January

Chineli mafuku akukuminina hiyakukeña kukuma, yuma yatama ‘yinakumena neyi matahu.’ (Mas. 92:7) Twahayamaña wanyi hakumona antu anakudiwula nshimbi jaNzambi. Mukaayi kamuchidiwu, tunateli kwikala ñahi “anyana anyanya kuyuma yatama” ilaña ‘tunakutoñojoka neyi muntu wapama chikupu?’ (1 Kor. 14:20) Ñakwilu yidi munsona yefuku dalelu, yinakwila nawu: “Akeñakeñaña Yehova ashinshikaña mwaya yuma yejima,” dikwila nawu yuma yejima yatela kumuzañalesha. Mazu adifwana nanawa ekala cheñi haYishimu 2:7, 9, ahoshaña nawu Yehova “akwakwoloka wayiswekelaña maana alala.” Chafumañamu, antu aloña ‘ashinshikaña nikuloña, niwuñaji, nimwesekena yuma, kafwampi njila jejima jajiwahi.’ Nowa, Danyeli niYoba adiña nanawa maana. (Ezek. 14:14) Niantu jaNzambi makonu akweti awa maana. Indenu halwenu mukweti awa maana? Komana ‘mwashinshikaña mwaya yuma yejima’ kulonda mumuzañalesheña Yehova? Chuma chinateli kuyikwasha hikumwiluka chikupu chekalayi. w18.02 8 ¶1-3

Kwosi muntu atela kukanjikijawu kupapatishewa kudi anvwali jindi, muntu wunakumudizisha Bayibolu hela muntu wudi wejima muchipompelu. Yehova hakeñaña nindi tukanjikijeña antuku. (1 Yow. 4:8) Ilaña, hampinji yitunakumudizisha, twatela kukonkomwena hakulema kwakwikala nawubwambu wawuwahi naNzambi. Muchima wakusakilila chalala chinadiziyi nikufwila kusenda mpaanda yawakwaKristu diyuma yikumuletesha kadizi kupapatishewa. (2 Kor. 5:14, 15) Hosi hashimunawu nawu muntu watela kupapatishewa nayaaka mukanaña. Kadizi wejima wakulaña nikupama munjila yashiyashana. Ifuku dachipapatishu hifuku dakuzañalala chikupu. Dekala cheñi ifuku dakutoñojokahu chikupu. Twatela kuzata nañovu hakwila twili kwesekeja nakudihana kwetu. Dihafumini Yesu hakuyesekeja akwaKristu nampaanda. Atumbanji twaYesu atela wanyi “kudihandila awenawu, ilaña amuhandili owu wayifwilili nawa asañwiliwu.”—2 Kor. 5:15; Mat. 16:24. w18.03 6-7 ¶14-17

Komana kudihu mpinji yimwakeñeleña kumwekesha chisambu ilaña mudifuntamu? Neyi mwadifuntilimu, mwapulwishili kukooleka kwakuzañalela hamu nawamanakwenu nikwikala nawubwambu wakola nawena. Chisambu chatukwashaña kumanisha chineñi. Hanu dinu, chumanyi chaleteshaña antu amakwawu abuleña kumwekesha chisambu? Kudi yuma yaleteshaña abuleña kumwekesha chisambu. Chuma chimu chidi chakwila nawu, ambuña aYehova ekalaña nampinji wanyi nawa kakavulu ekalaña nayuma yikwawu yakwila. Amakwawu amonaña nawu adana mpinji niñovu yakumwekesha chisambu. Neyi dichi mwamonaña, mwatela kushinshika chimwazataña nyidimu yenu. Mwatela kuzata nañovu kulonda mwikaleñaku nampinji niñovu yakumwekesha chisambu nikwiteja neyi ayimwekeshela chisambu. Muloña Nsona yashimuna nawu akwaKristu ejima atela kumwekesha chisambu. Chatama wanyi kwikala nampinji yakwila mwenimu. Dichuma chachiwahi chitwatela kwila. Hela chochu, twatela kukeheshaku nyidimu yikwawu kulonda twileña mwenimu. w18.03 16 ¶13-14

Ejima wetu, twatela kwimbujola muntwinyi wadiña wapama chikupu kuspiritu? Yesu hohu. Muchihandilu chindi chejima nimumudimu wakushimwina, wamwekesheli nindi wafwilileña kumwimbujola Tata yindi, Yehova. Watoñojokeleña, kutiya nikwila yuma neyi chelañayi Yehova nawa welileña yuma kwesekeja nanshimbi nichakeñañayi Nzambi. (Yow. 8:29; 14:9; 15:10) Chakutalilahu, esekejenu chasonekeliyi kaprofwetu Isaya hawushona watiyañayi Yehova nachasonekeliyi nsoneki waNsañu Yayiwahi Maku chatiyiliyi Yesu. (Isa. 63:9; Maku 6:34) Komana twekala neyi Yesu, wadiña wadiloñesha kutiyila antu wushona neyi tuwana antu anakukeñeka kuyikwasha? Kubombelahu, Yesu wadihanini chikupu kuzata mudimu wakushimwina nikudizisha antu nsañu yayiwahi. Kutiyila antu wushona nikuzata iyi nyidimu dikwamwekeshaña nawu owu muntu wapama kuspiritu. w18.02 21 ¶12

Mudimu wakukulisha anyana, “himudimu weneni, sweje-e mukanu kaayi kamakonu. (2 Tim. 3:1-5) Hela chochu, mwana neyi navwaliki hekalaña nawuswa wakwambula yayiwahi nayatamaku. Ilaña wasemukaña nachinlenji chakwiluka yuma chakeñekaña kuchidizisha nikuchifumba. (Rom. 2:14, 15) Mukanda wumu wahosha haBayibolu washimuna nawu izu dachiGiriki dabalumunawu nawu “kufumba” anateli kudibalumuna nawu “kukulisha mwana.” Anyana afumbawu chiwahi kakavulu ekalaña akiñewa. Eluka nawu wuswa wawu wakufuukula wukweti mwakukumina nawa eluka cheñi nawu yuma yafuukulañawu niyuma yelañawu mwafumaña yuma yayiwahi hela yatama. Dichi, anvwali akwaKristu atela kulomba wukwashu kudi Yehova. Anukenu nenu njila yakukulishilamu anyana yambuka kwesekeja nachisemwa nikiñu. Hakwila nawu anvwali akulishi chiwahi anyanawu atela kumwovwahila Nzambi, bayi kushindamena hadi antu hela hayitoñojoka yawuntuku. w18.03 30 ¶8-9

MukwaKristu wejima wapapatishewa watela kwiluka nindi wubwambu windi naYehova ‘hikufuukula kwachisaka’ wanyi. Ilaña, hikufuukula kweyi eyi aweni, hela chakwila ayihembaña kudi anvwali. Chawahiladi kwiluka ichi chikuma? Muloña neyi hiwukukula wakatachika kutiya wuvumbi nawa akwenu akakukakejaña kwila yuma yashiyashana. Kankaña wumu wahosheli nindi: “Kansi wukuneña wanyi neyi yabula kwanakana ifuku dakuvwalika kushikola muloña wakwila hiChinsahu chaYehova. Ilaña neyi yakula nawa mpwila yawuvumbi yisweja, watela kwiluka chikupu chichalemena kwovwahila nshimbi jaYehova.” Hela chochu, bayi neyi atwansi hohu diwu amonaña kukala kwakuhaku. Ninana apapatisheweli iku akula dehi, chikuhwelelu chawu achesekaña munjila yabulili kukuhwelelawu. Iku kweseka kunabombelimu kukala kwamuwulu, yikatu ninyidimu. Mwamweni, muntu wejima, kansi hela mukulumpi watela kwiluka nindi nateli kumona kukala kukukeñeka yekali washinshika kudi Yehova.—Yak. 1:12-14. w17.12 24 ¶4-5

Talenu chakutalilahu chikwawu. Antu antesha hohu diwu akabishawu dehi neyi chamukabishiliwu Davidi. Hela chochu, ona ibwambu daNzambi wahilili wanyi. Ilaña wasonekeli nindi: “Lekaku kuzuwa, shiyaku ndombu; muchima weyi bayi wubimbañaku, chaleta kwila yuma yatama.” (Mas. 37:8) Twatela ‘kuleka’ kuzuwa muloña twamwimbujolaña Yehova, yena “hanatwili mwesekena nshidi jetuku.” (Mas. 103:10) Ilaña kudi cheñi yuma yayiwahi yafumañamu neyi ‘tuleka’ kuzuwa. Kuzuwa kwaletaña yikatu yidi neyi BP nikukañanya kwona chiwahi. Cheñi kunateli kuleñela muchima wachida mbanda nidimbelema kubula kuzata chiwahi nawa yakuda akañanyaña kuyichika mwivumu. Neyi tunazuwi, twakañanyaña kutoñojoka chiwahi. Nawa mpinji yikwawu kuzuwa kunateli kumuleñela muntu kuneña hadi mpinji yayilehi. Ilaña, Bayibolu yahoshaña nawu, “muchima wadiwunjika wahandishaña muntu.” (Yish. 14:30) Hanu dinu tunateli kuleka ñahi kuzuwa kulonda tutiyañani namanakwetu? Tunateli kutwesha neyi tuzatisha kufumba kwekala muBayibolu. w18.01 10 ¶14-15

Davidi watalishili wanyi mukwila nindi hakafwaku hela wakaya wanyi mwijamu mwayañawu ejima. Izu daNzambi dashimuna hatooka nawu Davidi washinakajili. Chelili nafwi dehi, “wakamini nawankakulula jindi amujiikili mumukala waDavidi.” (1 Anya. 2:1, 10) Hanu dinu Masamu 16:10 yateneneña hinyi? Chimwahitili yaaka kubadika ikombakaji dimu kufuma hasonekeliwu idi isamu nawa chimwahitili nyilungu kufuma hamusañwiliwu Yesu, Petulu wahosheli haMasamu 16:10 kudi aYudeya niantu ekalili aYudeya. (Yil. 2:29-32) Wahosheli nindi Davidi wafwili nawa amujiikili. Antu atiyili chahosheleñayi Petulu elukili chumichi. Nawa iyi nsañu yamwekeshaña wanyi nawu kwadiña muntu wumu hakachi kawu wamutadikili Petulu chahosheliyi nindi Davidi “welukilili chadimu kusañuka” kwaMesiya. Petulu wakolesheli chikuma chindi kuhitila mukuhosha mazu ahosheliyi Davidi haMasamu 110:1. (Yil. 2:33-36) Chahosheliyi Petulu kuzatisha Nsona chakwashili izaza dawantu kwiluka nawu Yesu wadiña “Mwanta niKristu.” Antu elukili nawu Masamu 16:10 yashikijeweli hampinji yamusañwiliwu Yesu mudi afu. w17.12 10 ¶10-12

Izanvu Dalombolaña dalombaña chikupu nikuzata nañovu kulonda ekali namaana nikashinshi kakuzatisha chiwahi mali amukuloñesha. (Mat. 24:45) Mali atambwilañawu ayizatishaña kuyuma yakeñekaña. (Luka 14:28) Kapostolu Pawulu diyi wahembeleña yawaana yakukwasha amanakwetu akabakeneña muYudeya. Wazatili nañovu kulonda antu atwalileña yawaana eli “yuma yejima nakashinshi, bayi neyi kumesu aYehova hohuku, ilaña nikumesu awantu.” (2 Kor. 8:18-21) Kuloñesha kwetu makonu kwalondelaña nshimbi hakuzatisha yawaana yahanañawu neyi cheliliwu aEzera naPawulu. (Ezera 8:24-33) Hadi yaaka yinahitihu, kwadiña yuma yayivulu yazatika. Dichi, kuloñesha kwakeñeli njila yakukeheshelamu chakuzatisha mali nikukeheshaku nyidimu kulonda yawaana yimwahanaña yizatikeña chiwahi. w18.01 19-20 ¶12-13

Kukeña niluwi kunateli kutukwasha kudanakena wumu namukwawu. Chakutalilahu, neyi mukwetu mukwaKristu yatuneñesha namazu anahoshiyi hela nayuma yineliyi, twatela kwanuka mpinji yitwahosheli hela yitwelili chuma chatama. Komana twatiyaña wanyi kuwaha chatwanakeneniwu kudi amanakwetu niahela hayuma yitwelili? (Mukwa. 7:21, 22) Sweje-e dinu, twasakililaña haluwi lwaKristu lwamwekesheliyi hakutunuñañesha mukudifukula kwalala. Wejima wetu twakeña Nzambi yowumu, twashimwinaña nsañu yoyimu nawa twavula kumona kukala kwokumu. Tunateli kuleta kunuñañana hakachi kawakwaKristu nikusha maana hesomu dawumi neyi tudikeña nikudanakena wumu namukwawu. Yakutalilahu yakusoñamisha yamuBayibolu yamwekeshaña nawu ichima dinateli kutukañesha kutambwila isomu. Chakutalilahu, Kena wamutiyilili ichima manakwindi Abeli nawa wamujahili. Kora, Datani niAbirami amutiyilili Mosi ichima nawa adikañili nindi. Nawa, Mwanta Sawulu wamutiyilili Davidi ichima nayuma yelileñayi nawa wakeñeleña kumujaha. w17.11 27 ¶9-10

Aeluda neyi adi mukomiti yawunsompeshi, atela kushinshika neyi mukwaKristu wakoña nshidi yeneni mwalala nabalumuki chikupu mumuchima. Chakala kwiluka nawu muntu nabalumuki hela nehi. Hakwila nawu mwiluki, chiña mwiluka chinakutoñojokayi, chidiyi nichidi muchima windi. (Chim. 3:3) Muntu wunavulumuni watela kubalumuka mumuchima hakwila nawu amwanakeni. Aeluda hiyakutwesha kwiluka yuma yidi kumuchima neyi chamonaña Yehova niYesuku. Dichi neyi mudi aeluda, munateli kwiluka ñahi nenu muntu nabalumuki chikupu mumuchima? Chatachi, lombenu maana nikashinshi. (1 Anya. 3:9) Chamuchiyedi, sandujolenu Mwizu daNzambi nimunyikanda yanduñu wamaana nikashinshi kulonda yiyikwashi kwaambula, “kuneña kwamukaayi” nakuneña “kwesekeja nankeñelu yaNzambi,” kubalumuka kwakweni. (2 Kor. 7:10, 11) Sandujolenu nyikanda chiyahosha hadi antu abalumukili mumuchima niabulili kubalumuka. Bayibolu yashimuna ñahi chatiyiliwu, yilwilu yawu nicheliliwu? w17.11 17 ¶16-17

Chineli iyi yilwilu mpinji yikwawu anakuyiteja nawa anakuyisoneka munyikanda, anakuyimwekesha mumafilimu nihama progilamu aha TV, kubula kwovwahila kunakuletesha antu kubula kunuñañana muchisaka. Ichi chikuma antu anachiluki hadi yaaka yayivulu. Mwituña daGreece dakushankulu, neyi iyala yeta nvwali yindi, amutambwileña wuswa wakusubuka. Munshimbi jawaRoma, kweta tata yeyi akwimweneña neyi kujahana. Nsona jejima jachiHeberu nijawakwaKristu jachiGriki jayilejaña anyana kulemesha anvwali jawu. (Kwid. 20:12; Efwes. 6:1-3) Atwansi anateli kutondolwela kwikala nayilwilu yakubula kwovwahila kuhitila mukusakilila anvwali jawu hayuma yayililawu. Hakwila ekali namuchima wakusakilila, chiña eluka nawu Nzambi, Tata yetu wejima wetu wakeñaña nindi twovwahileña anvwali jetu. Atwansi anateli kukwasha akwawu atwansi kulemesha anvwali jawu neyi ahoshaña yuma yayiwahi hadi anvwali jawu. w18.01 29 ¶8-9

Makonu neyi mukwaKristu nakoñi nshidi yeneni watela kuya nakudimona nawakulumpi amuchipompelu kulonda amwanakeni. Muloñadi chumichi chichalemena? Chatachi, Yehova diyi washaku ntanjikilu yakwila nawu akulumpi asompeña nyiloña yahamesu bwi-i, neyi chashimunawu Mwizu dindi. (Yak. 5:14-16) Chamuchiyedi, iyi ntanjikilu yakwashaña muntu wunabalumuki mumuchima kumwanakena kudi Nzambi nikubula kukoña cheñi nshidi yoyimu. (Ñal. 6:1; Heb. 12:11) Chamuchisatu, akulumpi ayinka mudimu nawa ayidizisha chakukwasha muntu wunabalumuki kulonda yabuleña kuneña nikumona nindi hiyanamwanakeniku. Yehova wayitenaña awa akulumpi nindi “kwakweyama nvula.” (Isa. 32:2) Mukwiteja wanyi nenu iyi ntanjikilu hinjila yimu mwamwekeshelañayi Nzambi luwi? Ambuña aNzambi amavulu anamoni kuwaha kwekala mukulomba nikutambwila wukwashu kudi akulumpi. w17.11 10 ¶8-9

Hela chakwila chikutukata kumuchima, twatela kuleka kuhanjeka namuntu wamuchisaka ahañawu muchipompelu hafoni, kuditemeshela mameseji, maemelu ninjila jikwawu jakuhanjekelamu. Ilaña, twalekenuhu kuchiñeja. Kukeña “kwachiñejaña yuma yejima” nawa kwachiñejaña nawu antu ejima amushiya Yehova akafunta cheñi kudi yena. (1 Kor. 13:7) Neyi mumona nenu muntu wamuchisaka hakubalumuka mumuchima, munateli kulomba nenu Nsona yimukwashi kulonda yeteji mazu aYehova akwila nawu: “Funtaku kudami.” (Isa. 44:22) Yesu wahosheli nindi twatela kumukeña kubadika chitwakeña antu. Hela chochu, wakuhweleleli nindi atumbanji twindi atela kwikala ahamuka hakwila nawu atwalekihu kwikala ashinshika hela chakwila anakumona ikañesha. Neyi kwikala kambanji kaYesu kunaleti “mpoku yakabali” muchisaka chenu, mushindamenenu Yehova kulonda yayikwashi kushinda kukala kwamuchidiwu. (Isa. 41:10, 13) Ilukenu nenu Yehova niYesu atiyaña kuwaha chimunakuumika nawa akayikiswila muloña wakashinshi kenu. w17.10 16 ¶19-21

Neyi tumona antu anakukabakana nayuma yafumaña munshidi yitwaswana kudi Adama, twayimwekeshelaña wushona. Tunakuhembelela mpinji yakafumishawu yikatu niwushinakaji. Dichi tunakulomba netu Wanta waNzambi winzeña. Chayinu mpinji, tukwashenuña antu adi mukukala. Talenu muntu wumu chasonekeliyi hadi amama yindi ashinakajili nawa akatileña chikatu chaAlzheimer (Chikatu chaleteshaña woñu kubula kuzatika chiwahi).Ifuku dimu, amama yindi atamishili yakuvwala. Dichi, chelili nawu atachiki kukosa yakuvwala, atiyili kuchiisu kunakuhodesha antu. Awa añenji adiña aYinsahu ayedi enzaña mpinji yejima nakuyitala. Awa ahela ayihwili neyi chakwila kudi mudimu wuyatela kuyikwashaku. Akwili nawu, “eña wudikoku ilaña wakutiyisha nsonyi.” Awa añenji ayikwashiliku kukosa. Kuhiñahu, ashakamini hamu nakuhanjeka. Mwanawu weyala watiyili kuwaha nankashi. Wasonekeli nindi, “Natiyili kuwaha nanawa aYinsahu. Muloña elaña yuma yatañishañawu.” Komana wushona wumwatiyilaña antu akata niatushinakaji wayileñelaña muyikwashiku kukeheshaku kukala kunakumonawu?—Fwi. 2:3, 4. w17.09 9 ¶5; 12 ¶14

Twatela kuyimwekeshela amanakwetu kukeña chakudikeñela ‘mukujinda,’ hela chakadi antu amakwawu kwiluka. (Mat. 6:1-4) Twatela cheñi kutachikilahu kulemesha antu amakwawu. (Rom. 12:10) Yesu walemesheleña antu amakwawu kuhitila mukuzata nyidimu yamukunkulwayi. (Yow. 13:3-5, 12-15) Twatela kuzata nañovu kulonda twikali adizoza hakwila nawu tumwekeshi kalemesha kudi amakwawu. Niapostolu elukili wanyi chaletesheli Yesu yalemesheña antu sampu nimpinji yatambwililiwu spiritu yajila. (Yow. 13:7) Twatela kulemesha antu amakwawu kuhitila mukubula kudimona neyi twalema kubadika amakwawu muloña washikola, maheta hela nyidimu yitukweti mumudimu waYehova. (Rom. 12:3) Nawa hitwatela kutiyila ichima antu anakulemeshawuku, ilaña twatela kuzañalala nawu hela chakwila tunamoni netu ninetu atela kutulemesha hela netu twazatiliku owu mudimu. w17.10 9 ¶9-10

Akwakushimwina amavulu awana nawu kuzatisha Izu daNzambi kunakwashi antu ashimwinañawu mwiha. Chakutalilahu. Manakwetu wumu wayili kudi mukulumpi watañili magazini etu hadi yaaka yayivulu. Wamwinkeli Kaposhi Kakutalila kakaha nawa wamutañilili nsona yadiña muniyi magazini. Watañili 2 Akorinda 1:3, 4, yahosha nawu: “Tata wasweja luwi nawa Nzambi wakukundeja kwejima . . . watukundejaña mukweseka kwejima kutwamonaña.” Mwiniitala chatiyiliyi awa mazu walejeli manakwetu yamutañili cheñi. Iwu iyala wamulejeli manakwetu nindi yena niñodindi aneñeli nawa akeñeleña wakuyikundeja nawa haniyi mpinji wakeñeli kudiza Bayibolu. Komana himukwiteja nenu Mazu aNzambi akweti ñovu chikupu mumudimu wetu wakushimwinaku?—Yil. 19:20. w17.09 26 ¶9-10

Diyabolu chadikañiliyi chaletesheli yileñaleña yamwiwulu yashinshika kudi Nzambi yihili nikuzuwa nankashi. Hela chochu, Yehova hashikeneni dakwilahu chumaku. Nadiwunjiki nawa natwalekihu kuumika nakudikaña kwaSatana. (Kwid. 34:6; Yoba 2:2-6) Muloñadi? Yehova neteji mpinji kuhitahu, muloña nakukeña wanyi muntu hela wumu yakajilumuki, ilaña “wakeñaña nindi antu ejima ekali nakukooleka kwakubalumuka munyichima.” (2 Pet. 3:9) Yehova chadihembañayi chinakumwekesha nawu ninetu twatela kwiluka mazu akuhosha nichakuyihosha. Dichi bayi tushikenaña dakwila yumaku. Neyi kunamwekani yuma yakala, toñojokenu henohu kanda mwili chuma chidi chejima. Lombenu maana kulonda muhoshi hela mwili yuma yatelela. (Mas. 141:3) Neyi muntu nahili nankashi nateli kwila chuma chatama. Etu amavulu twaditoñeshahu dehi nanhoshelu hela yuma yatama yitwelili.—Yish. 14:29; 15:28; 19:2. w17.09 4 ¶6-7

Komana Kapristu Muneni Yoshuwa chamuvwikiliwu chibañula wekalili mwanta? Inehi, muloña Yoshuwa hadiña wamuchisaka chaDavidiku nawa hashikililimu kwikala mwantaku. Chamuvwikiliwu chadiña nakwimenaku wuprofwetu, kutalisha hadi mwanta wahaya nyaaka wakumbidi nawa kapristu. Kapristu muneni anelishiwu mwanta anamutumbi ijina nawu Mutayi. Nsona jamwekeshaña nawu Mutayi diyi Yesu Kristu. (Isa. 11:1; Mat. 2:23, tth.) Chineli hiMwanta nawa Kapristu Muneni, Yesu diyi nlomboli wamashidika amwiwulu aYehova. Nakuzataña nañovu kulonda antu jaNzambi ekali akiñewa hela chakwila anakushakama mukaayi katama. (Yere. 23:5, 6) Kristu keña yashindi nyuza hampinji yakahakwilaku chiyuulu chaNzambi nikukiña antu jaYehova. (Chim. 17:12-14; 19:11, 14, 15) Ilaña henohu kanda yayijilumuni, Mutayi wudi namudimu weneni watela kuzatayi. w17.10 29 ¶12-14

Munateli kwila ñahi neyi yakuvwala yenu yidi namajilu, hadaha yinakununka nikununka? Mukushikena dakuyivula. Munjila yoyimu, twatela kunyakala kwovwahili lushimbi lwakuleka yilwilu yatama yahelayi Nzambi. Twatela kwovwahila kufumba kwaPawulu kwayifumbiliyi akwaKristu amumafuku indi nindi: ‘Mwatela kuyileka.’ Nshidi yimu yateneniyi Pawulu hiwuvumbi. (Kol. 3:5-9) Izu dadeni damuBayibolu dabalumunawu nawu “wuvumbi” dabombelamu wuvumbi wawantu adisumbula ilaña ayiteja wanyi munshimbi nikudikaama eyala neyala hela mumbanda namumbanda. Pawulu wayilejeli akwawu akwaKristu ‘kujaha yiidi yawu yamujimba’ dikwila nawu kuleka kufwila kwatama kudi “neyi wuvumbi.” Mazu aPawulu anakumwekesha nawu twatela kuleka chikupu kufwila kwatama. Nawa tunateli kuleka iku kufwila kwatama. w17.08 18 ¶5-6

Nshakaminu yamakonu yidi neyi yamumafuku akaprofwetu Mika. Wadiñaku hampinji yayuulileñayi mwanta watama Ahazi. Haniyi mpinji majika kanwa adiña kwejima. Antu adiña ankuluñaña ‘mukukoña yuma yatama.’ (Mika 7:1-3) Mika welukili nindi wukutwesha wanyi kufumishahu yuma yatama. Neyi chikuhwelelu chetu chidi neyi chadiña naMika tukuhembelelaña, tukufwilaña kuhembelela wukwashu waYehova. Etu tudi wanyi neyi kayili wunakuhembelela kumujaha. Yena anamukanjikiji kuhembelela nawa hanakukeña kutoñojoka yuma yikumumwekenaku. Etu tunambuki naniwu muntu. Etu tunakufwila kumuhembelela Yehova muloña tuneluki netu wukashikija chikaninu chindi chakutwinka wumi wahaya nyaaka hampinji yayiwahi nawa yatelela. Dichi, etu ‘twomikaña chikupu nakuwunda nimuzañalu.’ (Kol. 1:11, 12) Neyi tukuhembelela iku tunakutoba nikudiladila netu Yehova nalabi, Nzambi yetu wukutiya kutama.—Kol. 3:12. w17.08 4 ¶6-7

Tunateli kuhetelamu ñahi mukudiloñesha kwaYehova kwakutukwasha? Twatela kwikala nawubwambu wawuwahi nayena. Hakwila twikali nawubwambu wawuwahi nayena, twatela kwikala adizoza. (Zef. 2:3) Antu adizoza amuhembelelaña Nzambi kulonda yololi yuma yaheña nikufumishahu yuma yatama. Yehova watiyaña kuwaha nawantu amuchidiwu. Munjila yikwawu, Nzambi ‘wakadimbwisha atama hamaseki.’ (Mas. 147:6b) Awa mazu akuchinisha. Hakwila nawu tuheteli mukukeña kwaYehova nikutondolwela kuzuwa kwindi, twatela kuhela yuma yahelayi. (Mas. 97:10) Chakutalilahu twatela kuhela wuvumbi. Dikwila nawu twatela kutondolwela yuma yejima yinateli kutuleñela kwila iyi yuma yatama kushilahu nikutala nyevulu yanzekesi. (Mas. 119:37; Mat. 5:28) Chumichi chakala kuleka, ilaña nawukwashu waYehova nikuzata nañovu tunateli kuleka. Hakwila nawu tushindi, twatela kushindamena hadi Yehova bayi nañovu jetuku. Twatela kuya kudi Yehova nakumulembelela kulonda yatukwashi. w17.07 19-20 ¶11-13

Kuzatisha maheta hakukwasha Wanta kwamwekeshaña nawu tunakwila mwamaana. Maana atukwashaña kukwasha antu amakwawu adi mukukankila. Ejima akweti maheta ilaña abulaña kuzata mudimu wampinji yejima hela kuya kumatuña acheñi atiyaña kuwaha kwiluka nawu yawaana yawu yakwashaña akwawu azataña mudimu wakushimwina. Yawaana yakuhana mukudikeñela yatukwashaña kwidisha nyikanda nikukwasha mudimu wakushimwina mumatuña mwekala wuzweñi ilaña mudi akwakushimwina amavulu. Hadi yaaka yayivulu, matuña adi neyi Congo, Madagascar niRwanda, amanakwetu azatishaña mali anateli kwesekana namali atambulañawu mumulungu hela hakakweji kumudimu kulanda yakuda yakukwasha chisaka hela kwikala namaBayibolu. Ilaña, kuloñesha kwaYehova kunazati nañovu kuzatisha yawaana yahanañawu antu amavulu nimali ‘esekana,’ kuyibalumwina maBayibolu nikuyitwalila antu ejima muchisaka kubombelahu niatudizi aBayibolu anakufwila kudiza chalala.—2 Kor. 8:13-15. w17.07 9 ¶11

Muloñadi chichinekalili chakukundeja kutoñojoka hakulema kwakwikala ashinshika? Muloña kweseka kutwamonaña kwekala nankeñelu. Hela chakwila kwamuneñeshaña Yehova, kwatukwashaña kulonda tumwekeshi netu twahakwilañaku chiyuulu chaNzambi. Kuumika “kwamuleñelaña Nzambi kututiya kuwaha” nawa kwatukwashaña kuchiñeja. (Rom. 5:3-5) Nsañu yaYoba yamwekeshaña nawu “Yehova wukweti wushona chikupu niluwi.” (Yak. 5:11) Dichi tunateli kukuhwelela netu wukutukiswila kushilahu niantu ahakwilañaku chiyuulu chindi. Kwiluka chumichi chikutukwasha kuumika “chikupu nakuwunda nimuzañalu.” (Kol. 1:11) Mwamweni, chinateli kwikala chakala kusha maana hakuhakwilaku chiyuulu chaYehova. Dichi, twatela kutoñojokaña mpinji yejima hakulema kwakuhakwilaku chiyuulu chaNzambi neyi tudi mukukala. w17.06 26 ¶15-16

Antu amavulu makonu anakufwila kwikala nayakuvwala yayiha, yozelu yakuzatisha namalayiti niyuma yikwawu yayivulu. Dichi, mukwaKristu wejima watela kudishinshika yomweni hayuma yafwilañayi kuhitila mukudihula nindi: ‘Komana nalemesha yuma yakumujimba nankashi chakwila nakisaña mpinji yeneni kusandujola nikutoñojoka nyotoka yayiha hela yuma yayiha kubadika kuloñesha kupompa? Komana nakisilaña mpinji yeneni kuyuma yakumujimba kubadika kulomba nikutaña Bayibolu?’ Neyi tumona netu tunasweji kukeña maheta kubadika Kristu, twatela kutoñojoka hamazu aYesu akwila adi munsona yefuku dalelu. Yesu wahosheli nindi kwosi “muntu wunateli kukalakela anyanta ayediku.” Wabombelelihu nindi: “Himunateli kukalakela Nzambi hampinji yoyimu niMahetaku.” Muloña “anyanta” ejima ayedi akukeñaña kuyovwahila. Yesu wahosheli nindi, tunateli “kuhelahu wumu nakukeñahu mukwawu” hela “kukakelahu wumu nakusekeshahu mukwawu.” (Mat. 6:24) Chineli twawanina wanyi, wejima wetu twatela kuzata nañovu kulonda tubuli kwila mwaya “kufwila kwamujimba wetu,” chidi neyi kufwila maheta.—Efwes. 2:3. w17.05 25-26 ¶15-16

Hela chakwila tudi nsaba jamawumba jabula kuwanina, nsañu yitwashimwinaña yinateli kutukwasha etu niantu itwashimwinaña kutambwila wumi wahaya nyaaka. Kapostolu Pawulu chakeñeliyi mudimu wakushimwina chamukwashali kuzata nañovu kwilisha atumbanji. (Rom. 1:14, 15; 2 Tim. 4:2) Chumichi chamukwashili kuumika cheñi ikañesha dasweja. (1 Tesa. 2:2) Tunateli kumwekesha ñahi netu twakeña mudimu wakushimwina? Njila yimu yamwekesheleliyi Pawulu nindi walemesheli mudimu wakushimwina, wadiña wadiloñesha kuhosha nawantu mpinji yejima. Kufwana apostolu niakwaKristu amumafuku awapostolu, twashimwinaña wunsahu wamumpanji, kushimwina kudi antu amavulu nikushimwina kwitala nikwitala. (Yil. 5:42; 20:20) Twafwilaña kuzata nañovu mumudimu wakushimwina, hadaha kuzataku wupayiniya wakukwasha hela wampinji yejima kwesekeja nahanakumini ñovu jetu. Hekwawu tunateli cheñi kudiza idimi dacheñi, kuya kwiluña dacheñi damwituña detu hela dakwituña dacheñi.—Yil. 16:9, 10. w17.06 10-11 ¶8-9

Yuma yatama yinakumwekana mukaayi anakuyila kudi yipompelu bayi neyi kudi muntu wumuku. Toñojokenu hansakililu yakutwamba chiyinakudimba yihita yawantu kutalisha hachekalayi Nzambi, hadi Bayibolu niyuma yikamwekena antu, iseki niyuma yikwawu. Indi nfulumendi yinakuleta njita nimadombu, yinakukabisha atuzweñi niantu abula wakuyikiña nawa yelaña majika kanwa nichaambu? Indi nyitayi yinakutamisha iseki, yinakumanisha yuma yekala hamaseki nawa yinakudimba antu kulonda antu antesha hohu aheti? Izu daNzambi dashimuna dehi nawu nfulumendi ninyitayi yawu yashindamenawu akayichañula hayikuku yawu. Nfulumendi yamunu mukaayi kanashinakaji ninyitayi yejima yayikwashañaku kudikaña naWanta waNzambi, akayijilumuna halukadi lwasweja.—Yere. 25:31-33. w17.04 11 ¶7-8

Yehova, ‘washinshikaña nyichima yawantu,’ wamutiyilili Ahabi luwi. (Yish. 17:3) Antu elukili nshidi yakoñeliyi Ahabi atiyili ñahi nachamutiyililiwu luwi? Chikuhwelelu chawantaña niamabwambu jaNaboti chatela chadiña mukweseka muloña wayuma yamwekeneña neyi yinahimpiki. Neyi dimu, kudizoza kwadi kuyikwasha kutwalekahu kudifukula kudi Yehova, nikukuhwelela nawu Nzambi yawu welaña mwaloña. (Kuhit. 32:3, 4) Naboti, anyanindi awamayala niantaña jindi akatiya kuwaha kumona Yehova nasañuli antu aloña. (Yoba 14:14, 15; Yow. 5:28, 29) Cheñi, muntu wadizoza weluka nindi “Nzambi wamba kashikija nyidimu yejima kukusompesha, hamu nayuma yakujinda yejima, hela yayiwahi, hela yatama.” (Mukwa. 12:14) Neyi Yehova nakutusompesha, washinshikaña nihayuma yitunabuli kwiluka. Dichi, kudizoza kwakiñaña muntu kuspiritu. w17.04 24 ¶8-9

Hamuloña wayuma yatama yinakumwekana mukaayi, yinaleteshi amanakwetu niahela kwikala matunduka. Fwikijenu hampinji yoyimu munakudiza idimi, kulondela nshimbi jajiha nichakudikunda nawantu, kuzata yuma mumpinji, kufweta nyinsoku, kufweta mali, kuya kushikola nikufumba anyana. Kwila muyikwasha munjila yakalemesha amanakwetu niahela anakumona kukala kwamuchidiwu nehi? (Fwi. 2:3, 4) Kubombelahu, mpinji yikwawu akulumpi janfulumendi akañeshaña amanakwetu kuya nakupompa. Nyitayi yikwawu yakaanaña kukwasha amanakwetu hela kuyihaña neyi akaana kwiñila mudimu wukukojeja abuleña kuya nakupompa. Amanakwetu amakwawu etejaña muloña wakutiya woma. Dichi, neyi amanakwetu matunduka anenzi mwiluña detu, twatela kudimona nawu swayi. Atela kwiluka nawu twayikeña. Neyi tuyitiyila luwi nikuyikwasha, chikuhwelelu chawu chikukola.—Yish. 12:25. w17.05 5 ¶9-10

Chinjikijilu chimu chashimwiniyi Yesu kutalisha “kukuma kwanshakaminu yamakonu” chadiñi chakwila nawu “kukeña kwawantu amavulu kwakakeha.” (Mat. 24:3, 12) Mumafuku awapostolu, aYudeya aditeneneña nawu hiyantu aNzambi, kukeña kwawu kwamukeñeliwu Nzambi kwakeheli. Kwambukaku, akwaKristu amavulu hayina mpinji adiña namudimu “wakushimwina nsañu yayiwahi hadi Kristu” nawa amwekesheleña nawu amukeña Nzambi, akwawu akwaKristu niantu abula kwitiya. (Yil. 2:44-47; 5:42) Hela chochu, kukeña kwawatumbanji amakwawu aYesu amumafuku awapostolu kwakeheli. Yesu Kristu asañwiliwu walejeli akwaKristu ashakamineña muEfwesesa mumafuku awapostolu nindi: “Nakuwani naniwu muloña, muloña wunaleki kukeña kuwadiña naku hakusambila.” (Chim. 2:4) Chumanyi chaletesheli? Awa atumbanji twaKristu amumafuku awapostolu atela aluwankeni nayitoñojoka yamukaayi.—Efwes. 2:2, 3. w17.05 17 ¶1-3

Wadiña nlomboli wahamuka; wadiña mumbanda watiyililaña. Wadiña mushidika wabula woma; wadiña mumbanda wovwahila. Kubombela hakudifukula kudi Nzambi yowumu, chumanyi chikwawu chadifwana cheliliyi Nsompeshi Yefwata niHana ñoda Elikana? Wejima wawu amukanini Nzambi, nawa wejima wawu elili mwakaniniwu. Elili yuma yayiwahi yatela kwimbujolawu amayala nawambanda makonu anakufuukulahu kumukana Yehova. Izu dachikaninu hikumushiika chikupu Nzambi neyi chadizatishawu muBayibolu. Muntu nateli kukana kwila chuma, kuhana chawana, kuzataku mudimu wumu hela kubula kwila yuma yimu. Muntu wakanaña chakudikeñela kuzatisha wuswa windi wakufuukula. Hela chochu, kwekala kwajila sweje-e neyi muntu nakumukana Nzambi muloña kwekalaña kusanyika nawu wakelamu hela nehi.—Kutach. 14:22, 23; Heb. 6:16, 17. w17.04 3 ¶1-2