“Yenu Mwakelishi . . . Atumbanji”

1-6. Shimunenu yakutalilahu yawaYinsahu ashimwinineña mpinji yambokamboka.

REBECCA, Chinsahu chaYehova wakansi muGhana, wamweneña shikola yawu nindi didu iluña dakushimwina. Mpinji yejima wendeleña nanyikanda yashindamena haBayibolu muchola chindi. Hampinji yakunooka, wawanineña mpinji yatelela kulonda ayishimwini akwawu akashikola. Rebecca watachikili kudiza Bayibolu nawakwawu mwatañilileñawu.

² Hachitutu chaMadagascar, chekala kumusela waAfrica, apayiniya ayedi endeleña makilomita 25 mwiluña ditata nankashi hakwila ashiki kumukala wekala kwakulehi. Kwenakuna, alombweleña atudizi aBayibolu amavulu amwekesheleña mpwila.

³ Hakwila ayiwani antu ashakamaña kuyikumu yakaloña Paraguay niParaná, aYinsahu muParaguay kushilahu niakakudihana afumini mumatuña 15 azatilili hamu kulonda atuñi watu. Watu weneni wudi namatani 45 wasendeleña antu akushika ku 12. Awa akakushimwina aWanta ashimwinini neyena nsañu yayiwahi mumaluña akala kushika iwu watu.

⁴ KuNorth America, aYinsahu muAlaska azatishili mpinji yayiwahi yamayinza kulonda ashimwini antu enzaña mwituña nakuhempula. Chashikili mpinji yanoña helili jimbopolu jishiki mwadiña enyi afumini kumatuña ashiyashana, aYinsahu amunidi iluña ayili kwashikenaña jimbopolu nanyikanda yashindamena haBayibolu mumadimi ambokamboka. Mudodenidi iluña, azatishili jindeki kulonda ashiki kunyikala yekala kwakulehi, chayikwashili kushimwina nsañu yayiwahi kudi antu atenañawu nawu aAleut, Athabascan, Tsimshian, Tlingit.

⁵ Larry, washakamaña muTexas, U.S.A., wadiña neluña dakushimwinamu dadimena, mwitala mwamuhembeleleñawu. Hela chakwila wendeleleña mukakinga kawayifwayi muloña wamaposu amweniyi, Larry watwalekelihu kushimwina. Wayishimwinineña antu nsañu yaWanta, nikuchiñeja kwamuBayibolu nakuyileja nindi ifuku dimu muchiyuulu chaWanta wakatachika kwenda cheñi.—Isa. 35:5, 6.

⁶ Hakwila ayi kukupompa kweneni muMyanmar, izanvu dawaYinsahu dendeli mafuku asatu nawatu kufuma kuMandalay. Chineli afwilileña kushimwina nsañu yayiwahi, asendeli nyikanda yashindamena haBayibolu, yahaniniwu kudi akwawu mwakandimininiwu muwatu. Neyi watu wimana hatawuni hela hamukala, akakushimwina adikita asulukileña nakuya munyikala swayi-swayi nakuhana nyikanda. Nawa haniyi mpinji antu amakwawu akukandama muwatu, ekalileña “iluña dakushimwina” dadiha danawa akakushimwina aWanta.

7. Munjilanyi akakudifukula aYehova mwashimwinañawu wunsahu haWanta waNzambi, nawa chumanyi chafwilañawu?

⁷ Kufwana amanakwetu niahela anashimuniwu muniyi yakutalilahu yantesha, akakudifukula aYehova akweti iyena mukaayi kejima anakushimuna “chikupu wunsahu haWanta waNzambi.” (Yilw. 28:23) Ayaña kwitala nikwitala, ashimwinaña antu munyikwakwa, ayisonekelaña nyikanda nikuhanjeka nawu hajinshiña. Hela adi mubasi, anakwenda hela anakunooka kumudimu wakumujimba, afwilaña chikupu kuwana njila yakushimwinamu haWanta waNzambi. Njila jakushimwinamu jinateli kwambuka, ilaña afwilaña kwila chuma chochimu, kushimwina nsañu yayiwahi kwejima kudi antu.—Mat. 10:11.

8, 9. (a) Chumanyi chatuleteshaña tuhayameña nachinataandi mudimu wakushimwina Wanta? (b) Lwihwinyi lutwatela kutoñojokahu, nawa twatela kwiladi kulonda tuwani ñakwilu?

⁸ Enu akwetu antañi, komana mudi hakachi kawakakushimwina aWanta amavulu, anakushimwina mumatuña akubadika ha 235? Neyi munakuzataku, munakutandisha mudimu wakushimwina waWanta! Nyidimu yinazatewi mukaayi kejima yakuhayamisha chikupu. Hela chakwila kudi makañesha nikukala, kushilahu nikuyilekesha nimakabisha ajinfulumendi, aYinsahu jaYehova anakushimwina chikupu haWanta waNzambi kudi antu akunyuza yejima.

⁹ Lwihu lwakutoñojokahu dilu ilu, Muloñadi makañesha, hela makañesha afumaña kudi Satana, chinakubulilawu kukañesha mudimu wakushimwina Wanta kuyilaku hambidi? Hakwila twakuli ilu lwihu, twatela kusandujola yuma yamwekeni muyaaka nkulakaji yakusambila C.E. Etu aYinsahu jaYehova adiku makonu tunatwalekihu namudimu wowumu watachikiliwu kunyima.

Mudimu Wasweja Kulema

10. Yesu washili muchima kumudimwinyi, nawa yumanyi yelukiliyi haniwu mudimu?

¹⁰ Muntu watachikishili chipompelu chawakaKristu, Yesu Kristu, washiliku chikupu muchima kumudimu wakushimwina nsañu yayiwahi yaWanta waNzambi; dimudimu wazatileñayi muchihandilu chindi. Walumbulwili nindi: “Natela cheñi kushimwina nsañu yayiwahi yaWanta waNzambi kunyisumba yikwawu, muloña ichi dichantemesheleliwu.” (Luka 4:43) Yesu welukili nindi nakutachikisha mudimu wukubula kumanishayi nkawindi. Kukamwihi nakufwa kwindi, washimwini chadimu nindi nsañu yaWanta akayishimwina “kunyuza yejima.” (Maku 13:10) Hanu dinu iwu mudimu atela kuwuzata ñahi nawa kudi anyi?

11. Mudimwinyi wasweja kulema wayinkeliyi Yesu atumbanji twindi, nawa wakayikwasha ñahi hakwila akawuzati?

¹¹ Hanyima yakwila Yesu nafwi nawa anamusañuli, wamwekeni kudi atumbanji twindi nawa wayinkeli iwu mudimu walema nindi: “Dichi, yenu mwakelishi antu akunyuza yejima ekali atumbanji, muyipapatisheña mwijina daTata nidaMwana nidaspiritu yajila, muyidizisheña ahembeña yuma yejima yinnayileji enu. Nawa tiyenu! Ami nukwikalaña nanenu mafuku ejima kushika nikukukuma kwanshakaminu yamakonu.” (Mat. 28:19, 20) Mazu akwila nawu “ami nukwikalaña nanenu” anakumwekesha nawu wakayikwashañaku atumbanji mumudimu wakushimwina nikwilisha atumbanji. Akakeñekaña wukwashu wamuchidiwu, muloña Yesu washimwini chadimu nindi “akayihela kudi nyuza yejima.” (Mat. 24:9) Kwatela kwikala chuma chatela kuyikwasha atumbanji. Henohu kanda afunti mwiwulu, Yesu wayilejeli nindi akayinka spiritu yajila kulonda akekali ayinsahu “kwakumina iseki dejima.”—Yilw. 1:8.

12. Malwihwinyi itunateli kudihula, nawa chalemenadi kwiluka ñakwilu?

¹² Chumichi chikuletesha tudihuli malwihu amakwawu netu: Komana apostolu aYesu niatumbanji amakwawu amuyaaka nkulakaji yakusambila azatili iwu mudimu namuchima wejima? Komana aka kadizanvu kawamayala niambanda akaKristu kashimwinini chikupu haWanta waNzambi nihampinji yayikabishileñawu? Komana ayikwashili kudi spiritu yaYehova mumudimu wawu wakwilisha atumbanji? Awa malwihu nimalwihu amakwawu adifwanaku ayakula mumukanda wamuBayibolu waYilwilu. Chalema nankashi kwiluka ñakwilu. Muloñadi? Yesu wakanini nindi mudimu wahaniniyi wukatwalekahu “kushika nikukukuma kwanshakaminu yamakonu.” Dichi iwu mudimu atela kuwuzata nikudi akaKristu alala, kushilahu ninetu tunakushakama munanu mafuku akukuminina. Kafwampi, twatela kwiluka nsañu yakunyima yasonekawu mumukanda waYilwilu.

Yuma Yidi muMukanda waYilwilu

13, 14. (a) Hinyi wasonekeli mukanda waYilwilu, nawa nsañu yasonekeliyi wayiwanini kudihi? (b) Yumanyi yekala mumukanda waYilwilu?

¹³ Hinyi wasonekeli mukanda waYilwilu? Mukanda waweni washimuna wanyi wawusonekeli, ilaña mazu akutachikilahu amwekeshaña hatooka nawu nsoneki waYilwilu wadiña muntu yowumu wasonekeli Nsañu Yayiwahi yaLuka. (Luka 1:1-4; Yilw. 1:1, 2) Dichi, kufuma tuhu kumatachikilu, Luka, “ndotolu itwakeña” nawa mukakusoneka nsañu yakunyaaka, diyi elukawu nawu diyi wasonekeli Yilwilu. (Kol. 4:14) Muniwu mukanda mwekala nsañu yamwekeni hadi yaaka 28, kufuma hakandaminiyi Yesu mwiwulu mu 33 C.E. kushika nimpinji yamukasiliwu kapostolu Pawulu mukaleya muRoma mu 61 C.E. Luka chinakuditenayi yomweni mumazu amakwawu chinakumwekesha nawu niyena wadiña kwoku hansañu yikwawu yasonekeliyi. (Yilw. 16:8-10; 20:5; 27:1) Luka, mukakusandujola chikupu, watela wafumishili nsañu yikwawu kudi Pawulu, Baranaba, Fwilipu niantu amakwawu atenayi mumukanda.

¹⁴ Yumanyi yekala mumukanda waYilwilu? Hakusambila, muNsañu Yayiwahi, Luka wasonekeli hansañu yahosheliyi Yesu niyeliliyi. Hela chochu, mumukanda waYilwilu, Luka nashimuni yuma yahosheli nawa yelili akakumulondela Yesu. Dichi, mukanda waYilwilu, wahosha hadi antu azatili nyidimu yakuhayamisha, hela chakwila antu amavulu ayimweneña nawu “adiña ataña wanyi nawa hiyantu hohu kwawu.” (Yilw. 4:13) Muwihi, iyi nsañu yonenawu yatulejaña chipompelu chawakaKristu chichatachikili nichichakulili. Mukanda waYilwilu wamwekeshaña chashimwinineñawu akaKristu akusambila, njila jazatishileñawu niyilwilu yawu. (Yilw. 4:31; 5:42) Washimuna mudimu wazatili spiritu yajila hakutandisha nsañu yayiwahi. (Yilw. 8:29, 39, 40; 13:1-3; 16:6; 18:24, 25) Mukanda waYilwilu watwalekahu namutu wamuBayibolu, mwabombela kujilika ijina daNzambi kuhitila muWanta windi wakayuulañawu kudi Kristu, nawa wamwekesha chikatanda nsañu yaWanta hela chakwila kudi makañesha.—Yilw. 8:12; 19:8; 28:30, 31.

15. Mukanda waYilwilu wukutukwasha munjilanyi?

¹⁵ Mwamweni, chatuzañaleshaña nawa chatukoleshaña neyi tushinshika nsañu yekala mumukanda wamuBayibolu waYilwilu! Neyi tutoñojoka hakuhamuka niheyena dadiña nawakakumulondela Kristu akusambila, nyichima yetu yikutatashana. Tukwikala nachizaku chakukeña kwimbujola chikuhwelelu chawakwetu akakushimwina akusambila. Chumichi chikutukwasha kuzata mudimu watulejawu nawu “yenu mwakeli antu . . . ekali atumbanji.” Awunu mukanda wumunakutaña anawusoneki kulonda wuyikwashi kudiza chiwahi mukanda waYilwilu.

Mukanda Wukutukwasha Kudiza Bayibolu

16. Yumanyi yisatu yinasonekeliwu iwu mukanda?

¹⁶ Iwu mukanda anawusonekelidi? Iwu mukanda anawusoneki muloña waniyi yuma yisatu (1) kulonda tukuhweleli chikupu netu Yehova nakuzatisha spiritu yindi yajila kukwasha mudimu wakushimwina Wanta nikwilisha atumbanji, (2) kutusañumuna kulonda twikali neyena dakushimwina kuhitila mukudizila kucheliliwu akakumulondela Kristu akusambila, nawa (3) kulemesha kuloñesha kwaYehova niantu anakulombola mudimu wakushimwina nikubiña yipompelu.

17, 18. Awunu mukanda anawusoneki munjilanyi, nawa yumanyi yidimu yikutukwasha neyi tunakudiza Bayibolu nkawetu?

¹⁷ Iwu mukanda anawusoneki munjilanyi? Neyi chimunamoni, anawambuli muyibalu 8, chibalu-hichibalu chinahoshi hansañu yekala mumukanda waYilwilu. Tupetulu tunalondelihu, bayi neyi tunakukeña kulumbulula mukanda waYilwilu havasi hivasiku, ilaña tunakushimuna yuma yitwatela kudizilaku kunsañu yasonekawu muniwu mukanda wamuBayibolu nikutukwasha chitunateli kuzatisha yikuma yitunadizi halwetu. Kumatachikilu akapetulu kejima, hadi mazu anakulumbulula mazu alema kapetulu niNsona yinakumwekesha chibalu chamukanda waYilwilu chikuhanjekewahu.

¹⁸ Kudi yuma yikwawu yidi muniwu mukanda yikuyikwasha neyi munakudiza Bayibolu nkawenu. Nyevulu yayiwahi yinakumwekesha yuma yekala mumukanda waYilwilu yikuyikwasha kutoñojoka hayuma yamwekeni chimukutañaña oyu nsañu yaBayibolu. Mutupetulu twatuvulu mudi yikasha mudi nsañu yikwawu. Yikasha yikwawu yinashimuni nsañu yamuntu ashimunawu muBayibolu wadiña nachikuhwelelu chitwatela kwimbujola. Yikwawu yinashimuni jiika hamaluña, yuma yamwekeni, tushidikilu hela antu amakwawu ashimunawu mumukanda waYilwilu.

19. Yumanyi yitwatela kudishinshikañahu mpinji yejima?

¹⁹ Iwu mukanda wukuyikwasha kudishinshika chikupu enu aweni. Hichikweti muloña nayaaka yimunakalakali neyi mukakushimwina waWantaku, chikuwaha nankashi mpinji yejima neyi muhudikila nakudishinshika kulonda mumoni yuma yimwalemesha muchihandilu nichimwamonaña mudimu wawakaKristu wakushimwina. (2 Kor. 13:5) Dihulenu nenu: ‘Komana nichidi kumona mudimu wakushimwina nami watela kuzatewa swayi-swayi? (1 Kor. 7:29-31) Komana inakushimwina nsañu yayiwahi chakufuma hamuchima nawa neyena? (1 Tes. 1:5, 6) Komana inakuzata chikupu hakumina ñovu yami mumudimu wakushimwina nikwilisha atumbanji?’—Kol. 3:23.

20, 21. Mudimu wetu wunakukeñekeladi kuwuzata mukunyakashana, nawa twatela kwiladi?

²⁰ Twanukeña mpinji yejima netu atwinka mudimu walema chikupu, wakushimwina nikwilisha atumbanji. Ifuku chidahita, chatela kutwanukishaña nawu twatela kuzata iwu mudimu mukunyakashana. Kukuma kwanshakaminu yamakonu keña kushiki. Wumi wawantu amavulu kanda wikaleñahu dehi muwubanji neyi chiwudi makonuku. Tuneluki wanyi antu adi nanyichima yashinshika aketeja nsañu yitwashimwinaña. (Yilw. 13:48) Ilaña himudimu wetu wakukwasha antu amuchidiwu henohu yuma kanda yiyitamini.—1 Tim. 4:16.

²¹ Dichi, chalema hama, kwimbujola antu ashimwinini haWanta neyena muyaaka nkulakaji yakusambila. Chimukutañaña awunu mukanda wuyisañumuni kushimwina neyena ninakuhamuka. Nawa mukwikala nachizaku chakufwila kutwalekahu “kushimuna chikupu wunsahu haWanta waNzambi.”—Yilw. 28:23.