Tondenu Yisela Yamutiyishaña Yehova Kuwaha

Yehova “[hiNzambi] wamuzañalu.” (1 Timotewu 1:11) Nakukeña nindi twiikali namuzañalu muchihandilu. Watiyaña kuwaha neyi twikalaña nampinji yakunooka. Mukunu kudiza, tukumona chitunateli kuzatisha mpinji yetu yakunooka munjila yayiwahi nawa yakuzañalesha. Chumichi chamutiyishaña niYehova kuwaha.

1. Yumanyi yitwatela kwanuka neyi tunakutonda yisela?

Yumanyi yimwelaña neyi munakunooka? Amakwawu akeña kuzatisha mpinji yawu yakunooka kushakama hetala nakutaña nyikanda, kutiyilila kutumina, kutala nyivwimbimbi hela kusandujola haIntaneti. Amakwawu niwena akeña kuya nakuhema nawamabwambu jawu chidi neyi kuya nakwendujola, nakuwela kuyiwelelu hela kuhema yisela. Hichikweti muloña nayisela yitwatondañaku, ilaña yisela yejima yitukutonda yatela kwikala “yetejañayi Mwanta.” (AEfwesesa 5:10) Twatela kwiluka ichi chikuma muloña muyisela yayivulu mwekala yuma yahelayi Yehova yidi neyi, madombu, wuvumbi nikupesha. (Tañenu Masamu 11:5.) Yumanyi yinateli kutukwasha kutonda chiwahi yisela?

Neyi tutonda amabwambu amukeña Yehova, anateli kutukwasha kutonda chiwahi yisela. Neyi chitwadizili mukudiza kunafumihu, “muntu wunakwenda nawakamaana wakekala namaana.” Ilaña neyi tunakudikunda nankashi nawantu abula kukeña nshimbi jaNzambi, “[twakamona] kukala.”—Yishimu 13:20.

2. Muloñadi chitwatela kwilukila mpinji yitwazatishaña kuyisela?

Hela chakwila yisela yitwatalaña yayiwahi, twatela kwikala asoñama kulonda tubuleña kumanishila mpinji yeneni kuyisela. Neyi nehi, tukukañanyaña kwikala nampinji yeneni yakwililamu yuma yalema. Bayibolu yatukwashaña “[kuzatisha] chiwahi mpinji [yetu].”—Tañenu AEfwesesa 5:15, 16.

SANDUJOLENU CHIKUPU

Ilukenu chimunateli kufuukulahu chiwahi hakutonda yisela.

3. Tondolwelenuña yisela yatama

Muloñadi chitwatela kutondela yisela yetu chiwahi? Vumishenu VIDIYO, kuhiñahu hanjekenu hamalwihu analondelihu.

VIDIYO: Yiselanyi Yinatela Kutonda? (4:39)

• Yisela yakunyima yakuzatisha yitwa yinadifwani ñahi nayamakonu?

• Muniyi vidiyo, yumanyi yadizayi Danny kutalisha hayisela?

Tañenu ARoma 12:9, kuhiñahu hanjekenu hanilu lwihu:

• Iyi vasi yinateli kuyikwasha ñahi kwiluka chakutonda yisela?

Yumanyi yikwawu yahelayi Yehova? Tañenu Yishimu 6:16, 17 niAÑalija 5:19-21. Chimwamanisha kutaña nsona-hinsona, muhanjeki hanilu lwihu:

• Hayuma yinashimuniwu munawa mavasi, yisela yamuchidinyi yinavuli makonu?

Chimunateli kutonda chiwahi yisela

Dihulenu nenu:

• Yumanyi? Komana munabombeli yuma yamuneñeshaña Yehova?

• Mpinjinyi? Komana yandiilaña mpinji yeneni yakwililamu yuma yalema?

• Anyi? Komana yanleteshaña kudikunda nawantu abula kumukeña Yehova?

Tunateli kwikala akiñewa neyi tubula kudiñija muyuma yatama. Dichitwabulilaña kudiñija muyisela yituneluki netu yayiwahi wanyi

4. Zatishenuña mpinji yenu chiwahi

VIDIYO: Yumanyi Yayidiilaña Mpinji? (2:45)

• Hela chakwila iwu manakwetu wadiña muvidiyo watala wanyi yisela yatama, wazatishaña ñahi chatama mpinji yindi yakunooka?

Tañenu AFwilipi 1:10, kuhiñahu hanjekenu hanilu lwihu:

• Iyi vasi yinateli kutukwasha ñahi kufuukula chiwahi mpinji yitwatela kumanishila kuyisela?

5. Tondenuña yisela yayiwahi

Hela chakwila yisela yikwawu yamuneñeshaña Yehova, ilaña kudi yikwawu yabulaña kumuneñesha. Tañenu Mukwakutañisha 8:15 niAFwilipi 4:8, kuhiñahu hanjekenu hanilu lwihu:

• Yiselanyi yayiwahi yimwakeña?

YUMA YIMUNADIZI

Yehova nakukeña nindi tutondeña nikudiluñisha yisela yayiwahi.

Kuhitulukamu

• Yisela yamuchidinyi yatela kutondolwelawu akaKristu?

• Muloñadi chitwatela kwikalila asoñama nampinji yitwamanishilaña kuyisela?

• Muloñadi chimunakukeñela kutonda yisela yamutiyishaña Yehova kuwaha?

ILUKILENUHU NSAÑU YIKWAWU

Ilukenu watela kuyitondela yisela.

“Komana aYinsahu jaYehova Akaanisha maVidiyo Amu, Nyikanda hela Tumina?” (Chibaaba chahaIntaneti)

Talenu chimunateli kufuukula chiwahi yuma yakuzañalesha niyuma yakwila hampinji yakunooka.

“Komana Yuma Yimwelaña haMpinji Yakunooka Yayiheteshaña?” (Kaposhi Kakutalila, October 15, 2011)

Muchibaaba chinakwila nawu “Nalekeli Chaambu,” talenu iyala wumu chahimpiliyi yisela yakeñeliyi.

“Bayibolu Yahimpaña Yihandilu Yawantu” (Kaposhi Kakutalila, February 1, 2010)

Talenu mama yawantu chinakufuukulayi chiwahi kutalisha hayisela munabombeli yuma yamukaayi.

Tondolwelenuña Yisela Munabombeli Kupesha (2:02)