March

Komana muchipompelu chenu mudi muntu wayihilishaña? Neyi kuzatilahu nehi, munateli kutwalekahu kumuhela manakwenu. Bayibolu yatulejaña kwikala nachisambu hakwila nawu wubwambu wetu nawamanakwetu wutwalekihu, hela nawayilumbu jetu. (Yish. 25:21, 22) Kumumwekeshela muntu chisambu kukutukwasha kutiyashana nikubula kudihela. Kukutukwasha kumona yilwilu yayiwahi yikweti manakwetu itunatambiki, yilwilu yamweniyi Yehova mudi yena hakumuleta muchalala. (Yow. 6:44) Neyi tumwekesha kukeña kuhitila mukutambika muntu wabula kukuhwelela nindi tukumutambika, tukwikala amabwambu chikupu nayena. Tukumwekesha ñahi netu kukeña dikunakutusañumuna kumwekesha chisambu? Njila yimu hikulondela kufumba kudi munsona yalelu. Neyi tumonaña amanakwetu niahela netu atubadika, muchikuhwelelu, mukuumika, mukuhamuka hela muyilwilu yikwawu yawakwaKristu, chikutukwasha kuyikeña chikupu nikuyimwekeshela chisambu chakufuma hamuchima. w18.03 17 ¶18-19

Anvwali amakwawu chayikalilaña kwovwahila lushimbi lwakubula kudikunda namwanawu ahañawu muchipompelu. Shinshikenu chakutalilahu chanvwali wamumbanda wadiña namwanindi ahañiliwu muchipompelu nawa wafumini hetala. Mama yindi wahosheli nindi: “Nakeñakeñeleña tuyiluwa munyikanda yetu kulonda nihanjekeña mpinji yeneni namwanami nimwanindi.” Wabombelelihu nindi: “Ilaña nfumwami wankwashili nindi mwanetu wafuma dehi mumakasa etu, dichi hitwatela kudikunda nindi cheñiku.” Chimwahitili yaaka, mwanindi amufuntishili. Mama yindi wahosheli nindi: “Wanlemesha ami ninfumwami muloña weluka nindi twamwovwahilili Nzambi.” Neyi mwanenu amuhaña muchipompelu, komana ‘mukumukuhwelela Yehova namuchima wenu wejima, chakadi kushindamena kukashinshi kenu enu aweni’? (Yish. 3:5, 6) Dichi ovwahilenu kufumba niwunlomboli waYehova. Enu anvwali, ilenuña yuma yejima yahoshayi Yehova hela chakwila yinakuyikalila kuyila. Eña, itejenuña kufumba kwaNzambi, bayi mukukaanañaku. w18.03 31 ¶12-13

Bayibolu yashimuna wanyi yaaka yatela kupapatishewayi muntu. Hela chochu, anvwali atela kutoñojokahu chikupu mwatalisha kwilisha atumbanji. Izu dachiGiriki dekala haMatewu 28:19 dabalumunawu nawu “mwakelishi atumbanji,” dalumbulula kudizisha muntu namuchima wakumwilisha yekali kadizi hela kambanji. Kambanji himuntu wadizaña hela weluka ntañishilu yaYesu nawa wajilondelaña. Dichi, anvwali akwaKristu atela kudizisha anyanawu kufuma kuwukeki nankeñelu yakuyilisha ekali atumbanji twaKristu apapatishewa. Kuhosha hohu walala, mukeki hanashikilimu kupapatishewaku. Hela chochu, Bayibolu yamwekeshaña nawu nianyana anyanya anateli kutiya nikudiza chalala chamuBayibolu. Chakutalilahu, kambanji Timotewu wadizili chalala hadiñayi kansi. Wadiña nachikuhwelelu chakola chikupu. (2 Tim. 1:5; 3:14, 15) Chashikijiliyi yaaka yakukumishaku yawukampululu hela yakutachika muma 20, Timotewu wekalili kambanji mukwaKristu enkeliwu nyidimu yadimena muchipompelu.—Yil. 16:1-3. w18.03 9 ¶4-5

Kudi yuma yitwahimpili hakwila twikali ambuña aNzambi. Twahimpili yuma yayivulu muchihandilu. Nawa twatwalekelihu kuhimpa hanyima yakupapatishewa. Chineli twawanina wanyi, twatela kutwalekahu kuhimpa. (Fwi. 3:12, 13) Chili tudi atwansi hela akulumpi, twatela kudihula netu: ‘Komana inakudimona ami aweni nami inakuhimpa nakwikala muntu wapama kuSpiritu? Komana wuntu wami wudi neyi waKristu? Yilwilu niyuma yinelaña hakupompa kwawakwaKristu yamwekeshaña nawu nidi muntu wamuchidinyi kuspiritu? Yuma yinahoshaña yamwekeshaña nawu nakeña yuma yamuchidinyi? Yuma yinelaña neyi inakudiza yamwekeshañadi? Nvwalilu yami nichinelaña neyi ananfumbi chamwekeshaña nawu nidi muntu wamuchidinyi? Nelaña ñahi neyi nidi mukweseka? Komana napami chikupu neyi chatela kupamayi mukwaKristu?’ (Efwes. 4:13) Kwakula awa malwihu etu aweni kukutukwasha kwiluka neyi tunakupaminaku kuspiritu hela nehi. w18.02 24 ¶4-5

Tunakushakama mumpinji yambukaku chikupu. Neyi chashimwineñahu dehi Bayibolu, Yehova nakupompesha “izaza deneni . . . dawantu [kufuma] kunyuza yejima, kunyichidi yejima, kudi antu ejima nikumadimi ejima.” Antu anapompeshiwu ‘himuza wañovu’ wawantu akubadika ha 8 miliyoni akweti muzañalu “anakumukalakela [Nzambi] mudimu wajila mwaana niwufuku.” (Chim. 7:9, 15; Isa. 60:22) Kanda kwikaleñahu dehi antu amavulu amukeña Nzambi niakwawu antu neyi awaku. Hela chochu, Nsona yonenawu yashimwineñahu dehi nawu kukeña kwakutwamba kwakuditiyisha muntu yomweni kuwaha akakwimwekeshaña kudi antu adambula kudi Nzambi. Kapostolu Pawulu wasonekeli nindi: “Mumafuku akukuminina . . . , antu akekala akwakudikeña awenawu, asweja kukeña mali, . . . akwakukeña jakuzañalesha chatela akeñi Nzambi.” (2 Tim. 3:1-4) AkwaKristu hiyamwekeshaña kukeña kwamuchidiwu kwakudikeña muntu yomweniku; kukeña kwawu kwambukaku chikupu. Mwamweni, kukeña kwamuchidiwu kunaleñeli yuma mukaayi kwikala ‘yakala.’ w18.01 22 ¶1-2

Kwiluka kwalala kwamukwashili Nowa kwikala nachikuhwelelu nimaana aNzambi, amukiñili kuyuma yatama sweje-e yadi kuluwañesha wubwambu windi naNzambi. Chakutalilahu, hamuloña wakwila Nowa “wendeli naNzambi,” hendeleña hela kudikunda nawantu abulili kumwiluka Nzambiku. Hiyamudimbili kudi andemoni adibalumwini, azatishileña ñovu jawu jasweja kulonda atiyisheña kuwaha antu abula kukuhwelelaku, hadaha antu atachikili nikudifukula kudi wena. (Kutach. 6:1-4, 9) Nowa welukili cheñi nindi, antu ayilejeli kuvwala anyana nakwinzesha iseki. (Kutach. 1:27, 28) Ilaña, Nowa watela welukili nindi chadiña chatama nawa chaluwa añelu kwila wuvumbi nawambanda. Chumichi chenjili nakumwekana chelili asemi anyana acheñi tuhu, abulileñawu kuvwala antu ejima. Chimwahitili mpinji, Nzambi wamusoñamishili Nowa nindi wukuleta dibaji hamaseki. Chikuhwelelu chaNowa muniku kusoñamisha chamuletesheli yatuñi watu nawa wapulwishili amwitala dindi.—Heb. 11:7. w18.02 9 ¶8

Neyi mwakoñeli nshidi yasweja, Yehova nateli kuyikwasha kuleka kudinka nyiloña. Ilaña mwatela kwiteja wukwashu waloñeshayi kuhitila muchipompelu. (Yish. 24:16; Yak. 5:13-15) Bayi mulabaku, muloña wumi wenu wahaya nyaaka wudi muwubanji. Indi neyi ayanakena dehi, ilaña muchidi kudinka nyiloña muloña wanshidi yimwakoñeli kunyima? Kudi mpinji yimu kapostolu Pawulu watiyileña kutama muloña wayiluwa yakoñeliyi kunyima. Wahosheli nindi: “Ami yami nakehelamu hakachi kawapostolu, nawa ami nateleli wanyi kuntena nawu kapostolu, muloña nakabishili chipompelu chaNzambi.” (1 Kor. 15:9) Yehova wamwanakeneni Pawulu nawa wakeñeleña yeluki nindi anamwanakeni. Neyi mubalumuka chikupu nakuleka nshidi yimwakoñeli kunyima nawa mulondela njila yashaku Nzambi, ilukenu nenu Yehova wukuyanakena. Itejenu mwanayilejiyi Yehova nawa ilukenu nenu nayanakeni!—Isa. 55:6, 7. w18.01 11 ¶17-18

Hakwila nawu twikala amabwambu jaYehova, twatela kumutiyilila nikuhosha nindi. Kudiza Bayibolu hinjila yimu yitwatiyililaña kudi Yehova. Chumichi chinabombelimu kwiluka kuhitila mukutaña nikutoñojokahu Hezu daNzambi nihanyikanda yashindamena haBayibolu. Chiwukwilaña mwenimu, anukaku neyi kudiza Bayibolu bayi hikutañamu neyi chatañañawu kushikola. Hiwatela kutaña neyi chelañawu akashikola ahembelaña hohu nsañu kumutu kulonda apasiku. Kudiza kwakuwahi kwakeñekaña kusandujola chikupu nyikabu yayilwilu yaYehova. Chumichi chikukukwasha kuswina kudi Nzambi nawa niyena wukuswina kwakwihi naneyi. Kuloñesha kwaYehova kunaloñeshi yitwa yayivulu kulonda yiyikwasheña kuhetela muprogilamu yenu yakudiza. Chakutalilahu, ha jw.org/lun nihena hadi yitwa yatukwashaña kudiza, yidi neyi “Chumanyi Chacheni Chatañishaña Bayibolu?” yinateli kukukwasha kwikala nachikuhwelelu chakola.—Mas. 119:105. w17.12 25 ¶8-9

Ilukenu nenu iku kuwunda kwakekalaku “muloña iseki dejima dakawanina kumwiluka Yehova.” Chineli atunyama ekala wanyi nawuswa wakudiza hadi Yehova, iwu wuprofwetu wakashikijewa hadi antu. (Isa. 11:6, 7) Kudi antu amavulu adiña ashinta neyi atuñwidi ilaña chayinu mpinji anakushakama mukuwunda nawakwawu. Munateli kutaña nsañu yanawa antu muyibaaba yahoshaña nawu “Bayibolu Yahimpaña Yihandilu Yawantu” yaha jw.org/lun. Antu adiña azuwa anavwali “wuntu wawuha waleñeliwu kwesekeja nankeñelu yaNzambi mukuloña kwalala nimukashinshi.” (Efwes. 4:23, 24) Antu chadizañawu hadi Nzambi, amonaña kulema kwakulondela nshimbi jindi. Dichi ahimpaña yuma yakuhwelelawu, yilwilu ninzatilu yawu. Chapela wanyi kuhimpa ilaña muntu nateli kuhimpa muloña spiritu yaNzambi yakwashaña antu afwilaña kwila nkeñelu yaNzambi namuchima wejima. w18.01 31 ¶15-16

Bayibolu yahosha kutalisha hakusañuka kwakuya mwiwulu nawu “muntu-himuntu akamusañula kwesekeja nandonda yindi.” Tunakuhweleli netu kusañuka kwahamaseki nikwena kwakekala mundonda. Iku kuchiñeja kwakuwahi nankashi. Komana antu afwa katataka akayisañula kukamwihi nakutachika kwaChiyuulu chaKristu Chekombakaji daYaaka kulonda akayisambilileña kudi antu ayikeña? Komana amayala ashinshika akunyima adiña nakulombola akasañukañahu dehi kulonda akalomboleña antu jaNzambi mwituña dadiha? Indi antu abulili kumukalakela Yehova? Akayisañula mpinjinyi nawa akasañukila kudihi? Tunateli kwihula malwihu amavulu chikupu. Ilaña, kuhosha hohu chalala, komana yinu mpinji diyi twatela kutoñojoka hansañu yamuchidiwu? Kwila tudiwunjika nakuhembelela nehi? Chayinu mpinji, twatela kumukuhwelela chikupu Yehova, watuleja kuhitila mudi Yesu nindi afu anukañayi Nzambi akayisañula.—Yow. 5:28, 29; 11:23. w17.12 12 ¶20-21

Chakadi nikujina, kuzatisha kufumba kwaPawulu kwonenewa kunateli kukwasha amayala, ambanda nianyana. Amayala ayileja nawu: “Keñenuña añodi jenu nawa bayi muyilendumokelañaku.” Iyala wukweti kukeña walemeshaña ñodindi kuhitila mukutiyilila yitoñojoka nikulemesha yuma yinakuhoshayi. (1 Pet. 3:7) Hela chakwila mpinji yikwawu wukwiteja wanyi yuma yejima yikuhoshayi, ilaña wukumwihulaña neyi nakufuukula. (Yish. 15:22) Iyala wukweti kukeña hakanjikijaña ñodindi kumulemeshaku ilaña welaña yuma yikuleñela amulemeshi. Iyala wakeña ñodindi nianyanindi wekalaña nachisaka chamukalakelaña Yehova namuzañalu nawa akatambwili isomu dawumi. w17.11 28 ¶12; 29 ¶15

Kapostolu Pawulu watela wayisonekeleli akwaKristu amuKolosi mukanda kumakumishilu ayaaka yamukasiliwu muRoma hela kwakwihi na 60-61 C.E. Wayilejeli kulema ‘kwakutiyishisha yuma yakuspiritu.’ (Kol. 1:9) Pawulu wahosheli cheñi nindi: “Babalenu, kwakenda kekala muntu wukuyitwala muwunkoli kwesekeja namaana awantu, nintañishilu yamukunkulwayi yamwaya tushidikilu twawantu, nimwaya yuma yawansi yamukaayi, ilaña bayi neyi kwesekeja naKristuku.” (Kol. 2:4, 8) Pawulu walumbulwili chahosheleliyi nindi yitoñojoka yikwawu yatama nichaleteshaña yitoñojoka yamukaayi yikokoleña antu abula kuwanina. Chakutalilahu, yinateli kuletesha muntu kutoñojoka nindi wukweti maana nawa nindi wabadika akwawu. Pawulu wasonekeli iwu mukanda kulonda yakwashi amanakwetu kukaana yitoñojoka niyilwilu yamukaayi.—Kol. 2:16, 17, 23. w17.11 20 ¶1

Yumanyi yatela kulekayi mukwaKristu hakwila nawu atwalekihu kumumwekeshela luwi kudi Nzambi? Watela kuleka yuma yejima hela chakwila wayikeña neyi yinateli kumuletesha yakoñi nshidi. (Mat. 18:9) Neyi amabwambu jenu amu anakuyikanjikija nawu mwili yuma yahelayi Yehova, mukuleka kudikunda nawu? Neyi mwakañanyaña kunwa walwa nakwesekeja, komana kwila mutondolwela yuma yinateli kuyiletesha kusheta nehi? Neyi mwakañanyaña kuleka kufwila kwakwila wuvumbi, komana mwatondolwelaña kutamba nyivwimbimbi, mawebusayiti hela yuma yinateli kuyiletela yitoñojoka yatama? Mwatela kwiluka nenu, neyi tuzata nañovu kulonda tuhembi kashinshi ketu kudi Yehova, mwakafuma yayiwahi. Kwosi chuma chasweja kukata neyi Yehova yatushiya. Nawa, kwosi chuma chatiyishaña kuwaha neyi twiluka netu watutiyilaña “luwi lwahaya nyaka.”—Isa. 54:7, 8. w17.11 11 ¶12

Mwatiya Zekariya 5:4 chiyahosha nawu “ishiñu . . . [dikeñila] mwitala dekombi . . . [dakashakama] mukachi ketala dindi, dakadinoñesha”? Wunsompeshi waYehova kwila muntu yawukañesha nayikuñu hela nanyikomenu nehi. Wunateli kuhanuka nakwiñila mwajindama (mwaswamanyika) mudi antu jaYehova anakwila yuma yatama. Hela chakwila muntu nateli kusweka wukombi windi kudi akwanshimbi, akwanyidimu, aeluda hela kudi anvwali, hanateli kuswama kudi Nzambi, wahosha nindi wukombi wejima akawusololaku. (Heb. 4:13) Twatiyaña kuwaha kudikunda nawantu afwilaña mpinji yejima kwikala ashinshika “muyuma yejima”! (Heb. 13:18) Yehova wahela wukombi wejima. Twatela kulemesha nikwovwahila nshimbi jaYehova, nikutwalekahu kwikala nayilwilu yayiwahi yikubula kuleta kasawuntu hejina dindi. Neyi twila mwenimu, Yehova wakatusompeshela hamu wanyi nawantu abulaña kumwovwahila. w17.10 22 ¶6-7

Twatela kuzata nañovu kulonda twikali mukuwunda nawamanakwetu, hela chakwila tunamoni netu anatwili chatama. (Rom. 12:17, 18) Kulomba kwanakena kunateli kuwundisha muchima, nawa kwatela kufuma hamuchima. Chakutalilahu, chatela muhoshi nenu, “Ñanakeniku neluka wanyi nami wukuhila,” ilaña mwatela kwiteja nenu munaluwañeshi neyi muhosha nenu, “Ñanakeniku hakukuhilisha namazu inahosha.” Sweje-e adisumbula atela kwikala mukuwunda. Eyala namumbanda atela wanyi kutwamba hadi antu neyi adikeña, henohu kwankawawu adihililaña, kudihosha mazu akasawuntu hela kuzuña. Twatela kudiloñesha kulonda twanakeneña chakufuma hamuchima. Twamwekeshaña netu tunamwanakeni muntu neyi tujimbala yuma yatama yinatwiliyi nikubula kumushila ndulu. Hakwila nawu twanakeneña chakufuma hamuchima, twatela kuhimpa chitwatoñojokaña kulonda tubuleña ‘kuhemba nkunyi.’ (1 Kor. 13:4, 5) Neyi tuhemba ndulu ninkunyi, wubwambu wetu namanakwetu hela muhela wukumana, nawa ninaYehova wukumana.—Mat. 6:14, 15. w17.10 10 ¶14-15

Nsañu yaZekariya yakwashili ñahi aYudeya amumafuku indi? Yehova wayikanini nindi wukuyikwashaña nawa wukuyikiñaña hakuzata mudimu. Chayilejeliyi nindi tembeli akayituña, chakolesheli nyichima yawu yazeyeli. Hanu dinu antu antesha akutwesha ñahi kuzata mudimu weneni? Mazu ahosheliyi cheñi Zekariya ayikwashili kubula kutiya woma nikujinoka. Kubombela hawukwashu wawamayala ashinshika adi neyi aHelidayi, Tobiya, niYedaya, Nzambi nakukwasha antu “enzaña nakutuña mutembeli yaYehova.” A Yudeya anatachiki cheñi kuzata swayi mudimu wakutuña hela chakwila anawukaanishi kudi mwanta wawaPeresi, muloña anakuhweleli muñovu jaNzambi. Yehova nafumishi ikañesha didi neyi mpidi dakukañesha iwu mudimu nawa tembeli anayimanishi mu 515 B.C.E. (Ezera 6:22; Zek. 4:6, 7) Hela chochu, mazu aYehova amwekesheleña niyuma yikamwekana mumafuku etu. w17.10 29 ¶17

Solomoni amulejeli kulombola mudimu weneni nawa walema wakutuña tembeli muYerusalema. Itala dateleli kwikala “deneni nankashi, dakatiyakani mpuhu nakulema mwahita matuña ejima.” Chuma chalema, tembeli yadi kwikala ‘itala daYehova, Nzambi walala.’ Yehova wamutondeli Solomoni kwikala kalama hakutuña idi itala. (1 Kushi. 22:1, 5, 9-11) Mwanta Davidi wakuhweleli nindi Nzambi wakamukwasha Solomoni. Ilaña Solomoni ‘wachidiña kansi nawa wadiña kanda yapami.’ Wadi kudikwatisha ñahi hakuzata mudimu wakutuña tembeli? Komana wadi kukañanya muloña wakwila wachidiña kansi nawa wadiña kanda yapami? Hakwila yawuzati iwu mudimu, Solomoni wateleleli kudikwatisha nikukoñamu. Neyi Solomoni wabulili kudikwatisha, wadi kutiya woma nawa wadi kukañanya kuzata mudimu. Twatela kulomba wukwashu kudi Yehova neyi cheliliyi Solomoni hakwila nawu tudikwatishi nikuzata mudimu. w17.09 28 ¶1-2; 29 ¶4-5

Chihandilu chadi kwikala ñahi chakadi Bayibolu? Twadi kudililaña yuma yejima yitunakeñi. Nawa twadi kwiluka wanyi yuma yayivulu hadi Nzambi, wumi nichihandilu chakumbidi. Cheñi hitwadi kwiluka yuma yelililiyi Yehova antu akunyimaku. Twasakililaña, muloña tweluka yuma yejimiyi. Yehova watwinka Izu dindi Bayibolu. Nawa washiika nindi mazu indi akatwalekahu haya nyaaka. Kapostolu Petulu wazatishili mazu ekala haIsaya 40:8. Iyi vasi yatena wanyi Bayibolu yayeni, ilaña yatena mazu onenawu ekala muBayibolu. (1 Pet. 1:24, 25) Antu akweti nyichima yayovu atwalekelihu kubalumuna maBayibolu nikuyihana kudi antu hadi yaaka yayivulu hela chakwila chadiña chapela wanyi. Elili kwesekeja nachakeñañayi Nzambi nindi “antu ejima ayamwini nawa nindi ekali nakwiluka kwalala kwakwiluka chalala.”—1 Tim. 2:3, 4. w17.09 18 ¶1-2

Atwansi amavulu akwaKristu anakumona kweseka kwamweniyi Yosefu. (Kutach. 39:7) Tuhanjekenu hadi Kim. Akwawu muyatañilileñawu adiña nakwila wuvumbi. Hanyima yakunooka kunsa yamulungu, adiña nakudisamba hadi amayala elawu nawu wuvumbi. Kim wadiña wanyi nansañu yamuchidiwu yakuyileja. Wahosheli nindi, mpinji yikwawu kwikala wambukaku chamutiyishileña “wuudi” nawa akwawu amuseheleña muloña wakubula kajila. Hela chochu, Kim welukili nindi atwansi amavulu anakumona kweseka kwakwila wuvumbi. (2 Tim. 2:22) Kakavulu akwawu akashikola amwihwileña neyi chakwila kanda yeleñahu dehi wuvumbi. Neyi amwihula, wayilumbulwilileña chuma chaleteshaña yabuleña kwila wuvumbi. Tunakuyihameka enu atwansi akwaKristu munakutondolwela ikakeja dakwila wuvumbi, Yehova niyena nakuyihameka. w17.09 4 ¶8; 5 ¶10

Antu azuwaña swayi kakavulu amwekeshaña kuzuwa kwawu kuhitila mukuhosha mazu akasawuntu. Kuhosha hohu chalala, yilwilu yamuchidiwu yaleteshaña chisaka kubula kwikala namuzañalu. Kudi chaletesha Bayibolu yikaanishi kuzuwa, nhoshelu yakasawuntu nikuzazoka. (Efwes. 4:31) Chawushona, iyi yilwilu yaletaña wubanji. Kaayi kamonaña yilwilu yakuzuwa naku yindi hohu chiwahi, ilaña yamulemeshaña wanyi Nleñi. Amavulu avuulili iyi yilwilu yatama henohu kanda avwali wuntu wawuha. (Kol. 3:8-10) Kubombela hanhoshelu yatama, kutwamba nikwena hiwuntu wawukulu. Chakutalilahu, antu amavulu atwambaña kulonda abuli kufweta nyisonku nikutwamba kulonda abuli kwikala munyiloña. Kwambukaku, Yehova ‘hiNzambi yansañu yalala.’ (Mas. 31:5) Dichi wakeñaña nindi akwakudifukula indi muntu himuntu yahosheña chalala namukwawu’ ‘nikubula kutwamba.’ (Efwes. 4:25; Kol. 3:9) Dichi, twatela tuhosheña chalala hela chakwila yuma yinakali chamuchidinyi.—Yish. 6:16-19. w17.08 18 ¶3, 5; 20 ¶12-13, 15

Makonu, Yehova watulombolaña Nezu dindi, Bayibolu. Nawa “izu dindi datemukaña lufuchi nankashi” chakwila watwinkaña yakuda yakuspiritu hampinji yatelela. Toñojokenu chimunateli kuhetela mukutaña Bayibolu, kudiza nyikanda yasonekawu kudi “nduñu wamaana nikashinshi,” kutamba JW Broadcasting, kuya ha jw.org/lun, kuhanjeka nawaeluda nikudikunda nawakwetu akwaKristu. (Mat. 24:45) Munakumona wanyi nenu Yehova nakunyakashana kuyilombola? Ñimbi yamasamu welukili Nzambi chayikwashiliyi antu jindi kunyima. Diwu hohu muza wenkeliwu “izu” daNzambi, “yidika yindi nawuñaji windi.” (Mas. 147:19, 20) Makonu, yetu hohu antu adi hamaseki atenañawu nejina daNzambi. Tudi nawubwambu wawuwahi naYehova muloña twamwiluka nawa twazatishaña Izu dindi. Kufwana nsoneki Wesamu 147, komana ninenu kudi yuma yinateli kuleñela kubidika nenu “Mushimekenu Ya!” nikulejaku amakwawu kuhosha chochimu? w17.07 20 ¶15-16; 21 ¶18

Atumbanji twaYesu makonu, kushilahu niambuña aNzambi kubadika ha 1,000,000 anakukalakala mumudimu wampinji yejima, azatishaña kufumba kwaPawulu kudi munsona yefuku dalelu. Hakwila nawu abuli kudiñija munsañu yakulanda nakulandulula yidi mukaayi, anukaña chishina chakwila nawu: “Mukwakusondama hinduñu yamukwakusondamisha.” (Yish. 22:7) Satana watiyaña kuwaha neyi tuzatishaña mpinji niñovu yetu yejima kukalakela maheta amukaayi kindi. Kufuukula kukwawu kunateli kutwiñija muwuduñu. Kusonkela matala amaneni, kuya kumashikola amaneni hankongoli, kufwetela nyotoka yasweja wuseya, nikupanga chidika chasweja wuseya kunateli kumuleñela muntu kwikala mukukala kwamali. Twamwekeshaña maana neyi tupeleshaku chihandilu nikukeheshaku kudiñija munyikudi nijakulanda nakulandulula, kwikala akasunuka hakumukalakela Nzambi chatela tushi maana hakufwila maheta.—1 Tim. 6:10. w17.07 10 ¶13

Kudi chuma chikwawu chitukuhoshela netu Yehova hiNyuuli watelela. Wazatishaña ñovu jindi jakuyuula munjila yawuñaji walala. Wahosheli nindi: “Yami Yehova nelaña mwaluwi mwawuñaji nimwaloña hamaseki; muloña natiyaña kuwaha nayumiyi.” (Yere. 9:24) Washinshikaña wanyi munyikanda yanshimbi yasonekawu kudi antu abula kawanina kulonda yasompesheleñahu. Wuñaji windi waloña wafumaña kudi yomweni nawa diyi wayisonekeleli antu nshimbi. “Itanda dindi . . . adituñila hakuloña nihawuñaji,” dichi tunakuhweleli netu nshimbi, yishina yindi nimwafuukulañayi mwejima mwalala. (Mas. 89:14) Kwambukaku naSatana wunakañanyi kuleta kuwunda mukaayi kejima, chiyuulu chaYehova chikaleta kuwunda. w17.06 28 ¶5

Yehova hiNzambi yachalala. (Mas. 31:5) Chineli hiTata yetu wukweti chisambu, wasololaña chalala chindi kudi antu amutiyaña woma. Kufuma tuhu hampinji yitwadizili chalala katachi, twadizili chalala Mwizu dindi Bayibolu, munyikanda yetu yawakwaKristu, kukupompa kweneni nikwañinza nikupompa kwamumulungu. Mukuhita kwampinji, twekalili nachisweku chateneniyi Yesu nindi “mwakuhembela maheta” achalala chitwadizili kunyima nichitunakudiza katataka. (Mat. 13:52) Neyi tukukeñakeña chalala chamuchidiwu neyi maheta aswekawu, Yehova wukutukwasha kuwana chalala chachiha chidi “mwakuhembela maheta.” (Yish. 2:4-7) Tunateli kwila ñahi mwenimu? Twatela kwikala nachaaku chakudiza nkawetu mpinji yejima nikusandujola chikupu Mwizu daNzambi nimunyikanda yetu. Chumichi chikutukwasha kuwana chalala “chachiha” chitwabulili kwiluka. (Yosh. 1:8, 9; Mas. 1:2, 3) Mwamweni, twatela kufwila kwinzesha mwetu mwakuhembela nachalala chaNzambi. w17.06 12 ¶13-14

Manakwetu wumu wabula kusumbula wadiña nakukala, dichi wamulejelimu Stephen eluda wasumbula iku kukala. Iwu manakwetu wadiña nakutoñojoka mazu itwatañaña ha 1 Akorinda 7:28 akwila nawu: “Antu [akusumbula hela akusumbuka] akumonaña yihuñu mumujimba wawu.” Wenhwili nindi, “Yihuñu yamuchidinyi yeniyi nawa nakayimanisha ñahi neyi nisumbula?” Henohu kanda yakuli ilu lwihu, Stephen wamulejeli iwu manakwetu kutoñojoka mazu amakwawu asonekeliyi kapostolu Pawulu nindi, Yehova ‘hiNzambi wakukundeja kwejima watukundejaña mukweseka kwejima kutwamonaña [“mulukadi,” tth.].’ (2 Kor. 1:3, 4) Mwamweni, Yehova diyi Tata wukweti kukeña, nawa watukundejaña neyi tunakumona kukala. Hadaha mwamonahu dehi chayikwashiliyi Nzambi nikuyikiña, sweje-e kuhitila Mwizu dindi. Tunateli kukuhwelela netu wukutukwasha neyi chakwashiliyi ambuñindi akunyima.—Yere. 29:11. w17.06 4 ¶1-2

Amanakwetu matunduka akeñekaña kuyikwasha kuspiritu nimuyitoñojoka kubadika kuyikwasha hohu kumujimba. (Mat. 4:4) Aeluda anateli kuyikwasha kuhitila mukuyitambwila nyikanda yamwidimi dawu hela kutambika amanakwetu ahoshaña idimi dawu. Matunduka amavulu anayambuli nawantaña jawu, antu amuchituñilu chawu ninayipompelu yawu yakeñeliwu nankashi. Dichi atela kumona chikupu nawu Yehova wayikeña nawa wayakamenaña kuhitila mudi akwawu akwaKristu. Neyi nehi, anateli kudikunda nawantaña jawu abula kwitiya hela nawakwawu mwenjililiwu eluka chisemwa chawu. (1 Kor. 15:33) Neyi tuyikwasha kumona nawu twayikeña muchipompelu, dikwila nawu tunakuzatila hamu naYehova “wahembaña enyi.” Matunduka chinateli kuyikalila kufunta kumukala wawu neyi chakwila ana ayiletesheli atemukiku achidi kwoku. Makabi analeteshi matunduka kuneña nikutiya nsonyi kuhosha hakukala kwamweneñawu. Dihulenu enu aweni nenu, ‘Neyi yami nadiña itunduka, nadi kutiya ñahi?’—Mat. 7:12. w17.05 6 ¶15-16

Kutoñojoka hayuma yinakutuneñesha kunateli kuzeyesha chikuhwelelu chetu nawa kukeña kutwamukeña Nzambi kunateli kukeha. Wejima wetu twaneñaña chineli tunakushakama mudinu ituña datama didi mumakasa aSatana. (1 Yow. 5:19) Hadaha tunakumona kukala kudi neyi wushinakaji, yikatu niwuzweñi. Indi kwiji tunakumona kukala kwakudimona neyi twashikilamu wanyi, yuma yitwakuhwelelaña yinazatiki wanyi niyiluwa yetu. Bayi twiteja yuma yamuchidiwu yituleteshi kumona netu Yehova natumbi chisayikilaku. Ilaña, twatela kutoñojokahu chikupu hamazu aYehova ashiikayi nindi watukeña. Twawanaña mazu amuchidiwu haMasamu 136:23, ahosha nawu: “Watwanukili hitwabulili kulema; luwi lwindi lwahaya nyaaka.” Mwamweni, kukeña kwakeñayi Yehova antu jindi kwahaya nyaaka. Dichi, tunateli kukuhwelela netu watiyaña “kulembelela kwetu” nawa wakulaña.—Mas. 116:1; 136:24-26. w17.05 18 ¶8

Neyi chamwekeshaña Añalija 2:11-14, Petulu wafwili mumuhetu wakutiya antu woma. (Yish. 29:25) Hela chakwila Petulu welukili nindi Yehova hekala nachaambuku, watiyili woma chahosheleña aYudeya alama adiña muchipompelu chamuYerusalema. Kapostolu Pawulu wadiñaku hakuna kubulakana muYerusalema mu 49 C.E., wamulejeli hatooka Petulu muAntiyoki nindi wamwekesheli yilwilu yawunfwikiji. (Yil. 15:12; Ñal. 2:13) Petulu watiyili mwamufumbiliwu kudi Pawulu. Kwosi Nsona yashimuna nawu amutambwili kukooleka kwadiñayinaku. Muloña mukuhita kwampinji amoneneni kusoneka nyikanda yiyedi nawa yekala muBayibolu. Hela chakwila chuma cheliliyi Petulu chayineñesheli ana aJentili adiña muchina chipompelu, Yesu mutu wachipompelu watwalekelihu kumuzatisha. (Efwes. 1:22) Antu amuchina chipompelu ateleli kwimbujola Yesu niTata yindi kuhitila mukumwanakena. Tunakuhweleli kwosi watuntukili nachiluwa chamuntu wabula kuwanina. w17.04 27 ¶16-18

Yehova chajilumwiniyi iyi nyisumba yejima, wafumishileñahu yilwilu yejima yatama. Nawa ichi chadiña “chakutalilahu kudi antu abulaña kumwakama Nzambi kutalisha hayuma yinakwinza.” Neyi chochafumishilihu Yehova yilwilu yatama hayina mpinji, dichi wakafumishahu yilwilu yejima yatama hampinji yakajilumunayi nshakaminu yamakonu. Yumanyi yikasinsa hayilwilu yatama? MuParadisa mwakekala nyidimu yayivulu. Toñojokenu hamudimu wawuwahi wakwilisha adinu iseki kwikala paradisa hela chitwakatuñaña matala etu niawantu itwakeña. Toñojokenu cheñi hampinji yitwakatambwilaña yihita yawantu afwa dehi nikuyidizisha kulonda akeluki yuma yakeñañayi Yehova nichelileñayi nawantu kunyima. (Isa. 65:21, 22; Yil. 24:15) Mpinji yejima twakazataña nyidimu yikatuletelaña muzañalu nikumushimeka Yehova! w17.04 12 ¶11-12

Hakukana ichi chikaninu, Yefwata hadaha welukili nindi mwanindi diyi wadi kwidika nakumukinkilila. Hela chakwila welukili, chumichi chayikalili wejima wawu tata yawantu namwanindi muloña ateleli kudihana. Yefwata chamumweniyi mwanindi, “watabwili mahinindi” nawa wahosheli nindi namukatishi kumuchima. Mwanindi wadilili ‘wujiki windi.’ Muloñadi? Yefwata wadiña namwana weyala wanyi nawa mwanindi wamumbanda wadi kusumbuka wanyi hela kumuvwalila ejikulu. Ijina dachisemwa dadikujiya. Hela chochu, ichi chuma chadiña chalema nankashi wanyi. Yefwata wahosheli nindi: “Namwasamina dehi mukanwa kami, hinukutwesha kubalumuna mwokuku.” Nawa mwanindi wakwili nindi: ‘Ñili mwejima muwunahoshi.’ (Ansomp. 11:35-39) Awa diwu antu elili mwamukaniniwu Nzambi Mukwakubadika Chikupu hela chakwila chadiña chapela wanyi.—Kuhit. 23:21, 23; Mas. 15:4. w17.04 4 ¶5-6

Yosefu mwana kamwijikulu waAbarahama niyena wahembeleleli nakudiwunjika. Chatachi, hadiñayi nayaaka 17 amanakwindi amulandishili nakwikala nduñu. Kuhiñahu amutwambilili nawu wakeñeleña kukaama ñoda mwanta windi chakukanjikija nawa chafuminimu amukamikili muyikuñu mukaleya. (Kutach. 39:11-20; Mas. 105:17, 18) Chidi neyi amubabesheli hamuloña wakashinshi kindi chatela amukiswili. Ilaña chimwahitili yaaka 13, yuma yejima yahimpikili mukunyakashana. Amufumishili mukaleya nakumwinka chifulu cheneni chakwikala wamuchiyedi kudi mwanta muEjipitu. (Kutach. 41:14, 37-43; Yil. 7:9, 10) Komana Yosefu wahilili chamwililiwu chatama? Komana walekeli kumukuhwelela Nzambi yindi Yehova? Inehi. Chumanyi chamukwashili Yosefu kuhembelela mukudiwunjika? Muloña wamukuhweleleli Yehova. Wamweni chikasa chaYehova chichamukwashileña. Chumichi chamwekeni hampinji yalejeliyi amanakwindi nindi: “Ilaña enu mwatoñojokeli kuñila chatama, hakwinza Nzambi watoñojokeli kwila chachiwahi, nindi ahandishi antu amavulu neyi chitunamoni lelu.” (Kutach. 50:19, 20) Nkumininaku Yosefu wamweni nindi welili chiwahi kuhembelela. w17.08 4 ¶6; 6 ¶12-13