June

Mama yakaprofwetu Samweli Hana wateleli kuumika kukala kwasweja chikupu. Hadi yaaka yayivulu havwelihu mwanaku. (1 Sam. 1:2) A Isarela amavulu atoñojokeleña nawu hinshinta, dikwila nawu washiñewa. Dichi chumichi chamutiyishileña Hana nsonyi. (Kutach. 30:1, 2) Chuma chaswejeli kutama kudi Hana chadiña chakwila nawu nfumwindi wadiña namumbanda mukwawu Penina, wamuvwalilileña nyana nawa wadiña nakumuvuloka Hana. Hana wakañenyi kuumika iku kukala. Waneñeleña chakwila “hakudilaña hohu [nikudaña] nawa nehi.” “Watiyili kumuchima bwi chikupu.” (1 Sam. 1:7, 10) Hanu dinu, Hana wakundejeweli ñahi? Hana walombeli kudi Yehova nakumuleja chatiyileñayi. Hanyima yakwila nalombi dehi, wamulejeli Kapristu Muneni Eli kukala kwindi. Kuhiñahu Eli wamulejeli nindi: “Yaña kweyi chachiwahi, Nzambi yaIsarela akwinki chuma chiwunamulombi.” Chumanyi chafuminimu? Hana “hakudiyila kwindi, hakudya, nikuneña nawa cheñi kumesu indi nehi.” (1 Sam. 1:17, 18) Kulomba kwawundishili muchima waHana. w20.02 21 ¶4-5

Katataka, Yehova yajilumuni nshakaminu yamakonu. Chiña hohu antu adi “nanyichima yashinshika yakukeña kwikala nawumi wahaya nyaaka” diwu akamwinawu. (Yilw. 13:48) Dichi chidi hohu chiwahi kushimwina niantaña jetu kulonda amukalakeleña Yehova. Tata yetu wukweti kukeña Yehova “hakeñaña muntu hela wumu akamujilumuniku, ilaña wakeñaña nindi antu ejima ekali nakukooleka kwakubalumuka munyichima.” (2 Pet. 3:9) Twatela kwiluka netu kudi njila yayiwahi niyatama yakushimwinamu nsañu yawamwinu. Neyi tunakushimwina muntu itwabula kwiluka twahanjekaña nindi munjila yakumudimbeka, ilaña neyi tunakushimwina ntaña yetu twahoshaña chakubula kuhita mumbadi. Neyi tweseka kwanuka mpinji yitwashimwininihu antaña jetu katachi, etu amavulu twaditoñeshaña, netu kachi nazatishili njila yacheñi. Chachiwahi kwanuka iku kufumba kwakapostolu Pawulu kudi munsona yalelu neyi tunakushimwina antaña jetu. Neyi nehi, tukuyineñeshaña chatela tuyikwashi atiyilili nsañu yitunakuyishimwina. w19.08 14-15 ¶3-5

Mwelili ñahi chimwadizili ichi chalala kutalisha hadi Mwana? Yesu diyi muntu walema wamuchiyedi mukuleña kwejima. Diyi Nkuuli yetu. Wahanini wumi windi kukoola etu. Neyi tumwekesha muyilwilu yetu netu twakuhwelela mwifutu danyiloña, akutwanakena nshidi jetu, tukwikala amabwambu jaNzambi nawa twakekala nawumi wahaya nyaaka. (Yow. 3:16) Yesu diyi Kapristu Muneni itukweti. Nakukeña kutukwasha kulonda tuheteli mwifutu danyiloña nikwikala nawubwambu wakola naNzambi. (Heb. 4:15; 7:24, 25) Chineli diyi Mwanta waWanta waNzambi, mudi yena dimwakajilikilayi Yehova ijina Dindi, kumanisha kutama nikuleta nkisu yahaya nyaaka muParadisa yinakwinza. (Mat. 6:9, 10; Chim. 11:15) Yesu diyi chakutalilahu chetu. Watwimikila chakutalilahu kuhitila mukuzatisha wumi windi hakwila nkeñelu yaNzambi. (Yow. 4:34) Neyi mwiteja yuma yadizishaña Bayibolu kutalisha hadi Yesu, mukumukeña chikupu Mwana kaNzambi akeñayi. Iku kukeña kukuyiletesha kuzatisha wumi wenu kulonda mwileña nkeñelu yaNzambi neyi cheliliyi Yesu. w20.03 10 ¶12-13

Yesu walombeleña mpinji yejima kushika nihefuku dakukumishaku. Hayilejeleñayi atumbanji twindi chakwanakana kufwa kwindi, walombeli hadinkendi nihavinyu. (1 Kor. 11:23-25) Henohu kanda afumi kwadiilileñawu Chipandakenu, walombeli nawatumbanji twindi. (Yow. 17:1-26) Yena niatumbanji twindi chashikiliwu haMpidi yaMaolivi hawuna wufuku, walombeli nakufuntisha funtishahu. (Mat. 26:36-39, 42, 44) Nawa mazu akukumishaku ahosheliyi Yesu henohu kanda yafwi, adiña akulomba. (Luka 23:46) Yesu walombeli kudi Yehova hayuma yejima yamumwekeneni hadina ifuku. Chuma chaletesheli Yesu yomiki kweseka, hikushindamena hadi Tata yindi mukulomba. Apostolu akañenyi kutwalekahu kulomba hawuna wufuku. Chafuminimu, mpinji yakweseka chiyashikili akañenyi kumwekesha wulobu. (Mat. 26:40, 41, 43, 45, 56) Neyi tumona kweseka, tunateli kutwalekahu kwikala ashinshika neyi tumwimbujola Yesu ‘nikutwalekahu kulomba.’ w19.04 9 ¶4-5

Yehova wahela kupanda. Wayilejeli aIsarela nindi: “Kudeyi bayi kwakamwekana muntu wakahitisha mwanindi weyala hela mwanindi wamumbanda mukesuku, hela mukwakuhoña, hela mukwakuhoña natutumbwa, hela wasansa nyiseñu, hela mukwakupanda, hela mukwakukaya, hela mukwakupesha, hela katepa, hela kadañuku. Muloña antu ejima elaña yumiyi Yehova wayimona nindi hiyakwakushimana.” (Kuhit. 18:10-12) AkwaKristu hiyadi muNshimbi jaMosiku. Hela chochu, tweluka netu wahimpa wanyi kutalisha hansañu yakupanda. Yehova watusoñamishaña hansañu yakupanda muloña weluka nindi Satana wazatishaña kupanda kulonda aluwañeshi nachu antu. Satana wazatishaña nsañu yakupanda kulonda atandisheña nachu makudi, nimakudi akwila nawu afu ashakamaña kwiluña dimu. (Mukwa. 9:5) Satana wazatishaña cheñi kupanda kulonda achinisheña nachu antu nikuyifumisha kudi Yehova. Wakeñaña antu elaña yuma yakupanda nindi akuhweleli mudi aspiritu atama chatela akuhweleli mudi Yehova. w19.04 21 ¶5-6

Kukaama anyana chakukanjikija hinshidi yeneni. Antu akaamaña anyana anyanya ayiyandishaña mwamuvulu. Waneñeshaña mwana nawa wamuleñelaña yatachiki kutoñojoka nindi kwosi muntu wakumukiña, nawa waleñelaña mwana kumona kukala kwatela kubula kumonayi. Twatela kukiña anyana kuyuma yamuchidiwu nawa twatela kukundeja nikukwasha atwansi akamawu dehi. (1 Tes. 5:14) Wunakaami mwana wanyanya waletaña kasawuntu mukachi kachipompelu. (Mat. 5:16; 1 Pet. 2:12) Twetejaña wanyi antu kushakama muchipompelu neyi anakoñi nshidi nawa anabalumuki wanyi mumuchima muloña atamishaña ijina dachipompelu. Neyi muntu wamuchipompelu nafumpi nshimbi, chidi neyi kukaama mwana wanyanya chakukanjikija, dikwila nawu navulumuni kudi akwanshimbi. (Esekejenu Yilwilu 25:8.) Akulumpi hiyakweti wuswa wakubabesha muntu wunafumpi nshimbi janfulumendiku, dichi hiyamukiñaña ona muntu wunavulumuni kudi akwanshimbiku. w19.05 9 ¶4-7

Tunateli kuumika kukala kudi kwejima, muloña Yehova diyi Ntañishi yetu Wabadika. (Isa. 30:20, 21) Izu dindi datudizishaña yuma yejima yitwakeñaña kulonda twikali muntu “washikilamu chikupu, wadiloñesha chikupu kuzata nyidimu yayiwahi yejima.” (2 Tim. 3:17) Neyi tulondelaña yuma yahoshaña Bayibolu, twekalaña namaana kubadika antu atandishaña “maana amukanu kaayi.” (Mas. 119:97-100) Kakavulu, maana amukaayi atukokolaña kulonda twileña yuma yafwilaña mujimba. Dichi chinateli kutukalila kutondolwela kutoñojoka nikwila yuma neyi antu amukanu kaayi. Dimuloña waweni Bayibolu chiyahoshelaña nawu: “Babalenu, kwakenda kekala muntu wukuyitwala muwunkoli kwesekeja namaana awantu, nintañishilu yamukunkulwayi yamwaya tushidikilu twawantu.” (Kol. 2:8) Neyi chashimwineñahu dehi Bayibolu kutalisha hamafuku akukuminina nayu, antu akekala “akwakukeña jakuzañalesha.” (2 Tim. 3:4) Kutanda kwayikatu chidi neyi AIDS yenzaña namuloña wawuvumbi, hichuma chinakumwekesha nawu maana amukanu kaayi hiwusupi.—2 Pet. 2:19. w19.05 21 ¶1-2; 22 ¶4-5

Satana wayidimbili aIsarela kulonda akuhweleli nawu hakwila ekali nayakuda yayivulu, ateleleli kulondela tushidikilu twawantu ayinyeñumukili abulileña kudifukula kudi Nzambi. Awa antu ayinyeñumukili akuhweleleli nawu anzambi jawu anateli kunokesha nvula chiña neyi adifukula kudi wena hela kulondela tushidikilu twawu. Dichi ana abulili chikuhwelelu mudi Yehova akuhweleleli nawu iyi diyi njila hohu yateleleli kuletesha kubuli chaaña, dichi akoñeli yuma yakundama kukwitiya kwakutwamba nikulemesha Bayali nzambi wakutwamba. Satana cheñi wayisañumwini nampwila yawuvumbi. Nyunza yawasenji yadifukwileña kudi anzambi jawu kuhitila mukwila yishimashima. Muniku kudifukula mwadibombeleli ambanda niamayala ayivumbi. Wutumwa niyilwilu yikwawu yawuvumbi ayimweneña nawu yetejewa. (Kuhit. 23:17, 18; 1 Anya. 14:24) Iyi nyunza yakuhweleli nawu iku kwitiya kwaletesheleña anzambi jawu kuleñela iseki kwikala nawushi. AIsarela amavulu ayikwokweli natushidikilu twawuvumbi twakoñeleña antu abulileña kudifukula kudi Yehova nawa atachikili kudifukula kudi anzambi akutwamba. w19.06 2 ¶3; 4 ¶7-8

Amanakwetu adiña mumudimu wampinji yejima, kushilahu ninana akalakeleleña haBeteli niwena nyidimu yawu yahimpikili. Chinateli kuyikalila awa amanakwetu niahela ashinshika kushiya mudimu wawu wakeñeshawu nankashi. Neyi mudi hakachi kanawa antu, chumanyi chinateli kuyikwasha kuumika neyi kudi kuhimpika? Swinenu kwakwihi naYehova, tañenuña Bayibolu mpinji yejima nikutoñojokahu chikupu. Cheñi, twalekenuhu kuzata hakumina ñovu jenu kushimwina nsañu yayiwahi muchipompelu chenu chachiha. Yehova wanukaña antu atwalekañahu kumukalakela nakashinshi hela chakwila hiyanateli kuzata neyi chazatileñawu kunyimaku. Peleshenuku chihandilu chenu. Bayi mwiteja kwakama kwamukaayi kaSatana ‘kuyikañeshi’ kumukalakela Yehovaku. (Mat. 13:22) Bayi mwiteja ikakeja damukaayi hela amabwambu jenu hela antaña kuyileñela kutachika kufwila mali amukaayi kaSatanaku. (1 Yow. 2:15-17) Mukuhwelelenu Yehova watukana kutwinka yuma yejima yitwakeñaña “hampinji yatelela.”—Heb. 4:16; 13:5, 6. w19.08 20 ¶4; 21-22 ¶7-8

Komana ninenu munakumona kukala? Chumichi chinakutwanukisha nawu Yehova wamonaña kukala kutwahitañamu. Weluka yuma yitwatela kwila niyitunateli kukañanya kwila nawa weluka yuma yitwatoñojokaña nichitwatiyaña. (Mas. 103:14; 139:3, 4) Neyi tukushindamena hadi Yehova, wukutukwasha kumanisha kukala kwaletaña chineñi. Chineñi chinateli kuyileñela kwikala nayitoñojoka yatama hela kuyizeyesha. Neyi chumichi chiyimwekena, anukenuña nenu Yehova nateli kuyikwasha kumanisha chineñi. Nateli kuyikwasha ñahi? Wakeñaña nindi mumulejeña kukala kumunakumona nichimunakutiya. Nawa wukutiya kwaba kwenu. (Mas. 5:3; 1 Pet. 5:7) Dichi mpinji yejima lombenuña kudi Yehova neyi mudi nakukala. Hakuhosha nanenu neyi chahosheliyi naElijaku, ilaña wukuhosha nanenu kuhitila Mwizu dindi Bayibolu nikuloñesha kwindi. Nsañu yimukutaña muBayibolu yinateli kuyikundeja nikuyikwasha kuchiñeja. Cheñi amanakwenu niahela anateli kuyikolesha.—Rom. 15:4; Heb. 10:24, 25. w19.06 16 ¶7-8

Neyi munakulomba kudi Yehova, ‘mwañenu muchima wenu neyi menji’ nawa mulejenu Tata yenu wukweti kukeña yuma yejima yinakuyitiyisha woma nikuyakamisha. (Mukeŋa 2:19) Neyi mulombaña chamuchidiwu, mukuditiya nenu munaswini kwakwihi naYehova. (Rom. 8:38, 39) Kuhwelelenu chikupu nenu nkisu jaWanta waNzambi jikashikijewa. (Kuch. 23:19) Neyi mukuhwelela nenu yikaninu yeniyi yikashikijewa wanyi, chikwikala chaswayi kuyichinisha kudi Satana niantu jindi. (Yish. 24:10; Heb. 2:15) Ikalenu nampinji yakudiza hayikaninu yaNzambi nihaWanta windi nimuloña waweni wumunateli kukuhwelela chikupu nenu yikashikijewa. Chumichi chinateli kuyikwasha ñahi? Shinshikenu chuma chamumwekeneni Stanley Jones, akasiliwu yaaka 7 muloña wachikuhwelelu chindi. Chumanyi chamukwashili kuumika nakashinshi? Wahosheli nindi: “Chikuhwelelu chami chakoleli muloña nelukili chekala Wanta waNzambi niyuma yiwakela nawa hinajinokeleñaku, dichi kwosi muntu watwesheli kunfumisha kudi Yehovaku.” Neyi mwakuhwelela chikupu muyikaninu yaNzambi, himwakatiya womaku.—Yish. 3:25, 26. w19.07 2 ¶1; 3 ¶6-7

Muloñadi chichalemena kwilisha atumbanji? Muloña atumbanji twaKristu hohu diwu anateli kwikala amabwambu jaNzambi. Kubombelahu, antu amulondelaña Kristu ekalaña namuzañalu chayinu mpinji nawa akweti kuchiñeja kwakwikala nawumi wahaya nyaaka kumbidi. (Yow. 14:6; 17:3) Chakadi nikujina, Yesu watwinka mudimu walema, ilaña hitwawuzataña nkawetuku. Kapostolu Pawulu wasonekeli kutalisha hadi yomweni niakwawu nindi: “Etu tudi akwakukalakala hamu naNzambi.” (1 Kor. 3:9) Yehova niKristu ayinka antu abula kuwanina kukooleka kwakweni! Cheñi mudimu wakwilisha atumbanji wunateli kutuletela muzañalu chikupu. Chuma chatachi chitwelaña hakwilisha atumbanji ‘hikukeñakeña’ antu akweti nyichima yatelela. Twamwekeshaña netu tudi aYinsahu jaYehova kuhitila mukushimwina antu ejima itwawanaña. Twamwekeshaña netu tudi akwaKristu alala neyi tulondela lushimbi lwaKristu lwakushimwina. w19.07 15 ¶3-5

Antu amavulu ayikokolaña namaana ekala muBayibolu. Muhela wendelaña antu ahoshaña idimi daMandarin muNew York wahosheli nindi: “Nafwilaña kumwekesha kukeña kudi antu nikuyitiyilila. Neyi niluka nami dihu hanabukiwu kufuma kwiluña dacheñi, nayihulaña nami: ‘Munakushakama ñahi? Munatachiki kuzata? Munakuhanda ñahi nawantu muchituñilu?’” Mpinji yikwawu chamukwashaña kutachika kudizisha antu Bayibolu. Neyi chinatwesheki, muhela wabombelañahu nindi: “Munakutoñojoka nenu chumanyi chalema chitwatela kwila hakwila nawu tutachiki kudikunda nawantu? Niyilejiku chishimu chimu chamuBayibolu? Chahoshaña nawu: ‘Kutachika yikonkojola chafwana neyi muntu najikuli mwajikawu [menji]; dichi dinu lekenu kufwilañena hachidi ndombu kanda.’ Komana ichi chishimu chinateli kutukwasha kudikunda nawantu?” (Yish. 17:14) Mpanji yamuchidiwu yinateli kutukwasha kwiluka antu anakukeña kudizilahu nsañu yayivulu. w19.07 23 ¶13

Ana antu anayi nakuzatila kwiluña dacheñi akeñaña nankashi nawu mwiluki kukala kwawu. Hadaha anakukatakata indi kwiji ntaña yawu diyi wakata. Hadaha adi nachineñi chakujimbesha muntu akeñawu. Nawa, neyi adi kwakankawawu atela aneñaña muloña wakwanuka amabwambu jawu kwadiña nakuzatilawu. Hatela kuhita mpinji yeneni hakwila nawu avulameniku. Neyi mushimwinaña nawu hamu nikuyikolesha kuhitila muyilwilu yenu yayiwahi chinateli kuyikwasha kwinjilila. Muhela wunakalakeli yaaka yayivulu mwituña dacheñi wahosheli nindi: “Kunadiña nakuzatila, nalombweleña atudizi aBayibolu mafuku ejima. Chinayili nakuzatila kwacheñi chankalilileña nikutaña Nsona hela kutalisha vidiyo mumudimu wakushimwina. Ilaña amanakwetu niahela ansendeleña kuya nakushimwina nawu nikulombola atudizi. Chinamweni ana amanakwetu niahela adikita anakudizisha atudizi twawu aBayibolu chanleñeleli kukeña iluña mutwashimwinineña. Nadizili chakutachika kuhanjeka nawantu kunidi iluña. Yuma yejimiyi yankwashili kwikala cheñi namuzañalu.” w19.08 22 ¶10; 24 ¶13-14

Kufwana Eyodiya naSintiki, hadaha chatukalilaña nankashi kudikunda nawamanakwetu, muloña twashaña muchima hayiluwa yawu. Wejima wetu twaluwañeshaña mpinji yejima. Neyi tushaña maana hayiluwa yawakwetu, tukuleka kuyikeña. Chakutalilahu, neyi manakwetu yajimbalaku kwinza nakutukwashaku kuwahisha Itala daWanta, twaneñaña. Neyi tutachika kuchinda yiluwa yejima yinakoñiyi manakwetu, tukuhila nankashi chakwila tukumuhela. Neyi mwekala nakukala kwamuchidiwu namanakwenu muchipompelu, chikuwaha neyi mukwanukaña nenu: Yehova weluka nindi twawanina wanyi kushilahu niamanakwetu. Ilaña, hela chakwila twawanina wanyi, watukeña hamu nawamanakwetu. Muloña wachumichi, twatela kwimbujola kukeña kwaYehova nikumona yuma yayiwahi mudi amanakwetu. Neyi tuzata nañovu nakukeña amanakwetu, tukwikala anuñañana.—Fwi. 2:1, 2. w19.08 9-10 ¶7-8

Yehova wakeña antu adizoza. Dichi, antu adizoza hohu diwu anateli kwikala amabwambu jindi. Kwambukaku, “wadinka wanta wamwilukilaña kwakulehi.” Wejima wetu twakeñaña kumutiyisha Yehova kuwaha nawa twakeñaña kuswina kwakwihi nayena. Dimuloña waweni wutwatela kwikalila adizoza. Muntu wadizoza wekala wadikehesha mumuchima nawa hadinkaña wanta hela kudivwimbaku. Bayibolu yamwekeshaña nawu muntu wadizoza weluka nindi Yehova wabadika nawa weluka wuswa wukweti akwawu. Muntu wadizoza weluka nindi muntu wejima wamubadika munjila yimu nayikwawu. (Fwi. 2:3, 4) Antu amakwawu amwekanaña neyi adizoza. Anateli kumwekana neyi akweti nsonyi nawa anateli kumwekesha kalemesha kwesekeja nachayikulishawu kudi anvwali jawu. Ilaña kwinza mukachi kamuchima, adivwimba. Hashimbulaña wanyi enzaña nakumwekesha chekalawu mumuchima wawu.—Luka 6:45. w19.09 2 ¶1, 3-4

“Nsañu yayiwahi yahosha hadi Mwanta wetu Yesu” munabombeli nsañu yalala yejima yatañishiliyi Yesu. Twovwahilaña nsañu yayiwahi neyi tuyizatishaña muchihandilu chetu. Muniku kwovwahila munabombeli kutwamijaku yuma yaWanta, kutwamijaku nyidimu yaYehova muchihandilu chetu nikushimwina nsañu yaWanta waNzambi. (Mat. 6:33; 24:14) Munabombeli cheñi kukwasha amanakwaKristu awayishewa hampinji yinakwakamenawu nyidimu yawu yalema. (Mat. 25:31-40) Keña afweti “anyikoku amakwawu” hawukwashu wayikwashañawu. (Yow. 10:16) Munjilanyi? Henohu njita yaAmagedoni kanda yitachiki, a 144,000 akayisañula nakuya mwiwulu nanyijimba yabulaña kufwa. Akekala hamu namashidika amwiwulu hakumujilumuna Gogi nawa akakiña “izaza deneni” dawantu jaYehova. (Chim. 2:26, 27; 7:9, 10) Mwalala, izaza deneni dikazañalala hakwiluka nawu akwashili ambuña aYehova awayishewa hampinji yadiñawu hamaseki. w19.09 12-13 ¶16-18

Muloñadi chichawahila kuzata mudimu watwinkayi Yesu? Muloña tukweti ankoñi amawahi. Hela chakwila Yehova Wabadika Chikupu, wakalisha wanyi nawa hakweti lukambuku. Wasakililaña hanyidimu yitwamukalakelaña. (Heb. 6:10) Nawa watwinkaña ñovu yakuzata mudimu watwinkayi. (2 Kor. 4:7; Ñal. 6:5 tth.) Yesu watuleja chakuzata nawakwetu. (Yow. 13:15) Akulumpi atubiñaña amwimbujolaña Yesu, “kabiña muneni.” (Heb. 13:20; 1 Pet. 5:2) Azataña kwesekeja nahakumina ñovu jawu, kututiyila luwi, kutukolesha hampinji yinakutulombolawu. Tukweti cheñi amabwambu amawahi nankashi. Kwosi antu akweti amabwambu adi neyi itukweti nimudimu wawuwahi neyi wutukwetiku. Toñojokenu hachumichi: Twazataña nawantu adi nayilwilu yayiwahi nawa adizoza. Eluka yuma yayivulu ilaña adizoza, nawa hiyadimonaña kulema kubadika akwawuku. Atumonaña nawu tudi akwakukalakala hamu nawu nawa amabwambu jawu. Atukeña nankashi chakwila afwilaña nikuhana wumi wawu kukoola etu. w19.09 20 ¶1; 23 ¶12-14

Pawulu washimwini kutalisha ‘hefuku daYehova.’ (1 Tes. 5:1-6) Neyi chinadizatishiwu muniyi nsona, dinatalishi kumpinji yakatachika kulukuka “Babiloni Muneni,” wanta wakaayi wansakililu yakutwamba nikukuma nanjita yaAmagedoni. (Chim. 16:14, 16; 17:5) Pawulu watuleja chitwatela kudiloñesha ‘nefuku daYehova.’ Hitwatela kukaama “mutulu neyi chelañawu antu amakwawuku.” Twatela kwikala ‘atona’ nawa asoñama kulonda tubuli kudibomba munsañu jamatuña nachiyuulu. Neyi tudiñija muyumiyi, tukwikala antu “amukaayi.” (Yow. 15:19) Tuneluki netu Wanta waNzambi hohu diwukaleta kuwunda mukaayi. Twatela cheñi kukwasha antu amakwawu kwiluka chashimwineñahu dehi Bayibolu kutalisha hayuma yikamwekana mukaayi. Neyi lukadi lwasweja lunatachiki, mpinji yakudifukula kudi Yehova yikekala yinamani dehi. Dimuloña waweni wutwatela kuzatila nañovu mumudimu wakushimwina. w19.10 8 ¶3; 9 ¶5-6

Chamanishiliwu kusoneka muvuñilu, Yeremiya washindameneni hadi ibwambu dindi Baruki kulonda yaleji antu nsañu yadiñamu. (Yere. 36:5, 6) Baruki wahamukili nakuzata mudimu wamwinkeliwu. Chakadi nikujina, Yeremiya watiyili kuwaha chelili Baruki yayi nakutañila antu muvuñilu mutembeli. (Yere. 36:8-10) Atulamba amuYuda atiyili yuma yejima yeliliyi Baruki nawa amulejeli kuyitañila cheñi muvuñilu. (Yere. 36:14, 15) Atulamba ayili nakumuleja Mwanta Yehoyakimi mazu ahosheliyi Yeremiya. Mwanta Yehoyakimi chatiyiliyi mazu asonekeliyi Yeremiya wazuwili nankashi chakwila wocheli nimuvuñilu nawa wahosheli nindi ayikasi aYeremiya naBaruki. Hela chochu, Yeremiya wanoneli cheñi muvuñilu wukwawu nakumwinka Baruki nawa Yeremiya wamulejeli mazu aYehova, kuhiñahu Baruki wasonekeli “mazu ejima amumukanda wocheliyi mwanta wawaYuda Yehoyakimi mukesi.”—Yere. 36:26-28, 32. w19.11 3-4 ¶4-6

Yehova nateli kwikala chuma chejima hakwila nawu yashikiji nkeñelu yindi. Chakutalilahu, Yehova wekala Ntañishi, Nkundeji, Mukwakushimwina. Iyi hiyakutalilahu yantesha hohu. (Isa. 48:17; 2 Kor. 7:6; Ñal. 3:8) Hela chochu, kakavulu wazatishaña antu kulonda yashikiji nkeñelu yindi. (Mat. 24:14; 28:19, 20; 2 Kor. 1:3, 4) Yehova nateli cheñi kutwinka wejima wetu maana niñovu yitwakeñaña hakwila twikali chuma chidi chejima kulonda tushikiji nkeñelu yindi. Imu dimwatalisha chinateli kwikalayi Yehova hela kutwilisha kwikala chuma chejima kulonda tushikiji nkeñelu yindi. Wejima wetu twakeñaña kutuzatisha kudi Yehova, ilaña amakwawu anateli kujinoka neyi chakwila Yehova nakuyizatisha. Muloñadi? Muloña wakukula, yuma chiyinakuyendela niwuswa wukwetiwu, yumiyi yinateli kuyileñela kutoñojoka nawu akutwesha wanyi. Munjila yikwawu, amakwawu anateli kutoñojoka nawu nyidimu yinakuzatawu yinashikili nawa kwila akeñelahu nyidimu yikwawu nehi. w19.10 20 ¶1-2

Kufwila yuma yakumujimba kunateli kutuluwañesha nikumba nkebu yetu yachikuhwelelu. Kapostolu Pawulu wahosheli nindi: “Kwosi muntu wunakuzata mudimu wawushidika wadiñijaña mumudimu wakulanda nakulandululaku, kulonda amutiyi kuwaha kudi muntu wamwiñijili wushidika.” (2 Tim. 2:4) Amashidika awaRoma ayitejeli kudiñija munsañu jakulanda nakulandulula wanyi. Tudi neyi amashidika amawahi. Chuma chalema chitwafwilaña hikumutiyisha Yehova niKristu kuwaha. Twalemesha chumichi kubadika chuma chejima chitunateli kwikala nachu mukaayi kaSatana. Twatela kwikala nampinji niñovu yakumukalakela Yehova nikuhemba chiwahi nkebu yetu yachikuhwelelu niyitwa yetu yejima yanjita yakuspiritu. Twatela kwikala asoñama mpinji yejima. Muloñadi? Kapostolu Pawulu wasoñamishili nindi: “antu afwilaña kuheta” ‘akayisenwisha nakufuma kuchikuhwelelu.’—1 Tim. 6:9, 10. w19.11 17 ¶12, 14-15

Mbila yakwila nawu “kuwunda nikukiñewa” yikekalaku henohu “ifuku daYehova” kanda. (1 Tes. 5:1-6) Kwesekeja na 1 Atesalonika 5:2, “ifuku daYehova” dinatalishi ‘kulukadi lwasweja.’ (Chim. 7:14) Tukeluka ñahi neyi ilu lukadi hilukutachika? Bayibolu yashimunaña nawu kwakekala mbila yitwabula kutiyahu dehi. Iyi mbila yikekala chinjikijilu chinakumwekesha nawu lukadi lwasweja hilukutachika. Iyi himbila yashimwineñawu dehi ‘yakuwunda nikukiñewa.’ Komana anlomboli jansakililu niwena akadibombamu? Hekwawu. Hela chochu, iyi mbila yikekala himakudi akafuma kudi andemoni. Ilaña awa makudi akekala afwana muloña akaleñela antu kutoñojoka mwaluwa nawu anekali akiñewa henohu lukadi lweneni lwabulahu dehi kumwekana muchihandilu chawantu keña lutachiki. Mwalala, “kujilumuka kwakayishikena neyi nyisoñu yakuvwala chiyashikenaña mumbanda wudi nevumu.” Hanu dinu chumanyi chikayimwekena ambuña aYehova ashinshika? Akahayama chikupu chikatachika idi ifuku daYehova, ilaña dikayishintakesha wanyi. w19.09 9 ¶7-8

Mpinji yimunakufuukula, ilukenu chuma chimunakukeña kwila. Neyi mwiluka chuma chimunakukeña kwila, chikuyikwashaku kuzata chuma chimunakufwila. Chakutalilahu, hadaha munafuukuli nenu mukutañaña Bayibolu mpinji yejima. Ilaña neyi munatanjiki chiwahi wanyi nyidimu, himukutwesha kwila mumunafuukuliku. Twili netu, akulumpi muchipompelu anafuukuli nawu akubiñaña nyikoku mpinji yejima, ilaña mukuhita kwampinji kwilamu nehi. Hakwila nawu eli munafuukuliwu, atela kudihula nawu: “Amanakwetu anyi niahela itwatela kubiña? Tunashimuni ntahi mpinji yitwatela kuyendela?” Cheñi ilukenu hanakumini ñovu jenu. Wejima wetu hitukweti mpinji, maheta hela ñovu yakwila yuma yejima yitwafwilañaku. Dichi ilukenu hanakumini ñovu jenu nikumona yuma chiyidi. Neyi mukañanya kushikija mumwafuukwili, mwatela kuhimpa. w19.11 29 ¶11-12

Nsañu yawuprofwetu yakundama kuchihandilu chawantu hamaseki yekala haIsaya 65:21-23. Chihandilu hichakekala chakadi nyidimuku. Ilaña Bayibolu yamwekeshaña nawu antu jaNzambi hayina mpinji akazataña nyidimu yayivulu yayiwahi. Twatela kukuhwelela netu kumakumishilu aChiyuulu chaYaaka Ikombakaji daKristu, “yileñaleña niyena akayisubula kuwuduñu wakutoka nakwikala yasubuka mukulema kwawanyana kaNzambi.” (Rom. 8:21) Neyi chocheliliyi Yehova nawaIsarela, wayilejeli kwikala nampinji yakuzata niyakunooka, dichakelayi nawantu jindi muChiyuulu chaYaaka Ikombakaji daKristu. Kwakela nyidimu yakuspiritu yayivulu. Chalema kudifukula kudi Nzambi muloña kwatuletelaña muzañalu, nimwituña dadiha twakadifukulaña. Antu ejima ashinshika akekala namuzañalu muChiyuulu chaYaaka Ikombakaji daKristu muloña twakazataña nyidimu yayivulu yayiwahi nawa wejima wetu twakamukalakelaña Nzambi. w19.12 12 ¶15; 13 ¶17-18

Izu dakwila nawu ‘kuleja’ datalisha “mukudizisha nikwanukisha kuhitila mukufuntisha funtishahu.” Hakwila eli mwenimu, anvwali atela kwikalaña nawanyanawu mpinji yejima. Mpinji yikwawu chatiyishaña kutama hakwila afuntisheñahu nsañu yoyimu kudi anyanawu. Hela chochu, atela kumona iyi njila nawu diyi njila yimu yakukwashilamu anyanawu kwiluka Izu daNzambi nikudizatisha. Dichi yilukenu chikupu anyanenu. Mukanda waMasamu 27 wesekeja anyana najinsewu. (Mas. 127:4) Neyi chochinateli kutuñawu jinsewu kuzatisha yuma yamboka-mboka nikwambuka mukutoha, anyana niwena ambuka. Dichi anvwali atela kwiluka chakudizisha mwana himwana. Adisumbula amuIsrael akwashili anyanawu ayedi kumukalakela Yehova ashimwini chuma chayikwashili. Dichi ahosheli nawu, “Twayidizishileña Bayibolu iwu kankawindi iwu kankawindi.” Hela chochu, mutu wachisaka watela kufuukulahu njila yinamuwahili chili iyi njila hela nehi. w19.12 26-27 ¶18-20

Neyi tunakuhita mukukala, twekalaña namuzañalu neyi antu atukwasha. Ryan wajimbesheli atata yindi muwubanji wahamukwakwa wahosheli nindi, “Neyi tunakukabakana, twakañanyaña kuzata nyidimu yitwazataña mpinji yejima. Ilaña twakundejewaña neyi muntu yatukwasha hela mutuyuma twanyanya.” Dichi mwatela kwanuka nenu munateli kukundeja akwenu neyi muyikwasha nimutuyuma twanyanya. Kambanji Maku wadiñaku mumafuku aYesu, wadiña mukwaKristu wadikita. Hela chochu, Maku wadiña nakuzatisha mpinji yindi kulonda yamukundeji kapostolu Pawulu nawa Pawulu wadiña wakasunuka kulomba wukwashu kudi Maku. Angela wajimbesheli ntaña yindi wasakililaña hakudihana kwawantu amukundejeli. Dichi wahosheli nindi, “Neyi akwenu anakufwila kukukwasha, chekalaña chaswayi kuhanjeka nawu. Akeñaña kukukwasha nawa hiyatiyaña woma wakukwashaku.” Tunateli kudihula netu, ‘Komana añiluka nawu nakundejaña akwetu itwadifukulaña nawu munjila jashiyashana?’ w20.01 11-12 ¶14-16

Muntu wawayishewa nateli kuda ñahi haChanukishu “henohu nateleli wanyi”? Nateli kwila mwenimu neyi wadiili nikunwa yifwikija henohu wadiña nakufumpa nshimbi jaYehova. (Heb. 6:4-6; 10:26-29) Awayishewa eluka nawu atela kwikala ashinshika hakwila akatambwili “wufwetu wamutambi wamwiwulu waNzambi kuhitila mudi Kristu Yesu.” (Fwi. 3:13-16) Spiritu yajila yaYehova yakwashaña ambuña indi kwikala adizoza bayi adivwimbaku. (Efwe. 4:1-3; Kol. 3:10, 12) Dichi awayishewa hiyatoñojokaña nawu alema kubadika akwawuku. Eluka nawu Yehova wenkaña ambuña indi ejima spiritu yajila. Hiyatoñojokaña nawu elukisha Bayibolu kubadika amakwawuku. Nawa hiyalejaña muntu wudi wejima nawu nawayishewi nawa watela kutachika kuda haChanukishuku. Ilaña, ekala adizoza nawa eluka nawu Yehova hohu diyi wunateli kutambika antu kuya mwiwulu. w20.01 27-28 ¶4-5

Yehova nakukeña nindi tuswini kwakwihi nayena nawa tuhanjekeña nindi. Watukonkomwenaña nindi “lombenuña chakadi kuzeya,” nawa watiyaña kulomba kwetu. (Rom. 12:12) Hakasikaku nawa hazeyañaku ilaña watutiyililaña. Dichi, twamutiyililaña kuhitila mukutaña Izu dindi, Bayibolu ninyikanda yikwawu yatukwashaña kutiyishisha Izu dindi. Twamutiyililaña cheñi neyi tunakutiyilila nakanañachima hakupompa kwawakwaKristu. Neyi tuhanjekaña naYehova mpinji yejima tukuswina kwakwihi nayena. Yehova nakukeña nindi tuhuñunwineña nyichima yetu hadi yena mukulomba. (Mas. 62:8) Dichi twatela kudihula netu: ‘Komana kulomba kwami kwafumaña heshina damuchima tahindi kwekala kwakusoneka hela chakala hikulomba hohu?’ Chakadi nikujina, mwamukeña Yehova chikupu nawa munakukeña kukolesha wubwambu wenu nayena. Hakwila mwili mwenimu, mwatela kuhanjeka nindi mpinji yejima. Mulejenu chimunakutiya. Mulejenu yuma yayizañaleshaña niyayineñeshaña. Kuhwelelenu nenu mwatela kulomba wukwashu kudi yena. w20.02 9 ¶4-5

Yehova wayinka akulumpi mudimu walema wakubiña antu jindi. Akulumpi anateli kudizilaku yuma yayivulu neyi ashinshika cheliliyi Nehemiya nawantu jaYehova. Chineli Nehemiya wadiña nguvulu muYuda, wadiña nawuswa chikupu. (Nehe. 1:11; 2:7, 8; 5:14) Nehemiya wamweneña kukala. Wawanini antu anatamishi tembeli nayuma yateleli kubula kwikalamu. Cheñi alekeli kuhana yawaana yakukwasha nachu Alevi kwesekeja naNshimbi. A Yudeya afumpileña nshimbi yaSabata nawa amayala amakwawu asumbwili ambanda akwacheñi. Nguvulu Nehemiya wateleli kushinda iku kukala. (Nehe. 13:4-30) Nehemiya wazatishileña wanyi wuswa wadiñayi nawu kulonda yakanjikiji antu kulondela chatoñojokeleñayi. Ilaña, wamulombeli Yehova kulonda yamukwashi kuhiñahu dinu hakuleja antu nshimbi jaYehova. (Nehe. 1:4-10; 13:1-3) Nehemiya wamwekesheli cheñi muchima wakudizoza kuhitila mukuzatila hamu nawamanakwindi hakutuña mbañu yaYerusalema.—Nehe. 4:15. w19.09 16 ¶9-10