Mumbanda Wudi Kwishima daMenji

Chamanini Chipandakenu, Yesu niatumbanji twindi ahitili muSamariya hafuntileñawu kuÑaliliya. Kwakwihi namusumba waSika, Yesu wemeni heluña dateneneñawu nawu ishima daYakoba. Hanookeleñayi kwenoku, atumbanji twindi ayili mumusumba nakulanda yakuda.

Mumbanda wumu wenjili kwishima nakutehuna menji. Yesu wamwilili nindi: “Nyinkihu menji akunwa.” Yena wamwakwili nindi: ‘Wunakuhosheladi nanami? Ami nidi mumbanda kaSamariya. AYudeya hiyahanjekaña nawaSamariyaku.’ Yesu wamulejeli nindi: ‘Neyi wañiluka, mutenowu wadi kulomba menji akunwa nawa nadi kukwinka menji awumi.’ Iwu mumbanda wamwihwili nindi: ‘Wunatalishi mudihi? Wudana nimbeketi.’ Yesu wamwakwili nindi: ‘Muntu wejima wukunwa menji inukumwinka hakatiya cheñi mpwilaku.’ Iwu mumbanda wamwilili nindi: “Mwanta, nyinkihu owu menji.”

Kuhiñahu Yesu wamulejeli nindi: ‘Kamutambiki nfumweyi enzi kunu kwishima.’ Yena wamwakwili nindi: ‘Hinikweti iyalaku.’ Yesu wamwilili nindi: ‘Wunahoshi chalala. Wasumbukahu dehi mapampa atanu, nawa ichi wunakushakama neyala iwabula kusumbuka nindi.’ Iwu mumbanda wamulejeli nindi: ‘Namoni nami wudi kaprofwetu. Antu jami akuhwelela nawu tunateli kudifukula kudi Nzambi haniyi mpidi, ilaña aYudeya hoshaña nawu tunateli kudifukwila hohu muYerusalema. Nakuhweleli nami neyi Mesiya nenzi dehi, wakatuleja chakudifukula.’ Kuhiñahu Yesu wamulejeli chuma chabulayi dehi kulejahu muntu wudi wejima nindi: ‘Yami Mesiya.’

Iwu mumbanda wayili lufuchi mumusumba wawu nakuleja aSamariya nindi: ‘Namoni namuwani Mesiya. Weluka yuma yejima hadi ami. Tuyenu mutali!’ Ayili hamu nindi kwishima nawa atiyilili chatañishileñayi Yesu.

ASamariya amulejeli Yesu nawu ashakami mumusumba wawu. Watañishili mwenomu hadi mafuku ayedi nawa antu amavulu amukuhweleleli. Amulejeli mumbanda kaSamariya nawu: ‘Hanyima yakutiyilila kudi iwu muntu, tuneluki netu chalala diyi Chamwinu wakaayi.’