Mukanda wamuBayibolu Naambala 53—2 Atesalonika
Nsoneki: Pawulu
Awisonekeleli: muKorinda
Awimanishili Kuwisoneka: Kwakwihi na. 51 C.E.
MUKANDA wakapostolu Pawulu wamuchiyedi wasonekeleliyi eniTesalonika wadilondashanini chikupu nawamuchimu. Tweluka netu awusonekeli hanyima yakumanisha mukanda watachi, nawa awisonekeleli mumusumba wowumu waKorinda, kudi ana kwetu wowamu, cheñi aSilivanusa niTimotewu, adibombeli hamu naPawulu hakwimusha chipompelu chakuTesalonika. Wejima wawu adiña ankoñi endaña amuchipompelu chawiniKristu chakunyima, nawa kwosi wunsahu wamwekeshaña nawu kufuma hiyadiña hamu muKorinda muwusatu wawu hiyadimwenuhu cheñiku. (2 Tesa. 1:1; Yil. 18:5, 18) Mutu wansañu wuyahosheleñawu nichiyawuhosheleñawu chinakumwekesha nawu Pawulu watoñojokeli kufumba chipompelu chakubula kumba mpinji kutalisha hachiluwa chadiñamu.
2 Walala waniwu mukanda anawumwekeshi neyi chochinamwekeshiwu walala wamukanda waAtesalonika Wamuchimu. Awitena nikudi Irenaeus (wamuyaaka nkulakaji yamuchiyedi C.E.) nikudi ansoneki amakwawu akunyima, kushilahu niJustin Martyr (niyena wamuyaaka nkulakaji yamuchiyedi), hadaha wateneni 2 Atesalonika 2:3 hasonekeliyi hadi “muntu wanshidi [waluwalala].” Wekala handandanda yoyimu yakusambila hadi Atesalonika Wamuchimu. Hela chakwila mumukanda waChester Beatty Papyrus Na. 2 (P46) mwosi, wakeñekeleña kwikala mumafu akutachikilahu ayedi ahakachi kamafu 7 abula kwikala kunsa yaAtesalonika Wamuchimu.
3 Muloñadi chiyawusonekeleluwu iwu mukanda? Mazu aPawulu afumbiliyi Atesalonika, dikutwelukilaña netu amakwawu muchipompelu adiña nakutadika nawu kwinza kwaMwanta kwadiña kwakwihi, nawa awa atuvuba adiña nakushimwina chikupu yitoñojoka yawu, nawa hiyadiña nakusañumuna akwawu muchipompeluku. Nawa chidi neyi amakwawu adiña nakuleyela mwenimu kulonda abuleña kuzata nakuwana yuma yakumujimba. (2 Tesa. 3:11) Mumukanda windi watachi, Pawulu wahosheli hakwinza kwaMwanta, nawa chakadi kujina awa atuvuba chiyayitañililuwu mukanda, anyakeli kubalumuna mazu aPawulu nakuyitalisha mwacheñi. Nawa atela atwambileña nawu mukanda wasonekeli Pawulu wamwekesheleña nawu ‘ifuku daYehova dinashiki dehi.’—2:1, 2.
4 Chidi neyi Pawulu watambwilili mujimbu wanichi chiluwa, hadaha kudi muntu watwalili mukanda windi watachi kuchipompelu, nawa wafwilileña chikupu kwolola yitoñojoka yawamana kwindi akeñeliyi chikupu. Dichi muchaaka cha 51 C.E., Pawulu hamu nawamabwambu jindi ayedi, atemesheli mukanda kufuma kuKorinda kuya kuchipompelu chamuTesalonika. Kubombela hakwolola yitoñojoka yaheña hakwinza kwaKristu, Pawulu wayikolesheli chikupu kushimata muchalala.
CHIWAWAHILA
10 Iwu mukanda wawihi wuyonena watemesheluwu kudi Atesalonika wahoshaña hayuma yayivulu yachalala chawiniKristu, nawa twatela kuwudiza wejima. Talenu iyi ntañishilu yalema yinalondeluhu ninshimbi yinahoshuwu muniwu mukanda: Yehova hiNzambi wawamwinu, nawa wajilikaña naspiritu nimukwitiya nsañu yalala (2:13); eniKristu atela kumika makabi kulonda ayiteni kutelela Wanta waNzambi (1:4, 5); EniKristu atela kuyipompesha hamu kudi Mwanta Yesu Kristu hakwinza kwindi (2:1); Yehova wakasompesha chaloña antu abulaña kwovwahila nsañu yayiwahi (1:5-8); ana atambikawu akayilemeshela hamu naKristu Yesu, kwesekana namwaya luwi lwaNzambi (1:12); anakuyitambika kuhitila mukushimwina nsañu yayiwahi (2:14); atela kwikala nachikuhwelelu (1:3, 4, 10, 11; 2:13; 3:2); chachiwahi kuzata mudimu wakumujimba kulonda tudikwasheña mumudimu wakushimwina; neyi muntu kwonti kwindi kukalakala, nateli kwikala nkopi nakutachika kuvuba nsañu (3:8-12); kumukeña Nzambi kwendelaña hamu nakutatakena (3:5). Komana nsañu yekala muniwu mukanda wawihi wonenawu yalema nawa yakoleshaña chikupu.
11 Muniwu mukanda Pawulu wakameneni chihandilu chakuspiritu chawana kwindi amuTesalonika nikunuñañana nikukola kwachipompelu. Wayitwalili mumpinji yefuku daYehova, nakuyileja nindi “muntu wanshidi” chiña yasambila kumwekana, kulonda yakashakami ‘mutembeli yaNzambi, nakuditena nindi yami nzambi.’ Hela chochu, owu ‘amonañawu kutelela wanta waNzambi’ atela kwiluka chikupu nawu Mwanta Yesu katataka akamumwekeshi mwiwulu, wakenza nakutenda nakubidima kwakesi “hakenzayi kulonda akamulemesheli kudi antu indi ajila, akamuhayamini mudi akwakwitiya ejima hefuku odu.”—2:3, 4; 1:5, 10.