December

Neyi tukañanya kuhemba idimi detu, dinateli kuleta kukala. Chakutalilahu, neyi muwana manakwetu washakamaña kwiluña kwalekeshawu mudimu wetu, komana mwafwilaña kumwihula kulonda yayilumbulwili chinakwenda mudimu mwituña dawu? Chakadi nikujina, himunakwihwila kulonda muyikoñi mwatamaku. Twayikeña nankashi amanakwetu nawa twakeñaña kwiluka yuma yinakuyimwekena. Tunakukeña kuyilombelaku cheñi hayuma yimu. Hela chochu, iyi diyi mpinji yitwatela kubula kuhosha. Neyi tukanjikija muntu wukweti nsañu yakujinda, dikwila nawu tunakumwekesha wanyi kukeña kudi iwu muntu nikudi amanakwetu niahela anashindameni hadiwu muntu nawu wukuhemba kajindilu. Munjila yoyimu, kwosi manakwetu hela muhela wunakuzatila munidi ituña wukukeña kushimuna chashimwinañawu aYinsahu nichazatañawu nyidimu yawakwaKristuku. w20.03 21 ¶11-12

Nzambi hakeñeleña nindi antu afweñaku. Hakwila nawu aAdama naEva ashakameña haya nyaaka, ateleleli kumwovwahila Yehova wayinkeli Nshimbi nindi: “Ilaña mutondu wakwiluka nachu niyayiwahi niyatama eyi bayi wakawidyaku; muloña ifuku diwakadya chalala wakafwa.” (Kutach. 2:16, 17) Ilaña Satana waleteli kukala. Satana wahosheleli mukapela mazu adi munsona yalelu kudi Eva. Chawushona Eva wetejeli mwamudimbiliwu nawa wadiili mukabu. Kuhiñahu, nfumwindi niyena wadiili mukabu. (Kutach. 3:6) Muloña wachumichi, nshidi nikufwa yenjili hadi antu ejima. (Rom. 5:12) Neyi chahosheliyi Nzambi, aAdama naEva afwili. Ilaña Satana halekeli kutwamba hansañu yakufwaku. Chimwahitili mpinji, watachikili cheñi makudi amakwawu. Makudi amu, hintañishilu yakwila nawu muntu neyi nafwi kudi chuma chatwalekañahu kuhanda mudi yena, hadaha nawu spiritu yatwalekañahu kuhanda. Makudi amuchidi awa analuwañeshi antu amavulu kushika nimakonu.—1 Tim. 4:1. w19.04 14-15 ¶3-4

Atwansi hiyanateli kwikala nawuswa wakutoñojoka, kufuukula hela kwiluka nikutondolwela wubanjiku. Dichi chinateli kwikala chaswayi kudi muntu kudimba mwana nikumukaama. Antu akaamaña anyana ayilejaña anyana makudi adi neyi, mwana yomweni diyi wunaleteshi, ayilejaña nawu kushimuna nehi, cheñi nawu kwosi muntu wunateli kuyitiyilila hela kuyikwasha neyi ashimunaku, hela nawu kudikaama kwamukulumpi nakansi hinjila yakumwekeshelamu kukeña. Makudi amuchidiwu aluwañeshaña mwana nawa hashimbulaña hakwila yeluki walala. Mwana wamuchidiwu wakulaña nakutoñojoka nindi kwosi muntu watela kudikundayi nindi hela tuhu Nzambi. Hichatuhayamishaña hakumona antu akaaminiwu kuwansi anatwalekihu kwikala nachineñiku. Tudi mumafuku akukumina, mumpinji antu ‘munakubula kukeñawu akwawu antu’ nawa ‘antu atama niakwakuluwañesha antu, anakuya nakutaminaku.’—2 Tim. 3:1-5, 13. w19.05 15 ¶7-8

Munjilanyi mwatañishilileñayi Yesu? Chatachi, watañishileña antu hayuma yahosheleñayi. Mazu indi adiña nañovu muloña ahosheleña chalala hadi Nzambi, wadizishileña chalala kutalisha hankeñelu yachihandilu nawa wayilejeleña antu nindi Wanta waNzambi diwakamanisha yihuñu yejima yamonañawu antu. (Luka 24:19) Cheñi, Yesu wadizishileña antu nayuma yelileñayi. Mukuhanda kwindi, wadiña nakudizisha chatela kuhandawu akwakumulondela. (Yow. 13:15) Yesu watañishili mpinjinyi? Watañishili mpinji yadiñayi nakushimwina hamaseki. (Mat. 4:23) Wadizishili cheñi antu amulondeleleña hanyima yakusañuka. Chakutalilahu, wamwekeni kudi atumbanji hadaha kubadika ha 500, nawa wayinkeli lushimbi ‘lwakwilisha atumbanji.’ (Mat. 28:19, 20; 1 Kor. 15:6) Chineli diyi mutu wachipompelu, Yesu watwalekelihu kudisha atumbanji twindi nihanyima yakufunta mwiwulu. Chakutalilahu, kwakwihi na 96 C.E., Kristu wamulombweli kapostolu Yowanu kukolesha nikufumba akwaKristu awayishewa.—Kol. 1:18; Chim. 1:1. w19.05 3 ¶4-5

Makonu chakeñekaña kuzata nañovu hakwila nawu tuwani mwakuhandila. Amanakwetu azataña maora amavulu hakwila akeñeli chisaka yuma yakeñekaña muchihandilu. Amakwawu niwena azatishaña mpinji yeneni ifuku nifuku-hakuya nihakufuma kumudimu. Amakwawu azataña nyidimu yakola hakwila adakameni. Hakukuma kwefuku awa amanakwetu niahela azeyaña. Chuma chafumañamu akañanyaña kudiza muloña wakuzeya. Walala wudi wakwila nawu, twatela kwikala nampinji yakudiza, kudiza chikupu Izu daNzambi ninyikanda yetu yawakwaKristu. Wubwambu wetu naYehova niwumi wetu wahaya nyaaka washindamena hakudiza. (1 Tim. 4:15) Amakwawu ahindukaña mafuku ejima ntetemena nakudiza henohu kwosi ipumba nawa yitoñojoka yichidi kanda yiluwankani. Amakwawu niwena ashiyañaku kapinji hela kantesha hakumana kwefuku kulonda adizi nikutoñojokahu chikupu hansañu yinadiziwu. w19.05 26 ¶1-2

Kuhimpa kwamuchidiwu hikwenzaña nañoma hela muloña wakubula kuzata nañovuku. Twatela ‘kuzata nañovu chikupu’ hadi mpinji yayilehi. (2 Pet. 1:5) Twatela kuzata nañovu chikupu kulonda tuhimpi wuntu wetu wamukachi. Kulomba dichuma chatachi chitwatela kwila. Twatela kulomba neyi cheliliyi ñimbi yamasamu nindi: “Nleñelumu muchima wutooka eyi Nzambi; mbalumwini spiritu yayiha yakashinshi mukachi kami.” (Mas. 51:10) Twatela kwiteja chikupu netu tunakukeña kuhimpa yitoñojoka niyilwilu yetu nawa twatela kumulomba Yehova kulonda yatukwashi. Kutoñojokahu chikupu hinjila yamuchiyedi yalema. Mpinji yitunakutaña Izu daNzambi nakanañachima ifuku nifuku, twatela kwikala nampiji yakutoñojakahu chikupu kulonda tumoni yuma yitwatela kuhimpa. (Mas. 119:59; Heb. 4:12; Yak. 1:25) Twatela kwiluka yilwilu hela yitoñojoka yenzaña muloña wamaana amukaayi. Twatela kwiteja netu kudi mutwazeyela nawa twatela kuzata nañovu kulonda tuzatili hakuzeyazeya kwetu. w19.06 8 ¶1; 10 ¶10; 12 ¶11-12

Neyi himukufuukula, mwatela kutonda mpinji yakwililamu yuma yimunafuukuli nawa bayi muhimpaku. Bayi mwilaña nenu nikazata neyi nekali dehi nampinji yayiwahiku, muloña yikamwekana wanyi. (Mukwa. 11:4) Bayi mukisilaña mpinji kuyuma yamukunkulwayi yikuyidiila mpinji niñovu yakwililamu yuma yalemaku. (Fwi. 1:10) Neyi chinatwesheki, tondenuña mpinji yinateli kubula kuyiluwañeshawu kudi antu. Lejenu akwenu nenu inakukeña wanyi kunluwañesha. Jimenuña foni yenu nawa mwatela kutaña emelu hela kuya haintaneti mpinji yacheñi. Yuma yafumaña muyuma yimwafuukulaña, yidi neyi kwiluña kumunakuya. Neyi munakukeña kushika kumunakuya, mukutwalekahu kuya hela chakwila mukukeña kuhimpa njila yimunakuyamu. Munjila yoyimu, neyi twiluka yuma yayiwahi yikufuma muyuma yitunafuukuli, tukuhimpa wanyi hela chakwila tunamoni kukala.—Ñal. 6:9. w19.11 30 ¶17-18

Yumanyi yatela kuyiletesha mufuukulihu kupapatishewa? Hamuloña wakudiza Bayibolu muneluki yuma yayivulu hadi Yehova, chekalayi nichelañayi yuma. Yuma yimuneluki hadi yena yinasañumuni nyichima yenu nawa yinayileteshi kumukeña nankashi. Kukeña kumwamukeña Yehova dikunateli kuyiletesha kupapatishewa. Chuma chinaleteshi mufuukulihu kupapatishewa, chidi chakwila nawu muneteji chalala chamuBayibolu. Shinshikenu yuma yahosheliyi Yesu hahanineñayi lushimbi lwakwilisha atumbanji. (Mat. 28:19, 20) Kwesekeja nachahosheliyi Yesu, ejima anakupapatishewa atela kupapatishewa “mwijina daTata nidaMwana nidaspiritu yajila.” Chumichi chatalisha mudihi? Mwatela kukuhwelela namuchima wenu wejima chalala chamuBayibolu kutalisha hadi Yehova; Mwanindi, Yesu; nispiritu yajila. Ichi chalala chikweti ñovu nawa chinateli kuyishika hamuchima. w20.03 9 ¶8-9

Yehova hatemesheli añelu kuya nakumusoñamisha hohu Lotiku ilaña nikumukwasha kulonda yapuluki kuwubanji wenjileña muSodoma. (Kutach. 19:12-14, 17) Munjila yoyimu, twatela kuyisoñamisha amanakwetu neyi tumona netu anakwila yuma yinateli kuyiletela kukala. Hela chakwila nakuzatisha swayi-swayi wanyi kufumba kwamu Bayibolu kunakutambwilayi, twatela kudiwunjika. Ikalenu neyi ana añelu ayedi. Chatela tuleki kumukwasha nikumushiya manakwetu, twatela kukeña njila yakumukwashilamu. (1 Yow. 3:18) Twatela kumukwasha kulonda yazatishi kufumba kwakuwahi kunatambwiliyi. Mutenowu Yehova wadi kusha maana hakubula kuwanina kwaLoti. Ilaña wenjili nakumonena kapostolu Petulu nakumutena Loti nindi wadiña iyala waloña. (Mas. 130:3) Kwila tumwimbujola Yehova neyi chamwililiyi Loti nehi? Neyi tushindamena hayilwilu yayiwahi yawamanakwetu niahela, tukudiwunjikaña. Chumichi chikuyileñela niwena kwiteja wukwashu wetu. w19.06 21 ¶6-7

Neyi nfulumendi yilekesha kudifukula kwetu, munateli kufuukulahu neyi chakwila mukuya nakumukalakela Yehova kwituña dacheñi, kwosi muntu wunateli kuyifuukwilaku. Antu amakwawu henohu kanda afuukulihu, anateli kusambila kushinshika yuma yeliliwu akwaKristu mumafuku awapostolu mpinji yamweniwu makabisha. Atumbanji muYerusalema ejima apalañeneni muYudeya nimuSamariya nawa ayili nakushika kuFwenisiya, Kipirosi nikuAntiyoki. (Mat. 10:23; Yilw. 8:1; 11:19) Hela chochu, chelili akwaKristu akusambila atachiki kuyiyandisha cheñi, kapostolu Pawulu wafukwilihu kubula kufuma mwiluña mwakaanishiliwu mudimu wakushimwina. (Yilw. 14:19-23) Yumanyi yitwadizilaña kuniyi nsañu? Nyitu yayisaka yatela kufuukulahu neyi anakukeña kubuuka. Henohu kanda afuukulihu, atela kulombelahu chikupu nakumona chidi yisaka yawu nikutoñojoka hayuma yayiwahi niyatama yinateli kumwekana neyi abuuka. Hitwatela kusompesha antu amakwawu neyi anafuukulihuku. w19.07 10 ¶8-9

Yesu watulejeli nindi “yenu mwakelishi antu akunyuza yejima ekali atumbanji.” (Mat. 28:19) Kubombela hakumudizisha kadizi chuma chakeñañayi Yesu kudi atumbanji twindi, twatela kumukwasha kadizi kwiluka chatela kushakamayi hamu neyi mukwaKristu walala. Hampinji yinakufwilayi kuzatisha yishina yamuBayibolu, twatela kumukwasha mukudiwunjika. Atudizi amakwawu ahimpaña yitoñojoka niyilwilu yawu mutukweji twantesha hohu amakwawu hashimbulaña. Mishonali wumu muPeru wamweni yuma yayiwahi muloña wakudiwunjika. Wahosheli nindi: “Nadiña nakadizi waBayibolu Raul wunadizishili nyikanda yiyedi. Ilaña wadiña nakumona kukala kwakuvulu muchihandilu chindi. Wadiña nakukala muwulu windi, wahosheleña mazu akasawuntu nawa anyanindi adiña nakumulemesha wanyi muloña wayilwilu yindi yatama. Wenjileña mpinji yejima nakupompa, dichi natwalekelihu kumuhempula nikumukwasha hamu nichisaka chindi. Muyaaka yisatu kufuma hinamuwanini, wapapatisheweli.” w19.07 15 ¶3; 19 ¶15-17

Toñojokenu hayuma yejima yelileñayi kapostolu Pawulu hampinji yasonekeleliyi aFwilipi mukanda. Amukasilili mwiitala muRoma. Nawa hatwesheleña kwidika nakuya nakushimwinaku. Hela chochu, watwalekelihu kushimwina antu amuhempwileña nikusonekela yipompelu yakwakulehi nyikanda. Pawulu welukili nindi, hakwila yamufwani Kristu, wateleli kuzata nañovu kushika nikunsa. Dichi wesekejeli chihandilu chamukwaKristu nakutemuka lufuchi. (1 Kor. 9:24-27) Mukwakutemuka wafwilaña kushika kumufunda nawa washaña wanyi maana kuyuma yinateli kumuluwañesha. Chakutalilahu, akwakutemuka lufuchi makonu anateli kutemukila mumukwakwa mudi masitolu niyuma yinateli kuyiluwañesha. Munatoñojoki nenu muntu wunakutemuka lufuchi nateli kwimana nakutachika kubanjila yuma yidi mumasitolu? Inehi! Mulufuchi lwakuwumi, ninetu twatela kutondolwela yuma yinateli kutuluwañesha. Neyi tuzata nañovu nikumukalakela Yehova neyena neyi cheliliyi Pawulu, tukatambwila nkisu. w19.08 3 ¶4; 4 ¶7

Neyi tutachika kushakama kwesekeja nanshimbi jaNzambi, chinateli kuyikalila antaña jetu kwiteja yuma yitwakuhwelela. Chuma chatachi chamonañawu kakavulu, hikuleka kudibomba nawu mukwanakana yidika yamukudifukula nimunsañu jamapolitiki. Hakusambila antaña jetu amakwawu anateli kutuhilila. (Mat. 10:35, 36) Ilaña bayi tuzeyaku. Neyi tukuleka kuyikwasha kwiluka yuma yitwakuhwelela, dikwila nawu tunakuhosha netu hiyanateleli kutambwila wumi wahaya nyaakaku. Yehova hatwinka mudimu wakusompeshaku, ilaña wamwinka Yesu iwu mudimu. (Yow. 5:22) Neyi twikala adiwunjika, mukuhita kwampinji antaña jetu akatiyilila kunsañu yetu. Twatela kwikala nawushona nawa bayi tuhimpa yitoñojokaku, hela chakwila twatela kuumika kukala. (1 Kor. 4:12b) Hanateli kuhita mpinji hakwila nawu antaña jetu eluki chikupu chuma chatuleñelaña kumukalakela Yehova. w19.08 17 ¶10, 13; 18 ¶14

“Kanda mutoñojokeñahu dehi hakukala kumwahitilimu nawa muhosha nenu: “Neyi muñovu jami hinadi kutwesha kuumikaku?” Etu amavulu twahoshahu dehi. Hadaha mwahosheli hanyima yakwanuka chimwomikili nayikatu hela hampinji yafwili ntaña yenu. Neyi mwanuka iyi yihuñu, mwatoñojokaña nenu mwomikili muloña wakwila spiritu yajila yaYehova yayinkeli “ñovu yabadika hañovu jawantu.” (2 Kor. 4:7-9) Ninetu twakeñaña spiritu yajila hakwila nawu abuli kutuluwañesha mukanu kaayi katama. (1 Yow. 5:19) Kubombelahu, twakeñaña ñovu hakwila nawu tudikañi “namazaza awandemoni.” (Efwe. 6:12) Spiritu yajila yaYehova yatwinkaña ñovu hela wuswa wakwila yuma yejima hela chakwila tunakuhita mukukala. Kapostolu Pawulu watwalekelihu kumukalakela Yehova hela chakwila wamweneña kukala. Chuma chamukwashili hikushindamena ‘hañovu jaKristu.”—2 Kor. 12:9. w19.11 8 ¶1-3

Bayibolu diwu mukanda hohu walumbulula yuma yayililayi Yesu. Mukeñenu Yesu nawa mukusweja kumukeña Yehova. Muloñadi? Muloña Yesu wadiña nakwimbujola yilwilu yaTata yindi. Dichi chimukudizaña nankashi hadi Yesu, mukumwiluka nikumulemesha Yehova. Toñojokenu hawushona wamwekesheleliyi Yesu antu adiña nakumonawu nawu amukunkulwayi, muloña wawuzweñi, yikatu nikuzeya. Toñojokenu cheñi hanshimbi jajiwahi jayinkañayi nichahimpikaña chihandilu chenu neyi mujilondela. (Mat. 5:1-11; 7:24-27) Neyi mutoñojokaña nankashi hakudihana kwadihaniniyi Yesu hakwila nawu nshidi jetu ajanakeni mukusweja nankashi kumukeña. (Mat. 20:28) Neyi mwiluka chikupu nenu wadihanini nakuyifwila, chikuyiletesha kulomba kudi Yehova nenu yayanakeni nshidi jenu. (Yilw. 3:19, 20; 1 Yow. 1:9) Nawa chimukusweja kumukeña Yesu niYehova, chikuyiletesha kukeña kuswina kudi antu adi neyi enu. w20.03 5-6 ¶10-12

Mukwakristu weyala nateli kutachika kutoñojoka nindi yena hohu diyi wunashikilimu kukalakala nyidimu muchipompelu. Hela mukwaKristu wasumbuka nateli kutoñojoka nindi, ‘Nfumwami diyi wunashikihu kubadika akanaña niakanaña!’ Ilaña neyi twadizoza, hitukutoñojokaña muniyi njilaku. Tunateli kudizila kuchuma cheliliyi Mosi hampinji yatambwililiwu akwawu kukooleka. Mosi walemesheli nankashi mudimu windi wakulombola muza waIsarela. Mosi welili ñahi chelili Yehova yayinki akwawu ñovu yakuzata mudimu wukwawu wazatileñayi? Hatiyili ichimaku. (Kuch. 11:24-29) Wadiña wadizoza nawa wetejeli antu amakwawu kumukwashaku kuzata mudimu wakusompesha antu. (Kwid. 18:13-24) Chumichi chawahili chikupu muloña aIsarela ekalili nawansompeshi amavulu akusompa nyiloña chatela ahembelelaña muntu wumu. Chumichi chinakumwekesha nawu Mosi washili maana hakukwasha amakwawu bayi kwikala nanyidimu yayivuluku. Ichi hichakutalilahu chachiwahi chitwatela kwimbujola. Neyi tunakukeña netu Yehova yatuzatisheña, twatela kwikala adizoza kubadika kwiluka hohu yuma yayivulu. w19.09 5-6 ¶13-14

Hituneluki mazu akahosha nyuza akaletesha akamulukuki Babiloni Muneniku. Hadaha akahosha nawu kwitiya dikunakuletesha nyuza yibuleña kwikala mukuwunda nawa diwu aluwañeshaña yuma yelaña nfulumendi. Hela anateli kuhosha nawu ana makuloñesha amunsakililu anatambuli maheta niyiteli yayivulu. (Chim. 18:3, 7) Nyuza chiyikalukuka nsakililu yakutwamba hiyikajilumuna antu ejima ekalamuku. Ilaña, chinamwekani neyi nyuza yikakisañana kuloñesha kwansakililu yakutwamba. Hanyima yakwila iyi nyitayi anayikisañani dehi, antu adiñamu akeluka nawu anlomboli amunsakililu anakañanyi kwila mwakaniniwu nawa akadambula kuniji nsakililu. Kujilumuka kwaBabiloni Munenu kwakashimbula wanyi. (Chim. 18:10, 21) Yehova watukana nindi “wakayihihisha owu mafuku” alukadi lwasweja kulonda indi “atondewa” ninsakililu yalala yikamwinewi.—Maku 13:19, 20. w19.10 15 ¶4-5

Amama jawantu, hadaha avwali jenu adiña akalisha nawa ahosheleña nakuzuwa-zuwa nawanyanawu. Dichi ninenu munateli kutachika kutoñojoka nenu diyi njila yayiwahi yakukulishilamu anyana. Hela chakwila mwadiza dehi chakeñañayi Yehova nindi mudizisheña anyanenu, chinateli kuyikalila kwikala awunda nawa adiwunjika neyi munakuhosha nawanyanenu, sweje-e neyi anakuluwañesha hampinji yimunazeyi. (Efwe. 4:31) Mpinji yamuchidiwu, diyi mpinji yimwatela kumushindamena Yehova mukulomba. (Mas. 37:5) Amama jawantu amakwawu chayikalilaña kumwekesha kukeña kudi anyanawu. Hadaha ayikulishili muyisaka yakwila anvwali adikundaña nawanyanawu wanyi. Neyi dichayikulishawu, bayi mwimbujola anvwali jenuku. Mama yawantu wamwovwahilaña Yehova watela kuyimwekeshela anyanindi kukeña. Chinateli kumukalila hakwila yahimpi. Ilaña nateli kuhimpa nawa yena nichisaka chindi anateli kwikala namuzañalu. w19.09 18-19 ¶19-20

Muntu wadifukulaña kudi Yehova iku nakukisila mpinji niñovu yindi kukufwila maheta, dikwila nawu nakukalakela anyanta ayedi. Hakudifukulaña chikupu kudi Yehova muchalalaku. Kukukuma kwayaaka yawapostolu, antu amuchipompelu chadiña mumusumba waLayodikeya adisambileña nawu: “Ami nidi mukwamaheta nawa nekali namaheta amavulu, hinnakukeña chuma chidi chejimaku.” Ilaña kumesu aYehova niYesu adiña ‘nayihuñu, anshona, atuzweñi, amputamesu nawa adiña nawuvu.’ Yesu hayifumbili muloña wamaheta adiñawu nawuku, ilaña muloña wakwila aswejeli kukeña mali chakwila aluwañesheleña wubwambu wawu naYehova. (Chim. 3:14-17) Neyi tumona netu tunatachiki kufwila mali, twatela kuzatilahu swayi-swayi kulonda tuyitondolweli. (1 Tim. 6:7, 8) Neyi nehi, tukutachika kufwila yuma yikwawu nawa Yehova wukwiteja wanyi kudifukula kwetu. Muloña yena “hiNzambi wukweti mukawu.”—Kuh 4:24. w19.10 27 ¶5-6

Izu dachiGiriki dabalumunawu nawu ‘chayilombweliwu’ datalisha mukwila nawu “chayisendeliwu; chayihoshesheliwu.” Nsoneki wamukanda waYilwilu Luka niyena wazatishili nhoshelu yoyimu yezu dachiGiriki hakulumbulula mbopolu ‘yalelwiliwu’ kudi mpepela. (Yilw. 27:15) Muntu wumu wadiza Bayibolu walumbulwili nindi Petulu chasonekeliyi nindi ansoneki aBayibolu ‘ayilombweli’ naspiritu yajila, wazatishili mazu adi kuletesha antu kutoñojoka chendaña mbopolu. Petulu wahosheleña nindi, neyi chendeshañawu mbopolu kudi mpepela kulonda yishiki kuyinakuya, atuprofwetu niansoneki aBayibolu niwena ayilombweli kudi spiritu yajila hakwila nawu azati mudimu wawu. Muntu yowumu wahosheli nindi: “Ansoneki aBayibolu adiña neyi mbopolu yinakandamishiwu itenti kwiwulu. Yehova wazatili mudimu windi. Wayinkeli “mpepela,” hela spiritu yajila. Ansoneki aBayibolu niwena azatili mudimu wayinkeliwu. Awuzatili kwesekeja nachayilombweliwu kudi spiritu yajila. Nawa makonu, tunateli kwesekeja spiritu yajila nampepela yahakaluñalwiji. Mbopolu yinateli kushika chiwahi kwiluña kuyinakuya hela chakwila hakaluñalwiji hadi mankanda. Munjila yoyimu, spiritu yajila yatukwashaña kutwalekahu kumukalakela Yehova hela chakwila tunakumona kukala kwasweja nichitukashika mwituña dadiha. w19.11 9 ¶7-9

Mpinji yikwawu tunateli kuzeya. Ilaña bayi tutoñojokaña hakukala kutukweti mpinji yejimaku. Neyi tuswejaña kutoñojoka, tukuvulamena yuma yayiwahi yejima yatukanayi Yehova. (Chim. 21:3, 4) Tukuzeya chakwila tukutachika nikutoñojoka netu tuleki kumukalakela Yehova. Talenu Muhela wakuUnited States chatwalekelihu kukolesha chikuhwelelu chindi hampinji yakatili nfumwindi chikupu. Wasonekeli nindi: “Kukala kutwahitileñamu kwadiña nakutuzeyesha mpinji yikwawu, ilaña chikuhwelelu chetu chakola. Nasakililaña hansañu yejima yatwinkañayi Yehova kulonda tukolesheña chikuhwelelu chetu nikutukwasha. Twakeñaña nankashi kutufumba nikutukolesha. Kwatukwashaña kutwalekahu kumukalakela Yehova nikuumika.” Mazu aniwu muhela anatukwashi kwiluka nawu ninetu twatela kuumika kukala! Munjilanyi? Anukenuña nenu makabi imwamonaña hikweseka kwafumaña kudi Satana. Mukuhwelelenu Yehova nenu wukuyikundejaña. Nawa zatishenuña yakuda yakuspiritu yayinkañayi. w19.11 16 ¶9-10

Akulumpi atela kuzatisha chishina chamuBayibolu. Mukulumpi weluka nindi hatela kuhosha “nsañu yakujinda” yawantu amuchipompeluku. Muloña neyi yela mwenimu, akuleka kumukuhwelela nawa ijina dindi dikutama. Antu akweti kukooleka muchipompelu hiyatela kwikala antu akweti “madimi ayediku,” hela “abulaña kutwamba.” (1 Tim. 3:8; tth.) Chinayi mukwila nawu hiyatela kudimba antu hela kukeña matuñuku. Neyi mukulumpi wamukeña ñodindi, hakumulejaña nsañu yinabuli kumukundamaku. Mumbanda nateli kumukwasha nfumwindi kwikala nejina dadiwahi neyi yabulaña kumukanjikija nindi yahoshi nsañu yakajindilu. Neyi mumbanda yela mwenimu, bayi neyi wukukwasha nfumwindi hohuku ilaña wukumwekesha nikalemesha kudi ana antu alejeli nfumwindi nsañu yakujinda. Nawa chuma chasweja kulema, wukumuzañalesha Yehova nawa wukuleta kuwunda nikunuñañana muchipompelu.—Rom. 14:19. w20.03 22 ¶13-14

Mu 1512 B.C.E., chatuñiliwu tabanaka kumpidi yaSinayi, Mosi walombweli ichi chidika hamutondeliwu Aroni nianyanindi kwikala atupristu. (Kwid. 40:17; Lev. 9:1-5) Yehova wamwekesheli ñahi nindi wetejeli atupristu atondeliyi? Chakiswilileñawu aAroni naMosi antu, Yehova watemesheli kesi nawa kanoñesheli nyilambu yejima yashalilihu hakameña. (Lev. 9:23, 24) Kesi kafumini mwiwulu hampinji yatondeliwu kapristu muneni kamwekeshelidi? Yehova wamwekesheli nindi wamwitejeli Aroni kwikala atupristu. A Isarela chamweniwu iwu wunsahu wafumini kudi Yehova elukili nawu atela kukwashaña atupristu. Komana chumichi chalema kudi etu? Eña! Wupristu wadiñaku muIsarela wadiña nakwimenaku mwevulu wachuma chalema. Kristu, diyi Kapristu Muneni wudi nawatupristu 144,000, akayuula hamu naKristu mwiwulu. (Heb. 4:14; 8:3-5; 10:1) Chakadi nikujina, Yehova nakulombola nikukiswila kuloñesha kwindi makonu. w19.11 23 ¶13; 24 ¶14, 16

Hadiñayi muKorinda kapostolu Pawulu wadiña nakushakama kwitala daAkwila naPrisila nawa “wazatilileña hamu nawu muloña elukili mudimu wakuchima matenti.” Chahosheliyi Pawulu nindi wazatileña “wufuku nimwaana” hatalishili mukwila nindi wazatileña chakadi kunookaku. Hefuku daSabata wachimineña wanyi matenti. Hanidi ifuku, wadiña nampinji yakuyishimwina aYudeya abulileña kuzata haSabata. (Yilw. 13:14-16, 42-44; 16:13; 18:1-4) Pawulu wazatileña mudimu wakumujimba, ilaña wakalakeleña mafuku ejima “mudimu wajila wakushimwina nsañu yayiwahi yaNzambi.” (Rom. 15:16; 2 Kor. 11:23) Wakolesheli amakwawu kwila chochimu. Hela chochu, Akwila naPrisila adiña “akwakukalakala hamu [nindi] mudi Kristu Yesu.” (Rom. 12:11; 16:3) Pawulu wayilembeleli akwaKorinda kwikala nayuma “yayivulu yakuzata mumudimu waMwanta.” (1 Kor. 15:58; 2 Kor. 9:8) Yehova wamoneneni kapostolu Pawulu kusoneka nindi: “Neyi muntu nakukeña kuzata wanyi, bayi yadaku.”—2 Tes. 3:10. w19.12 5 ¶12-13

Yehova waleñeli antu atachi nawuswa wakwikala nanyana. Hinyi watela kufuukula neyi adisumbula akekala nanyana hela mpinji yakekalawu nanyana? Muyisemwa yikwawu, antu atoñojokaña nawu antu neyi anadisumbuli atela kutachika kwikala nanyana. Anateli kuyikanjikija kudi antaña jawu nikudi antu amakwawu kulondela chisemwa chawu. Manakwetu Jethro wakuAsia, wahosheli nindi, “Muchipompelu chetu antu adi nanyana akanjikijaña adisumbula abula nyana kwikala nanyana.” Manakwetu Jeffrey niyena kokuAsia wahosheli nindi, “Antu amakwawu alejaña adisumbula abula anyana nawu akekala wanyi nawakuyihemba neyi anashinakaji.” Hela chochu, adisumbula atela kudifuukwila aweni neyi chakwila atela kwikala nanyana. Chidi kudi wena kufuukulahu, muloña diwu akweti wuswa. (Ñal. 6:5, tth.) Chakadi nikujina, amabwambu niantaña jawu akeñaña anadisumbuli kwikala namuzañalu. Ilaña atela kwiluka nawu ana adisumbula diwu atela kufuukula neyi chakwila atela kwikala nanyana hela nehi.—1 Tes. 4:11. w19.12 22 ¶1-3

Komana chayikalilaña kumumona Nzambi nenu hiTata yenu? Amakwawu anateli kutoñojoka nawu Yehova wabadika nawa nawu hitwalema kudi yenaku. Ajinookaña nawu Nzambi Wañovu Jejima wayakamenaña wanyi hamuntu-hamuntu. Ilaña, Tata yetu wukweti kukeña wakeñaña wanyi nindi tujinookeña. Watwinka wumi nawa wakeñaña nindi twikali amabwambu jindi. Hanyima yakuhosha iyi nsañu, kapostolu Pawulu wayilumbulwilili antiyilili jindi muAtenisi nindi Yehova “hekala kwakulehi nanetu ejimaku.” (Yilw. 17:24-29) Nzambi nakukeña nindi wejima wetu tuhanjekeña nindi neyi chahanjekañayi mwana nanvwali yindi wukweti kukeña nawa wakamenaña. Amakwawu chayikalilaña kumumona Yehova neyi hiTata yawu muloña wakwila atata jawu akumujimba ayimwekesheleli kukeña niluwi wanyi. Muhela wumu mukwaKristu wahosheli nindi: “Atata adiña atama muchima. Chinatachikili kudiza Bayibolu chankalilili kuswina kwakwihi naTata yetu wamwiwulu.” Komana ninenu dichimwatiyaña? Neyi dimu bayi muneñaku, mukuhita kwampinji mwakeluka nenu Yehova hiTata yenu wamuwahi. w20.02 3 ¶4-5

Yesu watulejeli nindi Yehova walemesha nyidimu yejima yitwamuzatilaña hela chakwila twayimonaña netu yalema wanyi neyi tushinakaja. (Mas. 92:12-15; Luka 21:2-4) Dichi zatenu hanakumini ñovu jenu. Chakutalilahu, munateli kuhosha hadi Yehova, kulombelaku amanakwenu nikukolesha amakwawu kulonda atwalekihu kwikala ashinshika. Yehova wayimonaña nindi mudi akwakukalakala hamu nindi muloña wakumwovwahila, bayi hamuloña wanyidimu yimwakalakalañaku. (1 Kor. 3:5-9) Twatiyaña kuwaha kumukalakela Yehova, Nzambi walemesha antu amukalakelaña. Watuleñeli nindi twileña nkeñelu yindi nawa chumichi chatutiyishaña kuwaha muchihandilu chetu. (Chim. 4:11) Hela chakwila mukaayi anateli kutumona neyi tudi amukunkulwayi, Yehova watulemesha. (Heb. 11:16, 38) Neyi twaneñaña muloña wayikatu, kubula mali hela wushinakaji, twanukeña netu kwosi chuma chinateli kutwambula kukukeña kwaTata yetu wamwiwuluku.—Rom. 8:38, 39. w20.01 18 ¶16; 19 ¶18-19

Tunateli kutondolwela ichima neyi twikala adizoza nawa tuzañalalaña nayuma yitukweti. Neyi twikala naniyi yilwilu, hitukwikala nechimaku. Kudizoza kunateli kutukwasha kubula kusweja kutoñojoka netu twabadika akwetu. Muntu wadizoza hatoñojokaña nindi yena hohu diyi watelela yuma yejimaku. (Ñal. 6:3, 4) Muntu wazañalalaña nayuma yikwetiyi, hadesekejaña nawakwawuku. (1 Tim. 6:7, 8) Muntu wadizoza nawa wazañalalaña nayuma yikwetiyi, wazañalalaña neyi yamona mukwawu anamwinki chuma chachiwahi. Tunakukeñeka wukwashu waspiritu yajila yaNzambi kulonda yitukwashi kutondolwela ichima nakwikala adizoza nikuzañalala nayuma yitukweti. (Ñal. 5:16; Fwi. 2:3, 4) Spiritu yaYehova yinateli kutukwasha kwiluka chidi yitoñojoka niyilwilu yetu. Nawukwashu waNzambi, tunateli kufumisha yitoñojoka yafwana mudetu nikuhiñishamu yayiwahi.—Mas. 26:2. w20.02 15 ¶8-9

Mwatela kwanuka nenu kudihana hichikaninu nawa Yehova nakukeña nindi mwili mumwakanini. Kundamenu kwakwihi nachipompelu. Amanakwenu niahela muchipompelu anekali chisaka chenu chakuspiritu. Neyi mupompaña mpinji yejima, wubwambu wenu nawena wukukola. Tañenuña Izu daNzambi nikutoñojokahu chikupu mpinji yejima. (Mas. 1:1, 2) Ikalenuña nampinji yakutoñojoka chikupu hayuma yimunatañi. Nkumininaku mazu akuyishika hamuchima. ‘Twalekenuhu nakulomba.’ (Mat. 26:41) Kulomba kwenu kwakufuma hamuchima kukuyikwasha kuswina kwakwihi naYehova. “Twalekenuhu kusambila kukeña Wanta.” (Mat. 6:33) Munateli kwila mwenimu kuhitila mukulemesha nankashi mudimu wakushimwina muwumi wenu. Neyi mushimwinaña mpinji yejima, chikuhwelelu chenu chikukolelañaku nawa mukukwasha antu kwikala nakuchiñeja kwawumi wahaya nyaaka. Kukala kwejima kumunateli kuhitamu mukanu kaayi ‘kwakapinji kantesha nawa kwapepela.’ (2 Kor. 4:17) Kwambukaku, neyi mupapatishewa mukwikala nachihandilu chachiwahi chayinu mpinji ‘niwumi walala’ wunakwinza kumbidi.—1 Tim. 6:19. w20.03 13 ¶19-21

Neyi kadizi wenu nakuyilaku hambidi wanyi, mpinji yikwawu munateli kudihula nenu, ‘Nileki kumudizisha?’ Henohu kanda mufuukulihu, dihulenu nenu: ‘Komana kadizi wami wakwataña swayi yuma yinakudizayi tahindi nehi? Natachiki ‘kuhemba’ hela kuzatisha yuma yinakudizayi?’ (Mat. 28:20) Chawushona, atudizi amakwawu adi neyi aIsarela adiñaku mumafuku aEzekeli. Talenu chamulejeliyi Ezekeli hadi antu amuchidiwu kudi Yehova nindi: “Komana wena anakumoni neyi wukamina kakawahi kamuntu wukweti izu dasweja kuwaha, weluka kwimba chisanji chachiwahi. Muloña mazu eyi ayitiyaña, ilaña kuyilaña nehi.” (Ezek.33:32) Chinateli kutukalila kumuleja muntu netu tukuleka kudiza nindi. Hela chochu, “mpinji yinashaliku yinakehi dehi.” Chatela tukiseña mpinji nakudizisha kadizi wunakubula kuyilaku hambidi, twatela kukeña antu adi “nanyichima yashinshika yakukeña kwikala nawumi wahaya nyaaka.”—Yilw. 13:48. w20.01 6 ¶17; 7 ¶20

A Kristendomu hiyatañishaña chalala chamuBayibolu chakwila nawu antu ovwahila akashakama haya nyaaka hamasekiku. (2 Kor. 4:3, 4) Makonu, nsakililu yayivulu yakutwamba yatañishaña nawu antu amawahi ejima ayaña mwiwulu neyi anafwi. Ilaña hadiña chaambu nawaTudizi aBayibolu asonekeleña Kaposhi Kakutalila kufuma mu 1879. Wena elukili nawu Nzambi wakafuntisha Paradisa hamaseki nawa antu amavulu ovwahila akashakamaña hanu heseki, bayi mwiwuluku. Hela chochu, hahitili mpinji yeneni hakwila eluki awa antu ovwahila. Atudizi aBayibolu elukili cheñi kwesekeja naNsona nawu amakwawu “[akayilanda] kufuma hamaseki” kulonda akayuuli naYesu mwiwulu. (Chim. 14:3) Elukili nawu hizanvu dawa 144,000 dadikita nawa akwaKristu adihana amukalakeleli Nzambi nakashinshi mpinji yadiñawu hamaseki. w19.09 27 ¶4-5