MUKANDA WATACHI KUDI AKORINDA

1 Ami Pawulu, atambikiliwu kwikala kapostolu kaKristu Yesu kwesekeja nankeñelu yaNzambi, nidi hamu namanakwetu Soseteni, 2 inakuyisonekela enu mudi muchipompelu chaNzambi chidi muKorinda, enu ajilikawu dehi kwikala atumbanji twaKristu Yesu, enu atenañawu kwikala akwakujila, hamu nawantu ejima adi kumaluña ejima owu anakutambika hejina daMwanta wetu Yesu Kristu, Mwanta wawu nawa wetu:

3 Luwi lwasweja nikuwunda jafumaña kudi Tata yetu Nzambi nikudi Mwanta Yesu Kristu jiikali nanenu.

4 Enu nayisakililañaku kudi Nzambi yami mpinji yejima muloña waluwi lwaNzambi lwasweja lwayitiyililiyi enu kuhitila mudi Kristu Yesu; 5 muloña munatambwili yuma yejima kuhitila mudi yena, kushilahu niwuswa wakushimwina izu daNzambi niwakwiluka kwejima, 6 neyi chinashimatishiwu wunsahu chikupu wahosha hadi Kristu mukachi kenu, 7 kulonda mubuli kukaankila chawaana chidi chejima, hampinji yimunakutalila chikupu mpinji yakamusololawu Mwanta wetu Yesu Kristu. 8 Nawa Nzambi wakayikolesha kushika nikunsa, kulonda kukabuli chuma chakuyinkelahu muloña kudi muntu hela wumu mwifuku daMwanta wetu Yesu Kristu. 9 Nzambi washinshika, diyi wayitambikili kulonda mukalakeleña hamu naMwanindi Yesu Kristu, Mwanta wetu.

10 Ichi dinu inakuyilembelela enu anakwami mwijina daMwanta wetu Yesu Kristu nami, wejima wenu muhosheña yuma yoyimu nawa bayi hekala chaambu hakachi kenuku, ilaña nami mwiikali anuñañana muyitoñojoka nawa mutoñojokeña hayuma yoyimu. 11 Muloña antu amu amwitala daKolowe ananleji yuma yimu kutalisha hadi enu anakwami nawu, munakutiyañana wanyi mukachi kenu. 12 Hakuhosha awa mazu, natalishi mukwila nami, muntu-himuntu mukachi kenu nakuhosha nindi: “Ami nidi muntu waPawulu,” mukwawu nindi “Ami nidi muntu waApolosi,” mukwawu niyena nindi “Ami nidi muntu waKefwasi,”* mukwawu nawa nindi “Ami nidi muntu waKristu.” 13 Komana Kristu wambokelamu tahindi? Komana Pawulu amujahilili hamutondu muloña wanenu tahindi? Hela, komana ayipapatishili mwijina daPawulu tahindi? 14 Namusakilili Nzambi muloña kwosi muntu hela wumu inapapatishili hakachi kenuku, chiña hohu Kirisipu niGayusi, 15 kulonda mukachi kenu mubuli kwikala muntu hela wumu wukuhosha nindi amupapatishili mwijina dami. 16 Diimu, napapatishili niamwitala daStefwanasi. Ilaña mukachi kenu, neluki wanyi neyi muduhu muntu inapapatishili hela nehi. 17 Muloña Kristu wantemesheli, bayi nakupapatishaku, ilaña nakushimwina nsañu yayiwahi; nawa bayi namaana akwiluka kuhoshaku,* kuchiina mutondu waKristu wakumuyandishilahu* abuli kuwumona kwikala wamukunkulwayi.

18 Muloña mazu ahosha hamutondu wakuyandishila,* ayimonaña nawu hiwusupi kudi antu anakuya nakujilumuka, ilaña kudi etu anakwamwinawu, twayimonaña netu hiñovu jaNzambi. 19 Muloña chasonekewa nawu: “Nakanoñesha maana awakwamaana, nawa kubabala kwawantu ababala nakakukaana.”* 20 Indi mukwamaana wudi kudihi? Indi nsoneki* wudi kudihi? Indi mukwantaadi wamunshakaminu yamakonu* wudi kudihi? Komana Nzambi hanabalumuni maana amukaayi kwikala wusupiku? 21 Chineli kuhitila mumaana aNzambi, kaayi hikamwilukili Nzambi namaana akuku, Nzambi watiyili kuwaha kwamwina antu etiyaña kuhitila munsañu yashimwinañawu oyu yamonañawu antu amakwawu nawu hiwusupi.

22 Muloña aYudeya alombaña nawu ayimwekesheli yinjikijilu, aGiriki niwena akeñakeñaña maana; 23 ilaña etu twashimwinaña hadi Kristu ajahililiwu hamutondu, kudi aYudeya chumichi hichuma chakuhukesha, ilaña kudi akwanyuza hiwusupi. 24 Hela chochu, kudi owu atambikawu dehi, aYudeya niaGiriki, mudi Kristu dimu mwamwekenaña ñovu jaNzambi nimaana aNzambi. 25 Muloña chuma chaNzambi chamonañawu antu nawu hiwusupi, chumochu chikweti maana kubadika antu, nawa chuma chaNzambi chamonañawu antu nawu chakola wanyi, chumochu chakola kubadika antu.

26 Enu anakwami, munamoni nenu chayitambikiliyi, bayi neyi enu amavulu mwadiña namaana akumujimbaku,* enu amavulu himwadiña akwañovuku, enu amavulu himwadiña avwalika kuyisaka yalemaku, 27 ilaña Nzambi watondeli yuma yamukanu kaayi yamonañawu antu nawu hiwusupi kulonda yatiyishi nachu nsonyi antu akwamaana. Nawa Nzambi watondeli yuma yamukaayi yamonañawu antu nawu yakola wanyi kulonda yatiyishi nachu nsonyi yuma yakola; 28 nawa Nzambi watondeli yuma yabula kulema yamukaayi niyuma yadiwulañawu antu niyuma yabula kwikalaku, kulonda yajilumuni nachu yuma yekalaku, 29 kulonda kubuli kwikala muntu* hela wumu wukudisamba kumesu aNzambi. 30 Ilaña hamuloña wayena, munadikundi naKristu Yesu owu wunekali kudi etu maana akufuma kudi Nzambi, diyi cheñi kuloña, diyi kujila nawa diyi nkuuli kuhitila mwifutu danyiloña, 31 kulonda chiikali neyi chochasonekawu nawu: “Muntu wadisambaña, yadisambileña mudi Yehova.”

2 Dichi, enu anakwami, chinenjili kudi enu nakushimuna yuma yajila yakujinda yaNzambi, hinazatishileña mazu akala kutiya hela kudimwekesha nami nikweti maanaku. 2 Muloña hampinji yinadiña hakachi kenu, nafuukwilihu kubula kwiluka chuma chidi chejima, chiña hohu Yesu Kristu, owu ajahililiwu hamutondu. 3 Nawa chinenjili kudi enu, nadiña wazeya, natiyileña woma nikuzaala chikupu; 4 nawa nhoshelu yami niyuma yinashimwinineña himwadiña mazu amaana akushinjilaku, ilaña yamwekesheleña spiritu niñovu, 5 kulonda chikuhwelelu chenu chibuli kwikala mumaana awantu, ilaña chiikali muñovu yaNzambi.

6 Dichi, twahoshaña yuma yamaana kudi antu apama, ilaña, bayi neyi maana anshakaminu yamakonuku,* hela maana awanyuuli anshakaminu yamakonu owu akaleka kwikalakuku. 7 Ilaña twahoshaña maana aNzambi amuyuma yajila yakujinda, wowu maana ajindawu, owu atoñweleliyi Nzambi chadimu henohu nshakaminu yamakonu kanda yiikaliku kulonda atulemeshi. 8 Awa diwu maana akañanya kwilukawu kudi nyuuli hela wumu wamunshakaminu yamakonu,* muloña neyi ayilukili, mutenowu, Mwanta wakulema hiyadi kumujahaku.* 9 Ilaña neyi chochasonekawu nawu: “Yuma yaloñeshelayi Nzambi antu amukeña, mesu akañanya kuyimona, matu niwena akañanya kuyitiya, nawa hiyeñililihu mumuchima wamuntuku.” 10 Muloña Nzambi natusolweliyu naspiritu yindi, muloña spiritu yasandujolaña muyuma yejima, kushilahu nimuyuma yakunama yaNzambi.

11 Kwosi muntu weluka chatoñojokaña mukwawu muntuku. Muntu yomweni diyi welukaña yuma yidi mumuchima windi. Dichi, kwosi muntu weluka yuma yaNzambiku, chiña hohu spiritu yaNzambi. 12 Etu hitwatambwilili spiritu yamukaayiku, ilaña twatambwilili spiritu yafumaña kudi Nzambi kulonda tutiyishi nakanañachima yuma yinatwinkiwu kudi Nzambi munjila yakukeña. 13 Cheñi, iyi yuma yitwahoshaña, hitwayihoshaña namazu iyatañishañawu namaana awantuku, ilaña namazu iyatañishañawu naspiritu yajila, hampinji yitwalumbululaña yuma yakuspiritu kuhitila mukuzatisha mazu akuspiritu.

14 Ilaña muntu wakumujimba, wetejaña* wanyi yuma yaNzambi yakuspiritu, muloña kudi yena yumiyi hiwusupi; nawa hanatweshi kuyilukaku, muloña ayesekaña munjila yakuspiritu. 15 Hela chochu, muntu wakuspiritu wesekaña yuma yejima, ilaña yena hiyamwesekaña kudi muntu hela wumuku. 16 Muloña “hinyi wuneluki yitoñojoka yaYehova kulonda yamudizishi?” Ilaña etu tukweti yitoñojoka yaKristu.

3 Dichi enu anakwami, hinatwesheli kuhosha nanenu neyi chahoshelañawu antu alombolañawu kudi spirituku, ilaña nahosheli nenu neyi chahoshelañawu antu afwilaña yuma yakumujimba, nawa neyi kudi anyikeki mudi Kristu. 2 Nayinwishili mayeli, hinayidiishili yakuda yakolaku, muloña mwachidiña kanda mukoli chikupu. Kafwampi, nihayinu mpinji muchidi kanda mukoli chikupu, 3 muloña muchidi antu akumujimba. Chineli mukachi kenu mudi ichima niyikonkojola, komana himuchidi antu akumujimba nawa himunakwenda neyi chendañawu antu akumujimbaku, tahindi? 4 Muloña neyi muntu wumu wukuhosha nindi, “Ami nidi muntu waPawulu,” mukwawu niyena nindi, “Ami nidi muntu waApolosi,” komana himunakwila neyi chelañawu antu amukaayiku, tahindi?

5 Hanu dinu, Apolosi diyinyi? Nawa cheñi, Pawulu diyinyi? Hiyakwakukalakala ayikwashili enu kubalumuka nakwikala akwakwitiya, neyi chayinkeliwu mudimu wakuzata kudi Mwanta hamuntu-hamuntu. 6 Ami natumbili, Apolosi watukumwinini, ilaña Nzambi diyi wayikulishileña, 7 dichi muntu watumbaña hela watukumwinaña, hiyatela kumulemeshaku, chiña hohu Nzambi wayikulishaña. 8 Dichi muntu watumbaña nimuntu watukumwinaña adi hohamu,* ilaña muntu-himuntu wakatambwila wufwetu windi kwesekeja namudimu windi. 9 Muloña etu tudi akwakukalakala hamu naNzambi. Enu mudi iha, odu dinakudimayi Nzambi, mudi itala daNzambi.

10 Kwesekeja naluwi lwaNzambi lwasweja lwantiyililiyi, naalili chikuku neyi mukwakutuña matala wakuluka yitembi,* ilaña muntu wacheñi diyi wunakutuñahu. Ilaña muntu-himuntu yekali wasoñama kulonda yeluki ochu chinakutuñayi hanichi chikuku. 11 Muloña kwosi muntu mukwawu wunateli kwaala chikuku kubadika chinaaliwu dehiku, dikwila nawu Yesu Kristu. 12 Dichi neyi muntu wumu yatuña hachikuku kuzatisha wuru, hela siliva, hela malola alema wuseya, nawa mukwawu niyena yatuñahu kuzatisha nyitondu, hela matahu, hela nsaachi, 13 mudimu wamuntu-himuntu wakamwekana* chiwudi neyi ifuku dinenzi. Neyi wunahiti dehi mukesi, dihakelukawu mudimu wamuntu-himuntu neyi chakwila wadiña wawuwahi hela nehi. 14 Neyi chakwila kesi kabula kwocha chuma chatuñililiyi muntu hachikuku, wakatambula wufwetu; 15 ilaña neyi mudimu wamuntu wuha nakesi, dikwila nawu mudimu wazatiliyi wunakisiki, ilaña yena yomweni akamwamwina; yeniwu muntu wakekala neyi kwiji antu anahukuliwu mukesi.

16 Komana enu himweluka nenu yenu tembeli yaNzambi nawa spiritu yaNzambi yashakamaña mudi enuku, tahindi? 17 Neyi muntu yakisañana tembeli yaNzambi, Nzambi niyena wakamukisañana; muloña tembeli yaNzambi yajila, nawa enu yenu oyu tembeli.

18 Bayi muntu yadidimbaku: Neyi muntu wumu mukachi kenu yatoñojoka nindi wudi namaana muyinu nshakaminu yamakonu,* yekali chisupi hakwila nawu yekali mukwamaana. 19 Muloña Nzambi wamonaña maana amukanu kaayi nindi hiwusupi, muloña chasonekewa nawu: “Walekaña antu akweti maana kufwa mumuhetu wakudimbana kwawu aweni.” 20 Cheñi nawa: “Yehova weluka nindi yitoñojoka yawakwamaana yamukunkulwayi.” 21 Dichi muntu bayi yadisambila mudi akwawu antuku; muloña yuma yejimiyi yenwenu, 22 hela Pawulu, hela Apolosi, hela Kefwasi,* hela kaayi, hela wumi, hela kufwa, hela yuma yidiku hela yuma yakenza, yuma yejimiyi yenwenu; 23 enu mudi antu jaKristu; Kristu niyena waNzambi.

4 Muntu watela kutumona nindi tudi akwakukalakela Kristu nawa anhembi ayuma yaNzambi yajila yakujinda. 2 Dichi, chuma chakeñekaña kudi anhembi, hikwikala ashinshika. 3 Kudi ami, hichuma chamukunkulwayi kunshinshika kudi enu hela kudi chota chanyiloña. Kafwampi, hela ami aweni hinadishinshikañaku. 4 Muloña ami hinelukahu chuma hela chimu chakudinkelahu muloña ami aweniku. Hela chochu, hinadimonaña kwikala waloñaku; ilaña Yehova diyi hohu wanshinshikaña. 5 Dichi bayi musompesha chuma hela chimu henohu mpinji yatelela kanda yishikiku, sampu Mwanta nenzi dehi. Yena wakasolola hatooka yuma yakujinda yamumwidima nikumwekesha yitoñojoka yidi munyichima yawantu, nawa kuhiñahu, muntu-himuntu akamuhameka kudi Nzambi.

6 Dichi enu anakwami, iyi yuma yinnahoshi nayikundamishi kudi ami aweni nikudi Apolosi kulonda enu muhetelimu, nami kuhitila mudi etu mwiluki ilu lushimbi lwakwila nawu: “Bayi mubadika* hayuma yasonekawuku,” kulonda mubuli kudinka wanta nawa mubuli kulemesha muntu wumu nakusekesha mukwawu. 7 Muloña, hinyi wakuleñelaña wudimoneña neyi wabadika mukwenu? Hanu dinu, chumanyi chiwukweti chiwabulili kutambwila? Dichi, neyi wachitambwilili, muloñadi chiwadisambilaña neyi kwiji wachitambwilili wanyi?

8 Komana enu munekuti dehi tahindi? Komana munaheti dehi tahindi? Komana munatachiki dehi kuyuula neyi anyanta chakadi etu tahindi? Chadi kuwaha neyi mwatachikili dehi kuyuula neyi anyanta kulonda ninetu tuyuulili hamu nanenu neyi anyanta. 9 Muloña ami namoni nami Nzambi natuleti etu apostolu kwikala antu akukumininaku, anatoñweliwu kufwa, kulonda antu ejima amoni, muloña tunekali chuma ochu chinakutalawu kudi kaayi, nikudi añelu nikudi antu. 10 Etu tudi ayisupi kukoola Kristu, ilaña enu mukweti maana mudi Kristu; etu twazeya, ilaña enu mwakola; enu anakuyilemesha, ilaña etu anakutusawula. 11 Kushika nihayinu ora tunatwalekihu nanzala, nimpwila, niwuvu,* nikutweta, nikubula matala, 12 nikukabakana, nikuzata nyidimu namakasa etu. Neyi atutuka, etu twayikiswilaña; neyi atukabisha, etu twomikaña nakudiwunjika; 13 neyi atutwambila, etu twayakulaña munjila yakudizoza;* tunekali neyi nswadi* yakaayi, neyi yuma yejima yawuzondu kushika nikulelu.

14 Inakuyisonekela yumiyi, bayi neyi nalondi nami niyitiyishi nsonyiku, ilaña nami niyifumbi neyi anyanami inakeña. 15 Muloña hela chakwila mudi nawakwakuyihemba* 10,000 mudi Kristu, himudi nawatata jenu amavuluku; muloña mudi Kristu Yesu dimu mwinnekalili tata yenu kuhitila munsañu yayiwahi. 16 Dichi, inakuyilembelela nami, mwiikali akwakuñimbujola. 17 Dichi chinaleteshi nimutemeshi Timotewu kudi enu, muloña himwanami inakeña nawa washinshika mudi Mwanta. Wakayanukisha njila jami jinelilañamu yuma mumudimu waKristu Yesu, neyi chochinatañishaña kwejima muchipompelu-hichipompelu.

18 Antu amu anakudinka wanta neyi kwiji ami inakwinza kudi enu wanyi. 19 Ilaña neyi Yehova neteji, inakwinza kudi enu katataka, nakeluki ñovu jawantu anakudinka wanta, bayi neyi nhoshelu yawuku. 20 Muloña Wanta waNzambi hiwashindamena hayuma yahoshañayi muntuku, chiña hañovu. 21 Chuma chidihi chimukukeña? Mukukeña nakenzi kudi enu nambwechi tahindi nakenzi nakukeña nispiritu yakwovwaha?

5 Kafwampi, chinatiyakani nawu mukachi kenu munakwila wuvumbi,* wakwila nawu muntu nakushakama* nañoda tata yindi, nawa iwu wuvumbi* wumunakwila hiwawanikaña nimudi akwanyuzaku. 2 Komana enu munakutiya kuwaha hachuma chamuchidiwu tahindi? Komana himwatela kudishona kulonda owu muntu wuneli iwu wuvumbi amufumishi mukachi kenuku, tahindi? 3 Hela chakwila kumujimba nidi hamu nanenu wanyi, kuspiritu nidi hamu nanenu, nawa muntu wuneli chumichi ami namusompeshi dehi, neyi kwiji nadiña hamu nanenu. 4 Neyi munapompi hamu mwijina daMwanta wetu Yesu, nikwiluka nenu ami nidi nanenu muspiritu hamu nañovu yaMwanta wetu Yesu, 5 mwatela kuhana muntu wamuchidiwu kudi Satana kulonda yajilumuni mujimba windi, hakwila nawu spiritu akayamwini mwifuku daMwanta.

6 Kudisamba kwenu kwakuwahi wanyi. Komana enu, himweluka nenu iluñi dantesha davuvumwishaña chikanka chejimaku, tahindi? 7 Fumishenu iluñi dadikulu didi mudi enu kulonda mwiikali chikanka chachiha, chineli munekali dehi abulaña kuvuvumuka.* Muloña Kristu wekala mwana kamukoku wetu waChipandakenu, anamulambuli dehi. 8 Dichi, tuhembenuña chawija, bayi neyi cheluñi dadikulu hela cheluñi datama nawa danshidiku, ilaña chadinkendi dakadi iluñi dadiwahi nawa dalala.

9 Mumukanda wami nayisonekeleli nami, muleki kudibomba* nawantu elaña wuvumbi,* 10 bayi neyi nawantu elaña wuvumbi* amukanu kaayi, akwalwisu, atupondu hela akwakupeshaku. Muloña neyi chadiña mwenimu, mutenowu mwadi kufuma mukaayi. 11 Ilaña inakuyisonekela nami, muleki kudibomba* namuntu wejima atenañawu nawu manakwetu owu welaña wuvumbi,* wukweti lwisu, wapeshaña, watukanaña,* mukwakusheta hela kapondu, muntu wamuchidiwu himwatela nikudiila nindi hamuku. 12 Komana kusompesha antu abula kwikala muchipompelu himudimu wami tahindi? Komana enu, hiyenu mwasompeshaña antu adi muchipompeluku, tahindi? 13 Komana Nzambi, hidiyi wasompeshaña antu adi mukaayiku, tahindi? “Fumishenu muntu watama wudi mukachi kenu.”

6 Neyi mukachi kenu mudi muntu wudi namuloña namukwawu, komana wakeñaña nindi yamutwali kuchota chanyiloña kumesu awantu abula kuloña, chatela yamutwali kudi akwakujila tahindi? 2 Hela, komana enu mweluka wanyi nenu akwakujila akasompesha kaayi tahindi? Dichi neyi enu yenu mwakasompesha kaayi, komana himunateli kusompa nitunyiloña twanyanyaku, tahindi? 3 Komana mweluka wanyi nenu etu twakasompesha añelu tahindi? Hanu dinu, tukukañenyadi kusompa nyiloña yamunshakaminu yamakonu? 4 Dichi neyi mudi nansañu yimunakukeña kusompa muyinu nshakaminu yamakonu, komana owu antu imwamonaña enu chipompelu nenu amukunkulwayi, diwu imwakeñaña nenu ayisompeli tahindi? 5 Inakuhosha mwenimu kulonda niyitiyishi nsonyi. Komana hakachi kenu, hosi muntu wudi namaana wunateli kusompela anakwindi nyiloña tahindi? 6 Ilaña mukuwana manakwetu nakutwala manakwindi kuchota chanyiloña nakwimana kumesu awantu abula kwitiya.

7 Kuhosha hohu chalala, neyi mukutwala manakwenu kuchota chanyiloña, dikwila nawu munaluwañeshi. Muloñadi chimwabulilaña kuumika neyi anayiluwañeshi? Cheñi nawa, muloñadi chimwabulilaña kuumika neyi anakuyidimbeka? 8 Ilaña, ninenu mwaluwañeshaña nikudimbeka anakwenu.

9 Komana enu, mweluka wanyi nenu antu abula kuloña hiyamba kaswana Wanta waNzambiku, tahindi? Bayi ayiluwañeshaku. Antu elaña wuvumbi,* akwakupesha, akwawujila, amayala etejaña kuyikaama kudi akwawu amayala, amayala adikaamaña nawakwawu amayala,* 10 amakombi, antu akweti lwisu, akwakusheta, atukanaña,* atupondu, hiyamba kaswana Wanta waNzambiku. 11 Enu amakwawu dichi chimwadiña. Ilana anayiweleshi nakuyitookesha; anayijiliki; anayiteni nawu mwaloña mwijina daMwanta Yesu Kristu nimudi spiritu yaNzambi yetu.

12 Kudi ami, yuma yejima ayiteja munshimbi, ilaña bayi neyi yuma yejima yayiwahiku. Kudi ami, yuma yejima ayiteja munshimbi, ilaña hinukwiteja kunyuula kudi chuma hela chimuku. 13 Yakuda yevumu, nawa ivumu dekalilaku muloña wayakuda, ilaña Nzambi wakakisañana ivumu niyakuda. Mujimba hiwekala wawuvumbiku,* ilaña wekala waMwanta, Mwanta niyena wekala wamujimba. 14 Ilaña Nzambi wamusañwili Mwanta, ninetu nawa wakatusañula kufuma mudi afu kuhitila muñovu jindi.

15 Komana mweluka wanyi nenu nyijimba yenu hiyiidi yaKristuku, tahindi? Dichi, komana ami nateli kusenda yiidi yaKristu nakuyilisha kwikala yiidi yamujimba wachivumbi? Inehi! 16 Komana mweluka wanyi nenu muntu wunadinuñi kudi chivumbi nekali mujimba wumu hamu nindiku? Muloña Nzambi wahosha nindi: “Wejima wawu ayedi akekala mujimba wumu.” 17 Ilaña muntu wukudinuña kudi Mwanta, nekali wumu nayena muspiritu. 18 Temukenu wuvumbi!* Neyi muntu yakoña nshidi yidi yejima, oyu nshidi hiyakatishaña mujimba windiku, ilaña muntu welaña wuvumbi wakatishaña mujimba windi yomweni. 19 Komana mweluka wanyi nenu mujimba wenu hitembeli yaspiritu yajila yidi mudi enu, oyu yimwatambwilili kudi Nzambi tahindi? Cheñi nawa, himwadiheta enu aweniku, 20 muloña ayilandili nawuseya walema. Dichi, mulemeshenu Nzambi mumujimba wenu.

7 Dichi, kutalisha hayuma yimwasonekeli, chachiwahi iyala kubula kukwatujola* mumbanda hamujimba; 2 ilaña muloña wakwila wuvumbi* wunasweji, iyala wejima yekali nañodindi yomweni, nawa mumbanda wejima yekali nanfumwindi yomweni. 3 Iyala yamwinkeña ñodindi yuma yatela kumwinkayi, nawa mumbanda niyena yeleña mwomumu kudi nfumwindi. 4 Mumbanda hakweti wuswa hamujimba windiku, ilaña nfumwindi diyi wukweti wuswa; chochimu nawa, iyala niyena hakweti wuswa hamujimba windiku, ilaña ñodindi diyi wukweti wuswa. 5 Bayi muduminaña yuma yimwatela kudinkaku, chiña muwuyedi wenu neyi munatiyañani kubula kwila mwenimu hampinji yimu kulonda mwiikali nampinji yakulomba, kuhiñahu mwatela kudibulakana cheñi hamu kulonda Satana yabuli kutwalekahu kuyeseka muloña wakubula kudiyuula. 6 Inakuyiteja nami mwili munahosheli, hela chochu, bayi neyi hilushimbi lwakwila nawu chiña hohu mulovwahiliku. 7 Ilaña, nafwili nami antu ejima kachi adiña neyi chinekala ami. Hela chochu, muntu-himuntu wukweti chawaana chindi chamwinkawu kudi Nzambi, iwu namwindi, iwu namwindi.

8 Dichi, inakuleja ajiki nianfwila nami, chachiwahi kudi wena neyi atwalekahu kushakama neyi chinidi ami. 9 Ilaña neyi hiyakutwesha kudiyuulaku, atela kusumbula hela kusumbuka, muloña chachiwahi kusumbula hela kusumbuka kubadika kukabakana nampwila yakufwila kudikaama.

10 Antu adisumbula inakuyinka nshimbi, bayi neyi amiku, ilaña Mwanta diyi, nami mumbanda bayi yaambuka* nanfumwindiku. 11 Ilaña neyi yaambuka, watela kushakama chakadi kusumbuka, neyi nehi, watela kufunta kudi nfumwindi; iyala niyena hatela kushiya ñodindiku.

12 Ilaña kudi antu amakwawu, ami, bayi neyi Mwantaku, inakuyileja nami: Neyi manakwetu wudi namumbanda wabula kwitiya nawa owu mumbanda neteji kushakama hamu nindi, owu manakwetu hatela kumushiya iwu mumbandaku; 13 nawa neyi mumbanda wudi neyala wabula kwitiya nawa owu iyala neteji kushakama hamu nindi, owu mumbanda hatela kumushiya iwu nfumwindiku. 14 Muloña iyala wabula kwitiya najilikewi namuloña wañodindi, nimumbanda wabula kwitiya najilikewi namuloña wamanakwetu; neyi nehi, anyanenu akwikala amajilu, ilaña ichi ajila. 15 Ilaña neyi muntu wabula kwitiya yatondahu kwaambuka, mulekenu yaambuki; manakwetu hela muhela hanakasiki munsañu yamuchidiwuku, ilaña Nzambi nayitambiki kulonda mushakami mukuwunda. 16 Eyi mumbanda, komana wuneluki wanyi neyi hadaha wakamwina nfumweyiku, tahindi? Hela eyi iyala, komana wuneluki wanyi neyi hadaha wakamwina ñodeyiku, tahindi?

17 Hela chochu, muntu-himuntu kwesekeja nachawaana chamwinkawu kudi Yehova, yendeña kwesekeja nanochu chamutambikiliwu kudi Nzambi. Dichi, inakuleja niyipompelu yejima ilu lushimbi. 18 Kudihu muntu wadiña waalama dehi hampinji yamutambikiliwu tahindi? Bayi yadifuntisha kuwudimaku. Kudihu muntu anatambikiwu henohu hichidima tahindi? Bayi amwalamishaku. 19 Kwalama hichumaku, nawa kubula kwalama nikwena hichumaku, chuma chalema yowu kuhemba nshimbi jaNzambi. 20 Muntu-himuntu yatwalekihu kushakama kwesekeja nachadiñayi hampinji yamutambikiliwu. 21 Komana akutambikili iku wudi nduñu tahindi? Bayi wakama muloña wachumichiku; ilaña neyi wukutwesha kwikala wakasunuka, zatishaku oyu mpinji. 22 Muloña muntu atambikiliwu mudi Mwanta henohu hinduñu, nekali muntu asubulawu waMwanta; chochimu nawa, muntu atambikiliwu henohu himuntu wasubuka, nekali nduñu yaKristu. 23 Ayilandili nawuseya walema; lekenu kwikala anduñu awantu. 24 Enu anakwami, muntu-himuntu yatwalekihu kushakama kumesu aNzambi kwesekeja nachadiñayi hampinji yamutambikiliwu.

25 Kutalisha kudi ajiki,* hinikweti mazu akuyileja anafumi kudi Mwantaku, ilaña inakuyileja mwinnatoñojoki, nawa chineli Mwanta nantiyili luwi munateli kukuhwelela yuma yinnakuhosha. 26 Dichi, kwesekeja nanshakaminu yamakonu yakala, natoñojoki nami chachiwahi muntu kutwalekahu kushakama kwesekeja nanochu chadiyi. 27 Komana eyi wakasika kudi ñodeyi tahindi? Lekaku kukeñakeña njila yakukasunukilamu. Komana eyi wakasunuka kudi ñodeyi tahindi? Lekaku kukeñakeña mumbanda. 28 Ilaña, hela neyi wukusumbula hela kusumbuka, hiwukuvulumunaku. Nawa neyi mujiki* yasumbula hela yasumbuka, muntu wamuchidiwu hanavulumuniku. Hela chochu, antu akusumbula hela akusumbuka akumonaña yihuñu mumujimba wawu. Ilaña ami inakufwila kuyikiña.

29 Kubombelahu, enu anakwami, mpinji yinashaliku yinakehi dehi. Dichi kufuma tuhu hayinu mpinji, amayala adi nawañodi jawu, ekali neyi kwiji hiyakwetiku, 30 nawa antu adilaña, ekali neyi kwiji antu abulaña kudila, antu azañalalaña, ekali neyi kwiji antu abulaña kuzañalala, niantu alandaña, ekali neyi kwiji antu abula yuma, 31 nawa antu anakuzatisha kaayi, ekali neyi kwiji antu anakubula kukizatisha chikupu; muloña yuma yamukaayi yinakuhimpika. 32 Chalala, inakukeña mubuleña kwakama. Iyala wabula kusumbula wakamenaña yuma yaMwanta kulonda yawani njila yakumutiyishilamu Mwanta kuwaha. 33 Ilaña, iyala wasumbula wakamenaña yuma yamukaayi kulonda yawani njila yakumutiyishilamu ñodindi kuwaha, 34 nawa washaña maana kuyuma yiyedi. Kubombelahu, mumbanda wabula kusumbuka, kushilahu nimujiki,* washaña maana kuyuma yaMwanta kulonda yekali wajila kumujimba nikuspiritu. Ilaña, mumbanda wasumbuka wakamenaña yuma yamukaayi kulonda yawani njila yakumutiyishilamu nfumwindi kuwaha. 35 Inakuhosha yumiyi kulonda enu muhetelimu, bayi neyi inakukeña kuyikañeshaku,* ilaña, inakukeña kuyikwasha kulonda mwileña yuma yatelela nikutwalekahu kumukalakela Mwanta namuchima wumu mpinji yejima chakadi kuyiluwañesha.

36 Ilaña, neyi muntu namoni nindi nakañanyi kushakama wujiki nawa neyi nahiti dehi muyaaka yawansi, ichi dichi chatela kwilayi: Yeli munakukeñayi; hanavulumuniku. Yasumbuli hela yasumbuki. 37 Ilaña neyi muntu yafuukulahu mumuchima windi nawa hanakukabakanaku, wudi nawuswa wakudihemba hachuma chinakukeñayi nawa nadikasi mumuchima windi kubula kusumbula hela kusumbuka,* neli chiwahi. 38 Dichi nawa, nimuntu wejima wukusumbula hela wukusumbuka neli chiwahi, ilaña muntu wukubula kusumbula hela kusumbuka, diyi wunabadiki kwila chachiwahi.

39 Kwesekeja nanshimbi, mumbanda wasumbuka wakasika kudi nfumwindi hampinji yichidiyi nfumwindi wamumi. Ilaña neyi nfumwindi yafwa, watela kusumbuka cheñi kudi iyala wejima anakeñiyi, hela chochu, chiña hohu mudi Mwanta. 40 Ilaña kwesekeja nayitoñojoka yami, neyi yashakama neyi chochadiyi, wakabadika kwikala namuzañalu; nawa chakadi nikujina, inakutoñojoka nami, ninami nidi naspiritu yaNzambi.

8 Dichi, kutalisha hayakuda yinalambuliwu antu kudi ankishi: Wejima wetu tuneluki chikupu chumichi. Kwiluka kwaleñelaña kudinka wanta, ilaña kukeña kwatuñaña. 2 Neyi muntu yatoñojoka nindi weluka chuma, dikwila nawu kanda yeluki yuma yejima kutalisha hanochu chuma. 3 Ilaña neyi muntu wamukeña Nzambi, dikwila nawu iwu muntu amwiluka kudi yena.

4 Dichi, kutalisha hakuda yakuda yinalambuliwu antu kudi ankishi, tweluka netu nkishi wamukunkulwayi mukaayi, nawa kwekala Nzambi wumu hohu. 5 Muloña hela chakwila kudi amakwawu atenañawu nawu anzambi, chili mwiwulu hela hamaseki, neyi chochikwekala “anzambi” amavulu “nianyanta” amavulu, 6 ilaña, kudi etu kudi Nzambi wumu hohu, yowu Tata, kwafumaña yuma yejima, etu twekalilaku muloña wayena; nawa kudi hohu Mwanta wumu, Yesu Kristu, mudi yena dimwaleñeleliwu yuma yejima, ninetu twekalaku kuhitila mudi yena.

7 Hela chochu, bayi neyi antu ejima eluka chumichiku. Ilaña antu amu, chineli kunyima apesheleña ankishi, neyi ada yakuda nawa ayimona nawu hiyuma yakulambula kudi ankishi, chinleji chawu chamuchima chazeya, chatamaña. 8 Hela chochu, yakuda yikutukundamisha wanyi kwakwihi naNzambi; neyi tubula kuda, hitunatamishiku, hela neyi tuda, hitunawahishiku. 9 Ilaña, babalenu kulonda wuswa wenu wakutonda wubuli kwikala chuma chakuhukesha kudi antu azeya. 10 Neyi muntu yakumona eyi wuneluki chumichi wunakuda yakuda mutembeli yankishi, komana chinleji chamuchima chanowu muntu wazeya, hichikamuleñela kutachika kuda yakuda yinalambuliwu kudi ankishiku, tahindi? 11 Dichi, muloña wayuma yiweluka wunakukisañana muntu wazeya, manakweyi afwililiwu kudi Kristu. 12 Neyi muvulumuna anakwenu muniyi njila nikukisañana chinleji chamuchima chawu chazeya, dikwila nawu munakumuvulumuna Kristu. 13 Dichi, neyi yakuda yikuleñela manakwami kuhukana, hinamba kadahu cheñi mbijiku, kulonda nibuli kumuhukesha manakwami.

9 Komana ami nakasunuka wanyi kwila chuma chinnakukeña tahindi? Komana ami hinidi kapostoluku, tahindi? Komana hinamumona Yesu Mwanta wetuku, tahindi? Komana enu hiyenu munafumi mumudimu wami wamudi Mwantaku, tahindi? 2 Hela chakwila hinidi kapostolu kudi antu acheñiku, ilaña kudi enu nidi kapostolu. Muloña enu mudi chinjikijilu chamwekeshaña nawu nidi kapostolu kaMwanta.

3 Kudihakwila kwami kudi antu ansompeshaña dikweniku, nami: 4 Tukweti wuswa wakuda* nikunwa, hidimuku? 5 Tukweti wuswa wakusumbula mumbanda wetiya nikuyaña nindi hamu, neyi chelañawu apostolu amakwawu niamana kwaMwanta niKefwasi,* hidimuku? 6 Komana Baranaba ninami, yetu hohu tunabuli kwikala nawuswa wakutondolwela kuzata nyidimu yakuhandilamu tahindi? 7 Ishidikanyi wazataña iku nakudifweta yomwenindi? Muntwinyi wakuminaña hohu dakutumba itempa danyivinyu, chakadi kuda nyikabu yamunodu itempa? Hela, hinyi wabiñaña mukanka wanyikoku chakadi kunwaku mayeli kunowu mukanka?

8 Komana ami inakuhosha yumiyi kwesekeja namwaya yitoñojoka yawantu tahindi? Komana Nshimbi niyena yahosha wanyi hayumiyi tahindi? 9 Muloña chasonekewa muNshimbi jaMosi nawu: “Bayi wakakasa chizamba* chañombi kukanwa hampinji yinakuhulayi tidikuku.” Komana Nzambi wakamenaña hohu ayizamba añombi tahindi? 10 Komana wahosha chumichi muloña wanetu tahindi? Achisonekeleli hohu etu, muloña muntu wadimaña nimuntu wahulaña, atela kuzata nayitoñojoka yakwila nawu akadaku.

11 Neyi tunatumbi yuma yakuspiritu mukachi kenu, komana chikutama neyi tumuna kudi enu yuma yakumujimba tahindi? 12 Neyi antu amakwawu akweti iwu wuswa wakutambula yuma kudi enu, komana etu hitwayibadika kwila mwenimuku, tahindi? Hela chochu, tunakuzatisha wanyi iwu wuswa wetu,* ilaña tunakuumika muyuma yejima kulonda tubuli kukañesha nsañu yayiwahi yahosha hadi Kristu. 13 Komana enu, mweluka wanyi nenu antu azataña nyidimu yajila, adaña yuma yakutembeli, nawa antu azatilaña mpinji yejima kukameña, atambwilaña yakuda kukameñaku, tahindi? 14 Chochimu nawa, Mwanta wayileja antu ashimwinaña nsañu yayiwahi nindi ahandileña munsañu yayiwahi.

15 Ilaña ami hinnazatishihu chuma hela chimu hakachi kaniyi yumaku. Chalala, bayi neyi nasoneki yumiyi kulonda munyinkiyiku, muloña chikuwaha ami kufwa kubadika—kwosi muntu wudi wejima wakantambula yuma yinadisambilañamuku. 16 Dichi neyi inakushimwina nsañu yayiwahi, hinatela kudisambaku, muloña diwu mudimu wunatela kuzata. Chalala, oyihuñu yinakamona neyi nibula kushimwina nsañu yayiwahi! 17 Neyi nizata iwu mudimu namuchima wumu, nikweti wufwetu; ilaña neyi niwuzata chakudikanjikija, hohamu nichidi namudimu wawuñamba wankunjikawu. 18 Hanu dinu, wufwetu wami diwu wudihi? Wowu wakwila nawu, neyi nishimwina nsañu yayiwahi, natela kushimwina nsañu yayiwahi chakadi kufwetesha, kulonda nitondolweli kuzatisha chatama wuswa wami* munsañu yayiwahi.

19 Muloña hela chakwila nakasunuka kudi antu ejima, nadilishi kwikala nduñu wawantu ejima kulonda nikokoli nachu antu amavulu. 20 Kudi aYudeya, nadilishili kwikala neyi kaYudeya, kulonda nikokoli nachu aYudeya; kudi antu ahembaña nshimbi, nekalili neyi muntu wahemba nshimbi, hela chakwila ami kwami hinidi muntu wahembaña nshimbiku, kulonda nikokoli nachu antu ahembaña nshimbi. 21 Kudi antu abula nshimbi, nadilishili kwikala neyi muntu wabula nshimbi, hela chakwila ami hinidi muntu wabula nshimbi kudi Nzambiku, ilaña nikweti nshimbi mudi Kristu kulonda nikokoli nachu antu abula nshimbi. 22 Kudi antu azeya, nadilishili kwikala neyi muntu wazeya kulonda nikokoli nachu antu azeya. Nadilishi kwikala yuma yejima kudi antu ejima kulonda neyi chinatwesheki, naamwiniku antu amu. 23 Ilaña nakoñaña yuma yejima muloña wansañu yayiwahi, kulonda niyishimwini kudi antu amakwawu.

24 Komana mweluka wanyi nenu akwakutemuka lufuchi atemukaña wejima wawu, ilaña wumu hohu diyi watambwilaña wufwetuku, tahindi? Temukenuña munjila yikuyileñela mukatambwili wufwetu. 25 Dichi muntu wahemaña yisela yakudibecha,* wadihembaña muyuma yejima. Hela chochu, elaña mwenimu kulonda atambwili chibaaba ochu chakisikaña, ilaña etu twelaña mwenimu kulonda twakatambwili chabulaña kukisika. 26 Dichi, ami hinatemukaña neyi kwiji neluki wanyi kwinnakuyaku; nawa njila yinnakwasilamu nkonyi, hinnakukeña kwasa mumpepelaku; 27 ilaña, nababeshaña* mujimba wami nakuwutwala muwuduñu, kulonda neyi nashimwini dehi kudi antu acheñi, abuli kuntiya kutama.

10 Ichi dinu enu anakwami, inakukeña mwiluki nenu, ankakulula jetu ejima adiña mwishina deevu nawa wejima wawu ahitili mukaluñalwiji 2 nawa wejima wawu ayipapatishili mudi Mosi kuhitila mwivu nimukaluñalwiji, 3 cheñi, wejima wawu adiili yakuda yakuspiritu yoyimu 4 nawa wejima wawu anwini yakunwa yakuspiritu yoyimu. Muloña adiña nakunwa kwilola dakuspiritu dayilondeleleña, nawa idi ilola demeneneñaku* Kristu. 5 Hela chochu, Nzambi hayitiyili kuwaha wejima wawuku, muloña ayijahili mwisaña.

6 Dichi, yumiyi yekala yakutalilahu kudi etu kulonda tubuleña kufwila yuma yatama neyi chayifwililiwu wena. 7 Nawa bayi twikala akwakupesha neyi cheliliwu amu mukachi kawuku; neyi chochasonekawu nawu: “Antu ashakamini nakuda nikunwa. Kuhiñahu, emeni nakuzañalala.” 8 Nawa bayi twila wuvumbi* neyi cheliliwu amu wuvumbiku,* chakwila antu 23,000 afwili mwifuku dimu. 9 Nawa bayi tumweseka Yehova neyi chamwesekeliwu amuku, dichi awa antu ayijahili kudi tupela. 10 Nawa bayi mwikala akwakutooba neyi chatoobeleñawu amuku, awa antu ayijilumwini kudi akwakujilumuna. 11 Iyi yuma yayimwekeneni kulonda yiikali yakutalilahu kudi etu, nawa ayisonekeli kulonda yiikali yakutusoñamisha etu tunakushakama kukukuma kwanshakaminu yamakonu.

12 Dichi muntu wunakutoñojoka nindi nemani, yababali kulonda yabuli kudimbuka. 13 Kwosi kweseka kwayimwekenahu dehi enu, kwabadika kweseka kwayimwekenaña antu ejimaku. Ilaña Nzambi washinshika, hakayileka enu kuhita mukweseka kwabadika kweseka kumunateli kuumikaku, ilaña kweseka kwejima kumukahitamu, wakayiloñeshela njila yakuumikilamu oku kweseka.

14 Dichi, enu akwetu inakeña, tondolwelenu kupesha. 15 Ami inakuhosha neyi kudi antu akweti kashinshi; dichi fuukulenu enu aweni neyi yuma yinnakuhosha yalala hela nehi. 16 Kaapu kankisu kitwakiswilaña,* komana hichatalisha mukwila nawu kuhetela mumashi aKristuku, tahindi? Komana dinkendi ditwahumunaña, hichatalisha mukwila nawu kuhetela mumujimba waKristuku, tahindi? 17 Muloña kudi hohu dinkendi dimu, dichi, hela chakwila etu tudi amavulu, tudi mujimba wumu, muloña wejima wetu tunakuda kunidi dinkendi dimu.

18 Toñojokenu hadi aIsarela akumujimba: Komana antu adiileña nyilambu yakuketula hiyanzañeneña nakameñaku, tahindi? 19 Hanu dinu inakuhosha namidi? Komana inakuhosha nami chuma chalambulañawu kudi nkishi dichalema tahindi nkishi diyi walema? 20 Inehi; ilaña inakuhosha nami yuma yalambulañawu akwanyuza, alambulaña kudi andemoni, bayi kudi Nzambiku; nawa inakukeña wanyi enu mwanzañaneña nawandemoni. 21 Himwatela kunwa mukaapu kaYehova nimukaapu kawandemoniku; himwatela kuda “kumesa yaYehova” nikumesa yawandemoniku. 22 Hela, ‘komana tunakumuzuwisha Yehova tahindi’? Komana etu twamubadika ñovu tahindi?

23 Yuma yejima ayiteja munshimbi, ilaña bayi neyi yuma yejima yayiwahiku. Yuma yejima ayiteja munshimbi, ilaña bayi neyi yuma yejima yakoleshañaku. 24 Dichi, muntu-himuntu bayi yafwileña yuma yakuditiyisha kuwaha yomweniku, chiña yuma yakutiyisha mukwawu kuwaha.

25 Denuña yuma yejima yalandishañawu hachisankanu chambiji, chakadi kwihula muloña wachinleji chenu chamuchima, 26 muloña “iseki niyuma yejima yekalahu yaYehova.” 27 Neyi muntu wabula kwitiya yayitambika nawa munakukeña kuya, denu yuma yejima yinayiloñesheliyi, chakadi kwihula muloña wachinleji chenu chamuchima. 28 Ilaña neyi muntu wumu yayileja nindi, “Ichi anachilambuli kudi ankishi,” bayi mudaku muloña wanowu wunayileji nimuloña wachinleji chamuchima. 29 Bayi neyi inakutalisha kuchinleji chenu chamuchimaku, ilaña chamuntu wacheñi. Hanu dinu, muloñadi kusubuka kwami chiyakukusompeshelawu nachinleji chamuchima chamuntu wacheñi? 30 Neyi inakuda nakumusakilila Nzambi, muloñadi chiyantenenañawu kutama hachuma chinamusakililaña Nzambi?

31 Dichi, hela munakuda, hela munakunwa, hela munakwila chuma chidi chejima, ilenuña yuma yejima yikumulemesha Nzambi. 32 Tondolwelenuña kwikala chuma chakuhukanaku aYudeya niaGiriki nichipompelu chaNzambi, 33 neyi chinnakufwila ami kutiyisha antu ejima kuwaha muyuma yejima, hinnakufwila yuma yakuditiyisha ami aweni kuwahaku, chiña yuma yakutiyisha antu amavulu kuwaha kulonda ayamwini.

11 Ikalenu akwakwimbujola ami, neyi chinamwimbujolaña Kristu.

2 Inakuyisakilila, muloña mwañanukaña muyuma yejima nawa munakukakela kuyuma neyi chinayinkeliyu enu. 3 Ilaña inakukeña enu mwiluki nenu, mutu weyala, hiKristu; nawa mutu wamumbanda, hiiyala; nawa mutu waKristu hiNzambi. 4 Iyala wejima walombaña hela kuprofweta iku nabuti chuma kumutu windi, wasawulaña mutu windi; 5 ilaña mumbanda wejima walombaña hela kuprofweta henohu kumutu windi nabutiku chuma wanyi, iwu mumbanda wasawulaña mutu windi, chumichi chinesekani namumbanda wunatewuli kawewula* kumutu windi. 6 Muloña neyi mumbanda nabuti wanyi chuma kumutu windi, watela kutewula nsuki yindi; ilaña neyi hichuma chansonyi mumbanda kutewula nsuki jindi hela kutewula kawewula,* dichi watela kubuta chuma kumutu windi.

7 Iyala hatela kubuta chuma kumutu windiku, muloña hichifwanisha nawa hikulema kwaNzambi, ilaña mumbanda wekala kulema kweyala. 8 Muloña iyala wafumini kudi mumbanda wanyi, ilaña mumbanda wafumini kudi iyala. 9 Nawa chuma chinasweji kubadika chidi chakwila nawu, iyala hiyamuleñeli muloña wamumbandaku, ilaña mumbanda amuleñeli muloña weyala. 10 Iwu diwu muloña waweni mumbanda watela kubutilayi chuma kumutu windi kulonda chiikali chinjikijilu chakwovwahila, muloña wawañelu.

11 Hela chochu, mudi Mwanta, mumbanda wukwikalaku wanyi neyi kwosi iyala, nawa iyala niyena wukwikalaku wanyi neyi kwosi mumbanda. 12 Muloña neyi chochafumayi mumbanda kudi iyala, niiyala niyena wavwalika kudi mumbanda; ilaña yuma yejima yafuma kudi Nzambi. 13 Fuukulenu enu aweni: Komana chidi hohu chiwahi mumbanda kulomba kudi Nzambi chakadi kubuta chuma kumutu windi tahindi? 14 Komana chisemwa, chayidizishaña wanyi enu nawu neyi iyala yekala nansuki jajilehi, jikumusawisha tahindi, 15 ilaña neyi mumbanda wukweti nsuki jajilehi, hikulema kudi yenaku, tahindi? Muloña nsuki dijamwinkawu chatela amwinki chuma chakubuta kumutu. 16 Hela chochu, neyi kudi muntu wunakukeña kuleta ntaadi muloña wakukeña kuhakwilaku yaaku yacheñi, etu hitukweti yaaku yacheñiku, hela muyipompelu yaNzambi mwosi.

17 Ilaña ami chinnakuyinka iji nshimbi, inakuyihameka wanyi, muloña chimwapompaña hamu himwapompaña kulonda mukoñi yuma yayiwahiku, ilaña kulonda mukoñi yuma yatama. 18 Muloña chatachi, inakutiya nawu neyi mupompa hamu muchipompelu, mukachi kenu mwambokelañamu; ninami neteji nami nsañu yikwawu yinnatiyi, yalala. 19 Muloña kuhosha hohu chalala, mukachi kenu nimwena mwakekala chaambu, kulonda antu atiyañayi Nzambi kuwaha niwena akasoloki hatooka.

20 Neyi mupompa hamu heluña dimu, hichinatalishi mukwila nawu munapompi kulonda mudi Kuda kwaMwanta kwaMelelaku. 21 Muloña neyi mpinji yenu yakuda ichi chakuda yinashiki dehi, muntu-himuntu wadiilaña dimu kuda kwindi kwamelela, dichi wumu watiyaña nzala, ilaña mukwawu washetaña. 22 Komana himukweti matala mwakudiila nikunwinaku, tahindi? Hela komana mwadiwulaña chipompelu chaNzambi nikutiyisha nsonyi antu abula yuma tahindi? Hanu dinu, nihoshi yumanyi kudi enu? Niyihameki tahindi? Muchuma chamuchidiwu, nukuyihameka wanyi.

23 Muloña chuma chinatambwilili kudi Mwanta, dichi chinayilejeli ninenu nawa nami, Mwanta Yesu hiyadiñawu kwakwihi nakumufukejela hanowu wufuku, wanoneli dinkendi, 24 nawa chelili nalombi dehi nakusakilila, wadihumwini nakuyila nindi: “Idi dinkendi dinakwimenaku mujimba wami, owu wukuhanawu kukoola enu. Dichi mwileña mwenimu hakuñanakana.” 25 Welili mwomumu cheñi nakaapu,* chamanishiliwu kuda, kuda kwamelela, wahosheli nindi: “Aka kaapu kanakwimenaku mashi ami achitiyañenu chachiha. Ilenuña mwenimu hakuñanakana mpinji yejima yimunakunwa aka kaapu.” 26 Muloña mpinji yejima yimunakuda idi dinkendi nikunwa aka kaapu,* dikwila nawu munakushimwina kufwa kwaMwanta kushika nimpinji yakenzayi.

27 Dichi, muntu wejima wadaña dinkendi hela kunwa kaapu kaMwanta* henohu nateleli wanyi, wakekala namuloña kutalisha hamujimba nimashi aMwanta. 28 Chatachi, muntu yadeseki yomweni kulonda yamoni neyi nateleli, kuhiñahu dinu yadi dinkendi nikunwa kaapu.* 29 Muloña muntu wadaña nikunwa chakadi kwiluka mwatalisha mujimba, wadaña nikunwa nakudiletela yomweni wunsompeshi. 30 Diwu muloña waweni enu amavulu mukachi kenu mwazeya, mwakata nawa amavulu anakaami tulu twakufwa.* 31 Ilaña neyi tudiluka etu aweni chitwekala, hiyakutusompeshaku. 32 Hela chochu, neyi atusompesha, dikwila nawu anatubabeshi kudi Yehova, kulonda tubuli kufwa namuloña hamu nakaayi. 33 Dichi, enu anakwami, neyi mupompa hamu nakuda kuda kwaMwanta kwaMelela, dihembelelenu wumu namukwawu. 34 Neyi kudi muntu wudi nanzala, yadi kwitala dindi, kulonda neyi munapompi hamu mubuli kufwa namuloña. Ilaña kutalisha kunsañu jikwawu jinashaliku, nakajimanisha neyi nenzi dehi kwenoku.

12 Ichi dinu enu anakwami, kutalisha hayawaana yakuspiritu, ami hinnakukeña nibuli kuyilejaku. 2 Mweluka nenu mpinji yimwachidiña antu akunyuza,* ayiluwañesheli nikuyisenwisha kudi ankishi abulaña kuhosha, mwayilondeleleña kwejima kuyayitwalileñawu. 3 Ichi dinu inakukeña mwiluki nenu, kwosi muntu hela wumu wukwila neyi nakuhosha kuhitila mudi spiritu yaNzambi wunateli kuhosha nindi: “Yesu washiñewaku!” nawa kwosi muntu wunateli kuhosha nindi: “Yesu diyi Mwanta!” chiña hohu naspiritu yajila.

4 Dichi kudi yawaana yashiyashana, ilaña spiritu yekala yoyimu; 5 nawa kudi nyidimu yashiyashana, ilaña kwekala Mwanta yowumu; 6 nawa kudi nyidimu yakuzata yashiyashana, ilaña Nzambi yowumu diyi wazataña iyi nyidimu yejima mudi antu ejima. 7 Ilaña nyidimu yaspiritu yinamwekeni mudi muntu-himuntu kulonda akwashi akwawu kuhetelamu. 8 Muloña muntu wumu anamwinki chawaana chakuhosha mazu amaana* kuhitila mudi spiritu, mukwawu chawaana chakuhosha yuma yakwiluka kuhitila mudi spiritu yoyimu, 9 mukwawu anamwinki chikuhwelelu kuhitila mudi spiritu yoyimu, mukwawu chawaana chakuuka kuhitila mudi spiritu yoyimu, 10 mukwawu niyena anamwinki chawaana chakukoña nyidimu yañovu, mukwawu chawaana chakutiyisha mazu onenawu, mukwawu chawaana chakuhosha mumadimi amboka-mboka, nawa mukwawu chawaana chakulumbulula madimi acheñi. 11 Hela chochu, nyidimu yejimiyi ayikoñaña naspiritu yoyimu, yayipañilaña hamuntu-hamuntu kwesekeja nanochu chiyinakukeña.

12 Neyi chochekala mujimba wumu, ilaña wukweti yiidi yayivulu nawa yiidi yejima yanowu mujimba, hela chakwila yekala yayivulu, yekala mujimba wumu, ichi dichekalayi niKristu nawa. 13 Muloña kuhitila mudi spiritu yimu, wejima wetu atupapatishili mumujimba wumu, hela tudi aYudeya hela aGiriki, hela tudi anduñu hela twasubuka, nawa wejima wetu atunwishili spiritu yimu.

14 Muloña mujimba hiwekala nachiidi chimu hohuku, ilaña wekala nayiidi yayivulu. 15 Neyi mwendu wukuhosha nawu, “Chineli ami nidi chikasa wanyi, hinidi chiidi chamujimbaku,” chumichi hichinateli kuleñela mwendu kubula kwikala chiidi chamujimbaku. 16 Nawa neyi itu dikuhosha nawu: “Chineli ami nidi disu wanyi, hinidi chiidi chamujimbaku,” chumichi hichinateli kuleñela itu kubula kwikala chiidi chamujimbaku. 17 Neyi mujimba wejima wadiña disu hohu, indi wuswa wakutiya wadi kwikala kudihi? Neyi mujimba wejima wadiña nakutiya hohu, indi wuswa wakwepula ivumba wadi kwikala kudihi? 18 Ilaña Nzambi waloñesheli chiidi-hichiidi chamujimba kwesekeja nachakeñeleñayi.

19 Neyi yiidi yejima yadiña chiidi chimu, indi mujimba kachi wudi kudihi? 20 Hela chochu, kwekala yiidi yayivulu, ilaña mujimba wumu hohu. 21 Disu dinateli wanyi kuleja chikasa nadu, “Hinnakukukeña eyiku,” hela, mutu hiwunateli kuleja nyendu nawu, “Hinnakuyikeña enuku.” 22 Hela chochu, yiidi yamujimba yamwekanaña neyi yazeya, yakeñekaña nankashi, 23 dichi yiidi yamujimba yitwatoñojokaña netu yalema wanyi, diyi yitwalemeshaña chikupu, nawa yiidi yetu yamwekanaña neyi yamukunkulwayi, diyi yitwavumbikaña chikupu, 24 ilaña yiidi yetu yamwekanaña chiwahi hiyakeñekaña chuma hela chimuku. Hela chochu, Nzambi wanuñañesha mujimba nakulemesha chikupu chiidi chamonañawu nawu chalema wanyi, 25 kulonda mumujimba mubuli kwikala chaambu, ilaña chiidi-hichiidi chamujimba chakameneña chiwahi chiidi chikwawu. 26 Neyi chiidi chimu chikabakana, dikwila nawu yiidi yikwawu yejima yinakabakeni hamu nachu; hela neyi chiidi chimu achilemesha, dikwila nawu yiidi yikwawu yejima yazañalelaña hamu nachu.

27 Enu mudi mujimba waKristu, nawa enu hamuntu-hamuntu mudi chiidi chaniwu mujimba. 28 Nawa Nzambi natondi antu ashiyashana muchipompelu: atachi, apostolu; amuchiyedi, atuprofwetu; amuchisatu, antañishi; kuhiñahu nyidimu yañovu; kubombelahu yawaana yakuuka; nyidimu yakukwashana; wuswa wakulombola antu; nimadimi ashiyashana. 29 Komana ejima hiyapostolu tahindi? Komana ejima hiyatuprofwetu tahindi? Komana ejima hiyantañishi tahindi? Komana ejima akoñaña nyidimu yañovu tahindi? 30 Komana ejima adi nayawaana yakuuka akata tahindi? Komana ejima ahoshaña mumadimi acheñi tahindi? Komana ejima hiyakwakulumbulula* mazu tahindi? 31 Ilaña fwilenuña* chikupu kwikala nayawaana yabadika. Hakwila ami nukuyileja njila yabadika kuwaha.

13 Neyi nihosha mumadimi awantu niawañelu, ilaña nikweti wanyi kukeña, dikwila nawu nekali neyi chivumina changezu hela neyi ipumba dachifwoyu chinakuvumishawu. 2 Nawa neyi nikweti chawaana chawuprofwetu nichakutiyisha yuma yajila yakujinda nikwiluka kwejima, nawa neyi nikweti chikuhwelelu chakola chikupu chakwila nateli nikutuntulula jimpidi, ilaña nikweti wanyi kukeña, dikwila nawu nidi wamukunkulwayi. 3 Neyi nukuhana yuma yami yejima kulonda nikwashi antu amakwawu, hela nihana mujimba wami kulonda nidisambilimu, ilaña nikweti wanyi kukeña, kwosi chuma chinukuhetelamu.

4 Kukeña kwadiwunjikaña nawa kwatiyilaña luwi. Kukeña hikwatiyilaña ichimaku. Hikwadivwimbañaku, hikwadinkaña wantaku, 5 hikwelaña yuma yabula kutelelaku,* hikwakeñaña hohu kuditiyisha kwakweni kuwahaku, hikwahilaña swayiku. Hikwahembaña nkunyiku.* 6 Hikwazañalalaña nayuma yabula kuloñaku, ilaña kwazañalalaña nachalala. 7 Kwabutaña yuma yejima, kwakuhwelelaña yuma yejima, kwachiñejaña yuma yejima, kwomikaña yuma yejima.

8 Kukeña hikwamanañaku. Ilaña neyi kudi yawaana yawuprofwetu, yakamana; neyi kudi kuhosha mumadimi,* kwakamana; neyi kudi kwiluka, kwakamana. 9 Muloña tweluka hohu chanti, nawa twaprofwetaña hohu chanti, 10 ilaña chitwakeluka nikuprofweta chikupu, dihu dinu hakamana kwiluka kwanti nikuprofweta kwanti. 11 Chinachidiña kansi, nahosheleña neyi kansi, natoñojokeleña neyi kansi, namweneña yuma neyi kansi; ilaña ichi, chineli nakuli dehi, naleki yilwilu yawansi. 12 Muloña hayinu mpinji tunakumona chiwahi wanyi, muloña chidi neyi tunakutala hachibanjilu chachikuñu, ilaña hanoyu mpinji, twakamona chachiwahi. Hayinu mpinji neluka chanti, ilaña hanoyu mpinji, nakeluka chikupu neyi chañilukawu* ami chikupu. 13 Hela chochu, iyi yuma yisatu yikutwaleka kwikalaku: chikuhwelelu, kuchiñeja nikukeña; ilaña chabadika hayuma yejimiyi, hikukeña.

14 Fwilenuña kukeña, hela chochu, fwilenuña chikupu yawaana yakuspiritu, ilaña sweje-e dinu, fwilenuña chawaana chakuprofweta. 2 Muloña muntu wahoshaña mwidimi dacheñi, hahoshaña kudi antuku, wahoshaña kudi Nzambi, muloña kwosi muntu wachitiyañaku, ilaña yena wahoshaña yuma yajila yakujinda kuhitila muspiritu. 3 Hela chochu, muntu waprofwetaña watuñaña antu nikuyikolesha nikuyikundeja kuhitila munhoshelu yindi. 4 Muntu wahoshaña mwidimi dacheñi, wadituñaña yomweni, ilaña muntu waprofwetaña watuñaña chipompelu. 5 Ami nateli kukeña nami wejima wenu muhosheña mumadimi acheñi, ilaña chuma chinnakeñi nankashi chidi chakwila nami muprofweteña. Chalala, muntu waprofwetaña wabadika muntu wahoshaña mumadimi acheñi, chiña neyi owu muntu yalumbulula* mazu indi mwidimi datiyañawu antu kulonda chipompelu achituñi. 6 Enu anakwami, neyi ninza kudi enu hayinu mpinji nakuhosha mumadimi acheñi chakadi kuhosha yuma yinansolweliwu, hela nakwiluka, hela nawuprofwetu, hela nakutañisha, dikwila nawu yumanyi yayiwahi yinnayikoñeli enu?

7 Chumichi chinesekani nayuma yabula wumi yavumaña, yidi neyi ipeleli hela kadada. Neyi yivumina yayu kushiyashana nehi, chivumina chinakwimbawu nepeleli hela nakadada, akuchiluka ñahi? 8 Neyi mpuña yikuvuma chivumina chakadi kulumbuluka, hinyi wukudimanyeka kulonda yayi kunjita? 9 Chochimu, ninenu mwahoshaña mumadimi acheñi, neyi mubula kuhosha mazu apela kutiya, muntu wukwiluka ñahi munatalishi yuma yimunakuhosha? Kafwampi, mukuhoshaña hohu mumpepela. 10 Munu mukaayi munateli kwikala madimi amboka-mboka ahoshañawu antu, hela chochu, kwosi idimi nidimu dabulaña kutiyawuku. 11 Muloña neyi nibula kutiya idimi dinakuhoshayi muntu, dikwila nawu nukwikala neyi ñiinza kudi owu muntu wunakuhosha, nawa muntu wunakuhosha wukwikala neyi ñiinza kudi ami. 12 Hohamu ninenu nawa, chineli munakufwila nankashi yawaana yaspiritu, fwilenu chikupu kwikala nayawaana yikutuña chipompelu.

13 Dichi, muntu wahoshaña mwidimi dacheñi, yalombi kulonda yeluki mwakulumbulwila* mazu indi. 14 Muloña neyi inakulomba mwidimi dacheñi, inakulomba muloña wachawaana chaspiritu, ilaña hinelukaña muchinalumbulukiliku. 15 Hanu dinu, nukwiladi? Nukulomba nachawaana chaspiritu, nawa cheñi nukulomba mwidimi dinatiyishaña. Nukwimba tumina twakumuhameka Nzambi nachawaana chaspiritu, nawa cheñi nukwimba tumina twakumuhameka Nzambi mwidimi dinatiyishaña. 16 Mukunkulwayi, neyi wukumuhameka Nzambi nachawaana chaspiritu, indi muntu wabula kutaña wudi mukachi keyi wukuhosha ñahi nindi “Ameni” kuyuma yiwunakulomba nakusakilila, chineli yena neluki wanyi yuma yiwunakuhoshahu? 17 Diimu tuhu, wunakulomba nakusakilila munjila yayiwahi, ilaña mukwenu nakutuñewa wanyi. 18 Namusakililaña Nzambi hakwiluka nami nahoshaña mumadimi acheñi amavulu kubadika wejima wenu. 19 Hela chochu, muchipompelu chikuwaha ami kutondahu kuhosha mazu atanu anateli kutiyawu antu muyalumbulukilawu* kulonda nidizishi* antu amakwawu, kubadika kuhosha mazu 10,000 mwidimi dacheñi.

20 Enu anakwami, bayi mutoñojokeña neyi anyana anyanyaku, ilaña ikalenu neyi anyana anyanya kuyuma yatama; nawa toñojokenuña neyi muntu wapama chikupu. 21 Chasonekewa muNshimbi nawu: “Yehova nahoshi nindi, ‘Nakahosha nanawa antu kuhitila mukuzatisha madimi awañiinza ninyivumbu yawenyi, hela chochu, akakaana kuntiyilila.’ ” 22 Dichi, madimi hichinjikijilu chawantu etiyaku, chiña antu abula kwitiya, wuprofwetu niwena hiwawantu abula kwitiyaku, chiña antu etiya. 23 Dichi neyi chipompelu chejima chidipompesha heluña dimu nawa wejima wawu atachika kuhosha mumadimi acheñi, ilaña antu abula kutaña hela antu abula kwitiya eñila mukachi, komana akuhosha wanyi nawu munazaluki tahindi? 24 Ilaña neyi wejima wenu munakuprofweta, nawa muntu wabula kwitiya hela wabula kutaña yeñila mukachi, mazu imunakuhosha wejima wenu akumukonkolola nikumuleñela yadishinshiki yomweni chikupu. 25 Kuhiñahu, yuma yakujinda yidi mumuchima windi yikusoloka, kulonda yadimbuki chamesu hamaseki nakudifukula kudi Nzambi, nakuhosha nindi: “Chalala Nzambi wudi mukachi kenu.”

26 Hanu dinu, chikwikala ñahi enu anakwami? Neyi mupompa hamu, wumu nakwimba isamu, mukwawu nakutañisha, mukwawu nakusolola yuma, mukwawu nakuhosha mwidimi dacheñi, nawa mukwawu nakulumbulula mazu. Yuma yejima yikoñenuña kulonda mudituñeña wumu namukwawu. 27 Nawa neyi muntu wumu wahoshaña mwidimi dacheñi, ekali hohu antu ayedi hela asatu kunahu, nawa adihimpeña, wumu watela kulumbulula.* 28 Ilaña neyi kwosi mukwakulumbulula,* muntu wahoshaña mumadimi watela kumwenahu muchipompelu nakudihoshesha kankawindi mumuchima nikudi Nzambi. 29 Atuprofwetu ayedi hela asatu aprofweti, nawa antu amakwawu eluki munalumbulukili mazu wenowu. 30 Ilaña neyi kwikala muntu anasolweliwu yuma hampinji yinashakamiyi mwenomu, nhoshi wakusambila yomweni nzo-o. 31 Muloña wejima wenu munateli kuprofweta wumu hampinji yimu, mukwawu nawa hampinji yikwawu, kulonda antu ejima adizi nikukoleshewa. 32 Nawa atuprofwetu atela kwiluka chiwahi njila muyazatishilañawu yawaana yaspiritu. 33 Muloña Nzambi, hiNzambi wakuwunda bayi neyi wakuluwañeshaku.

Neyi chichekala muyipompelu yejima yawakwakujila, 34 ambanda amwenihu muyipompelu, muloña hichetejewa wena kuhoshaku. Ilaña, ovwahileña neyi chahosha niNshimbi. 35 Neyi kudi yuma yinakukeña kwilukawu, atela kwihula anfumu jawu kwitala, muloña chansonyi mumbanda kuhosha muchipompelu.

36 Komana izu daNzambi dafumini kudi enu tahindi dashikili hohu kudi enu?

37 Neyi muntu wejima nakutoñojoka nindi hikaprofwetu hela nindi wukweti chawaana chaspiritu, watela kwiluka nindi yuma yinnakuyisonekela enu, hinshimbi jaMwanta. 38 Ilaña neyi muntu wejima yadiwula chumichi, niyena akamudiwula.* 39 Dichi enu anakwami, fwilenuña kuprofweta, ilaña bayi mukaanisheña antu kuhosha mumadimi acheñiku. 40 Dichi, yuma yejima yilenuña mukutelela nawa mukuloña.

15 Dichi enu anakwami, inakuyanukishaku kutalisha hansañu yayiwahi yinayishimwinini, yimwatambwilili nawa yinayikoleshi enu. 2 Enu anakuyaamwina kuhitila muniyi nsañu yayiwahi yinayishimwinini neyi mukakela chikupu kuniyi nsañu, chiña neyi mwetiyili hohu chamukunkulwayi.

3 Muloña hakachi kayuma yatachi yinayilejeli hadiña nichuma chinatambwilili ninami nawa, chakwila nawu Kristu wafwili kukoola nshidi jetu kwesekeja nachahosha Nsona; 4 nawa cheñi nawu amujiikili, cheñi nawu amusañwili hefuku damuchisatu kwesekeja nachahosha Nsona; 5 nawa nawu wamwekeni kudi Kefwasi,* kuhiñahu kudi apostolu 12. 6 Kufumahu, wamwekeni kudi anakwetu akubadika ha 500 hampinji yoyimu, amavulu hakachi kawu tuchidi nawu hamu, hela chakwila amakwawu anakaami dehi mutulu twakufwa. 7 Kuhiñahu wamwekeni kudi Yakoba, nikudi apostolu ejima. 8 Ilaña, nkumininaku wamwekeni kudi ami nawa, ami wadiña neyi mwana wunavwaliki wamwisu.

9 Muloña ami yami nakehelamu hakachi kawapostolu, nawa ami nateleli wanyi kuntena nawu kapostolu, muloña nakabishili chipompelu chaNzambi. 10 Ilaña hamuloña waluwi lwaNzambi lwasweja, dilu lunanleñeli niikali ichi chinidi. Nawa luwi lwindi lwasweja lwammwekesheleliyi lwadiña lwamukunkulwayi wanyi, ilaña nazatili kubadika wejima wawu; hela chochu, bayi neyi muloña wanami aweniku, ilaña muloña waluwi lwaNzambi lwasweja ludi nanami. 11 Dichi, hela chakwila hiyami hela wena diwu anakushimwina, wejima wetu twashimwinaña nsañu yoyimu nawa ninenu diyi yimwakuhweleleli.

12 Dichi neyi antu anakushimwina nawu Kristu anamusañuli kufuma mudi afu, hanu dinu, muloñadi antu amu mukachi kenu chahoshelañawu nawu kwosi kusañuka kwawafu? 13 Dichi neyi kwosi kusañuka kwawafu, komana dikwila nawu Kristu amusañula wanyi. 14 Ilaña neyi Kristu amusañula wanyi, dikwila nawu kushimwina kwetu kwamukunkulwayi, nawa chikuhwelelu chenu nichena chamukunkulwayi. 15 Kubombelahu, dikwila nawu ninetu tunekali ayinsahu jaNzambi akutwamba, muloña tunashimuni wunsahu hadi Nzambi netu wamusañwili Kristu, owu abuliliyi kusañulayi neyi chakwila afu chalala hiyamba kayisañulaku. 16 Muloña neyi afu akayisañula wanyi, dikwila nawu niKristu amusañula wanyi. 17 Kubombelahu, neyi Kristu amusañula wanyi, dikwila nawu chikuhwelelu chenu chamukunkulwayi; muchidi kushakama munshidi yenu. 18 Dikwila nawu ninowu aholokela dehi mutulu twakufwa mudi Kristu ananoñi chikupu. 19 Neyi tunakuhweleli Kristu hohu muwunu wumi, dikwila nawu etu yetu atela kutiyilawu wushona nankashi kubadika antu ejima.

20 Ilaña dinu Kristu amusañula kufuma mudi afu, dichi yena diyi mukabu watachi wanowu anaholokeli mutulu twakufwa. 21 Muloña chineli kufwa kwenjili kuhitila mudi muntu wumu, dikwila nawu kusañuka kwawafu nikwena kwenza kuhitila mudi muntu wumu. 22 Muloña neyi chochinakufwawu antu ejima kuhitila mudi Adama, chochimu nawa antu ejima akekala nawumi kuhitila mudi Kristu. 23 Muntu-himuntu akamusañula kwesekeja nandonda yindi: Kristu diyi nyikabu yatachi, kuhiñahu antu jaKristu akayisañula hampinji yakwikalahu kwindi. 24 Nkumininaku, neyi nahani dehi Wanta kudi Nzambi yindi nawa Tata yindi, hampinji yakela najilumuni dehi nfulumendi jejima, niwuswa wejima niñovu jejima. 25 Muloña watela kuyuula neyi mwanta kushika nimpinji yakashayi Nzambi ayilumbu ejima mwishana danyendu yindi. 26 Nawa chilumbu wakukumishaku, dikwila nawu kufwa, akamujilumuna. 27 Muloña Nzambi “wovwahishili yuma yejima mwishina danyendu yaKristu.” Ilaña chahoshayi* nindi, ‘Novwahishi yuma yejima mwishina danyendu yaKristu,’ hichinatalishi mukwila nawu Owu wovwahishili yuma yejima niyena wadovwahishili yomweni mwishina danyendu yaKristuku. 28 Ilaña yuma yejima anayovwahishi mwishina danyendu yindi, dichi Mwana niyena wakadovwahisha yomweni kudi Owu wovwahishili yuma yejima kudi yena kulonda Nzambi yakekali yuma yejima kudi antu ejima.

29 Neyi chidi mwenimu, antu anakupapatishawu nawu akafwi, akelañadi? Neyi afu akayisañula wanyi, hanu dinu, muloñadi chinakuyipapatishilawu nawu akafwi? 30 Muloñadi ninetu chitwekalilaña muwubanji mpinji yejima? 31 Dichi enu anakwami, kudisamba kunadisambilaña mudi enu, enu atumbanji twaKristu Yesu Mwanta wetu, inakusanyika nami hefuku-hefuku natalañanaña nakufwa. 32 Neyi ami nazuñi nawanyama amwisaña ayisumi kuEfwesesa neyi chochelañawu antu amakwawu,* chumanyi chinukuhetelamu? Neyi afu hiyakayisañulaku, dichi “tudenu nikunwa, muloña kumadiki twakafwa.” 33 Bayi ayiluwañeshaku. Kudikunda nawantu atama kwakisañanaña* yilwilu yayiwahi. 34 Toñojokenuña chiwahi kulonda mwileña mwaya kuloña nawa bayi mukoña nshidiku, muloña antu amu hiyamwiluka Nzambiku. Inakuhosha mwenimu kulonda niyitiyishi enu nsonyi.

35 Hela chochu, muntu wumu wukehula nindi: “Indi afu akayisañula ñahi? Nawa, akenza mumujimba wamuchidinyi?” 36 Eyi muntu wabula maana! Chuma chiwatumbaña chasambilana kufwa, kuhiñahu dinu hichikumena.* 37 Nawa chuma chiwatumbaña, hiwatumbaña mujimba wunakuli dehiku, ilaña watumbaña lubutu, chili lwatidiku hela lwambutu yacheñi; 38 ilaña Nzambi waleñelaña lubutu kwikala namujimba kwesekeja nanochu chinakeñiyi yomweni, nawa lubutu-hilubutu walwinkaña mujimba walu. 39 Bayi neyi nyijimba yejima yekala yoyimuku, ilaña kwekala nyijimba yawantu, kwekala nyijimba yawanyama, kwekala nyijimba yatuda, nawa kwekala ninyijimba yanshi. 40 Nawa kwekala nyijimba yamwiwulu ninyijimba yahamaseki; ilaña kulema kwanyijimba yamwiwulu kwacheñi, nawa cheñi kulema kwanyijimba yahamaseki kwacheñi. 41 Kulema kwetena kwacheñi, nawa kulema kwakakweji kwacheñi nikulema kwatutumbwa nikwena kwacheñi; kafwampi, katumbwa-hikatumbwa kashiyashana nakakwawu mukulema.

42 Dichi chekala nikusañuka kwawafu. Mujimba watokaña awutumbaña, ilaña mujimba wasañulañawu watokaña wanyi. 43 Awutumbaña mukusawuka; awusañulaña mukulema. Awutumbaña mukuzeya; awusañulaña muñovu. 44 Awutumbaña mumujimba wawuntu; awusañulaña mumujimba wakuspiritu. Neyi kwekala mujimba wawuntu, dikwila nawu kwekala nawa nimujimba wakuspiritu. 45 Dichi chasonekewa nawu: “Muntu watachi Adama wekalili muntu* wamumi.” Adama wakukumishaku wekalili spiritu yahanaña wumi. 46 Hela chochu, muntu wakuspiritu hidiyi watachuku. Ilaña muntu wakumujimba diyi watachi, kuhiñahu dinu muntu wakuspiritu. 47 Muntu watachi wafumini hamaseki nawa amuleñeli nalunkuñu; muntu wamuchiyedi wafumini mwiwulu. 48 Antu aleñeliyi Nzambi nalunkuñu adi neyi muntu aleñeliyi nalunkuñu. Nawa owu ekala mwiwulu adi neyi muntu wenjili kufuma mwiwulu. 49 Nawa neyi chochitwafwana muntu aleñeliwu nalunkuñu, dichi chitwakafwana ninowu wafumini mwiwulu.

50 Ilaña enu anakwami, inakuyileja chumichi nami, mujimba wamashi hiwakaswana Wanta waNzambiku, hela mujimba watokaña hiwakaswana mujimba wabulaña kutokaku. 51 Tiyenu! Inakuyileja yuma yajila yakujinda nami: Wejima wetu hitwakakaama mutulu twakufwaku, ilaña wejima wetu akatuhimpa, 52 mukapinji kantesha, mukulabula kwadisu, hampinji yakavuma mpuña yakukumishaku. Muloña mpuña yakavuma, afu akayisañula nakwikala nanyijimba yabulaña kutoka, ninetu nawa akatuhimpa. 53 Muloña iwu mujimba watokaña wakabalumuka nakwikala wabulaña kutoka, nawa iwu mujimba wafwaña wakabalumuka nakwikala wabulaña kufwa. 54 Ilaña neyi iwu mujimba watokaña wunabalumuki dehi nakwikala wabulaña kutoka, nawa neyi iwu mujimba wafwaña wunabalumuki dehi nakwikala wabulaña kufwa, dikwila nawu mazu asonekawu akashikijewa, akwila nawu: “Kufwa anakuminyi chahaya nyaaka.” 55 “Kufwa, indi kwimika mushindu kweyi kudi kudihi? Kufwa, indi lumuna lweyi ludi kudihi?” 56 Lumuna lwaletaña kufwa hinshidi, nawa ñovu yanshidi hiNshimbi.* 57 Ilaña tumusakililenu Nzambi muloña natwinki ñovu yakushinda kuhitila mudi Mwanta wetu Yesu Kristu.

58 Dichi, enu anakwami inakeña, ikalenu akola mbe-e chakadi kuswijewa, mpinji yejima ikalenuña nayuma yayivulu yakuzata mumudimu waMwanta, nanochu chimuneluki nenu kudikita kwenu kumunakudikita mudi Mwanta kwamukunkulwayi wanyi.

16 Dichi kutalisha kukupompesha yawaana yawakwakujila, mwatela kulondela nshimbi jinahanini kuyipompelu yamuÑalija. 2 Hefuku datachi damulungu-himulungu, muntu-himuntu watela kuhembahu yawaana hambadi kwesekeja nayuma yikwetiyi, kulonda mwakabuli kutachika kupompesha yawaana hampinji yinakashika. 3 Ilaña chinakashika kwenoku, nakatemesha amayala imwaketeja munyikanda yenu kulonda akatwali yawaana yenu yaluwi kuYerusalema. 4 Hela chochu, neyi chidi hohu chiwahi ninami kuya kwenoku, nakaya nawu hamu.

5 Ilaña nakenza kudi enu neyi nahiti dehi muMasidoniya, muloña muMasidoniya dimunakahita; 6 nawa hekwawu nakashakama nanenu hadi mpinji yayilehi, hekwawu nimutukweji twamashika twejima, kulonda mwakanshinjikijiku hinakayaña oku kwinnakuya. 7 Muloña hayinu mpinji yinukuhitaña, inakukeña wanyi kudimona nanenu mulufuchi-lufuchi, muloña inakufwila nakashakami nanenu hadi mpinji yayilehi, neyi Yehova neteji. 8 Ilaña ami inakushala muEfwesesa kushika nimpinji yaChawija chaPentekosita, 9 muloña anañenzunwini chenzelu cheneni chakuzata nyidimu yayivulu, ilaña kudi akwakudimbulula amavulu.

10 Dichi, neyi Timotewu nashiki dehi, mukamutambwili chiwahi yakashakami nanenu chakadi woma, muloña nakukalakala mudimu waYehova neyi chochinelaña ninami nawa. 11 Dichi, bayi amudiwula kudi muntu hela wumuku. Mukamutemeshi mukuwunda kulonda yakenzi kudi ami, muloña ami inakumutalila hamu nawanakwetu.

12 Kutalisha kudi manakwetu Apolosi, namukonkomweneni chikupu nami yakenzi kudi enu hamu nawanakwetu. Yena hakeñeleña nindi yenzi hayinu mpinjiku, ilaña wakenza neyi nekali dehi nampinji.

13 Tonenuña, imanenu akola mbe-e muchikuhwelelu, ikalenu ahamuka,* nawa kolenu. 14 Yuma yejima yimwelaña, yilenuña nakukeña.

15 Dichi enu anakwami, inakuyikonkomwena nami: Mweluka nenu antu amwitala daStefwanasi diwu asambilili kwikala atumbanji muAkaya nawa adihanini namuchima wumu kukalakela akwakujila. 16 Ninenu twalekenuhu kwovwahila antu adi neyi awa niantu ejima aneteji kukalakala nikuzata nañovu. 17 Ilaña natiyi kuwaha chinnayimoni aStefwanasi naFwotunatu niAkayikusi, muloña wena anayimeniku enu munabuli kwikala kunu. 18 Muloña anahizumwishi spiritu yami niyenu. Dichi, lemeshenuña antu amuchidiwu.

19 Yipompelu yejima yamuAsiya yinayimushi. Akwila niPrisila hamu nichipompelu chidi mwitala dawu anayimushi mudi Mwanta namuchima wejima. 20 Anakwetu ejima anayimushi. Mudimushi wumu namukwawu nakudifufwa kwajila.*

21 Ami Pawulu, yami inasoneki iku kwimusha nachikasa chami.

22 Neyi kudi muntu wabula kumukeña Mwanta, amushiñi. Mwanta wetu, twaya! 23 Luwi lwasweja lwaMwanta Yesu lwiikali nanenu. 24 Kukeña kwami kwiikali nanenu ejima mwadikunda naKristu Yesu.