January

Ambuña aNzambi ashinshika ejima anakukeña kudiza chinateliwu ‘kuzata chikupu’ mudimu wayinkawu kuzata. (2 Tim. 4:5) Iwu mudimu walema nankashi, nawa wunakukeñeka kuzatilahu swayi kubadika nyidimu yejima yamuchihandilu. Hela chochu, chinateli kwikala chakala kuzata mpinji yeneni kwesekeja nachitunakukeña. Nyidimu yikwawu yalema yakeñekaña kuzatisha mpinji niñovu jetu. Chakeñekaña kuzata maora amavulu hefuku kumudimu kulonda twikali namali akudikwasha nachu nikukwasha chisaka chetu. Chinateli kutukalila kuzata nyidimu yakwakamena chisaka chetu, indi kwiji twakata hela tunakuneña muloña wakukala kwenzaña muwushinakaji. Neyi kukala kutunakumona kunakutukañesha kuzata kwesekeja nahakumina ñovu jetu munyidimu yaYehova, bayi tuzeyaku. Yesu welukili nindi bayi neyi ejima anateli kuzata chochimu mumudimu waWantaku. (Mat. 13:23) Yehova walemesha nyidimu yejima yitwazataña mumudimu windi, chakala tunakuzata hanakumini ñovu jetu.—Heb. 6:10-12. w19.04 2 ¶1-3

Makudi aSatana amwekeshaña nawu Yehova watama. Awa makudi munabombeli ntañishilu yakwila nawu afu ayikabishilaña mukesi. Ntañishilu yamuchidiwu yatamishaña ijina daNzambi. Munjilanyi? Iyi ntañishilu yinaleteshi antu kukuhwelela nawu Nzambi wakukeña watama neyi Diyabolu. (1 Yow. 4:8) Mwatiyaña ñahi? Sweje-e dinu, Yehova watiyaña ñahi nanawa makudi? Sweje-e dinu, yena wahela yuma yejima yatama. (Yere. 19:5) Makudi aSatana kutalisha hansañu yawafu analeñeli antu kubula kukuhwelela mwifutu danyiloña daKristu. (Mat. 20:28) Makudi amakwawu aSatana adi akwila nawu wumi wamuntu wafwaña wanyi. Neyi dimu, kachi antu ejima ahandaña haya nyaaka. Kristu hadi kuhana wumi windi kwikala ifutu detu danyiloña kulonda tukekali nawumi wahaya nyaakaku. Mwatela kwiluka nenu mulambu waKristu hinjila yimu yabadika mwayimwekesheleliwu antu kukeña. (Yow. 3:16; 15:13) Fwikijenu chatiyañayi Yehova niYesu hantañishilu yaleñelaña antu kutoñojoka nawu ichi chawana chalema wanyi. w19.04 14 ¶1; 16 ¶8-9

Yuma yatañishileñayi Yesu ayisoneka kudihi? Nyikanda yaNsañu Yayiwahi yiwana asonekamu yuma yahosheliyi Yesu niyeliliyi hadiñayi hamaseki. Nyikanda yikwawu yaNsona jawakwaKristu jachiGriki yatukwashaña kwiluka cheñi chekala yitoñojoka yaYesu hayuma yikwawu, muloña antu ayisonekeli ayoneneni kudi spiritu yajila nawa adiña “nayitoñojoka yaKristu.” Ntañishilu yaYesu yatukwashaña muchihandilu chetu chejima. Dichi “lushimbi lwaKristu” lwakundama kuyuma yejima yitwelaña, kumatala, kumudimu hela kushikola nimuchipompelu. (Ñal. 6:2) Twadizaña lwenilu lushimbi neyi tutañaña Nsona jawakwaKristu jachiGriki nikutoñojokahu chikupu. Twovwahilaña ilu lushimbi neyi tunakwovwahila kufumba, nshimbi niyishina yekala muniyi nsañu yonenawu. Neyi twovwahila lushimbi lwaKristu, tunakumwovwahila Nzambi yetu wukweti kukeña Yehova, Mwini yuma yejima yatañishileñayi Yesu.—Yow. 8:28. w19.05 3 ¶6-7

Chawushona antu anakwila yuma yamutiyishaña Diyabolu kuwaha. Hela chochu, Yehova weluka yuma yejima yelañayi Satana. Twatela kwiluka chikupu netu Yehova weluka chitwakabakanaña nawa netu nateli kutukundeja. Twakalakelaña “Nzambi wakukundeja kwejima, yena watukundejaña mukweseka kwejima kutwamonaña, kulonda ninetu tutweshi kukundeja antu amakwawu mukweseka kwejima kwamonañawu kuhitila mukuyikundeja nakukundeja kutwatambwilaña kudi Nzambi.” (2 Kor. 1:3, 4) Antu ashiliwu chisayikila kudi anvwali jawu hela akaaminiwu chakukanjikija kudi antu adikundiliwu nawu akeñekaña kuyikundeja. Ñimbi yamasamu Davidi welukili nindi twatela kumukuhwelela Yehova netu nateli kutukundeja. (Mas. 27:10) Davidi wakuhweleleli nindi Yehova wekalaña Tata yanana antu ashiyañawu kudi antaña jawu. Yehova welaña ñahi mwenimu? Wazatishaña ambuña indi ashinshika. Akwetu itwadifukulaña nawu kudi Yehova diwu antaña jetu. Chakutalilahu, Yesu wateneni antu enjili nakudifukula kudi Yehova nindi amanakwindi niahelindi nawa amama yindi.—Mat. 12:48-50. w19.05 15-16 ¶8-9

Yumanyi yitwatela kusambila kudiza? Twatela kwikalaña nampinji yakudiza Izu daNzambi mafuku ejima. Mavasi amuBayibolu itwadizaña hakupompa kwamumulungu ayikehesha kulonda twikaleña nampinji yakutoñojoka chikupu hansañu yitunakutaña nikusandujola. Chikonkwanyi chetu chatela kwikala chakudiza nakwiteja mazu ashikeña hamuchima kulonda tukundameña kwakwihi naYehova, bayi neyi kukumina dakufwila kutañaña nakumanisha hohuku. (Mas. 19:14) Kaposhi Kakutalila Kakudiza katukwashaña kutiyishisha nsañu yamuBayibolu. Shenuñaku muchima chikupu kujinsona, sweje-e jakutaña neyi munakudiza chibaaba muchipompelu. Shenuñaku muchima chikupu kulonda mumoneña mazu hela nyikuku yidi muvasi chiyinakulumbulula yikuma yidi muparagilafu. Cheñi, ikalenuña nampinji yakutoñojoka chikupu hajinsona jimunatañi nichimunateli kujizatisha muchihandilu chenu.—Yosh. 1:8. w19.05 27 ¶5; 28 ¶9

Yesu walemesheli nankashi mudimu wakushimwina. Chuma chadiñi chalema muchihandilu chindi hikushimwina haWanta waNzambi. Wendeleña maluña amalehi kulonda ashimwini antu amavulu. Wakeñeleña njila yejima yakuhanjekelamu nawantu kumaluña kwawanikaña antu amavulu nikumatala awu. Yesu watwamijiliku mudimu wakushimwina muchihandilu chindi. Tunateli kumwimbujola Kristu kuhitila mukwikalaku nampinji yakushimwina nsañu yayiwahi kudi kwejima nawa mpinji yejima. Twalekaña yuma yakuditiyisha nachu etu aweni kuwaha kulonda tuzateña mudimu wakushimwina. (Maku 6:31-34; 1 Pet. 2:21) Amakwawu muchipompelu hiyapayiniya adimena, ampinji yejima hela akukwasha. Amakwawu anadizi madimi acheñi amakwawu nawa anakuzatila kumaluña kudi kukankila. Ilaña, mudimu weneni wakushimwina awuzataña kudi akwakushimwina, azataña hakumina ñovu jawu. Hela chochu, Yehova hatulombaña chuma chitukubula kutwesha kumwinkaku. w19.04 4 ¶7-8

Dihulenu nenu: ‘Komana mumuchima wami mudi lwisu hela ichima?’ (1 Pet. 2:1) ‘Komana naditiyaña muloña weluña kunafuma, shikola yinataña hela mali inikweti?’ (Yish. 16:5) ‘Komana nadiwulaña antu amakwawu abula yuma yinikweti hela muloña wakwambuka kwekowa?’ (Yak. 2:2-4) Komana nakeña yuma yekala mukaayi kaSatana? (1 Yow. 2:15-17) ‘Komana nadiluñishaña yilwilu yatama niyisela yamadombu?’ (Mas. 97:10; 101:3; Amosa 5:15) Neyi mwakula awa malwihu, mukwiluka himwatela kuzatila. Anateli kutuluwañesha kudi antu itwadikundaña nawu. (Yish. 13:20) Kumudimu hela kushikola, twadikundaña nawantu anateli kubula kutukwasha kwikala nayitoñojoka yaNzambi. Hela chochu, tunateli kwikala nawamabwambu amawahi hakupompa kwetu kwawakwaKristu. Kukupompa dikutunateli kwikala namuzañalu hela kutusañumuna “kukeña nikukoña nyidimu yayiwahi.”—Heb. 10:24, 25, tth. w19.06 12 ¶13-14

Yehova hakeñeleña nindi tuhiteña mukukala nikwikala nachineñi chitukweti makonuku. Dichi neyi kambuña aNzambi washinshika yahosha nachikela muloña wakuneña twatela kwiluka netu nahosheli muloña wamakabi. (Yoba 6:2, 3) Hela yahosha yuma yatama hadi Yehova hela hadi etu, bayi tunyakala kuhila namazu anahoshiyi hela kumusompeshaku. Mpinji yikwawu, muntu wunakuhita mukukala wakeñekaña kumufumba hela kumwolola. (Ñal. 6:1) Indi akulumpi anateli kwila ñahi mwenimu? Atela kumwimbujola Elihu wamutiyilileña Yoba wushona. (Yoba 33:6, 7) Elihu wamufumbili Yoba hanyima yakwila natiyilili dehi yuma yatoñojokeleñayi. Akulumpi amwimbujolaña Elihu, atiyililaña nakanañachima nikutiya chidi kukala kwamuntu. Nkumininaku, neyi anakufumbana, afwilaña kushika muntu hamuchima. w19.06 22-23 ¶10-11

Munateli kutwalekahu ñahi kudifukula kudi Yehova mpinji yinayilekeshiwu? Kasanji kamutayi kakayileja akulumpi nshimbi nijinjila jakutambwilamu yakuda yakuspiritu, chakupompa nichakushimwina nsañu yayiwahi. Neyi kasanji kamutayi kanahanjeki wanyi nawakulumpi, dichi akulumpi akayikwasha wejima wenu muchipompelu kutwalekahu kudifukula kudi Yehova. Akayileja chakwila kwesekeja nakufumba kwekala muBayibolu nimunyikanda yetu yawakwaKristu. (Mat. 28:19, 20; Heb. 10:24, 25) Yehova washiika nindi ambuñindi akayidiishaña chiwahi yakuda yakuspiritu. (Isa. 65:13, 14; Luka 12:42-44) Dichi mwatela kukuhwelela nenu kuloñesha kwindi kwakazata nañovu yejima kulonda akayinki yakuda yakuspiritu. Yumanyi yimwatela kwila? Neyi anayilekeshi, monenu iluña dadiwahi kumwatela kusweka Bayibolu ninyikanda yimukweti. Ikalenu asoñama, bayi mushiya nyikanda hela yozelu hatookaku. Wejima wetu twatela kuzata nañovu kulonda tukoleshi chikuhwelelu chetu. w19.07 10 ¶10-11

Hadi yaaka yayivulu yinahitihu, antu amavulu mukaayi adiña akundama kunsakililu. Ilaña hadi yaaka yinahitihu yuma yinahimpiki. Antu amavulu adana nsakililu kwakundamawu. Mumatuña amakwawu antu ahoshaña nawu adana nsakililu kwakundamawu. (Mat. 24:12) Muloñadi? Amakwawu ashaña maana hayuma yachiseki hela hakukala kukwetiwu. (Luka 8:14) Amakwawu adiña mujinsakililu ichi ahoshaña nawu kwekala Nzambi wanyi. Amakwawu amukuhwelela Nzambi ilaña atoñojokaña nawu nsakililu hiyuma yakunyaka, hichuma chamukunkulwayi nawa nawu yaditejaña wanyi najasayansi. Anateli kuyiluwañesha kudi akwawu, antañishi hela hayisanji hahoshañawu nawu wumi wadileñeli waweni, ilaña kwosi wunsahu watiyañawu wukuletesha akuhweleli mudi Nzambi. Amakwawu ayineñeshaña kudi akulumpi jamachechi afwa hamali niyifulu. Kumaluña amakwawu, nfulumendi yashaku nshimbi yakañeshaña jinsakililu. w19.07 20 ¶1-2

Himwakeñekaña ñovu hakwila nawu mumukalakeli Yehova nikwikala neyena mumudimu windiku. Dichi, antu amavulu azeya dehi kumujimba anatwalekihu kumukalakela Yehova kwesekeja nahakumina ñovu jawu. (2 Kor. 4:16) Hadaha munamukalakeli Yehova hadi yaaka yayivulu nawa chayinu mpinji munakukañanya kumukalakela neyi chimwelileña kunyima muloña wakukatakata. Neyi dimu, bayi muzeyaku. Ilukenu chikupu nenu Yehova wanukaña nyidimu yimwamukalakeleli nakashinshi kunyima. (Heb. 6:10) Nawa mwatela kwiluka nenu, bayi neyi kumukalakela Yehova nañovu dichuma chikumwekesha nawu twamukeñaku. Ilaña twamwekeshaña netu twamukeña Yehova neyi twikala nayilwilu yayiwahi nikuzata hanakumini ñovu jetu. (Kol. 3:23) Yehova weluka kuzeyazeya kwetu nawa hakeñaña nindi twili yuma yitukukañanyaku.—Maku 12:43, 44. w19.08 3 ¶6; 5 ¶11-12

Yehova wakokolaña antu kuhitila ‘munyidimu yayiwahi’ yamuchipompelu chawakwaKristu. (Mat. 5:14, 15; 1 Pet. 2:12) Neyi ñodenu hela nfumwenu hiChinsahu chaYehova wanyi, wahanjekahu dehi nawantu amuchipompelu chenu? Tambikenu mwinikwenu kulonda yenzeña nakupompa hamu nanetu. (1 Kor. 14:24, 25) Twakuhwelela chikupu netu antaña jetu ejima akatachika niwena kumukalakela Yehova. Hela chakwila, tukuzata nañovu jejima netu tukwashi antaña jetu ekali ambuña aNzambi, hadaha hiyanateli kwinza muchalalaku. Muniyi njila, hitwatela kudinka muloña hakufuukula kwawuku. Hitunateli kukanjikija muntu wudi wejima kwiteja yuma yitwakuhwelelaku. Hela chochu, neyi antaña jenu amona muzañalu wumukweti hakumukalakela Yehova, niwena anateli kwikala nampwila. Yilombelenuñaku. Hanjekenu nawu mukubabala. Bayi muleka kuyikwashaku! (Yilw. 20:20) Kuhwelelenu chikupu nenu Yehova wukuyikwasha. Nawa neyi antaña jenu atondahu kuyitiyilila, dikwila nawu akayamwina! w19.08 18-19 ¶15-17

Yesu watalishili mudihi? Watalishili mukwila nindi twatela kupeleshaku chihandilu chetu hela kusha maana hachuma chimu, hela nkeñelu, bayi kuluwankanaku. Yesu yomweni wamwekesheli chumichi kuhitila mukusha maana hamudimu wakushimwina, nawa wayidizishili atumbanji twindi kusha muchima hakumukalakela Yehova nihaWanta Windi. Twamwimbujolaña Yesu neyi tutwamijaku mudimu wakushimwina muchihandilu chetu, “kusambila kukeña Wanta [waNzambi] nikuloña kwindi.” (Mat. 6:33) Njila yimu mutunateli kushila muchima hamudimu wakushimwina hikupeleshaku chihandilu chetu kulonda tuzatisheña mpinji yeneni kukwashaku antu amakwawu amwiluki Yehova nikumukeña. Chakutalilahu, kwila tukeheshaku mpinji yitwazataña kumudimu kulonda twikaleñaku nampinji yeneni yakushimwina mumulungu nehi? Kwila tukeheshaku mpinji yakuhema yinakutumanishila mpinji nehi? w19.04 5-6 ¶12-13

Hadi yaaka yinahitihu, amanakwetu adiña mumudimu wampinji yejima amweni kuhimpika. Kuhosha hohu walala, chayikalilili nankashi awa amanakwetu niahela kuhimpa. Chakadi nikujina, amavulu akeñeli nankashi nyidimu yazatiliwu hadi yaaka yayivulu. Chelili awa amanakwetu ayihimpi, mpinji yikwawu ‘aneñeleña’ nankashi hakwila nawu enjilili nanyidimu yayinkeliwu. Chimwahitili mpinji enjilili. Muloñadi? Chuma chayikwashili hikumukeña Yehova. Elukili nawu adihana kudi Yehova bayi kumudimu wudi wejima hela kwikala nejinaku. (Kol. 3:23) Anatwalekihu kumukalakela Yehova nakudizoza mumudimu wudi wejima. ‘Amumbilaña kwakama [kwawu] kwejima,’ muloña eluka nawu wayakamenaña. (1 Pet. 5:6, 7) Neyi twikala nachilwilu chakudizoza, akwetu akuswina kwakwihi nanetu nawa mukufuma yuma yayiwahi. Chikutupelelaña kuumika kukala muchihandilu. Chuma chabadika, tukuswina kwakwihi naTata yetu wamwiwulu. w19.09 6-7 ¶15-17

Yehova wamutondeli Davidi kwikala mutu wachisaka chidi hohuku, ilaña nihadi aIsarela ejima. Chineli wadiña mwanta, Davidi wadiña nañovu chikupu. Mpinji yikwawu wazatishileña chatama ñovu yindi nawa wakoñeleña yiluwa yamaneni. (2 Sam. 11:14, 15) Wamwovwahilili Yehova kuhitila mukwiteja kufumba. Chalombeleñayi kudi Yehova, wamulejelimu chatiyileñayi. Wazatili nañovu hakwila nawu yovwahili kufumba kwaYehova. (Mas. 51:1-4) Kubombelahu, wadiña wadizoza chakwila wetejeli kufumba kwafumini kudi amayala niambanda. (1 Sam. 19:11, 12; 25:32, 33) Davidi wadizilili kuyiluwa yindi nawa washili maana hakumukalakela Yehova. Welukili chichawahila kumwovwahila Yehova. Makonu, tunakumona chaambu chidi hakachi kawantu amwovwahilaña Yehova niadiwulaña kufumba kwindi. Antu amwovwahilaña Yehova “[embaña] tumina twachiseki mumuchima.”—Isa. 65:13, 14. w19.09 17 ¶15; 19 ¶21

Mu 1935, aYinsahu jaYehova enjili nakwiluka nawu izaza deneni dakaya mwiwulu wanyi nakwimana “kumbidi yetanda nikumesu aMwana kaMukoku.” Ilaña, emanaña muchifwikija. Hela chakwila akashakamaña hamaseki, izaza deneni demanaña “kumbidi yetanda” kuhitila mukwiteja nawu Yehova diyi nyuuli wakuleña kwejima nawa nikumwekesha nawu eteja wuswa windi kuhitila mukumwovwahila. (Isa. 66:1) Akemana “kumesu aMwana kaMukoku” kuhitila mukukuhwelela mumulambu wefutu danyiloña daYesu. Munjila yoyimu, haMatewu 25:31, 32, hashimuna nawu “akwanyuza yejima,” kushilahu niantu atama “akayipompesha kumesu” aYesu kwitanda dindi dakulema. Mwalala, akwanyuza yejima hiyekala mwiwuluku, ilaña ekala heseki. Iyi ntiyishilu yahimpiliwu kunyima yalala nawa yatiyakana. Yinalumbululi muloña waweni Bayibolu chiyabulila kutena nawu izaza deneni dakaya mwiwulu. Izanvu dimu hohu dawa 144,000, didu dakanawu wumi wahaya nyaaka mwiwulu nawa diwu “akayuula neyi anyanta hamaseki hejima” naYesu.—Chim. 5:10. w19.09 28 ¶9

Yehova wakeñaña akwakudifukula indi kwambukaku naBabiloni Muneni. Hela chochu, bayi neyi twatela kuleka kuya munsakililu hohuku. Ilaña twatela cheñi kufuukulahu kudifukula kudi Yehova. Talenu njila jiyedi mutwatela kwila mwenimu. Chatachi, twatela kutwalekahu kwovwahila nshimbi jaYehova jaloña. Hitwatela kwiteja yilwilu yatama yamukaayiku. Chakutalilahu, hitwetejaña nyichidi yejima yawuvumbi, munadibombeli kudisumbula iyala neyala hela mumbanda namumbanda niyilwilu yikwawu yawutumwaku. (Mat. 19:4, 5; Rom. 1:26, 27) Chamuchiyedi, twatela kutwalekahu kudifukwila hamu nawakwetu akwaKristu. Twelaña mwenimu kala mpinji, chili Mwitala daWanta hela neyi chinatwesheki mumatala awamanakwetu hela tuhu mukuswamujoka. Hela chakwila kukamwekani chuma chamuchidinyi, hitwamba kaleka kupompaku. Hela chochu, twatela kupompelaña hamu “sweje-e dinu nanochu [chitunakumona netu] ifuku odu dinakuswina kwakwihi.”—Heb. 10:24, 25. w19.10 16 ¶6-7

Yehova wakeñaña nindi tudiluñisheña, nawa yisela yinateli kutukwasha kudiluñisha. Hela chochu, Izu daNzambi dahosha nawu “hikudi chuma chacheñi chakuwahisha muntuku, chiña yowu kudya nakunwa nakuluñisha muchima windi nanyidimu yindi yikukabakanayi.” (Mukwa. 2:24) Hela chochu, yisela yayivulu yidi mukaayi yinateli kutuluwañesha. Yinateli kuletesha antu kutachika kwiteja nikukeña yuma yakaanisha Izu daNzambi. Twatela kudifukula kudi Yehova kankawindi hohu, dichi hitwatela kuda “kumesa yaYehova nikumesa yawandemoniku.” (1 Kor. 10:21, 22) Kuda yakuda namuntu chamwekeshaña nawu hadi wubwambu. Neyi tutonda yisela munabombeli madombu, kupesha, wuvumbi hela kufwila kwamujimba niyilwilu yatama, dikwila nawu tunakuda hamu yakuda yinaloñeshiwu kudi ayilumbu jaNzambi. Yuma yikufumamu, hitukuditamisha hohu etu aweniku, ilaña tukuluwañesha cheñi niwubwambu wetu naYehova. w19.10 26 ¶2; 29-30 ¶11-12

Hakwila nawu mpepela yimukwashi mukwakwendesha mbopolu watela kwila yuma yiyedi. Chatachi, watela kuteñulwila mbopolu yindi kunakuya mpepela. Mbopolu yindi yinateli kwenda wanyi neyi yayimika kuchikumu kwakulehi nakunakuya mpepela. Chamuchiyedi, watela kutandumuna itenti swayi-swayi. Hela chakwila mpepela yinakukunka, mbopolu yindi yinateli kwenda hohu neyi mpepela yikwata mwitenti. Munjila yoyimu, tunateli kutwalekahu kumukalakela Yehova chiña hohu naspiritu yindi yajila. Hakwila nawu spiritu yajila yitukwashi, twatela kwila iyi yuma yiyedi. Chatachi, twatela kwila munakutulombola spiritu yaNzambi yajila. Chamuchiyedi, twatela ‘kutandumuna matenti etu’ kuhitila mukuzataku iyi nyidimu kwesekeja nahanakumini ñovu jetu. (Mas. 119:32) Spiritu yajila yikutwinka ñovu yakuumika kukala kwasweja nikutwalekahu kumukalakela Yehova. w19.11 9 ¶8; 10 ¶11

Hefuku dindi dakukumishaku hadiñayi muntu hamaseki, Yesu wakameneni nankashi. Katataka akabakani nikumujaha kumakasa awantu afumpaña nshimbi. Bayi neyi Yesu wadiña nakwakama muloña wakufwa kwenjileña nakumonayiku. Wamukeñeli nankashi Tata yindi nawa wakeñeleña kumuzañalesha. Yesu welukili nindi neyi atwalekahu kwikala washinshika mukukala kwayileña nakumonayi, wukuleñela antu amakwawu kuhakwilaku ijina daYehova. Yesu wakeñeli cheñi antu, nawa welukili nindi antu anateli kwikala nakuchiñeja kwakwikala nawumi wahaya nyaka neyi atwalekahu kwikala washinshika kudi Yehova kushika nikukufwa. Hela chakwila Yesu wadiña mukukala kwasweja, wadiña nakuwunda. Wadiña “nakuwunda kwaNzambi,” kuwunda kwekalaña namuntu muloña wakwikala nawubwambu wawuwahi naYehova. Iku kuwunda kwamuleñeleli Yesu kubula kwakama. (Fwi. 4:6, 7) Hakachi ketu hihakekalahu muntu wukakabakana nakukala kwomikiliyi Yesuku, ilaña ejima amulondaña Yesu akumonaña kukala. (Mat. 16:24, 25; Yow. 15:20) Kufwana Yesu, mpinji yikwawu tunateli kwakama. w19.04 8 ¶1-3

Twatela kudihula netu, ‘Komana nasakililaña hakwikala mukuloñesha kwaYehova?’ Yehova natwinki chinjikijilu chinakumwekesha nawu nakukiswila antu jindi makonu. Tukweti wunsahu wawuvulu wukuletesha tusakilileña. (1 Tes. 5:18) Tunateli kuzatila ñahi hamu nakuloñesha kunakuzatishayi Yehova? Kuhitila mukulondela yuma yitwadizaña muBayibolu, munyikanda yetu, hakupompa, hakupompa kwañinza nihakupompa kweluña. Kubombelahu, tunateli kuzatila hamu kuhitila mukuzata mudimu wakushimwina nikutañisha. (1 Kor. 15:58) Tunakukeña Yehova yeteji nyilambu yetu. Tumukalakelaña Yehova muloña tunakukeña kumutiyisha kuwaha. Dichi tutwalekenuhu kumukalakela Yehova kwesekeja nahanakumini ñovu yetu muloña twamukeña namuchima wetu wejima. Nawa tuzatenu hanakumini ñovu yetu kulonda tuzatileña hamu nakuloñesha kunakuzatishayi makonu. Neyi twila yumiyi, tukumwekesha kudi Yehova netu twalemesha kukooleka kwakwikala aYinsahu jindi. w19.11 25 ¶17-18

Yesu hatalishili mukwila nindi ninetu tukakoñaña yihayamisha neyi yenaku. Ilaña nindi akwakumulondela akashimwinaña nikutañisha mumaluña amavulu, kudi antu amavulu nikuzata mpinji yayilehi kubadika yena. Neyi mwazataña mudimu wakumujimba dihulenu nenu: ‘Komana añiluka nawu nekala wadikita chikupu? Namanishaña mudimu wami mumpinji nikuzata hakumina ñovu jami?’ Neyi mwakula nenu eña, dikwila nawu mukulumpi wenu wamudimu wukuyikuhwelela. Nawa niantu kumudimu kumwazataña akukeñaña kutiya nsañu yayiwahi. Dihulenu awa malwihu kutalisha kumudimu wakushimwina nenu: ‘Komana añiluka nawu nashimwinaña chikupu? Naloñeshaña chiwahi chakushimwina halwendu lwatachi? Nafuntilaña kudi antu anamwekeshi mpwila? Nawa komana mpinji yejima nazatishaña njila jamboka-mboka jakushimwinamu?’ Neyi mukwiteja, dikwila nawu mukwikala namuzañalu mumudimu wenu wakushimwina. w19.12 5 ¶14-15

Adisumbula anakukeña kwikala nanyana atela kuhanjeka haniyi yuma yiyedi yalema: Chatachi, mpinjinyi yikakeñawu kwikala nanyana? Chamuchiyedi, anakukeña kwikala nawanyana añahi? Mpinjinyi yayiwahi yatela kuhanjekawu adisumbula haniyi nsañu? Nawa muloñadi iyi yuma yiyedi chiyalemena? Kakavulu antu anakukeña kudisumbula atela kuhanjeka chadimu neyi chakwila akekala nanyana hela nehi. Muloñadi? Chuma chasweja kulema chidi chakwila nawu wejima wawu atela kwikala nayitoñojoka yoyimu hansañu yamuchidiwu. Cheñi, atela kwiluka neyi chakwila anadiloñeshi kwila mwenimu. Antu amakwawu neyi dihu hanadisumbuliwu ahembelelaña muhita chaaka chimu hela yiyedi hakwila ekali nanyana muloña kwikala nanyana chakeñekaña mpinji yeneni niñovu yakuyakamena. Atoñojokaña nawu neyi ahembelelaku, chikuyikwasha kwiluka chakushakama muwulu wawu nikudikunda nankashi. w19.12 23 ¶4-5

Ambuña aYehova amavulu mukaayi kejima anakuhita mukukala kwayakamishaña nikuyineñesha. AkwaKristu amakwawu anakuyekela nayikatu nawa amakwawu anakuneña muloña wakufwisha antaña jawu. Amakwawu anakuneña nankashi muloña wantaña yawu hela ibwambu dawu wunaleki kumukalakela Yehova. Hela chochu, amakwawu anakukabakana muloña wawubanji wadimwekenaña. Awa amanakwetu niahela ejima anakukeña kuyikundeja. Tunateli kuyikundeja ñahi? Ikalenu amabwambu ashinshika. Amabwambu ashinshika adihanaña kulonda akwashi amanakwawu niahela. Chakutalilahu, manakwetu Peter amulejeli kudi ndotolu nawu wadiña nachikatu chafwana. Ñodindi Kathryn wahosheli nindi: “Atutwalili kuchipateli kutwelukilili chikatu chaPeter kudi manakwetu nimuhela adisumbula. Haniyi mpinji afuukwilihu nawu akutukwasha muniku kukala nawa atukwashileña mpinji yejima yitwakeñeleña wukwashu.” Chatukundejaña chikupu kwikala nawamabwambu anateli kutukwasha kuumika kukala kutukweti. w20.01 8 ¶1; 9 ¶5; 10 ¶6

Neyi ninenu mwadiña hakachi kanana atumbanji adiña mukapeka kahewulu haPentekosta, 33 C.E., himwadi kujinoka nenu anayiwayishi naspiritu yajilaku. (Yilw. 2:5-12) Komana antu ejima awayishañawu naspiritu yajila ayiwayishaña muchihayamisha nawa hampinji yoyimu? Inehi. Tuhanjekenu mpinji yinateli kumuwayishawu muntu. Bayi neyi izanvu dawakwaKristu akushika ku 120 diwu awayishiliwu naspiritu yajila hanidi ifuku hohuku. Ilaña hadodina ifuku, antu akushika ku 3,000 niwena atambwilili spiritu yajila yayikaniniwu. Ayiwayishili hampinji yayipapatishiliwu. (Yilw. 2:37, 38, 41) Ilaña yaaka yahiñilihu, akwaKristu awayishewa ejima hiyayiwayishili hefuku dakuyipapatishaku. A Samariya ayiwayishili hanyima yakupapatishewa. (Yilw. 8:14-17) Kwambukaku, Konelisu niantu amwitala dindi wena ayiwayishili henohu kanda apapatishewi.—Yilw. 10:44-48. w20.01 20-21 ¶2-4

Munyikanda yaNsañu Yayiwahi yiwana, Yesu wamuteneni Yehova nindi “Tata” kapampa 165. Muloñadi Yesu chahosheleleñayi kakavulu hadi Yehova? Chuma chimu chaletesheli chidi chakwila nawu wakeñeleña nindi antu amwiluki Yehova nawu hiTata yetu wukweti kukeña. (Yow. 17:25) Shinshikenu yuma yitwadizilaña kudi Yehova kwesekeja nachelileñayi hadi Mwanindi, Yesu. Yehova watiyileña kulomba kwaYesu mpinji yejima. Watiyileña kulomba kwindi nawa wamwakwileña. (Yow. 11:41, 42) Hela chakwila Yesu wahitili mukukala kwamboka-mboka, welukileña nindi Tata yindi wadiña wamukeña nawa nindi wamukwashileña. (Luka 22:42, 43) Chineli hiTata wukweti kukeña, Yehova wamukwashileña Yesu kwiluka nindi wadiña nakumwakamena. (Mat. 26:53; Yow. 8:16) Hela chakwila Yehova hamukiñili Yesu kuyuma yejima yadi kumukatishaku, Wamukwashili kuumika kweseka kwejima. Yesu welukili chikupu nindi kukala kwejima kwamweniyi kwadiña kwakapinji kantesha hohu. (Heb. 12:2) Yehova wamwekesheli nindi wamwakameneni Yesu kuhitila mukumutiyilila, mukumwinka yuma yejima, kumudizisha nikumukwasha.—Yow. 5:20; 8:28. w20.02 3 ¶6-7, 9

Neyi tunakufuukulahu kudiñija hela kubula kudiñija mutushidikilu hela muchisemwa, twatela kusambila kutoñojokahu neyi chakwila yuma yitukufuukula yinateli kuneñesha yinleji yawakwetu, sweje-e akwetu akwaKristu. Twakeñaña wanyi kudimbwisha antu amakwawu. (Maku 9:42) Cheñi, hitwakeñaña kuneñesha antu abula kwikala aYinsahuku. Kukeña kunateli kutuleñela kuhanjeka nawu munjila yayiwahi, yaletaña kalemesha kudi Yehova. Hitwakeñaña kubobola nawantu hela kusekesha chisemwa chawuku. Anukenu nenu, kukeña kukweti ñovu. Neyi tumwekesha kukeña munjila yatelela nawa yakalemesha, tukuwundisha nyichima yawantu atudimbululaña. Lekenu antu ejima muchituñilu chenu eluki nawu mudi aYinsahu jaYehova. (Isa. 43:10) Neyi muyilumbulwila chadimu antaña jenu niantuñi nenu yuma yimwakuhwelela kutalisha hachisemwa, chikuyipelelaku kumanisha kukala neyi muntu hela ntaña yenu nafwi. Bayi tutiyaña nsonyi yakuhakwilaku chalala kutalisha hadi afuku.—Rom. 1:16. w19.04 17-18 ¶14-16

Apostolu 12 adiña nakuzatila hamu naYesu mpinji yadiñayi hamaseki, ilaña kapostolu Pawulu wekalili mukwaKristu hanyima yakumusañula Yesu. Hela chakwila amutondeli kwikala “kapostolu wawantu akunyuza,” Pawulu wadiña hakachi kawapostolu 12 wanyi. (Rom. 11:13; Yilw. 1:21-26) Chatela Pawulu yatiyili ichima ana amayala 12 muloña wawubwambu wadiñawu nawu naYesu, watwalekelihu kuzañalala namudimu windi. Neyi twazañalalaña nayuma yitukweti nawa twadizoza, tukwikala neyi Pawulu nawa tukulemeshaña antu enkawu wuswa kudi Yehova. (Yilw. 21:20-26) Wayinka amayala atondawu mudimu wakulombola muchipompelu chawakwaKristu. Hela chakwila awanina wanyi, Yehova wayimonaña nindi ‘hiyawaana.’ (Efwe. 4:8, 11) Neyi tulemeshaña awa amayala atondewa nikwila yuma yinakutulejawu, tukuswina kwakwihi naYehova nawa tukwikala mukuwunda nawakwetu akwaKristu. w20.02 17 ¶13-14

Hampinji yimwadiña kanda mutachiki kudiza nawaYinsahu jaYehova mwadiña mwalemesha Bayibolu. Nawa mwadiña mwamukeña Yesu. Ichi dinu chimunadiluki dehi nawaYinsahu jaYehova, hadaha munakudikunda nawu. Ilaña bayi neyi kukeña iyi yuma kukuyileñela mudihani kudi Yehova nakupapatishewaku. Chuma chacheni chinateli kuyiletesha kupapatishewa hikumukeña Yehova Nzambi. Neyi musweja kumukeña Yehova kubadika yuma yejima, himukwiteja chuma chidi chejima hela muntu kuyikañesha kumukalakela Yehovaku. Kumukeña Yehova kukuyisañumuna kupapatishewa nawa kukuyikwasha kutwalekahu kwikala ashinshika kudi yena nihanyima yakupapatishewa. Yesu wahosheli nindi twatela kumukeña Yehova namuchima wetu wejima, nawumi wetu wejima, nayitoñojoka yetu yejima niñovu jetu jejima. (Maku 12:30) Munateli kumukeña ñahi Yehova nikumulemesha chikupu? Kutoñojoka hakukeña kwatukeñayi Yehova, kukutuletesha ninetu kumukeña. w20.03 4 ¶4-5

Kuzata chikupu mumudimu wakushimwina chatalisha mudihi? Kazata chikupu mudimu wakushimwina kwatalisha mukwila nawu twatela kushimwina nikudizisha hakumina ñovu jetu. Hikwatalisha hohu hampinji yitunateli kushimwinaku. Chuma chalema kudi Yehova himuloña waweni wutwashimwinaña. Twazataña namuchima wetu wejima mumudimu wakushimwina muloña wakumukeña Yehova niakwetu antu. (Maku 12:30, 31; Kol. 3:23) Kumukalakela Nzambi namuchima wetu wejima kwatalisha mukudihana etu aweni kuzatisha ñovu jetu nikuzata hakumina wuswa wetu mumudimu wakushimwina. Neyi twiluka netu kushimwina hikukooleka, tukuzataña chikupu hakumina ñovu jetu kushimwina nsañu yayiwahi kudi antu ejima. Hitukutwesha kwikala nampinji yakushimwina kwesekeja nachimunakufwilaku. Hela chochu, diyi mudimu imwakeña. Mwafwilaña kuwahishaku ntañishilu yenu kulonda muyishikeña antu hanyichima nansañu yayiwahi. Twatwamijañaku mudimu wakushimwina. w19.04 2 ¶3; 3 ¶4, 6

Makudi aSatana analeteshi antu kuswejelaku kuneña nikukabakana. Anvwali anafwishi mwana anateli kuyileja nawu Nzambi diyi wunamutambuli mwanawu, hadaha nawu kulonda yekali kañelu mwiwulu. Awa makudi aSatana aleteshaña anvwali kusweja kuneñelaku. Ntañishilu yakesi kahelu niyena ayizatishaña nawu hinjila yakubabeshelamu muntu, kushilahu nikwochela hanyitondu antu ejima adikañaña nantañishilu yamuchechi. Kwesekeja namukanda waSpanish Inquisition, awa antu ocheleleña akwawu hanyitondu akuhweleleli nawu antu akaanineña ntañishilu yamuchechi ayocheleña kulonda “atiyi chichatiyakanaña neyi adi mukesi kahelu” kulonda abalumuki mumuchima henohu kanda afwi nawa akabuli kukabakana muhelu neyi anafwi. Mumatuña amavulu, antu akuhwelela nawu atela kudifukula kudi ankakulula jawu afwa dehi, kulonda ayilemeshi hela nawu ayikiswili. Amakwawu niwena akeñaña kuwundisha antaña jawu afwa dehi nawu akamba kuyibabesha. Chawushona, iyi ntañishilu yashindamena hamakudi aSatana hiyayikundejañaku. Ilaña yayiletelaña hohu antu chineñi cheneni hela woma. w19.04 14 ¶1; 16 ¶10