MPANJI 95
Ntañishilu yaYesu
IFUKU dimu Yesu hakuleja iyala wumu nindi watela kukeña ntuñi nindi. Iyalowu hakumwihula Yesu nindi: ‘Ntuñi nami hinyi?’ Chalala, Yesu hakwiluka yitoñojoka yaniwu iyala. Iwu iyala nakutoñojoka nindi antu amuchidi windi niamuchipompelu chindi hohu diwu antuñi nindi. Tutalenu Yesu chanamwakuliyi.
Mpinji yikwawu Yesu watañishaña kuhitila mukuhosha mpanji. Ichi dichineliyi. Hakuhosha mpanji yakaYudeya namwiniSamariya. Twadizahu dehi netu aYudeya amavulu hiyadikeña naweniSamariyaku. Chachiwahi, iyi diyi mpanji yaYesu:
Ifuku dimu kwadiña kaYudeya wakunkumukileña mpidi munjila yaya kuYeriku. Amakombi hiyakumulukuka. Hiyakumwiya mali nakumweta nakumushiya tuhu kwakwihi nakufwa.
Chimunahiti mpinji kapristu kaYudeya hakwinza munjila. Wamumweni iyala weteliwu. Wunatoñojoki neyi welilidi? Wakuminini dakutondolwela kwishinadi danjila nakutwalekahu kuya. Kulondelahu mukwakwitiya mukwawu niyena wenjili. Wadiña kaLevi. Wemeni? Inehi, niyena hemeni kulonda amukwashi ona iyala weteliwuku. Talaña akapristu nakaLevi ana anakuya nakukunkumuka munjila.
Ilaña talaña iwu wudaha naniwu iyala wunetiwu. HimwiniSamariya. Nawa wudi nakukwasha kaYudeya. Nakumusha yitumbu hayilonda yindi. Nkumininaku, hakumutwala kaYudeya kwiluña kwatelelayi kunookela kulonda akoli.
Hanyima yakumanisha mpanji yindi, Yesu hakumwila iyala wamwihwili lwihu nindi: ‘Hinyi hadi awa asatu wazatili neyi ntuñi nindi kudi ona iyala weteliwu? Wadiña kapristu tahindi, kaLevi tahindi, kaSamariya?’
Iyalowu hakwakula nindi: ‘Iyala kaSamariya diyi. Wamutiyilili luwi ona iyala weteliwu.’
Yesu hakuhosha nindi: ‘Wunakuli chiwahi. Dichi yaña wukeleña akwenu neyi cheliliyi.’
Komana hiwunayikeñi ntañishilu yaYesuku? Tunatweshi kudiza yuma yayivulu, yalema neyi tukutiyilila yuma yahoshayi Yesu muBayibolu, netuku?