Kutañisha Mumbanda Kasamariya

Hampinji yinakuyawu kufuma kuYudeya nakuya kuÑaliliya, Yesu niatumbanji twindi anahiti munkambi yakuchikasa chachidilu kuSamariya. Anazeyi nankashi hanilu lwendu. Namwana, anemani kwakwihi namusumba waSika nakunooka heshima daYakoba hadaha dembiliyi hela dafweteliyi kumwimbila yaaka yayivulu henohu Yesu kanda enzi. Makonu, idi ishima munateli kudiwana kwakwihi namusumba wamakonu waNablus.

Hampinji yinakunookayi Yesu heshima, atumbanji twindi anayi nakulanda yakuda mumusumba wudi mukamwihi. Hampinji yinafumiwu iku, mumbanda kaSamariya nenzi nakutaha menji. Yesu namwili nindi: “Nyinkihu menji akunwa.”—Yowanu 4:7.

AYudeya niaSamariya atiyañanaña wanyi hamuloña wachaambu chekala hakachi kawu. Dichi mumbanda nahayami nawa namwihuli nindi: “Wunakunlombeladi menji akunwa henohu eyi wudi kaYudeya, ami nidi mumbanda kaSamariya?” Yesu namwakuli nindi: “Neyi weluka chawaana chaNzambi ninowu wunakwili nindi, ‘Nyinkihu menji akunwa,’ mutenowu wadi kumulomba nawa yena wadi kukwinka menji awumi.” Namwakuli nindi: “Mwanta, hiwukweti chakutahilaku menjiku nawa ishima dakunama. Hanu owu menji awumi wunayiwani kudihi? Komana eyi wamubadika nkakulula yetu Yakoba, watwinkeli idi ishima mwanwineñayi yena hamu nianyanindi kushilahu niyimuna yindi?”—Yowanu 4:9-12.

Yesu namuleji nindi: “Muntu wejima wukunwa awa menji wakatiya cheñi mpwila. Ilaña muntu wejima wukunwa menji inukumwinka, hakatiya cheñi mpwilaku, muloña menji inukumwinka akwikala mudi yena kaseloki kamenji anakusefuka nakumwinka wumi wahaya nyaaka.” (Yowanu 4:13, 14) Eña, hela chakwila Yesu nazeyi nakufwila chikupu kumudizisha mumbanda kaSamariya chalala.

Dichi mumbanda nahoshi nindi: “Mwanta, nyinkihu owu menji kulonda nibuleña kutiya mpwila hela kwinza mpinji yejima kunu nakutehuna menji.” Yesu namwekani neyi nahimpi mutu wansañu nawa namuleji nindi: “Yaña wakatambiki nfumweyi nawa winzi cheñi kunu.” Yena namwakuli nindi: “Hinikweti nfumwamiku.” Nahayami chikupu hayuma yelukayi Yesu nanochu chinamulejiyi nindi: “Wunahoshi chalala neyi, ‘Hinikweti nfumwamiku.’ Muloña wasumbukahu dehi kudi amayala atanu, nawa iyala iwukweti chayinu mpinji hinfumweyiku.”—Yowanu 4:15-18.

Nsañu yalema yinamulejiwu nayitiyi nawa nahayami nakuhosha nindi: “Mwanta, namoni nami wudi kaprofwetu.” Dichi namwekeshi nindi nakukeña kwiluka yuma yayivulu hadi Nzambi. Munjilanyi? Natwalekihu nindi: “Ankakulula jetu [aSamariya] adifukwilileña hayinu mpidi [yaGerizimi, yidi mukamwihi], ilaña enu [aYudeya] mwahoshaña nenu muYerusalema dimwatela kudifukwilawu antu.”—Yowanu 4:19, 20.

Hela chochu, Yesu nalumbululi nindi iluña dakudifukwila dalema wanyi. Nahoshi nindi: “Mpinji yinakwinza yimwakabula kudifukula kudi Tata hayinu mpidi hela muYerusalema.” Nkumininaku namuleji nindi: “Mpinji yinakwinza, nawa yinashiki dehi, oyu akakudifukula alala yakadifukulañawu kudi Tata muspiritu nimuchalala, muloña Tata nakukeña antu adi neyi awa adifukuleña kudi yena.”—Yowanu 4:21, 23, 24.

Chuma chakeñañayi Tata mukudifukula kwalala hiiluñaku, ilaña njila mwadifukulañawu. Mumbanda nazañalali. Nahoshi nindi: “Neluki nami Mesiya nakwinza, atenañawu nawu Kristu. Nawa neyi nenzi dehi, wakatuleja chiwahi yuma yejimiyi.”—Yowanu 4:25.

Kuhiñahu, Yesu namuleji chalala chalema, nindi: “Diyi ami, iwunakuhosha nindi.” (Yowanu 4:26) Toñojokenu chumichi! Iwu mumbanda wenza nakutaha menji itena mwiwulu. Ilaña Yesu namulemeshi munjila yayiwahi. Namuleji hatooka yuma yinabuli kushimunayi kudi antu acheñi, nindi diyi Mesiya.

ASAMARIYA AMAVULU ANAKUHWELELI

Atumbanji twaYesu anafunti nayakuda kuSika kwayawu. Anamuwani heshima daYakoba hamushiyawu, ilaña anamuwani nakuhanjeka namumbanda kaSamariya. Atumbanji chinashikiwu, mumbanda naditwiiki nsaba yewumba hakuya mumusumba.

Chinashikiyi muSika, iwu mumbanda natachiki kuleja antu yuma yamulejawu kudi Yesu. Nakuyileja nakuyishinjila nindi: “Tuyenu mutali muntu wanleja yuma yejima yinakoñeli.” Kuhiñahu hakwila ayikokoli enzi, nehuli nindi: “Iwu kwiji dinu diyi Kristu?” (Yowanu 4:29) Ilu lwihu diyi nsañu yalema, nsañu yinahanjekihu kufuma tuhu mumafuku aMosi. (Kuhituluka 18:18) Yinaleteshi antu amumusumba kwinza nakudimwena Yesu awenawu.

Mumpinji yoyimu, atumbanji anakumukanjikija Yesu kuda yakuda. Ilaña nayakuli nindi: “Nikweti yakuda yinatela kuda yimunabuli kwiluka.” Atumbanji anahayami, nakudihujola nawu: “Kudihu muntu wunamuletelihu yakuda tahindi?” Yesu nayilumbulwili atumbanji twindi mwatalishayi: “Yakuda yami hikwila nkeñelu yanowu wantemesheli nikumanisha mudimu windi.”—Yowanu 4:32-34.

Mudimu wunakutenayi Yesu bayi wakumuna mbutu, wukatachika neyi munahiti tukweji tuwanaku. Ilaña, Yesu nakutena kumuna kwakuspiritu, neyi chinatwalekihu nindi: “Fumbulenu mesu enu kulonda mutali maha, chiyanatookashaniwu dehi to-o, anashiki dehi hampinji yakwaañula. Mukakumuna natachiki dehi kutambula wufwetu nikupompesha nyikaabu yawumi wahaya nyaaka, kulonda mukakukuwa nimukakumuna azañaleli hamu.”—Yowanu 4:35, 36.

Yesu neluki dehi chuma chikufumamu nachina chahanjekayi nanona mumbanda. Amavulu muSika anatachiki kumukuhwelela nayuma yahoshayi ona mumbanda, muloña wayileja antu nindi: “Wanleja yuma yejima yinakoñeli.” (Yowanu 4:39) Dichi, chinenziwu kwishima kufuma muSika, anamuleji Yesu nawu ashakami mafuku kulonda ahanjeki nawu. Yesu neteji nawa nashakami muSamariya mafuku ayedi.

ASamariya chinakumutiyililawu Yesu, amavulu anamukuhweleli. Anamuleji mumbanda nawu: “Ichi dinu hitunakuhweleli namazu iwahosha hohuku; muloña tunaditiyili etu aweni nawa tuneluki netu iwu muntu chalala diyi chamwinu wakaayi.” (Yowanu 4:42) Mumbanda kaSamariya welili chuma chachiwahi chitwatela kudizilaku neyi tunakushimwina hadi Kristu, kusañumuna mpwila kulonda antiyilili jetu elukiliku nsañu yayivulu.

Anukenu nenu kunashali tukweji tuwana nampinji yakumuna, hadaha kumuna bali, yekalañaku munooña. Dichi hadaha yinu mpinji himuNovember hela December. Chumichi chinatalishi mukwila nawu kufuma tuhu haChipandakenu ha 30 C.E., Yesu niatumbanji twindi ashakamini muYudeya tukweji 8 nakutañisha nikupapatisha. Ichi anafunti kumukala wawu kuÑaliliya kuchimunswa. Yumanyi yinakuyihembelela kweniku?