May

Hela chakwila kufumba kwakataña kumuchima, ilaña kudi chuma chabadika kukata kutwatiyaña neyi anatufumbi, chuma chatama chafumaña mukubula kwiteja kufumba. (Heb. 12:11) Shinshikenu chakutalilahu chaKena. Kena chatachikiliyi kuhela manakwindi Abeli, Nzambi wamwihwili nindi: “Wunazuwilidi? Wunadihombelidi Kumesu? Neyi wukwila chachiwahi hiyakukwitiyaku? Ilaña neyi hiwukwila chachiwahuku nshidi yinafukami kuchisu; wakata muchima hadeyi, nineyi wakela mwanta windi.” (Kutach. 4:6, 7) Kena hatiyililiku. Dichi nshidi niyena yamwimakeneni. Kena wadileteleli yomweni yihuñu nimakabi. (Kutach. 4:11, 12) Neyi watiyililili kufumba kwaYehova chiña mwafumini yuma yatama wanyi. Yehova hakeñaña nindi tumoneña yihuñu yamuchidiwuku! (Isa. 48:17, 18) Dichi ‘tutiyilileña kufumba, kulonda twikali namaana.’—Yish. 8:33. w18.03 32 ¶18-20

Danyeli wamwilukili ñahi Yehova? Amudizishili chikupu kudi anvwali jindi. Amudizishili kumukeña Yehova nikukeña Izu dindi. Kubombelahu, Danyeli watwalekelihu naniku kukeña muchihandilu chindi chejima. Nihampinji yashinakajiliyi, watwalekelihu kudiza nankashi Nsona. Danyeli wamwilukili Nzambi chikupu nawa welukili nindi Nzambi wayakameneneña aIsarela. Chumichi chamwekenaña mumazu akulomba kwakufuma hamuchima akaprofwetu asonekawu haDanyeli 9:3-19. Kwila mwikala nampinji yakutaña iku kulomba nikutoñojokahu, nikumona yuma yalombeliyi chiyinateli kuyikwasha kwiluka chadiñayi Danyeli nehi? Iwu kaYudeya washinshika wadiña nakushakama muBabiloni mwadiña kudifukula kwakutwamba. Chakutalilahu, Yehova wayilejeli aYudeya nindi: “Mukala wunayitwalishi dehi muwukoli wukeñelenu jakumwena.” (Yere. 29:7) Hampinji yoyimu, Nzambi wakeñeleña nindi adifukuleña kudi yena. (Kwid. 34:14) Chumanyi chamukwashili Danyeli kulondela iku kuleja kuyedi hampinji yoyimu? Maana aNzambi amukwashili kutiyishisha yishina yahosheleña hakwovwahila anyuuli ahamaseki. Chimwahitili yaaka yayivulu, Yesu wahosheli hachishina chochimu.—Luka 20:25. w18.02 10¶11-12

Komana munakumona kukala kudi neyi yikatu, kubula mali hela makabisha? Komana mpinji yikwawu mwaneñaña mumudimu waYehova? Neyi dimu, dizilenu kudi Nowa, Danyeli niYoba. Adiña awanina wanyi nawa amweneña kukala kutwamonaña ninetu, nawa kukala kukwawu kwashileña wumi wawu hakatoña. Hela chochu, ahembeli kashinshi kawu nawa Nzambi wayitondeli kwikala yakutalilahu yayiwahi yachikuhwelelu nikwovwahila. (Ezek 14:12-14) Ezekeli wasonekeli awa mazu adi munsona yalelu hadiñayi muBabiloni mu 612 B.C.E. (Ezek. 1:1; 8:1) Yerusalema wadiña kwakwihi nakujilumuka neyi chashimwineñawu dehi, nawa wajilumukili mu 607 B.C.E. Antu antesha hohu adiña nayilwilu neyi yaNowa, Danyeli niYoba diwu apulwishiliwu. (Ezek. 9:1-5) Munjila yoyimu, Yehova wakapulwisha hohu antu aloña hampinji yakukuma kwanshakaminu yamakonu.—Chim. 7:9, 14. w18.02 3-4 ¶1-3

Enu atwansi, dihulenu nenu: ‘Komana nazataña nyidimu yakuspiritu muloña anvwali dichanlejañawu? Komana inakuswina kudi Nzambi kuhitila mukwikala nawubwambu wawuwahi nayena? Iku kufumba kwakufwila yuma yakuspiritu kunakundami kudi atwansi hohu wanyi. Kufwila yuma yakuspiritu kwakwashaña ambuña aYehova ejima kwikala akola kuspiritu. (Mukwa. 12:13) Neyi tumona netu hadi hitwazeyela, twatela kuzatilahu nikuhimpa. Neyi wuspiritu wetu wudi chiwahi, tukapuluka, ilaña neyi wuspiritu wetu wudi chiwahi wanyi tukajimbesha wumi wetu. (Rom. 8:6-8) Hela chochu, hichinayi mukwila nawu chiña twikala awanina hakwila nawu tupami kuspirituku. Spiritu yaYehova yikutukwasha kupaminaku kuspiritu. Ilaña, twatela kuzata nañovu. Hela chakwila kutaña Bayibolu kwatiyakanaña chiwahi, bayi tuyitaña neyi mukanda mwasonekawu nsañu yakulumbishaku. Twatela kuyitaña nakuwanamu yikuma yalema yinateli kutukwasha. w18.02 25 ¶10-11

Bayi neyi muntu watela kwiluka yuma yejima henohu kanda yadihani kudi Nzambi nikupapatishewaku. Muntu chapapatishewayi, watwalekañahu kudiza kulonda yekali nakwiluka kwalala. (Kol. 1:9, 10) Hanu dinu muntu watela kudiza kushika hadihi hakwila yapapatishewi? Chakutalilahu chachisaka chimu chadiñaku mumafuku awapostolu chikutukwasha makonu. (Yil. 16:25-33) Pawulu wahempwili musumba waFwilipu mulwendu lwindi lwamuchiyedi lwawumishonali mu 50 C.E. Hadiñayi muniwu musumba, yena nimulunda nindi Silasi ayitwambilili nawa ayikwatili nakuyisha mukaleya. Nawufuku, kwenjili mutentanshi nawa wanyinkesheli yikuku yakaleya nawa yenzelu yejima yenzunukili. Mukwakuhemba kaleya wakeñeleña kudijaha chamweniyi nindi atuyili anatemuki, ilaña Pawulu wamukaanishili. Pawulu naSilasi amushimwinini mukwakuhemba kaleya nichisaka chindi. Chalala chadiziliwu hadi Yesu chayileñeleli ashikeni kwiladi? Ashikeneni dakupapatishewa chakadi kulaba. w18.03 10 ¶7-8

Yehova hiNzambi wukweti muzañalu nawa antu jindi amwekeshaña ichi chilwilu. Kubombelahu, kwambukaku nawantu adikeña aweni nawa asha maana hohu hakutambwila, ambuña aYehova atiyaña kuwaha kudihana aweni kukwasha antu amakwawu. (Yil. 20:35; 2 Tim. 3:2) Tunateli kwiluka ñahi netu tunasweji kudikeña etu aweni kubadika Nzambi? Shinshikenu kufumba kwekala haAfwilipi 2:3, 4 kwahosha nawu: “Bayi mukoña chuma hela chimu nantaadi hela nakudivwimba kwamukunkulwayiku, ilaña dizozenuña nakumona akwenu nenu ayibadika enu, iku munakufwila yuma bayi yayitiyishaña kuwaha enu aweni hohuku, chiña yuma yatiyishaña kuwaha niakwenu.” Twatela kudihula etu aweni netu: Komana nazatishaña iku kufumba muchihandilu chami? Komana nafwilaña kukwasha antu mumudimu wakushimwina niakwetu muchipompelu? Chapela wanyi kudihana etu aweni. Chakeñekaña kuzata nañovu nikudihana. Chumanyi chinateli kutuletela muzañalu kubadika wutwekala nawu hakwiluka nawu atwiluka kudi Mwanta wakuleña kwejima? w18.01 23 ¶6-7

Hakwila tudeseki, twatela kudihula netu: ‘Komana nakuhwelela nami nekala mukuloñesha kwetejayi Yehova kunakuzatishayi hakushikija nkeñelu yindi? Komana nazataña hakumina ñovu yami kudizisha nikushimwina nsañu yayiwahi yaWanta? Komana yilwilu yami yamwekeshaña nawu neluka nami tunakushakama mumafuku akukuminina nawa chiyuulu chaSatana keña chikumi? Komana nichidi namukuhwelela Yehova niYesu neyi chinayikuhweleleli hampinji yinahanini wumi wami kudi Yehova Nzambi?’ (Mat. 24:14; 2 Tim. 3:1; Heb. 3:14) Kutoñojoka hañakwilu yanawa malwihu kunateli kutukwasha kwiluka chitudi. Tañenu nikutoñojoka haNsona yahosha hakulema kwaChanukishu. (Yow. 3:16; 17:3) Njila yaya kuwumi wahaya nyaaka yabombelamu ‘kumwiluka’ Yehova ‘nikumukuhwelela’ Yesu, Mwanindi wumu hohu. Neyi munadiloñeshi kwanakana Chanukishu, kwila mudiza nsañu yikuyikwasha kuswina kwakwihi naYehova niYesu nehi? w18.01 13 ¶5-6

Neyi wutaña Bayibolu ninyikanda yetu nawa neyi wuya kukupompa kwawakwaKristu, wukudiza yakutalilahu yawantu akwashiliwu kudi Nzambi kwikala ashinshika. Ilaña chiwukupamaña kuspiritu, watela kumona chikukukwashañayi Yehova muchihandilu cheyi. Munjilanyi muwamutompahu dehi Yehova nakutiya chawahayi? Kudi njila yimu akwaKristu ejima yamutompahu dehi Yehova nakutiya chawahayi. Kuhitila mukuyitambika kuswina kwakwihi naNzambi niMwanindi. Enu atwansi, komana mwatiyaña nenu ayikoka kudi Nzambi? Kansi nateli kutoñojoka nindi, ‘Yehova wakokeli hohu anvwali jami, ami nakumini dakuyilondela.’ Ilaña chiwadihanini kudi Yehova nikupapatishewa, wamwekesheli neyi wunekali ibwambu dindi. Ichi akwiluka chikupu kudi Nzambi. Bayibolu yatulejaña nawu: “Neyi muntu wamukeña Nzambi, dikwila nawu iwu muntu amwiluka kudi yena.” (1 Kor. 8:3) Twalekakuhu kuzata nañovu kulonda wulemesheña nikusakilila hakwikala mukuloñesha kwaYehova. w17.12 26 ¶12-13

Izu dakwila nawu “kubabesha,” hadaha dayileñelaña kutoñojoka hadi muntu anakukabishawu, ilaña mwabombela yuma yayivulu. MuBayibolu, kubabesha akwishimuna munjila yayiwahi, mpinji yikwawu akwitenena hamu namaana, kukeña niwumi. (Yish. 1:2-7; 4:11-13) Muloña kubabesha kwaNzambi kwamwekeshaña nawu watukeña nawa wakeñaña nindi twakashakameña haya nyaaka. (Heb. 12:6) Hela chakwila wababeshaña, ilaña hababeshaña munjila yalukambuku. Mwamweni, izu “dakubabesha” datalisha mukudizisha, neyi chadizishañayi nvwali mwana akeñayi. Etu akwaKristu ejima amuchipompelu, twekala amwitala daNzambi. (1 Tim. 3:15) Dichi twatela kulemesha nshimbi jashaku Yehova nikwiteja kutubabesha neyi tunajifumpi. Kubombelahu, neyi yuma yituneli yinaleti jomisha mbaña, kubabesha kwindi kukutwanukishaña kulema kwakumwovwahila Tata yetu wamwiwulu.— Ñal. 6:7. w18.03 23 ¶1; 24 ¶3

Indi neyi wudi kampululu nawa wunakutiyañana wanyi nawanvwali jeyi akwaKristu nawa wumona neyi anakukukañesha kwila yuma yimu, wukwiladi? Neyi wukuhila, chikukukojeja kumona neyi kumukalakela Yehova kwatama. Nawa neyi wuleka kumukalakela Yehova muloña wakuhila, wukumona neyi kwosi muntu wakwakamenaña chikupu kubadika chipompelu nianvwali amwakamaña Nzambi. Neyi anvwali jeyi abula kukufumba, wukutoñojoka neyi akwakamenaña? (Heb. 12:8) Hadaha kufumba kwakufumbawu kudi anvwali jeyi dikwakuhilisha. Chatela wuhili nachakufumbawu, watela kwiluka neyi kudi chuma chaletesha akufumbi. Dichi diwunjiki nawa zataku nañovu kulonda wubuli kuhila nankashi nachinakuzuwiliwu. Zataku nañovu kulonda wileña yuma neyi muntu wapama watambwilaña kufumba munjila yakuwunda, chakadi kutiya kutama njila mwakufumbilawu.—Yish. 1:8. w17.11 29 ¶16-17

Hadaha mwamonahu dehi atwansi amakwawu apapatisheweli ilaña akañanya kwovwahila nshimbi jaNzambi. Amavulu afumaña muchalala. Dichi, munateli kwakama nenu hadaha mwanenu hakusambila wukwikala mukwaKristu wamuwahi ilaña mukuhita kwampinji wukaleka kukeña chalala. Munateli kutondolwela ñahi chuma chamuchidiwu nikumukwasha yakuli “nakushika kuwamwinu”? (1 Pet. 2:2) Ñakwilu yidi mumazu amulejeliwu Timotewu kudi Pawulu nindi: “Twalekakuhu kulondela yuma yiwadizili niyuma yakushinjililiwu yakukwashili kwitiya, muloña wuneluki antu akudizishili yumiyi nawa kufuma kuwukeki wuneluki nsona jajila [Nsona jachiHeberu], jinateli kukukojeja kwikala namaana, nawa awa maana akakukwasha kumona wamwinu kuhitila mukukuhwelela mudi Kristu Yesu.” (2 Tim. 3:14, 15) Talenu yuma yateneniyi Pawulu; (1) kwiluka nsona jajila, (2) kudiza yuma yakushinjililiwu yinateli kukukwasha kwitiya, ni (3) maana akakukwasha kumona wamwinu kuhitila mukukuhwelela mudi Kristu Yesu. w17.12 18-19 ¶2-3

Kwitiya kwakuvulu kwatañishaña antu kulonda abuli kumwiluka Nzambi nawu kwekala kesi kahelu, kwatambulaña mali awantu nawa kwatañishaña nsañu yamapolitikisi. Dichinaleteshi antu amavulu kutoñojoka nawu anateli kwikala namuzañalu hela chakwila hiyetiyaku. Chakadi nikujina, muntu nateli kwikala namuzañalu neyi wukubula kwikala mukwitiya kwakutwamba, ilaña muntu wukwikala namuzañalu waweni neyi yekala nawubwambu wawuwahi naYehova, “Nzambi wamuzañalu.” (1 Tim. 1:11) Yuma yejima yelañayi Nzambi yatukwashaña. Ambuñindi ekala namuzañalu muloña akwashaña antu amakwawu. (Yil. 20:35) Chakutalilahu, talenu kudifukula kwalala chikwaletaña muzañalu muchisaka. Kudifukula kwalala kwatudizishaña kulemesha mwinikwetu, kushikija chikaninu chetu chawulu, kubula kwila wujila, kukulisha anyana munjila yayiwahi nikumwekesha kukeña kwalala. Chafumañamu, kudifukula kwamuchidiwu kwanuñañeshaña antu nikwikala namuzañalu muchipompelu nimukaayi kejima. w17.11 21 ¶6-7

Ambuña aNzambi amavulu ahoshahu dehi awa mazu ahosheliyi kapostolu Pawulu. Wejima wetu twakabakanaña muloña wanshidi yitwaswana nawa neyi tunakufwila netu tumukalakeli Yehova ilaña tukañanya, twaneñaña. AkwaKristu amakwawu akoñahu dehi nshidi yahamesu bwi-i atoñojokaña nawu Nzambi kwila yayanakena nehi. Hela chochu, Nsona yatukwashaña nawu ejima abatama mudi Yehova atela wanyi kutoñojoka nawu hiyanayanakeniku. (Mas. 34:22) Pawulu washimwini chatiyiliyi hanyima yakukañanya kumwovwahila Yehova, wahosheli nindi: “Namusakilili Nzambi kuhitila mudi Yesu Kristu Mwanta wetu!” (Rom. 7:25) Hela chakwila Pawulu walwishileña nanshidi niyitoñojoka yatama yayuma yakoñeliyi, nawa yadanakeneniyi, wakuhweleleli nindi Nzambi namwanakeni kuhitila mudi Yesu. Yesu nkuuli yetu watookeshaña chinleji chetu nikutwinka kuwunda. (Heb. 9:13, 14) Chineli hiKapristu Muneni, “yena nateli nikwamwina chikupu antu amusolomokaña Nzambi kuhitila mudi yena, muloña yena wahandaña mpinji yejima kulonda yayilembeleleñaku.”—Heb. 7:24, 25. w17.11 8 ¶1-2; 12 ¶15

Tunateli kumwekesha ñahi netu tunakushikija chikaninu chetu chakudihana? Neyi tuumika kukala kweneni nikwanyanya tukumwekesha netu tunakuhemba chikaninu chetu chakumushimeka Yehova “hefuku-hefuku.” (Mas. 61:8) Chakutalilahu, neyi muntu nakuyikenkamina kumudimu hela kushikola, mwatela kushinda iku kweseka kuhitila mukulondela kufumba kwakwila nawu “tiyaku kuwaha [mudi Yehova].” (Yish. 23:26) Neyi twashakamaña nawantaña abula kwitiya, komana twalombaña wukwashu kudi Yehova kulonda yatukwashi kwikala nayilwilu yawakwaKristu hela chakwila wena dichinakwilawu wanyi? Komana twalombaña kudi Tata yetu wamwiwulu ifuku nifuku nakumusakilila hakutuleta muchiyuulu chindi nihakutukeña? Twatañaña Bayibolu hefuku-hefuku? Komana hitwamukanini netu tukwilaña yuma yejimiyiku? Hakwila nawu twili yumiyi, twatela kwovwahila. Kudifukula mpinji yejima kwamwekeshaña nawu twamukeña Yehova nawa nawu twadihana chikupu kudi yena. Kwila mutwakanini kwatukwashaña etu aweni; nawa neyi tutwalekahu kwikala ashinshika mwakafuma yayiwahi. w17.10 23 ¶11-12

Mukwakusoneka tumina waya mpuhu wahosheli nindi: “Mazu adi mukamina aleteshaña muntu kutoñojoka nsañu yinakwimbayi. Yivumina yaleteshaña kamina kumushika muntu hamuchima. Ilaña kamina kakojejaña muntu kufwikija nsañu yejima.” Tumina tutwembaña hakumushimeka Tata yetu wamwiwulu, Yehova twatela ‘kutushika nankashi hamuchima’ kubadika tumina tudi twejima. Dichaletesha kwimba kwikali chibalu chakudifukula kwalala chili tunakwimba nkawetu hela tunakwimba hamu nachipompelu chawantu aNzambi. Mwatiyaña ñahi kwimbila hewulu hamu nachipompelu? Komana mwatiyaña nsonyi? Muyisemwa yikwawu, amayala akañanyaña kwimba hadi antu amavulu. Yuma yamuchidiwu yajahilañamu chipompelu, sweje-e neyi anakulombola anakwimba wanyi hela anakwila yuma yacheñi hampinji yinakwimba chipompelu. (Mas. 30:12) Neyi twiluka chikupu netu kwimba hichibalu chakudifukula kwetu, tukufumañahu wanyi hanichi chibalu chakupompa. w17.11 3 ¶1-3

Wejima wetu twakeñaña kushakama mukuwunda, chakadi kwakama. Twatiyaña kuwaha muloña Yehova watwinka “kuwunda kwaNzambi,” kuwunda kwamukachi kwatukiñaña kuyitoñojoka yatama niyakuhila. (Fwi. 4:6, 7) Chineli twadihana kudi Yehova, twekalaña “mukuwunda naNzambi,” nikwikala nawubwambu wawuwahi nayena. (Rom. 5:1) Hela chochu, mpinji yakaletayi Nzambi kuwunda kwakweni kanda yishiki. Ayinu mpinji yakala yamumafuku akukumina munenzali yikonkojola, nawa antu amavulu anakutiyañana wanyi. (2 Tim. 3:1-4) Etu akwaKristu, twatela kuzuña njita yakuspiritu naSatana nintañishilu yindi yakutwamba yatandishañayi. (2 Kor. 10:4, 5) Ilaña sweje-e antaña jetu abula kwitiya diwu anateli kuluwañesha kuwunda kwetu. Amakwawu anateli kusekesha yuma yitwakuhwelela, kututwambila nawu twasandaña yisaka hela kutukaanisha kumukalakela Nzambi. w17.10 12 ¶1-2

Chineli madimi ahimpaña mukuhita kwampinji, dikwila nawu nimadimi mwabalumunawu Bayibolu ahimpa. Bayibolu yabalumwiniwu kunyima yatiyakeneña chiwahi yalekaña kutiyakana chiwahi. Talenu chakutalilahu chaBayibolu yabalumwiniwu muChizungu. Bayibolu yaKing James Version ayibalumwini katachi mu 1611. Diyi Bayibolu yaChizungu yadiña nakuzatishawu nankashi antu amavulu. Bayibolu yaKing James yazatishili nankashi wanyi ijina daNzambi. Hela chochu, mukuhita kwayaaka mazu azatishiliwu muBayibolu yaKing James Version alekeli kuzatika. MaBayibolu amakwawu niwena abalumwiniwu dehi kunyima, mazu azatishiliwu aleka kuzatika. Komana twazañalalaña wanyi hakwikala naBayibolu yikweti mazu itunakuzatisha makonu yaNew World Translation of the Holy Scriptures? Iyi Bayibolu ayibalumuna yamukuma hela yachibalu mumadimi akubadika ha 150, dichi antu amavulu makonu adi nayu. w17.09 19 ¶5-6

Atwansi akwaKristu atela kwikala ahamuka hakufuukula chiwahi amabwambu amawahi, yisela yayiwahi, yilwilu yayiwahi nikupapatishewa. Muloña anakufuukulahu yuma yahelayi Satana, wamusawulaña Nzambi. Chuma chalema chatela kwilawu atwansi hikufuukulahu yuma yakelañawu kumbidi. Mumatuña amu, atwansi ayikanjikijaña kutaña mashikola ahewulu nikufwila nyidimu yamali amavulu. Mumatuña amakwawu, kubula maheta kunateli kuyiletesha atwansi kusha muchima kunyidimu yakukwasha yisaka yawu. Yehova wukukiswila atwansi amwekeshaña kuhamuka hakufwila yuma yakuspiritu yakelañawu kumbidi nikutwamijaku Wanta muchihandilu chawu. Wukuyikwasha kwakamena yisaka yawu kumujimba. Timotewu hadiñayi kansi wafwilileña yuma yakuspiritu, nawa ninenu munateli kwila chochimu.—Fwi. 2:19-22. w17.09 29-30 ¶10-12

Kudiza chikupu Bayibolu kunateli kuyikwasha akwaKristu kwikala nachilwilu chakudihemba. Munjilanyi? MuBayibolu mwekala nsañu yalumbululawu chiwahi yinateli kutukwasha kwiluka yuma yayiwahi yinateli kufumamu neyi tudihemba niyuma yatama neyi tubula kudihemba. Kudi chuma chaletesheli Yehova yasoneki iyi nsañu. (Rom. 15:4) Dichi, twatela kuyitaña, kutoñojokahu chikupu nikudiza iyi nsañu. Wanenu njila mumunateli kuyizatishila halwenu nichisaka chenu. Mulombenu Yehova yayikwashi muzatisheña Izu dindi. Neyi mwiluka nenu mpinji yikwawu mwadihembaña wanyi, bayi mudiwulaku. Kuhiñahu lombenu nawa zatenu nañovu kulonda mudihembeña. (Yak. 1:5) Chakadi nikujina, neyi musandujola munyikanda yetu yawakwaKristu chinateli kuyikwasha kuwana nsañu yalema yinateli kuyikwasha chikupu. w17.09 6 ¶15-16

Nhoshelu yakwila nawu “wuntu wawuha,” ayitena kapampa kayedi muBayibolu yaNew World Translation of the Holy Scriptures. (Efwes. 4:24) Yatalisha hawuntu “waleñeliwu kwesekeja nankeñelu yaNzambi.” Tunateli kwikala naniwu wuntu wawuha. Muloñadi? Muloña Yehova wayileñeli antu neyi chekalayi yomweni. Dichi tunateli kwikala nayilwilu yindi yayiwahi. (Kutach. 1:26, 27; Efwes. 5:1) Hanyima yakutukolesha nawu tuvwaleña wuntu wawuha, Pawulu watwalekelihu kulumbulula nindi kubula chaambu hichilwilu chakuvwala wuntu wawuha. Washimwini nindi: Kwekala wanyi “kaGiriki hela kaYudeya, waalama hela wabula kwalama, ñiinza hela kaSikita, nduñu hela muntu wasubuka.” Muloñadi muchipompelu chimwatela kubulila kwikala chaambu chekowa, chaambu chamatuña hela chakutaña? Muloña atumbanji twaKristu alala ‘wejima wawu ekala wumu.’ (Kol. 3:11; Ñal. 3:28) Antu avwala wuntu wawuha alemeshaña akwawu akwakwitiya niantu abula kwitiya, hela chakwila ataña hela ataña wanyi.—Rom. 2:11. w17.08 22 ¶1; 23 ¶3-4

Kutalisha kukudiwunjika, Yehova wakeñaña wanyi nindi twileña yuma yakwila yomweni hayilañaku. Yena wadiwunjika. (2 Pet. 3:9) Yehova nahembeleli hadi yaaka yayivulu kulonda kukala kwamwekeni mwitempa daEdeni yakakwimanishi munjila yayiwahi. ‘Nakuchiñilila’ mpinji yakajilikawu chikupu ijina dindi. Nawa mwakafuma nkisu yasweja yikatambwilawu antu ejima ‘amuhembelelaña.’ (Isa. 30:18) Yesu niyena wahembeleleli. Wadiña mukweseka hampinji yadiñayi hamaseki kushika nimpinji yahaniniyi mulambu windi wefutu danyiloña mu 33 C.E. Ilaña wahembeleli kushika mu 1914 hatachikiliyi kuyuula. (Yil. 2:33-35; Heb. 10:12, 13) Wukuhembelela kushika nimpinji yakajilumunawu ayilumbu jindi ejima kumakumishilu akuyuula kwindi kwaYaaka Ikombakaji. (1 Kor. 15:25) Ilaña tunakuhweleli netu kuhembelela kwindi kwakuwahi. w17.08 7 ¶16-17

Susi wahosheli nindi: “Twaneñeli chikupu kwakwihi nachaaka chimu chelili mwanetu yafwi.” MukwaKristu wumu niyena wahosheli nindi chafwiliyi ñodindi, “wakatili nankashi.” Chawushona, antu amavulu anakumona kukala kwamuchidiwu. AkwaKristu amavulu muchipompelu akuhweleleli wanyi nawu antaña jawu akafwa henohu Amagedoni kanda. Chili mwafwisha ntaña yenu hela mwelukahu antu amu anafwishi, munateli kutoñojoka nenu, ‘Antu anafwishi anateli kukwashewa ñahi kulonda abuli kusweja kuneña? Hadaha mwatiyahu dehi antu anakuhosha nawu hahitaña mpinji hakwila nawu muntu yaleki kuneña. Hela chochu, komana chinayi mukwila nawu kuhita kwampinji kunateli kuuka muchima wunabaluki? Ntuluwa wumu wahosheli nindi, “Namoni nami yuma yikwilayi muntu hampinji yimu diyi yinateli kumukwasha.” Mwamweni, chineñi chinateli kumana chovu-chovu neyi chochakusukaña chilonda neyi munakuchakamena. w17.07 12-13 ¶1-3

Yumanyi yakeñañayi Yehova nindi mufuukuleña? Waleñeli antu nindi ekaleña namuzañalu kuhitila mukumwiluka nikumukalakela nakashinshi. (Mas. 128:1; Mat. 5:3) Twambukaku chikupu nawatunyama aleñayi, wena akuminaña hohu dakuda, kunwa nikusema. Nzambi nakukeña nindi mwikaleña namuzañalu, kuhitila mukufuukula chiwahi kubadika kufuukula hohu yuma yelañawu anyama. Nleñi yenu ‘hiNzambi wakukeña,’ “Nzambi wamuzañalu,” waleñeli antu “neyi chekalayi yomweni.” (2 Kor. 13:11; 1 Tim. 1:11; Kutach. 1:27) Mukwikala namuzañalu neyi mumwimbujola Nzambi yetu wakukeña. Mwamonahu dehi kushikijewa kwansona yahosha nawu: “Mukuhana mwekala muzañalu chikupu kubadika wekala mukutambwila”? (Yil. 20:35) Ichi dichatiyañawu antu. Dichi, Yehova nakukeña nindi kufuukula kwenu kumwekesheña nawu mwakeña akwenu niNzambi.—Mat. 22:36-39. w17.07 23 ¶3

Nzambi wayilemesha ambuñindi chikupu. Watwakamenaña chikupu kubadika chitwatela kudakamena etu aweni. Yehova wakamenaña antu jindi ejima. Nawa wayakamenaña hamuntu-hamuntu. Chakutalilahu, toñojokenu mpinji yelili Yehova yatondi ansompeshi nikuyinka ñovu jakufumisha muza wawaIsarela mumakasa awayilumbu jawu hadi yaaka nkulakaji yisatu. Muniyi mpinji yakala, wamweni Luti wabulili kwikala kaIsarela. Wadihanini nakwikala mukwakudifukula walala. Yehova wamukiswilili Luti nakumwinka iyala nimwana. Akamukiswila cheñi kumbidi. Neyi anamusañuli dehi, Luti wakeluka nindi mwanindi wadiña hakachi kawankakulula yaMesiya. Nawa wakatiya kuwaha kwiluka nindi nsañu yachihandilu chindi ayisonekeli muBayibolu nawa azatishili ijina dindi!—Luti 4:13; Mat. 1:5, 16. w17.06 28-29 ¶8-9

Mu 1970, manakwetu Peter wadiña nayaaka 19 nawa dihayiliyi nakukalakela haBeteli kuBritain. Hampinji yadiña nakushimwinayi kwitala nikwitala, wabulakeni iyala wadiña nawevu wawulehi. Peter wamwihwili iwu iyala neyi wukukeña kudiza chalala chamuBayibolu. Iwu iyala wakwili iku nahayami nindi idi itala dawarabi awaYudeya. Hakumweseka Peter, rabi wamwihwili nindi, “Eyi kansi, mukanda waDanyeli awusonekeli mwidiminyi?” Peter wakwili nindi, “Chibalu chimu achisonekeli muchiAramayiki.” Peter wahosheli nindi: “Rabi wahayamini chinahanini ñakwilu yaloña, ilaña wahayamini neyi chinahayamini wanyi! Nelukili ñahi ñakwilu? Chinayili kumukala nakutaña magazini yaKaposhi Kakutalila niLoleni! akakweji kafuminihu, mwadiña chibaaba chalumbulwileña nawu mukanda waDanyeli awisonekeli muchiAramayiki.” (Dan. 2:4) Mwamweni, spiritu yajila yinateli kutwanukisha nsañu yitwadizili.—Luka 12:11, 12; 21:13-15. w17.06 13 ¶17

Anateli cheñi kutachika kwakama neyi mumbanda yaleja nfumwindi nindi, “Nidi nevumu.” Kakavulu, adisumbula atachikaña kwakamena chakuhemba mwanawu kutalisha hansañu yakuya kuyipatela hampinji yidiyi mumbanda nevumu hela neyi mwana navwaliki dehi. Nawa akutoñojokaña hansañu yamali akudikwasha nachu chakatataka nikumbidi. Yuma yayivulu yahimpikaña neyi mwana navwaliki dehi. Mama yawantu wazatishaña mpinji yeneni hakuhemba mwana. Iyala kakavulu wamonaña nindi anamumbilili muloña mumbanda washaña maana hakwakamena mwaana. Iyala niyena wukwikala nanyidimu yikwawu yayiha. Nyidimu yikumuvulila muloña nekali namuntu mukwawu muchisaka wakuhemba nikwakamena. Kwekala yihuñu yikwawu yamonañawu adisumbula. Akufwila nawu ekali nanyana ilaña kuvwala nehi. Neyi mumbanda yabula kwimita waneñaña nankashi. w17.06 4 ¶1; 5 ¶5-6

Etu akwaKristu twalemesha chalala. Mwizu daNzambi dimwekala chalala. Halombeleñayi kudi Tata yindi Yesu wahosheli nindi: “Izu deyi dichalala.” (Yow. 17:17) Dichi, hakwila nawu tukeñi chalala, chiña twiluka chikupu chalala chaMwizu daNzambi. (Kol. 1:10) Hela chochu, kwakeñekaña kwila yuma yayivulu kubadika hakwiluka hohu yuma. Ilukenu nenu nsoneki yaMasamu 119 watukwashili kwiluka mwatalisha kukeña chalala chamuBayibolu. (Mas. 119:97-100) Komana twekala nampinji yakutaña nikutoñojoka hayibalu yamuNsona ifuku dejima? Tunateli kutwalekahu kukeña chalala chamuBayibolu neyi tutoñojokaña hachitunateli kuzatisha yuma yitwadizaña. Twatiyaña cheñi kutowala kwayakuda yamuBayibolu yitwatambwilaña mukuloñesha kwaNzambi. Twatela kuyidaña mpinji yejima kulonda yitwanukisheña “mazu alala” achalala kulonda tuyizatisheña hakukwasha amakwawu.—Mukwa. 12:10. w17.05 19-20 ¶11-12

Tunakukeña kukwasha antu anakukabakana kushilahu niabula kwikala aYinsahu. (Luka 10:33-37) Njila yimu yayiwahi hikuyishimwina nsañu yayiwahi. Eluda wumu wunakwashi matunduka amavulu wahosheli nindi, “Chikuwaha neyi tukudimwekesha netu tudi aYinsahu jaYehova nawa tunakufwila kukwasha antu kuspiritu bayi muyitoñojokaku. Neyi nehi, tukudikeña nawu muloña wayuma yitunayinki.” AkwaKristu neyi amwekeshaña kukeña kudi “enyi” mwafumaña yuma yayiwahi. (Mas. 146:9) Muhela mukwaKristu washimwini nindi chisaka chatemukili makabisha muEritrea. anyanindi awana endeli mafuku 8 muchinkalampata hakwila ashiki kuSudan. Wahosheli nindi: “Amanakwetu atwitambwilili neyi kwiji tudi antaña, atwinkeli yakuda, yakuvwala, hakukama nimali akwendela. Kwekalahu antu amakwawu atambwilaña enyi mumatalawu muloña wakwila adifukulaña kudi Nzambi yowumu? A Yinsahu jaYehova hohu!”—Yow. 13:35. w17.05 7 ¶17, 19-20

“Muntu atweshi kumukwashaku Nzambi? Mukwamaana wukudikwasha yomweni. Chiwudi waloña chinamutiyishi Chinaweji kuwaha? Chiwukuwahisha nankashi njila jeyi chikumukwasha yena?” (Yoba 22:1-3) Mwatoñojokahu dehi hañakwilu yamalwihu amuchidiwu? Elifwazi wakuTemani chamwihwiliyi Yoba awa malwihu, Elifwazi welukili nindi wukwakula nindi inehi. Alunda nindi aBilidadi naShuhi, atachikili kuhosha nawu muntu kwila yekala waloña kudi Nzambi nehi. (Yoba 25:4) Awa ankundeji akutwamba ahosheleña nawu nyidimu yitwamukalakelaña Yehova yekala yamukunkulwayi, nawa Nzambi watumonaña neyi kanzwanzwa, ivunyi hela kabubu. (Yoba 4:19; 25:6) Yehova wamwekesheli chamonañayi yuma hamuzuwililiyi Elifwazi, Bilidadi niZofwari nachatwambiliwu ilaña watiyili kuwaha naYoba, nakumutena nindi “kambuñami.” (Yoba 42:7) Dichi, muntu nateli “kumukwashaku Nzambi.” w17.04 28 ¶1-2

Tunakabakani nankashi mukanu kaayi hadi mpinji yayilehi chakwila tunakumona yuma neyi kwiji dichiyekala. Neyi chochekala antu ashakamaña kukamwihi nasitesheni yasitima, alekaña kutiya ipumba, hela antu ashakamaña kwakwihi nakwanatilañawu majilu, alekaña kutiya ivumba. Ilaña neyi yuma yejimiyi ayifumishahu, akutiya kuwaha! Yumanyi yakasinsa hamakabi itwamonaña? Talenu chikaninu chidi munsona yefuku dalelu. Komana awa mazu anayitiyishi kuwaha wanyi? Yehova wakeñaña nindi mutiyeña kuwaha. Zatenu nañovu kulonda muswini kwakwihi naYehova Nzambi nikuloñesha kwindi muyinu mpinji yakala! Toñojokenuña hakuchiñeja kumukweti nikukwifwikija neyi kwiji kunashikijewi dehi nawa lejenu antu amakwawu. (1 Tim. 4:15, 16; 1 Pet. 3:15) Neyi mwila mwenimu, mukukuhwelela chikupu nenu himwakajilumuka nakanu kaayi katamaku. Ilaña, mukahandaña hohu haya nyaaka namuzañalu! w17.04 13 ¶16-17

Iyi nsañu yaswayi kwiteja, ilaña chakalaña neyi manakwetu natwili katama. Neyi chuma chamuchidiwu chimwekana, tukumona yuma neyi chayimonañayi Yehova? Chakutalilahu, mukwila ñahi neyi eluda yahosha mazu anakumwekesha chaambu? Komana munateli kutuntuka neyi eluda yahosha mazu anayitishi kutama? Chatela mushikeni kukunkulula nenu ona manakwetu nashikihu wanyi kwikala eluda, kwila muhembelela Yesu mutu wachipompelu nehi? Komana mukuleka kutoñojoka hachiluwa chindi, nakutachika kutoñojoka hachinazatiyi nakashinshi hadi yaaka yayivulu? Neyi manakwetu wunayili chatama yatwalekahu kwikala eluda hela amwinkelahu kukooleka kukwawu, mukutiya ñahi? Neyi mumwanakena chakufuma hamuchima mukumwekesha nenu mwamonaña yuma neyi chayimonañayi Yehova.—Mat. 6:14, 15. w17.04 27 ¶18