Yoshuwa
10 Mwanta Adonizedeki wakuYerusalema chatiyiliyi tuhu nindi Yoshuwa nalukuki Ayi nawa namujilumuni, nakwila Ayi nimwanta wawu+ neyi chamwililiyi Yeriku nimwanta wawu,+ ninochu antu ashakamineña muGibeyoni chatiyañeniwu chitiyañenu chakuwunda nawaIsarela+ nakutwalekahu kushakama mukachi kawu, 2 watiyili woma chikupu+ muloña Gibeyoni wadiña musumba weneni nankashi neyi musumba wumu wahanyisumba yawanta. Wadiña weneni kubadika Ayi+ nawa amayala awu ejima adiña ayilobu. 3 Dichi Adonizedeki mwanta wakuYerusalema watemesheli awa mazu kudi Hohami mwanta wakuHebironi,+ Pirami mwanta wakuYarimuti, Yafiya mwanta wakuLakishi nikudi Debiri mwanta wakuEgiloni+ nindi: 4 “Twayenu munkwashi kulonda tumulukukenu Gibeyoni, muloña antu ashakamañamu anatiyañani chitiyañenu chakuwunda naYoshuwa niaIsarela.”+ 5 Hohenohu anyanta atanu awaAmori,+ mwanta wakuYerusalema, mwanta wakuHebironi, mwanta wakuYarimuti, mwanta wakuLakishi nimwanta wakuEgiloni, adipompesheli hamu namashidika awu nawa ayili nakuteekela kuGibeyoni kulonda azuñi nawu.
6 Kuhiñahu, amayala akuGibeyoni atemesheli mazu kudi Yoshuwa kuchilombu kuGiligali+ nawu: “Bayi wutuumba chisayikila etu* anduñu jeyiku.+ Twaya swayi-swayi! Twamwini nawa tukwashi! Anyanta ejima awaAmori ashakamaña mwiluña damapidi anadipompeshi kulonda atulukuki.” 7 Dichi Yoshuwa wakandukili kufuma kuGiligali hamu nawamayala ejima akakuzuña niakakuzuña njita añovu.+
8 Kufumahu, Yehova wamulejeli Yoshuwa nindi: “Bayi wuyitiya womaku,+ muloña wena nayihani kudi eyi.+ Kwosi niwumu hakachi kawu wukutwesha kukwimika mushinduku.”+ 9 Yoshuwa wayili nakuyilukuka chakadi wena kwiluka hanyima yakwenda wufuku wejima kufuma kuGiligali. 10 Yehova wayiluwañesheli hamesu awaIsarela+ nawa ayijahili amavulu chikupu kuGibeyoni, nakuyikumpisha munjila yakandukila kuBetihoroni nakuyitapa kushika kuAzeka nikuMakeda. 11 Hayitemukileñawu aIsarela nawa chashikiliwu hamukunkumuki waBetihoroni, Yehova wanokesheli nvula yamalola yeneni chikupu hadi wena mwiwulu kushika nikuAzeka, nawa ajilumukili. Kafwampi, owu afwili nanvula avulili kubadika ajahiliwu nampoku yakabali kudi aIsarela.
12 Hadodenodu ifuku Yehova hashindiliyi aAmori hamesu awaIsarela, Yoshuwa wahosheli kudi Yehova hamesu awaIsarela nindi:
13 Dichi itena demeni kuka-a nikakweji nikena hikaswininiku, sampu nichaditendeleli muza hadi ayilumbu jindi. Komana hiyachisoneka mumukanda waYashariku?+ Itena demeni kuka-a hakachi kaluzwizu nawa hidahumini swayiku, demeni kwakwihi nefuku damukuma. 14 Kanda kwikaleñahu dehi ifuku damuchidiwu, hela henohu idi ifuku kanda diikaliku hela hanyima yakwikalakuku, datiyililiyi Yehova mwizu damuntu,+ muloña Yehova wayizuñilileñaku aIsarela.+
15 Nkumininaku, Yoshuwa hamu nawaIsarela ejima afuntili kuchilombu kuGiligali.+
16 Haniyi mpinji, owu anyanta atanu atemukili nakuya nakuswama mwiyeñu kuMakeda.+ 17 Kufumahu, Yoshuwa amulejeli nawu: “Owu anyanta atanu anayiwani anaswami mwiyeñu kuMakeda.”+ 18 Dichi Yoshuwa wahosheli nindi: “Kalañumwinenuku malola amaneni kuwiñililu wanodu iyeñu nawa mushiku amayala kulonda ayihembeña. 19 Ilaña enu munashali, bayi mwimanaku. Yikumpishenu ayilumbu jenu nawa yitapilenuña kunyima.+ Bayi muyiteja eñili munyisumba yawuku, muloña Yehova Nzambi yenu nayihani mumakasa enu.”
20 Hanyima yakwila Yoshuwa niaIsarela anamanishi dehi kujaha antu amavulu nankashi kwakwihi nakuyijiyisha, kufumishaku hohu ayipuluka amu atemukili nakwiñila munyisumba yakiñewa, 21 antu ejima afuntili mukuwunda kudi Yoshuwa kuchilombu kuMakeda. Kwosi muntu niwumu wesekeli kuyihosha* aIsarela izu datama hela dimuku. 22 Kuhiñahu, Yoshuwa wahosheli nindi: “Kashinkulenu kuwiñililu wanodu iyeñu kulonda mwidishi owu anyanta atanu muyileti kudi ami.” 23 Dichi owu anyanta atanu ayifumishili mwiyeñu nakuyileta kudi yena. Adiña mwanta wakuYerusalema, mwanta wakuHebironi, mwanta wakuYarimuti, mwanta wakuLakishi nimwanta wakuEgiloni.+ 24 Chayileteliwu awa anyanta kudi Yoshuwa, yena watambikili amayala aIsarela ejima nawa walejeli akulumpi jawamayala akakuzuña njita owu ayili hamu nayena, nindi: “Twayenu kwakwihi. Datenu nyendu yenu hanyima yanshiñu janawa anyanta.” Dichi enjili kwakwihi nawa adatili nyendu yawu hanyima yanshiñu jawu.+ 25 Kuhiñahu, Yoshuwa wayilejeli nindi: “Bayi mutiya woma hela kufwa mutentuku.+ Ikalenu ahamuka nawa kolenu, muloña ichi dichikwilayi Yehova nawayilumbu jenu ejima imunakuzuña nawu.”+
26 kufumahu, Yoshuwa wayitapili nakuyijaha, wayikudikili hanyitondu yitanu nawa atwalekelihu kwikala hanoyu nyitondu kushika nimelela. 27 Hakuhuma kwetena, Yoshuwa walejeli antu nindi ayifumishihu hanyitondu+ nakuyinatila mwiyeñu muyaswaminiwu. Kuhiñahu, kuwiñililu weyeñu ashiliku malola amaneni nawa wenawa achidi kwoku nikulelu.
28 Hanodi ifuku, Yoshuwa walukukili musumba waMakeda+ nawa wawutapili nampoku yakabali. Wajilumwini mwanta wawu niantu ejima* adiñamu, chakadi kupulwishahu muntu hela wumu.+ Mwanta wakuMakeda+ wamwilili neyi chamwililiyi mwanta wakuYeriku.
29 Kuhiñahu, Yoshuwa hamu nawaIsarela ejima afumini kuMakeda nakuya kuLibina nawa azuñili naLibina.+ 30 Yehova wahanini niLibina hamu namwanta wawu+ muchikasa chawaIsarela nawa awujilumwini niantu ejima* adiñamu nampoku yakabali, chakadi kupulwishamu muntu hela wumu. Mwanta wawu amwilili neyi chamwililiwu mwanta wakuYeriku.+
31 Kufumahu, Yoshuwa hamu nawaIsarela ejima afumini kuLibina nakuya kuLakishi,+ ateekeleli kwenoku nawa azuñili nawu. 32 Yehova wahanini Lakishi muchikasa chawaIsarela, nawa wena awulukukili hefuku damuchiyedi. Awujilumwini niantu ejima* adiñamu nampoku yakabali+ neyi cheliliwu naLibina.
33 Kuhiñahu, Horami mwanta wakuGezeri+ wayili nakumukwashaku Lakishi, ilaña Yoshuwa wamujahili niantu jindi sampu nichajilumwiniyi antu ejima chakadi kupulwishahu muntu hela wumu.
34 Kufumahu, Yoshuwa hamu nawaIsarela ejima afumini kuLakishi nakuya kuEgiloni,+ ateekeleli kwenoku nawa azuñili nawu. 35 Awulukukili hadodenodu ifuku nawa awutapili nampoku yakabali. Hadodenodu ifuku, ajilumwini niantu ejima* adiñamu neyi cheliliwu naLakishi.+
36 Kuhiñahu, Yoshuwa hamu nawaIsarela ejima akandukili kufuma kuEgiloni nakuya kuHebironi+ nawa azuñili nawu. 37 Awulukukili nawa awutapili nampoku yakabali, mwanta wawu, matawuni* awu niantu ejima* adiñamu, chakadi kupulwishahu muntu hela wumu. Wawujilumwini niantu ejima* adiñamu neyi cheliliyi naEgiloni.
38 Nkumininaku, Yoshuwa hamu nawaIsarela ejima abalumukili nakuya kuDebiri+ nawa azuñili nawu. 39 Wawulukukili, mwanta wawu, matawuni* awu ejima niantu ejima* adiñamu nawa wayitapili nampoku yakabali nakuyijilumuna,+ chakadi kupulwishahu muntu hela wumu.+ Wajilumwini Debiri nimwanta wawu neyi cheliliyi naHebironi niLibina nimwanta wawu.
40 Yoshuwa wemikili mushindu ituña dejima damapidi, Negebi, Shefela,+ nyikunkumuki nianyanta jawu ejima, chakadi kupulwishahu muntu hela wumu. Wajilumwini yuma yejima yonaña+ neyi chashimwiniyi Yehova Nzambi yaIsarela.+ 41 Yoshuwa wayimikili mushindu kutachikila kuKadeshi Baraneya+ kushika nikuGaza+ nikwituña dejima daGosheni+ kushika nikuGibeyoni.+ 42 Yoshuwa wayijilumwini awa anyanta ejima nimatuña awu, welili mwenimu hampinji yimu hohu, muloña Yehova Nzambi yaIsarela diyi wayizuñilileñaku aIsarela.+ 43 Kuhiñahu, Yoshuwa wafuntili hamu nawaIsarela ejima kuchilombu kuGiligali.+