December

Kunyima, chisambu chabombelelimu kutambika muntu kwitala kulonda adiili nindi hamu yakuda. (Kutach. 18:1-8; Ansomp. 13:15; Luka 24:28-30) Kuyitambika antu kulonda adiili hamu nawu yakuda kwayikwashileña kwikala amabwambu nikushakama mukuwunda. Anyi itwatela kusambila kutambika? Antu itwahandaña nawu mpinji yejima, amanakwetu niahela amuchipompelu. Neyi tudi mukukala, komana hitukukeña wukwashu kudi akwetuku? Twatela kwikala ashinshika nawa awunda nawamanakwetu niahela ejima. Ankoñi añinza niakashikola ayaña kumashikola aWanta niakwakudihana mumudimu wakutuña akeñaña matala akushakamamu. Wubanji wadimwekenaña washiyaña yisaka yikwawu makasa mushiñu nawa akeñekaña hakukaama sampu anatuñululi matalawu. Bayi tuhoshaña netu akwetu adi namatala amawahi diwu atela kutambwila enyiku, hadaha anakwashani kapampa kakavulu. Kwila mutambwila enyi hela chakwila itala denu danyanya nehi? w18.03 15 ¶6; 16 ¶9

Chumanyi chamukwashaña wunadimbuki kunyamuka? Bayi nañovu jindi yomweniku, ilaña naspiritu yaNzambi. (Fwi. 4:13) Mukabu waniyi spiritu mwabombela kudihemba, chilwilu chadifwana nakudifumba etu aweni. Yuma yikwawu yinateli kumukwasha, hikulomba kwakufuma hamuchima, kudiza Bayibolu nikutoñojokahu chikupu. Indi neyi chayikalilaña kudiza Izu daNzambi? Hadaha mwadimonaña enu aweni nenu mukutwesha wanyi kudiza. Hela chochu, ilukenu nenu Yehova wukuyikwasha neyi mumulomba. Nateli kuyikwasha ‘kufwila chikupu’ kudiza Izu dindi. (1 Pet. 2:2) Chatachi, mulombenu Yehova yayikwashi mudifumbeña enu aweni kulonda mudizeña Izu dindi. Kuhiñahu, zatenu nañovu mwileña yuma kwesekeja nakulomba kwenu, hadaha mwatela kwihihishaku mpinji yakudiza. Mukuhita kwampinji, kudiza kukuyipelelaña nawa mukudiluñishaña! Mwamweni, mukumona kulema kwakudiza chimukwiluka chekala yitoñojoka yaYehova yasweja kuwaha.—1 Tim. 4:15. w18.03 29 ¶5-6

Henohu muntu kanda yapapatishewi, chikuhwelelu chindi chatela kushindamena hakwiluka kwalala kwakwiluka Nzambi, nkeñelu Yindi ninjila yashaku yakupulukila. (1 Tim. 2:3-6) Chikuhwelelu chamuchidiwu chamukwashaña kadizi kutondolwela yilwilu yamuneñeshaña Nzambi nakwila yuma kwesekeja nanshimbi jaYehova jaloña. (Yil. 3:19) Kuhosha hohu chalala, muntu kwila yadihana kudi Nzambi iku nakwila yuma yatama yikaleñela yakabuli kuswana Wanta nehi, neyi yadihana kudihana kwindi kwamukunkulwayi. (1 Kor. 6:9, 10) Ilaña watela kwila cheñi yuma yikwawu kubadika hohu kulondela nshimbi jaYehova jaloña. Muntu wunakukabila kuloña watela cheñi kuyaña nakupompa nikudikita chikupu mumudimu wakupulwisha mawumi nawa wakwilisha atumbanji. (Yil. 1:8) Kambanji wamuha watela kwila iyi yuma yejima kuhiñahu dihu hakudihana kudi Yehova mukulomba kwankawindi nikudihana hamesu awantu amavulu kuhitila mukupapatishewa. w18.03 6 ¶12

Muloñadi Yehova chamutondeleliyi Mariya kwikala mama yaYesu? Chakadi nikujina, Mariya wadiña muntu wakeña yuma yakuspiritu. Wamwekesheli nindi wadiña muntu wakeña yuma yakuspiritu mumazu akushimeka ahosheliyi hayendeleliyi antaña jindi aZekariya naElizabeta. (Luka 1:46-55) Mazu ahosheliyi Mariya amwekeshaña nawu wadiña wakeña Izu daNzambi nankashi nawa wadiña weluka Nsona yachiHeberu. (Kutach. 30:13; 1 Sam. 2:1-10; Mal. 3:12) Mariya naYosefu chadisumbwiliwu adijilikili kubula kuhumañana sampu chavwalikiliyi Yesu. Chumichi chinakumwekesha nawu wejima wawu atwamijiliku nkeñelu yaYehova ninshimbi yindi kubadika kufwila yuma yakutiyisha mujimba kuwaha. (Mat. 1:25) Chimwahitili mpinji, Mariya wamweni yuma yamwekeni muchihandilu chaYesu nawa washili maana kumazu ahosheleñayi. Washili muchima hankeñelu yaNzambi kutalisha hadi Mesiya. Kwila twimbujola chakutalilahu chaMariya chakutwamijaku nkeñelu yaNzambi muchihandilu chetu nehi? w18.02 21 ¶11

Tunateli kwimbujola ñahi chikuhwelelu nikwovwahila kwaYoba? Hichikweti muloña nakukala kutunakumonaku, tutwalekenuhu kumutwamijaku Yehova muwumi wetu, kumukuhwelela chikupu nikumwovwahila chakufuma hamuchima. Nawa tweluka yuma yayivulu yikuleñela tumukuhweleli Yehova kubadika Yoba. Chakutalilahu, twamwiluka chikupu Satana nitufuta twindi. (2 Kor. 2:11) Twasakililaña hakwikala namukanda waYoba, tuneluki muloña wetejelayi Yehova makabi. Muwuprofwetu waDanyeli, twadizañamu netu Wanta waNzambi hinfulumendi yekala mumakasa aKristu Yesu. (Dan. 7:13, 14) Nawa tweluka netu Wanta waNzambi keña wufumishihu makabi haya nyaaka. Yuma yamweniyi Yoba yinakutudizisha nawu twatela kutiyila akwetu akwaKristu wushona anakuumika kukala. Kufwana Yoba, amakwawu anateli kutuboka mpinji yikwawu. (Mukwa. 7:7) Chatela tuyisompesheña, tuyimwekesheleña kashinshi niwushona. Neyi twila mwenimu, tukumwimbujola Tata yetu wukweti kukeña niluwi, Yehova.—Mas. 103:8. w18.02 6 ¶16; 7 ¶19-20

Antu amakwawu adivwimbaña muloña amwekanaña lubanji, atiyakana, akweti wuswa wakwimba tumina, akuluka yitembi muyuma yimu hela yifulu yamaneni yikwetiwu. Davidi wadiña nayuma yejimiyi, ilaña wadiña wadizoza muchihandilu chindi chejima. Chelili yamujahi Goliyati, amwinkeli mwana kaMwanta Sawulu kulonda yekali ñodindi, Davidi wahosheli nindi: “Yaminyi ntahi . . . mwaka nimoni nijakwikala Sambanza (muku wamwanta)?” (1 Sam. 18:18) Kufwana Davidi, antu jaYehova makonu azataña nañovu kulonda amwekesheña kudizoza. Twahayamaña chikupu kwiluka netu Yehova, Muntu wabadika kwiwulu nihamaseki, wukweti ichi chilwilu chakudizoza. Twalondelaña kufumba kwonenawu kwakwila nawu: “Vwalenu muchima wawushona, luwi, kudizoza, kwovwaha nikudiwunjika.” (Kol. 3:12) Tweluka cheñi netu kukeña “hikwadivwimbañaku, hikwadinkaña wantaku.” (1 Kor. 13:4) Neyi tumwekesha kudizoza, antu akuswina kudi Yehova. w18.01 28 ¶6-7

Makonu, ninetu anateli kutuleja kuhana yawaana kunyidimu yimu yadimena. (Yil. 4:34, 35; 1 Kor. 16:2) Chakutalilahu, komana chipompelu chenu chinakukeña kutuña Itala daWanta dadiha? Hadaha anatuleji kuhana yawaana yakukwasha kupompa kweluña hela kukwasha amanakwetu anamoni kukala kwadimwekenaña. Twahanaña cheñi yawaana yakwashaña antu akalakelaña hakasanji kamutayi keneni nitusanji twamumatuña ejima. Yawaana yetu cheñi yakwashaña amishonali, apayiniya adimena niankoñi añinza. Ejima wetu twatela kukwasha mudimu waYehova wunakuzatewa munanu mafuku akukuminina. Yawaana yayivulu yekala yakujinda. Twajindaña hakusha yawaana muchikasha chekala Mwitala daWanta hela tunateli kuhanina haintaneti kuzatisha jw.org/lun. Tunateli kutoñojoka netu yawaana yantesha yitunahani kwosi mudimu wuyikuzata. Ilaña, yawaana yayivulu yafumaña kudi antu ahanaña yawaana yantesha kubadika yawaana yahanañawu kudi antu ahanaña yayivulu. w18.01 19 ¶10-11

AkwaKristu ejima atela kupapatishewa nawa hinjila yinateli kuyikwashi kupuluka. (Mat. 28:19, 20) Chipapatishu cheyi chamwekeshaña nawu wadihanini. Hikukana kuwamukanini Yehova neyi wukamukeñaña nikutwamijaku kwila nkeñelu yindi kubadika yuma yejima. Ichi chikaninu watela kuchishikija. Komana watela kuditoñeshaña neyi chiña wabulili kukana? Inehi, hiwatela kuditoñeshaku. Chatama wanyi kudihana neyi akuzatisheña kudi Yehova. Talaku chichekala neyi wubula kudihana. Muntu wabula kumwiluka Yehova amuyuulaña kudi Satana. Diyabolu hakeñaña nindi wakapulukiku. Watiyaña kuwaha neyi wujimbesha kuchiñeja kweyi kwawumi wahaya nyaaka kuhitila mukudibomba nindi hakudikaña nachiyuulu chaYehova. Chatela wumuhakwileñaku Satana, toñojokaña hankisu yiwukweti hamuloña wakwikala mukwaKristu wadihana nawa wapapatishewa. Chineli wunahani wumi weyi kudi Yehova, watela kuhosha nachikuhwelelu neyi: “Yehova wadikuma nanami; hinukutiya womaku; chumanyi chakañilawu antu?” (Mas. 118:6) Kwosi chuma chabadika kudihana kudi Nzambi nikwikala ibwambu dindiku. w17.12 23-24 ¶1-3

Kukwikalaña mpinji yitukutiyaña kutama namazu niyilwilu yawakwetu akwakwitiya hela etu kuyineñesha wena. Iku kunateli kwikala kweseka kweneni. Neyi chekala kweseka kwejima, Yehova wetejaña kutweseka kulonda tumwekeshi kashinshi ketu kuhitila mukuzata mukuwunda nawamayala niambanda adihana nawa akeñayi hela chakwila hiyawaninaku. Chakutalilahu chaYosefu chamwekeshaña nawu Yehova wetejaña ambuñindi kuyeseka. Yosefu hadiñayi kansi, amanakwindi amutiyilili ichima nakumulandisha muwuduñu kuEjipitu. (Kutach. 37:28) Yehova wamweneña yuma yejima yamwekeneña nawa waneñeli kumona ibwambu dindi Yosefu washinshika anakumuyandisha. Hela chochu, Nzambi helilihu chumaku. Chimwahitili mpinji, Yosefu amutwambilili nawu wakeñeleña kumukaama ñoda Potifwari nawa amushili mukaleya. Chochimu, kwosi chuma cheliliyi Yehova. Komana Nzambi wamushiyili Yosefu nkawindi? Inehi: “Yuma yeliliyi Yosefu yejima Yehova wayiwahishili.”—Kutach. 39:21-23. w18.01 9-10 ¶12-14

Neyi muntu yayihula nindi, ‘Chikuhwelelu chenu chashindamena hanka?’ mukwakula nenudi? Chakadi nikujina mukuhosha nenu mwakuhwelela nenu Yehova diyi Nleñi nawa Mukwakuhana Wumi. Mukuhosha cheñi hayuma yimwakuhwelela hadi Yesu Kristu, wafwili neyi ifutu danyiloña. Nawa mukuhosha namuzañalu haparadisa yakumbidi, mwakashakamaña antu jaNzambi haya nyaaka. Komana mukuhosha cheñi nenu chikuhwelelu chenu chashindamena chikupu hakusañuka? Kudi yuma yikuletesha tuhoshi netu kusañuka kwakekalaku hela chakwila etu twachiñejaña kupuluka halukadi lwasweja nikushakama hamaseki haya nyaaka. Chikuhwelelu chetu chashindamena hakusañuka. Neyi Kristu amusañwili wanyi, wadi kwikala wanyi Mwanta wetu nawa ntañishilu yetu yakwila nawu Kristu nakuyuula yadi kwikala yamukunkulwayi. (1 Kor. 15:12-19) Ilaña, tweluka netu Yesu amusañwili. Hela chakwila anakutuyandisha, twatwalekañahu kukuhwelela mukusañuka.—Maku 12:18; Yil. 4:2, 3; 17:32; 23:6-8. w17.12 8 ¶1-2

A Fwarisi ashinshikileña hohu hachiluwa chinakoñiyi muntu chatela ashinshiki mumuchima windi. A Fwarisi chamweniwu Yesu nayi kuchidika kwitala daMatewu, enhwili atumbanji twindi nawu: “Muloñadi ntañishi yenu chadiilañayi hamu nawakwakutambula nyisonku niakwanshidi?” Yesu wakwili nindi: “Antu akola hiyakeñaña ndotoluku, chiña akata hohu. Dichi, yenu mwakadizi mwatalisha awa mazu akwila nawu: ‘Nakeñi luwi, bayi mulambuku.’ Muloña nenjili nakutambika akwanshidi, bayi aloñaku.” (Mat. 9:9-13) Komana Yesu wetejeleña nshidi yahamesu bwi-i? Inehi. Nawa nsañu yindi yalema yashimwinineñayi yadiña yakuleja antu abalumuki mumuchima. (Mat. 4:17) Hela chochu, Yesu welukili nindi “akwakutambula nyisonku . . . niakwanshidi” akeñeleña kubalumuka. Hiyayili kwitala daMatewu nakuda hohuku. Ilaña “antu amavulu adiña nakumulondela [Yesu].” (Maku 2:15) Chawushona, aFwarisi amavulu akañenyeña kumona yuma yamweneñayi Yesu mudi awa antu. w17.11 13 ¶2; 16 ¶15

Wejima wetu tukwiteja netu kwikala muchipompelu chawakwaKristu hikukooleka kwakweni. Kudiza Bayibolu hakupompa kwetu nikukeña kutwadimwekeshelaña wumu namukwawu kwatukwashaña kusha maana hesomu detu. Hela chochu, mpinji yikwawu kubula kutiyashana kwaleñelaña chipompelu kubula kwikala mukuwunda. Neyi tukañanya kumanisha iku kukala, tunateli kutachika kudihembela nkunyi. (1 Pet. 3:8, 9) Tunateli kuleka ñahi kuhemba nkunyi kulonda yibuli kutukañesha kutambwila isomu? Pawulu wayilejeli akwaKolosi nindi: “Chineli mudi antu atondawu kudi Nzambi, ajila nawa akeñayi, vwalenu muchima wawushona, luwi, kudizoza, kwovwaha nikudiwunjika. Ditiyililenuña wumu namukwawu nikudanakena wumu namukwawu chakufuma kumuchima hela chakwila kudi muntu wudi namuloña namukwawu. Neyi chayanakeneniyi Yehova chakufuma kumuchima, ninenu nawa mwatela kwila mwomumu.”—Kol. 3:12, 13. w17.11 27 ¶7-8

Neyi namujahi mukwawu chamaposu, itunduka wasambilileña kushimuna “nsañu yindi kudi akulumpi” hachiisu chamusumba wakubatamina kunatemukiliyi. Amutambwilileña chiwahi. Neyi munahiti dehi mafuku, amufuntishileña kudi akulumpi kumusumba kwajahililiyi mukwawu nawa akulumpi asompeleña muloña windi. (Kuch. 35:24, 25) Itunduka wafuntileña kumusumba wakubatamina chiña hohu neyi anasompi nawu wajaha mukwawu chamaposu. Muloñadi akulumpi chiyatalileña haniyi nyiloña? Afwililileña kuhemba chipompelu chawaIsarela chakadi majilu nikukwasha muntu wunajahi mukwawu chamaposu kulonda amwanakeni kudi Yehova. Muntu wumu wadiza jaBayibolu wasonekeli nindi neyi itunduka yabula kuya nakudimona nawakulumpi, “wadishileña yomweni muwubanji . . . , muloña wadiwili njila yakupulukila yaloñesheliyi Nzambi.” Neyi yakañanya kutemukila kunyisumba yakubatamina yaloñesheliyi Yehova, ntaña yanona muntu wajahiliyi wadiña nawuswa wakumujaha niyena. w17.11 9 ¶6-7

Mumafuku aZekariya, Yehova wamazaza wadiña nakuzatisha añelu indi kukiña nikukolesha antu jindi. (Mal. 3:6; Heb. 1:7) Kufuma tuhu hampinji yayifumishiliwu aIsarela akuspiritu muwuduñu waBabiloni Muneni mu 1919, kudifukula kwalala kunatwalekihu hela chakwila anakukañeshi. (Chim. 18:4) Chineli añelu anakutukiña, twatela wanyi kutiya woma netu kuloñesha kwaYehova kwakafunta cheñi muwuduñu wakuspiritu. (Mas. 34:7) Ilaña, twatela kukuhwelela netu ambuña aNzambi mukaayi kejima akutwalekahu kudifukula. Tukweti makalu amavulu. Hampinji yikasweja lukadi lwasweja, mashidika awañelu aYehova wamazaza akakiña antu jaNzambi nikujilumuna antu adikañaña nachiyuulu chindi. (2 Tesa. 1:7, 8) Dakekala ifuku dakala chikupu. w17.10 28 ¶10-11

Neyi muntu wamuchisaka anamuhañi muchipompelu hela nadaambuli nachipompelu, chakataña nankashi kumuchima neyi mpoku yakabali. Munateli kuumika ñahi kukala kwamuchidiwu? Twalekenuhu kwila yuma yakuspiritu. Koleshenu chikuhwelelu chenu kuhitila mukutaña Bayibolu mpinji yejima, kuloñesha nikuya kukupompa kwawakwaKristu, kuya mumudimu wakushimwina nikulomba kulonda muumiki. (Yuda 21) Hanu dinu mukwila ñahi neyi mumona nenu munakwila yuma yejimiyi, ilaña munakutoñojoka hohu hakukala kumunakumona? Bayi muzeyaku. Kwila yuma yakuspiritu, kukuyikwasha kutondolwela yitoñojoka yatama nichimunakutiya. Toñojokenu chuma chamumwekeneni nsoneki yeSamu 73. Wadiña nakutoñojoka mwaluwa nawa waneñeli, ilaña walekeli yitoñojoka yeniyi cheñililiyi mwitala daNzambi dakudifukwila. (Mas. 73:16, 17) Kudifukula kudi Yehova nakashinshi, kukuyikwasha ninenu kuhimpa yitoñojoka yenu. w17.10 16 ¶17-18

Mwitempa daEdeni, Satana watwambili neyi kwiji nakukeña kumukwasha Eva, ilaña yilwilu yindi yadiña yakudikeña yomweni nawa yawunfwikiji. (Kutach. 3:4, 5) Mumafuku aDavidi, Ahitofweli wamwekesheli nindi wubwambu windi namwanta wadiña wamakudi. Ahitofweli wekalili nfukeji chelili yamoni nindi akumutiya kuwaha. (2 Sam. 15:31) Munjila yoyimu nimakonu, akwakusekesha niantu amakwawu aletaña chaambu muchipompelu azatishaña “nhoshelu yawu yakudimbeka nimumazu awu amwovu akulambisha” kulonda amwekani neyi akweti kukeña, ilaña akeñaña kuditiyisha aweni kuwaha. (Rom. 16:17, 18) Kukeña kwawunfwikiji kwatiyishaña nsonyi muloña kwamwekeshaña wanyi yilwilu yaNzambi yakukeña kwakudihana. Wunfwikiji wamuchidiwu wadimbaña antu, bayi Yehovaku. Yesu wahosheli nindi antu adi neyi anfwikiji akayibabesha “nankashi.” (Mat. 24:51) Hela chochu, twatela kudihula netu, ‘Komana namwekeshaña kukeña kwalala, bayi kwakutwamba nawa kwakuditiyisha kuwahaku?’ w17.10 8 ¶6-8

Neyi tunakutaña Mwizu daNzambi hakushimwina, dikwila nawu tunakumwiteja Yehova kuhosha namwini itala. Neyi tutonda nsona yayiwahi, yinateli kumushika muntu hamuchima kubadika mazu itunateli kuhosha. (1 Tesa. 2:13) Dihulenu nenu, ‘Komana natañaña Izu daNzambi neyi inakushimwina nsañu yayiwahi kudi antu?’ Hela chochu, kudi yuma yayivulu yitwatela kwila kubadika kuyitañila hohu antu itukushimwina Bayibolu. Muloñadi? Muloña antu amavulu elukisha wanyi Bayibolu nawa ayitiyishishaña wanyi. Mumafuku awapostolu antu atiyishishileña wanyi nsona, nimakonu chochimu. Dichi, bayi tutoñojoka netu muntu wukutiyishisha chikuma chidi munsona neyi tumutañilayi hohuku. Twatela kwikala nampinji yakutaña kulonda twiluki chikuma chidi muvasi nikulumbulula muchinatalishi. Hadaha munateli kutaña cheñi chikuma chidi muvasi. Neyi tukwila mwenimu, nsañu yidi Mwizu daNzambi yinateli kushika antu itunakushimwina hanyichima.—Luka 24:32. w17.09 25 ¶7-8

Antu amwimbujolaña Yesu atela kumwekesha wushona kudi antu nikudi amanakwawu akwaKristu. (Yow. 13:34, 35) Wushona watalisha “mukukabakena hamu nawantu anakukabakana.” Muntu wamwekeshaña wushona wakwashaña antu anakukabakana, hadaha wukuyikwasha kumanisha kukala kukwetiwu. Wanenu njila yakukwashilamu antu. Makabi amonañawu antu adi kunamwekani wubanji aleteshaña antu amavulu kumwekesha wushona. Antu jaYehova ayiluka nankashi nawu akwashaña antu neyi kunamwekani kukala kwamuchidiwu. (1 Pet. 2:17) Muhela wumu wakuJapan washakamineña kwiluña kwaholokeleli mutentashi nitsunami mu 2011. Wahosheli nindi, “wakolesheweli nawa wakundejeweli” hamudimu wazatiliwu amanakwetu amavulu amuJapani niafumini kumatuña amakwawu adihanini kutuñulula itala dindi dakisikili. Wasonekeli nindi: “Chankwashiliwu, nelukili nami Yehova wakamenaña. Nawa akwetu aYinsahu adakamenaña wumu namukwawu. Amanakwetu niahela amavulu mukaayi kejima atulombelañaku.” w17.09 11 ¶12-13

Mwatela kwikaliladi nachilwilu chakudihemba? Toñojokenu hayikuma yiyedi. Chatachi, kusandujola kunakumwekesha nawu antu ahembaña yitoñojoka yawu hiyavula kumona kukala kwaswejaku. Avula kwakama wanyi. Ekalaña nawamabwambu amawahi. Nawa kakavulu hiyavula kuzuwa hela kwakama nikuneña neyi chekala antu abulaña kudihembaku. Chamuchiyedi, hakwila nawu twikali nawubwambu naNzambi twatela kubula kufwila yuma yatama nikukaana kweseka kwejima. Adama naEva chavulumwiniwu chamwekeshaña nawu akañenyi kudihemba. (Kutach. 3:6) Toñojokenu cheñi kukala kunamoniwu antu amakwawu muloña wakubula kudihemba. Muntu wabula kuwanina kwila yadihemba chacheni nehi. Yehova wayiluka chikupu ambuña indi chiyakañanyañawu kudihemba, nawa nakukeña kuyikwasha kuleka kufwila yuma yatama.—1 Anya. 8:46-50. w17.09 3-4 ¶3-4

Mpinji yimu, aYinsahu eyila niatooka muSouth Africa adikundileña wanyi. Hela chochu, Hamulungu haDecember 18, 2011, amanakwetu niahela 78,000 eyila niatooka muSouth Africa niafumini kumatuña amakwawu apompeli hamu mwibulu mumusumba waJohannesburg nakudiluñisha maprogiramu akuspiritu. Mukulumpi wumu hakachi kawakulumpi atalaña ibulu wahosheli nindi: “Kanda nimoneñahu dehi antu adi nayilwilu yayiwahi neyi enu munidi ibulu. Ejima anavwali chiwahi. Munawahishi ibulu dejima chiwahi. Ilaña chuma chabadika himukweti chaambu chekowaku.” Mazu amuchidiwu ahoshañawu antu abula kwikala aYinsahu amwekeshaña nawu kunuñañana kwetu kwamukaayi kejima kwaambuka. (1 Pet. 5:9) Hanu dinu yumanyi yaleteshaña twaambuki nakuloñesha kukwawu? Izu daNzambi nispiritu yindi yajila diyatukwashaña ‘kuvuula wuntu wawukulu.’ Nawa twavwalaña “wuntu wawuha.”—Kol 3:9, 10. w17.08 17-18 ¶2-3

Bayibolu yatulejaña nawu kudiwunjika himukabu waspiritu yajila. Etu antu abula kuwanina hitukutwesha kudiwunjika chakubula wukwashu waNzambiku. Kudiwunjika hichawaana chatwinkayi Nzambi. Nawa hakwila nawu tumwekeshi netu twamukeña, twatela kudiwunjika. Kudiwunjika kwamwekeshaña cheñi nawu twakeña akwetu. Neyi tutwalekahu kubula kudiwunjika kukutukojeja kubula kukeña akwetu. Ilaña neyi tukwikala adiwunjika tukuyikeña. (1 Kor. 13:4; Ñal. 5:22) Mukudiwunjika mwabombela cheñi yilwilu yikwawu yawakwaKristu yalema. Chakutalilahu, mukudiwunjika mwabombela kuumika. Kuumika kwatukwashaña kushinda neyi tudi mukukala chakubula kutooba. (Kol. 1:11; Yak. 1:3, 4) Kudiwunjika kwakeñekaña cheñi kukabakana chakubula kwaboka nikwikala akola hela tukumona kukala kwasweja. Kubombelahu, Bayibolu yatulejaña kuhembelela mukudiwunjika. Kuhembelela kwamuchidiwu akushimuna haYakoba 5:7, 8. w17.08 4 ¶4

Enu atwansi munateli kwiteja nenu henohu kanda muyi hawenyi, mwatela kwiluka kumunakuya. Chihandilu chidi neyi wenyi nawa mwatela kutoñojoka kumunakuya henohu muchidi atwansi. Hela chochu, kufuukula kwakala. Ilaña bayi mutiya womaku. Talenu mazu ahosheliyi Yehova adi munsona yefuku dalelu. Yehova wayileja nindi mwatela kufuukulañahu dehi yuma yimwakela kumbidi. (Mukwa. 12:1; Mat. 6:20) Wakeñaña nindi mwikali namuzañalu. Yuma yayiwahi yaleñayi yamwekeshaña nawu nakukeña nindi mwikali namuzañalu. Shinshikenu cheñi chatwakamenañayi nikutuleja njila yayiwahi yakuhandilamu. Yehova walejaña antu akaanaña kufumba kwindi nindi: “Himukwila chuma chinantamini kumesu ami. . . . Tiyenu ambuñami akatiyaña kuwaha hakwila enu mwakatiyaña nsonyi. Tiyenu ambuñami akembaña tumina twachiseki mumuchima.” (Isa. 65:12-14) Yehova amulemeshaña neyi antu jindi afuukulaña chiwahi.—Yish. 27:11. w17.07 22 ¶1-2

Neyi Nzambi weluka hadi katumbwa kadi kejima, dikwila nawu ninenu wayiluka hamuntu-hamuntu kwejima kumudi, chimwatiyaña niyuma yejima yimwakeñaña mpinji yidi yejima. Yehova wayakamenaña enu nkawenu nawa wukweti ñovu yakuyikwasha nakukala kumunakumona. (Mas. 147:5) Munateli kumona nenu kukala kunayiswejeli nawa mukutwesha wanyi kukwimanisha. Nzambi wayiluka chikupu nawa “waanukaña kwindi nindi hilunkuñu hohu kwalu.” (Mas. 103:14) Chineli hitwawaninaku, twakoñaña yiluwa yoyimu mpinji yejima. Twaditoñeshaña hayuma yitwahoshaña, yuma yatama yitwafwilaña mpinji yejima hela kutiya ichima nayuma yikwetiwu akwetu. Yehova kanda yeleñahu dehi yuma yamuchidiwu; ilaña, kwosi wukwiluka chatwilukayi. (Isa. 40:28) Hadaha mwamwonahu dehi chikasa chaYehova chichayikwashili hampinji yimwadiña mukukala.—Isa. 41:10, 13. w17.07 18-19 ¶6-8

Manakwetu wakuSri Lanka, wunakushakama kwituña dacheñi, wahana itala niluña kulonda apompeleñamu kupompa kwachipompelu nikwañinza nawa mushakameña antu adi mumudimu wampinji yejima. Manakwetu wadihanini chikupu kukwasha amanakwetu abula yuma. Mumatuña mwakanishañawu mudimu wetu, amanakwetu azatishaña matala awu kwikala Matala aWanta kulonda apayiniya niantu amakwawu abula mali apompeña chakadi kuyifwetesha. Muhela wahanaña yawaana mpinji yejima kumudimu waWanta walumbulwili nkisu yinatambwiliyi nindi: “Kuhana kunankwashi chikupu kumona yuma yayiwahi hadi yaaka yinahitihu. Kukwasha antu namaheta kunankwashi kwikala nawamabwambu amavulu. Kunankwashi kwikala namuchima wakwanakena, kudiwunjika, kubula kuneña neyi anañili chatama nikutambwila kufumba.” w17.07 9 ¶9-10

Hela chakwila Yoba nkumininaku welukili chaletesheli yakabakani, hadaha mpinji yikwawu watoñojokeleña chakojejeli yakabakani nankashi. Neyi yatoñojoka hakukala kwindi, watela wanukileña kufumba kwamufumbiliwu kudi Nzambi. Kwanuka kufumba kwamufumbiliwu kudi Nzambi kwatela kwamukwashileña kumona yuma munjila yatelela nawa wakundejeweleña. (Mas. 94:19) Nsañu yaYoba yinateli kutukwasha ninetu kumona yuma munjila yatelela nawa yinateli kutukundeja. Muloña Yehova wayisoneka iyi nsañu “kulonda etu tudiziliku, kulonda mukuumika kwetu nimukukundeja kwamuNsona, twiikali nakuchiñeja.” (Rom. 15:4) Tunateli kudizilaku chumanyi? Chatachi: Bayi tudiñija muyuma yakumujimba yikuletesha tubuli kusha maana hachuma chalema, kuhakwilaku chiyuulu chaYehova. Nawa twatela kumona netu mudimu wutukweti wakuhakwilaku chiyuulu watukwashaña kwikala ashinshika neyi tudi mukukala kweneni, neyi cheliliyi Yoba. w17.06 24 ¶9; 25 ¶13-14

Yesu welukili nindi twatela kwikala nampinji yakunooka. Hanyima yakwila anazeyi kufuma mukampeni yakushimwina wayilejeli atumbanji twindi mazu itunashimuni hewulu. Mwamweni, kunooka nikuhema kwalema nankashi. Hela chochu, kukala kudi kwakwila nawu tunateli kutachika kusha maana hakunooka. Mumafuku awapostolu, antu adiña nachaaku chakwila nawu “Tudenu nikunwa, muloña kumadiki twakafwa.” (1 Kor. 15:32) Dichaaku chidi nawantu mukaayi kejima makonu. Tunateli kwiluka ñahi netu twakisilaña mpinji yeneni wanyi kukuhema? Tunateli kuchinda maora itwazatishaña mumulungu kuyuma yakuspiritu. Kuhiñahu tukwesekeja maora itunazatishi kukuhema chidi neyi kuhema ngunja, kutamba TV niyisela yahavidiyo.—Efwes. 5:15, 16. w17.05 24-25 ¶11-13

Muchakutalilahu chaYesu chamukwakulanda nakulandulula wawanini mperola. Hakwila nawu yayilandi watela kulandisha yuma yejima yikwetiyi. Toñojokenu iwu iyala chalemesheliyi iyi mperola. Wanta waNzambi wudi neyi mperola yasweja wuseya. Neyi tukuwukeña chikupu neyi chakeñeliyi mperola ona mukwakulanda nakulandulula, tukuleka kwila yuma yejima kulonda twikali amuniwu Wanta. (Maku 10:28-30) Chakutalilahu, Zakewu wadiña mukwakutambula nyisonku waheteli kuhitila mukutambula antu mali. (Luka 19:1-9) Hela chochu, iwu iyala wabula kuloña chatiyiliyi Yesu nakushimwina nsañu yaWanta, welukili kulema kwayuma yatiyiliyi nawa wabalumukili hohenohu. Wahosheli nindi: “Mwanta, talaña! Chibalu chayuma yami, inakwinka atuzweñi, nawa yuma yejima yinatambwili kudi muntu wejima munjila yawupwapoki, nukumushilahu yikwawu yiwana.” Wahanini maheta indi aheteliyi munjila yatama nawa walekeli kufwila maheta munjila yatama. w17.06 10 ¶3-5

Antu akutondawu kudi anvwali kukwasha anyanawu atela kuyidizisha anyana kwikala nakavumbi kudi anvwali jawu nikubula kusupisha anvwali, ilaña bayi azata mudimu wejima watela kuzatawu anvwaliku. Kubombelahu, ana anakukwasha atela kwikala nayilwilu yayiwahi, bayi yikuletesha antu muchipompelu hela akunji atachiki kujinokaku. (1 Pet. 2:12) Anvwali bayi alekela antu acheñi kuyidizishila anyanawu chalalaku. Atela kwiluka yuma yinakuyidizishilawu kudi amakwawu nawa atela kutwalekahu kuyidizisha anyanawu awenawu. Enu anvwali, lombenu kudi Yehova kulonda yayikwashi nawa zatenu hakumina ñovu jenu. (2 Kushi. 15:7) Kwashenu mwanenu kwikala nawubwambu wawuwahi naYehova kubadika yuma yidi yejima. Zatenu nañovu kulonda Izu daNzambi dimushiki mwanenu hamuchima. Kuhwelelenu nenu mwanenu nateli kwikala kambuña aYehova wamuwahi. w17.05 12 ¶19-20

Fwikijenu iyala anamusompeshi nawu anakumujaha. Antaña nimabwambu jindi anahayami, muloña antu amukunkulwayi anahani wunsahu wakutwamba wunaleteshi amujahi. Antu amakwawu anatiyi kutama hakumona antu akadi muloña anakukeña kuyijaha. Bayi neyi iyi nsañu yakulumbisha hohuku. Ichi chuma dichamumwekeneni kambuña aYehova washinshika Naboti, wadiñaku hampinji yayuulileñayi Mwanta Ahabi muIsarela. (1 Anya. 21:11-13; 2 Anya. 9:26) Naboti wakaanini kulandisha itempa dindi danyivinyu kudi Mwanta Ahabi hela kwiteja kumwinkelamu itempa dacheñi. Muloñadi? Wahosheli mumesu awunda nindi: “Chinjila kumesu aYehova ami kukwinka wuswana wawankakulula jami.” Naboti wakaanini muloña Yehova wenkeli muza wawaIsarela lushimbi lwakaanishileña kulandisha wuswana wamuchidi. (Lev. 25:23; Kuch. 36:7) Iyi nsañu yinamwekeshi chikupu nawu Naboti wamweneña yuma neyi chayimonañayi Yehova. w17.04 23 ¶1; 24 ¶4

Anyi akasinsa hadi antu atama neyi anayifumishihu? Yehova watushiika nindi: “Akwakudizoza akaswana ituña, akatiya kuwaha nankashi nakushakama chachiwahi chamwena.” Isamu dodimu dahosha cheñi nadu: “Akwakuloña akaswana ituña, akashakamamu haya nyaka.” (Mas. 37:11, 29) “Akwakudizoza” ‘niakwakuloña’ hiyanyi? Akwakudizoza hiyantu atiyililaña mwayilejañayi Yehova nikwiteja wunlomboli windi: akwakuloña hiyantu elaña yuma yaloña kumesu aYehova Nzambi. Makonu, antu atama diwu amavulu kubadika antu aloña mukaayi. Ilaña mwituña dadiha dinakwinza, hikwakekala nawu akwakudizoza niakwakuloña antesha hela amavuluku, ilaña diwu akekala hohu hamaseki. Mwamweni, antu amuchidiwu diwu akelisha iseki kwikala paradisa! w17.04 10-11 ¶5-6

“Kukeña kwaNzambi” kwatusañumunaña kudikeña wumu namukwawu, sweje-e mumpinji yakala. (1 Yow. 3:17, 18) Chelili nzala yakapwelendedi yiholokeli akwaKristu aYudeya amumafuku awapostolu, chipompelu chayikwashili. (Yil. 11:28, 29) Kapostolu Pawulu naPetulu niwena akolesheli akwaKristu kwikala nachisambu. (Rom. 12:13; 1 Pet. 4:9) Neyi akwaKristu akamenaña chiwahi amanakwawu ayendelaña, atela kukwasha amanakwawu adi mukukala hela anakabishiwu muloña wachikuhwelelu chawu. Katataka, aYinsahu jaYehova amavulu atemuka ndombu nimakabisha muUkraine. Chawushona, amakwawu ayijahili. Ilaña amavulu ayisendeli kudi amanakwawu akuspiritu momuUkraine nawa amakwawu ayisendeli kudi akwawu aYinsahu muRussia. Mumatuña ejima ayedi, atwalekelihu kubula kudiñija munsañu jamatuña nachiyuulu dikwila nawu kubula kwikala “ampata yamunu mwishina” nikutwalekahu “kushimwina mazu ansañu yayiwahi.”—Yow. 15:19; Yil. 8:4. w17.05 4 ¶6-7