nawa Yehova wamazaza wadiña nayena.

10 Awa diwu anlomboli* jaDavidi akakuzuña njita añovu, amukwashili nankashi muwanta windi hamu nawaIsarela ejima, nakumwilisha kwikala mwanta kwesekeja nezu daYehova kutalisha hadi Isarela.+ 11 Iyi diyi ndandanda yawakakuzuña njita añovu aDavidi: Yashobeyami+ mwana kamwini Hakimoni, wadiña hakachi kawakulumpi asatu.+ Hampinji yimu wazatishili iyoña dindi kujahilaku antu kubadika 300.+ 12 Walondeleli hadi yena wadiña Eleyazari+ mwana kaDodo mwini Ahohi.+ Iwu niyena wadiña hakachi kawakakuzuña njita añovu asatu. 13 Wadiña naDavidi kuPasidamimi,+ kwadipompesheleli hamu aFilisitinu kulonda azuñi njita. Dichi kwadiña iha mwadiña bali yayivulu, nawa antu atemukili muloña wawaFilisitinu. 14 Ilaña yena womikili nakwimana mukachi keha nawa wadikiñili odu iha nakutwalekahu kutapa aFilisitinu, chakwila Yehova wayimikili mushindu* chikupu.+

15 Akulumpi asatu ahadi akulumpi janyikala 30 akunkumukili nakuya kwilola kwadiña Davidi kwiyeñu daAdulami,+ iku njita yawaFilisitinu yinatuñili chilombu muChinekineki chawaRefa.+ 16 Haniyi mpinji, Davidi wadiña mwiluña dakiñewa nawa izanvu dawamashidika awaFilisitinu dadiña muBetelemi. 17 Kufumahu, Davidi watachikili kutoña nindi: “Menji amwishima didi kuchiisu chaBetelemi,+ nateli kuyinwa!” 18 Hohenohu, asatu adikanjikijili nakwiñila muchilombu chawaFilisitinu nawa atehwini menji mwishima dadiña kuchiisu chaBetelemi nakumuletelawu Davidi. Ilaña Davidi wakaanini kuyinwa nawa wayimwañilili kudi Yehova. 19 Wahosheli nindi: “Eyi Nzambi yami, kwesekeja nachiwamonaña, chinjila ami kwila chuma chamuchidiwu! Komana ami nateli kunwa mashi anawa amayala asha mawumi awu muwubanji?+ Muloña asha mawumi awu muwubanji hakuleta awa menji.” Dichi wakaanini kuyinwa. Iyi diyuma yakoñeli akakuzuña njita indi asatu añovu.

20 Abishayi+ mana kwaYowabi+ wekalili mukulumpi wamashidika amakwawu asatu; mpinji yimu wazatishili iyoña dindi kujahilaku antu kubadika 300 nawa wayili mpuhu neyi ana amashidika asatu añovu.+ 21 Hadi awa asatu, yena diyi wabadikili kulema hadi owu ayedi nawa diyi wadiña mukulumpi wawu; hela chochu, yena hashikili hachifulu hashikili ana amashidika asatu akusambilaku.

22 Benaya+ mwana kaYehoyada, wadiña iyala wahamuka* wazatili nyidimu yayivulu muKabizeyeli.+ Watapili anyana kaAriyeli wakuMowabi ayedi awamayala nawa wakunkumukilili mwibuku damenji hefuku dikwadiña sino* nawa wajahili mutupa.+ 23 Nawa watapili niiyala mwini Ejipitu wataluka chikupu, waleheli muchiiminu makyubiti* atanu.+ Hela chakwila owu mwini Ejipitu wadiña neyoña muchikasa chindi dadiña neyi mukambu wawakakusowashana,+ yena wayili nakumuwana namutondu nawa wahukwili iyoña muchikasa chamwini Ejipitu nakumujaha neyoña dindi.+ 24 Iyi diyuma yakoñeliyi Benaya mwana kaYehoyada nawa wayili mpuhu neyi ana akakuzuña njita asatu añovu. 25 Hela chakwila amulemesheli chikupu kubadika akwawu anlomboli 30, hashikili hachifulu hashikili ana amashidika asatuku.+ Hela chochu, Davidi wamutondeli kwikala mukulumpi wawanhembi jindi.

26 Akakuzuña njita añovu hadi amashidika adiña, Asaheli+ mana kwaYowabi, Elihanani mwana kaDodo wakuBetelemi,+ 27 Shamoti mwini Harori, Helezi mwini Peloni, 28 Ira+ mwana kaIkeshi mwini Tekowa, Abiyezeri+ mwini Anatoti, 29 Sibekayi+ wakuHusha, Ilayi mwini Ahohi, 30 Maharayi+ mwini Netofa, Heledi+ mwana kaBayana mwini Netofa, 31 Itayi mwana kaRibayi wakuGibeya wawaBenjamini,+ Benaya wakuPiratoni, 32 Hurayi wakunyihoñi* yaGayashi,+ Abiyeli mwini Aribati, 33 Azimaveti mwini Baharumi, Eliyaba mwini Shayalibimi, 34 anyana kaHashemi mwini Gizoni, Yonatani mwana kaShage mwini Harari, 35 Ahiyami mwana kaSakari mwini Harari, Elifali mwana kaUri, 36 Heferi wakuMekera, Ahiya mwini Peloni, 37 Heziro wakuKarimeli, Nayarayi mwana kaEzibayi, 38 Yoweli mana kwaNatani, Mibihari mwana kaHagiri, 39 Zeleki mwini Amoni, Naharayi mwini Beroti, mukakusenda yitwa yanjita yaYowabi mwana kaZeruwiya; 40 Ira mwini Itiri, Garebi mwini Itiri, 41 Uriya+ mwini Hiti, Zabadi mwana kaAlayi, 42 Adina mwana kaShiza mwini Rubeni, nlomboli* yawaRubeni niantu 30 adiñayi nawu; 43 Hanani mwana kaMayaka, Yoshafati mwini Mitini, 44 Uziya wakuAshiterati, Shama niYeyeli, anyana awamayala avweliwu kudi Hotami wakuAroweri; 45 Yediyayeli mwana kaShimiri nimanakwindi Yoha mwini Tizi; 46 Eliyeli mwini Havi, Yeribayi niYoshaviya anyana kaElinayami awamayala niItima wakuMowabi; 47 Eliyeli, Obedi niYayasiyeli wakuMezoba.