May

Yesu hadiñayi kansi wadiña nakuyovwahila anvwali jindi. Hadikañileña nanshimbi jawanvwali jindi muloña nindi welukili jajivulu kubadika wenaku. Chineli Yesu diyi wadiña mukulumpi hadi anyana ejima, chakadi nikujina wazatili mudimu windi kwesekeja nachakeñekaña. Wazatili nañovu hakwila nawu yadizi mudimu wakusoña kudi tata yindi Yosefu kulonda chimukwasheñaku kuhemba chisaka. Hadaha Yesu amulejeli kudi anvwali jindi kutalisha hansañu yakuvwalika kwindi nichahosheliwu antemesha jaNzambi kutalisha hadi yena. (Luka 2:8-19, 25-38) Yesu hakuminini dakwiluka nsañu yamulejeliwu hohuku, ilaña wadizili cheñi muNyikanda. Tuneluki ñahi netu Yesu wadizileña Izu daNzambi? Muloña hachidiñayi kansi, antañishi muYerusalema “ahayamini nankashi nañakwilu yindi nikashinshi kakutiyishisha yuma chiwahi.” (Luka 2:46, 47) Nawa hadiñayi nayaaka 12, Yesu wamwekesheli nindi Yehova diyi Tata yindi.—Luka 2:42, 43, 49. w20.10 29-30 ¶13-14

Kusañuka kwaYesu dikunateli kutukwasha kukuhwelela netu antu afwa dehi akayisañula. Pawulu chatachikiliyi kuhosha hansañu yakusañuka wahosheli yuma yisatu yalala. (1) “Kristu wafwili kukoola nshidi jetu.” (2) “Amujiikili.” (3) “Amusañwili hefuku damuchisatu kwesekeja nachahosha Nsona.” (1 Kor. 15:3, 4) Kufwa kwaYesu, chamujiikiliwu nikusañuka kwindi kwatukwashaña ñahi? Kaprofwetu Isaya washimwineñahu dehi nindi Mesiya “[aka]mufumisha hetuña dawamomi” nawa ‘akamujiika nawantu atama.’ Ilaña kwadiña yuma yenjileña nakumwekana. Isaya wabombelelihu nindi Mesiya ‘wakasenda nshidi yawantu amavulu.’ Yesu welili mwenimu kuhitila mukuhana ifutu danyiloña. (Isa. 53:8, 9, 12; Mat. 20:28; Rom. 5:8) Dichi kufwa kwaYesu, kumujiika nikusañuka kwindi kwatukwashaña kukuhwelela netu akatusubula kunshidi nikukufwa nawa twakadimona cheñi nawantaña jetu afwa dehi. w20.12 2-3 ¶4-6; 5 ¶11

Kakavulu kapostolu Pawulu washimwinineña mumasinagogi awaYudeya. Chakutalilahu, musinagogi yamuTesalonika, “hadi sabata jisatu wahanjekeleña nawu kuzatisha Nsona.” (Yilw. 17:1, 2) Chinamwekani neyi Pawulu wadiña wakasunuka kushimwina musinagogi. Amukulishili neyi kaYudeya. (Yilw. 26:4, 5) Pawulu wayilukili aYudeya, nawa wayishimwinini mukukasunuka. (Fwi. 3:5) Chelili Pawulu amufumishi muTesalonika nimuBereya kudi akwakumukabisha, wayili kuAtenisi. Cheñi, “watachikili kuhanjeka musinagogi nawaYudeya niantu amakwawu adifukwileña kudi Nzambi.” (Yilw. 17:17) Ilaña hampinji yashimwinineñayi kumaluña akulandishila, wadiña nawantu acheñi. Hakachi kawantiyilili jindi hadiña antu adiza maana awantu niakwaNyuza amweneña yuma yatañishileñayi nawu “ntañishilu yayiha.” Amwilili nawu: “Wunakutañisha yuma yitwabula kutiyahu dehi.”—Yilw. 17:18-20. w20.04 9 ¶5-6

Bayi mutoñojokaña nenu mudi amukunkulwayi neyi mukweti kuzeya-zeyaku. Mwatela kwanukaña nenu kwosi muntu waloña kumesu aNzambi. Dichi wonsu wetu twakeñaña Nzambi yatumwekesheli luwi lwindi lwasweja kuhitila mwifutu danyiloña. (Efwe. 1:7; 1 Yow. 4:10) Muloñadi chitwatela kubula kuneñela neyi chakwila tunakukeña kwila yuma yaloña ilaña tunakukañanya? Amanakwetu niahela muchipompelu anateli kutukolesha! Neyi tunakukeña kuhanjeka nawu anateli kututiyilila nakanañachima nawa akutukolesha. (Yish. 12:25; 1 Tes. 5:14) Muhela Joy, wakuNigeria wadiña nachineñi wahosheli nindi: “Nadi kutwesha kuumika wanyi chakadi amanakwetu niahela. Chankoleshañawu amanakwetu niahela chamwekeshaña nawu Yehova wakulaña kulomba kwami. Chumichi chinankwashi ninami kwiluka chakukolesha akwetu ananeñi.” Twatela kwanukaña netu amanakwetu niahela hiyanateli kwiluka neyi chakwila tunakukeñeka kutukoleshaku. Dichi, twatela kuleja akwetu akwakwitiya apama neyi tunakukeña netu atukwashi. w20.12 23-24 ¶7-8

Kakavulu, neyi munakukeña kwikala ibwambu damuntu mwatela kwikala nampinji yakuhanjeka nindi. Chimunakuhanjeka naniwu muntu, nakudileja yitoñojoka niyuma yimunahitimu wubwambu wakolaña. Mpinji yikwawu, chapela wanyi kwikala amabwambu jaYesu. Muloña watachi wudi wakwila nawu kanda tumumoneñahu dehi Yesu namesu kapu. Akwakristu amavulu amumafuku awapostolu, niwena chadiña nakuyikalila. Hela chochu, kapostolu Petulu wahosheli nindi: “Hela chakwila himwamumwenihuku, mwamukeña. Hela chakwila hayinu mpinji himunakumumonaku, ilaña mwamukuhwelela.” (1 Pet. 1:8) Dichi, tunateli kwikala amabwambu jaYesu hela chakwila kanda tumumoneñahu dehi. Cheñi hitwahoshaña naYesuku. Neyi tunakulomba, twahoshaña naYehova. Hela chakwila twalombaña kuhitila mwiijina daYesu, ilaña hitwahoshaña nayenaku. Kafwampi Yesu wakeñaña wanyi kulomba kudi yena. Muloñadi? Muloña kulomba hinjila yimu yakudifukwilamu nawa twatela kudifukula hohu kudi Yehova. (Mat. 4:10) Hela chochu, twatela kumukeña Yesu. w20.04 20 ¶1-3

Akwakutemuka lufuchi amuyisela yawaGiriki adiña nakuumika kukala kwejima. Ilaña ashili nankashi maana hakudiza nihañovu jawu. Tudi neyi ana akwakutemuka lufuchi munjila yakwila atudizishaña chakutemuka lufuchi lutudimu. Ilaña etu twayibadika akwakutemuka lufuchi. Twafumishaña ñovu kudi mukwakuhana ñovu. Neyi tumushindamena Yehova, watukana kutudizisha nikutukolesha chikupu. Kapostolu Pawulu womikili kukala kwakuvulu. Kubombela hamakabisha nikasawuntu katambwililiyi, mpinji yikwawu wazeyeleña nawa womikileña kukala kwateneniyi nindi “mwiña mumujimba.” (2 Kor. 12:7) Chatela yeteji iku kukala kumuzeyeshi, yena wamweni nindi diyi njila yakushindamena hadi Yehova. (2 Kor. 12:9, 10) Chineli Pawulu wadiña naniyi yitoñojoka, Yehova wamukwashili kuumika kukala kwejima kwamweneñayi. w20.04 29 ¶13-14

Tukweti chawaana chabulaña kumwekana chakwikala “akwakukalakala” hamu naYehova nikuloñesha kwindi kwamwiwulu. (2 Kor. 6:1) Twazatilaña nawu hamu mpinji yejima yitwazataña mudimu wakwilisha atumbanji. Pawulu waditeneni yomweni niejima azataña mudimu wakushimwina nindi: “Etu tudi akwakukalakala hamu naNzambi.” (1 Kor. 3:9) Neyi tuzataku mudimu wakushimwina, twekalaña cheñi akwakukalakala hamu naYesu. Anukenu nenu hanyima yakuyileja atumbanji twindi nindi yenu “mwakelishi antu akunyuza yejima ekali atumbanji,” Yesu wahosheli nindi: “Ami nukwikalaña nanenu.” (Mat. 28:19, 20) Indi añelu? Twakooleka chikupu kuzatila hamu nawañelu hakushimwina “[nsañu] yayiwahi . . . kudi antu ashakama hamaseki.” (Chim. 14:6) Iwu wukwashu wafumaña mwiwulu watukwashaña kwiladi? Chitwakuwaña nsañu yaWanta, mbutu yikwawu yaholokelaña hanyichima yayiwahi nawa yakulaña. (Mat. 13:18, 23) Hinyi wakulishaña iyi mbutu nakusoña nyikabu? Yesu walumbulwili iyi nsañu munsona yalelu. w20.05 30 ¶14-15

Yisaka yayivulu yinakudambula muloña wakudiseña. Yisaka yikwawu yashakamaña mwitala dimu yadikeña nankashi wanyi. Chakutalilahu, nkoñu wumu wahosheli nindi: “Amama jawantu, atata jawantu nianyana ahanjekaña wanyi, mpinji yawu ayikisilaña hamakompyuta, hamatabuleti, hamafoni nikuyisela yahamavidiyo. Hela chakwila ashakamaña mwitala dimu, adiluka chiwahi wanyi.” Hitunakukeña kwikala neyi antu adi mukanu kaayi abulaña kumwekesha kukeñaku. Twatela kumwekeshaña chikupu kukeña kudi antu amuchisaka chetu niamanakwetu niahela muchipompelu. (Rom. 12:10) Kudikeña chikupu kwatalisha mudihi? Idi izu datalisha kukudikunda kwadikundañawu antu amuchisaka. Iku dikukeña kutwatela kuyimwekeshelaña amanakwetu niahela. Neyi tudimwekeshelaña iku kukeña, hakachi ketu hakwikala kunuñañana, dichuma chakeñekaña mukudifukula kwalala.—Mika 2:12. w21.01 20 ¶1-2

Izanvu danuñañana dinateli kutambwila masomu kubadika dabula kunuñañana. Muchima wenu wunateli kwikala neyi idi izanvu danuñañana neyi yitoñojoka yenu, yuma yimwafwilaña nichimwaditiyaña yanuñañana mukumukalakela Yehova. Anukenu nenu Satana nakukeña mwikali nanyichima yiyedi. Nakukeña yitoñojoka yenu, yuma yimwafwilaña nichimwaditiyaña jambukiku nanshimbi jaYehova. Hela chochu, mwatela kwikala namuchima wumu hohu hakwila nawu mumukalakeli Yehova. (Mat. 22:36-38) Bayi mumwiteja Satana yayileteshi kwikala nanyichima yiyediku. Mulombenu Yehova neyi chalombeliyi Davidi nindi: “Bayi niikala nanyichima yiyeduku, chiña wunyinka wumu hohu.” Ilenuña mumunakulomba. Muyuma yejima yimwafuukulaña ifuku niifuku chili yanyanya hela yamaneni, fwilenuña kumwekesha nenu mwalemesha ijina daYehova. Hamu neyi aYinsahu jaYehova, neyi mwila mwenimu mukujilikaña idi ijina. (Yish. 27:11) Nawa wejima wetu tukahosha neyi chahosheliyi kaprofwetu Mika nindi: “Twakendaña mwiijina daYehova Nzambi yetu chahaya nyaka nanyaka.”—Mika 4:5. w20.06 13 ¶17-18

Iku kulukuka kwamwanta wakukabeta kakuchimunswa hamu najinfulumendi jamukaayi, kwakaletesha Yehova yakazuwi nankashi nikuleta njita yaAmagedoni. (Chim. 16:14, 16) Haniyi mpinji, mwanta wakukabeta kakuchimunswa hamu nanyuza yejima akemenañaku Gogi waMagogi, akayijilumuna nawa “kwosi niniwu wakamukwashaku.” (Dan. 11:45) Vasi yinalondelihu muDanyeli yinashimuni nsañu yikwawu chakamujilumunawu mwanta wakukabeta kakuchimunswa nijinfulumendi jejima nichikatupulwishawu. (Dan. 12:1) Iyi vasi yinatalishi mudihi? Mikeli didu ijina dikwawu daMwanta wetu wunakuyuula, Kristu Yesu. Natwalekihu ‘kwimenaku’ antu jaNzambi kufuma tuhu mu 1914 hatachikili Wanta windi kuyuula mwiwulu. Kumbidi ‘wakemana,’ hela kujilumuna ayilumbu jindi haAmagedoni. Iyi njita diyakekala chuma chakukumishaku chatenayi Danyeli nindi “mpinji yayihuñu” yakadi kumonañahu dehi.—Chim. 6:2; 7: 14. w20.05 15-16 ¶15-17

Hampinji yadiñayi Yosefu nduñu nawa mukaleya, kwosi yuma yadi kwilayi hakwila nawu chihandilu chindi chiwahi. Chumanyi chamukwashili kuumika? Chatela yatoñojokeña hayuma yateleli kubula kwilayi, yena washili maana hamudimu wamwinkeliwu. Yosefu wamutwamijiliku Yehova muchihandilu chindi. Chafuminimu, Yehova wakiswilileña yuma yejima yelileñayi Yosefu. (Kutach. 39:21-23) Iyi nsañu yatudizishaña nawu kanu kaayi katama nawa antu anateli kutwila yuma yatama. Nimukwetu mukwakwitiya nateli kutwila chatama. Ilaña neyi tumumonaña Yehova netu diyi Ilola detu nawa diyi Chiswamu chetu, hitwaketeja chuma chidi chejima kutukañesha kumukalakelaku. (Mas. 62:6, 7; 1 Pet. 5:10) Anukenu nenu, Yosefu wadiña nayaaka kwakwihi na 17 hampinji yamulejeliwu yilota kudi Yehova. Yehova wakuhwelela chikupu niambuña indi atwansi. Atwansi amavulu makonu adi neyi chadiñayi Yosefu. Niwena amukuhwelela Yehova. Amakwawu anayikasi mutuleya hamuloña wakumwovwahila Nzambi.—Mas. 110:3. w20.12 16 ¶3; 17 ¶5, 7

Kapostolu Petulu niYowanu amweni nawu chachiwahi kuyikabisha muloña wakumulondela Yesu nikushimwina hadi yena. (Yilw. 4:18-21; 5:27-29, 41, 42) Atumbanji atiyili nsonyi wanyi. Mukuhita kwampinji akwaKristu akusambila akwashili antu kubadika ayilumbu jawu. Chakutalilahu, nyikanda yonenewa yasonekeliwu kudi awa akwaKristu yinatwalekihu kukwasha antu amavulu kwikala nakuchiñeja. Nawa Wanta watumbakesheleñawu wunakuyuula mwiwulu nawa katataka wuyuuli antu ejima. (Mat. 24:14) Kwambukaku, mawanta añovu adiña nakukabisha akwaKristu ajiya dehi. Kubombelahu, atumbanji ashinshika chayinu mpinji hiyanyanta mwiwulu. Ilaña ayilumbu jawu afwa; nawa neyi akayisañula, akayiyuulaña kudi Wanta watiyakesheleñawu akwaKristu aheleliwu.—Chim. 5:10. w20.07 15 ¶4

Abarahama wakuhweleleli chikupu muyikaninu yaNzambi, chadiña tuhu neyi wamumweneña Wawayishewa hela Mesiya owu wakekala Mwanta muWanta waNzambi. Dichaletesheli Yesu yoyileji aYudeya nindi: “Tata yenu Abarahama wazañaleli nankashi chachiñejeleñayi kumona ifuku dami, dichi wadimweni nawa wazañaleli.” (Yow. 8:56) Chinamwekani hatooka nawu Abarahama welukili nindi anyanindi amakwawu akekala muniwu Wanta waYehova nawa wadiña nakumutalila Yehova kulonda yashikiji ichi chikaninu. Abarahama wamwekesheli ñahi nindi wadiña nakutalila iwu musumba, hela Wanta wapiminiwu kudi Nzambi? Chatachi, Abarahama hakundaminihu kuwanta wudi wejima hanu hamasekiku. Wadiña nakutuntujoka, hashikaminihu heluña dimuku nawa hakundaminihu kudi mwanta wudi wejimaku. Kubombelahu, Abarahama hekalilihu nawanta windiku. Ilaña wadiña nakumwovwahila nikumuchiñilila Yehova kulonda yashikiji yikaninu Yindi. Cheliliyi mwenimu, Abarahama wamwekesheli nawu wamukuhweleleli Yehova chikupu. w20.08 3 ¶4-5

Yehova wakanini nindi kwosi muntu wakahosha muchiyuulu chaKristu nindi: “Ami nakataku.” (Isa. 33:24) Antu akasañulawu akekala akola kumujimba. Hela chochu, hiyakashikena kwikala awaninaku. Neyi ashikena kwikala awanina, chakayikalila antaña jawu kuyiluka. Chinamwekani neyi muChiyuulu chaKristu chaYaaka Ikombakaji, antu ejima akawaninaña chovu-chovu. Chakamana Yaaka Ikombakaji, Yesu wakahana Wanta kudi Tata yindi. Haniyi mpinji, Wanta wakekala wela dehi yuma yejima yakeñeleñayi Yehova kwila, kushilahu nikubalumuna antu kwikala awanina. (1 Kor. 15:24-28; Chim. 20:1-3) Fwikijenu chichakekala hakudimona cheñi nawantu itwakeña. Komana muzañalu wumwakatiya wukayiletesha kuseha tahindi kudila? Mwakazañalala nakumushimeka Yehova natumina? Chakadi nikujina, mwakasweja kumukeña Tata yenu wukweti kukeña niMwanindi analeteshi kukekali kusañuka. w20.08 16-17 ¶9-10

Kapostolu Pawulu wakolesheli akwaKristu kutoñojokahu neyi chakwila anateli kumukalakela Yehova muwujiki. (1 Kor. 7:8-9) Chakadi nikujina, Pawulu hadiwili akwaKristu ajikiku. Kafwampi, watondeli mukwenzi Timotewu wadiña manakwetu mujiki kwakamena nyidimu yaYehova yalema. (Fwi. 2:19-22) Dichi, chinateli kwikala chaluwa kutoñojoka netu manakwetu nashikihu hela nashikihu wanyi muloña wakwila wasumbula hela wasumbula wanyi. (1 Kor. 7:32-35, 38) Chili Yesu hela Pawulu kwosi washimwini nindi mukwaKristu watela kusumbula hela kwikala mujikiku. Hanu dinu tukuhoshahu netudi kutalisha hakusumbula nihawujiki? Kaposhi Kakutalila kaOctober 1, 2012, kaEnglishi kahosheli nawu: “[kusumbula niwujiki] hiyawaana kufuma kudi Nzambi. . . . Yehova hamonaña [wujiki] neyi chuma chakutiyisha nsonyi hela chakuneñeshaku.” Dichi twatela kulemesha amanakwetu niahela ajiki adi muchipompelu. w20.08 28 ¶8-9

Mumatuña amakwawu, antu akeñaña kudiza chatiyawu nsañu yayiwahi. Atiyaña neyi dichuma chatalilañawu hohu! Ilaña mumataña amakwawu, antu hiyakeñaña kutiya nsañu yinakuhosha hadi Nzambi hela Bayiboluku. Indi antu mwiluña denu ekala ñahi? Hichikweti muloña nachekalawuku, Yehova nakukeña nindi tutwalekihu kushimwina sampu mudimu wejima wunazatiki neyi chakeñañayi. Hampinji yatoñolayi Yehova, mudimu wakushimwina wakamana nawa “kukuma [kwakenza].” (Mat. 24:14) Yesu washimwini yuma yikamwekana yikamwekesha nawu tudi mumafuku akuminina nawa yinateli kukañesha amulondelaña kuzata mudimu wakushimwina. Wayikonkomweneni atumbanji twindi nindi “tonenuña.” (Mat. 24:42) Makonu, tunakumona yuma yatukañeshaña neyi yayikañesheli antu amumafuku aNowa kusha maana kukusoñamisha kwashimwiniyi Nowa. (Mat. 24:37-39; 2 Pet. 2:5) Dichi, twatela kutwamijaku mudimu wakushimwina watwinkayi Yehova kuzata. w20.09 8 ¶1-2, 4

Satana “nahili chikupu” nawa tukudidimba etu aweni neyi tutoñojokaña netu tunateli kutondolwela kuzuwa kwindi. (Chim. 12:12) Katataka, wejima wetu chikuhwelelu chetu chiikali mukweseka. Kaayi keña kamoni “lukadi lwasweja lwakwila kanda lwikaleñaku dehi kufuma hatachikiliyi Nzambi kuleña yuma kushika nikulelu.” (Mat. 24:21) Haniyi mpinji, antaña jetu akatubalumukilamu nawa mudimu wetu akawulekesha. (Mat. 10:35, 36) Kufwana Mwanta Asa, komana hamuntu-hamuntu twakamukuhwelela Yehova netu wakatukwasha nikutukiña? (2 Kushi. 14:11) Yehova nakutwinka yakuda yakuspiritu kulonda yatuloñesheli chadimu hayuma yakamwekana kumbidi. Nakulombola “nduñu wamaana nikashinshi” kulonda yatwinkeña yakuda yakuspiritu “hampinji yatelela” yikutukwasha kutwalekahu nakudifukula kwetu. (Mat. 24:45) Ilaña etu twatela kuzata nañovu nakukolesha chikupu chikuhwelelu chetu mudi Yehova.—Heb. 10:38, 39. w20.09 18 ¶16-18

Neyi yuma yinakwendela hamu nankeñelu yindi, Yehova nateli kuzatisha spiritu yindi yajila kulonda yayikojeji akwawuswa kwila chuma chinakufwilayi. Antu anateli kwimba kapila kulonda ateñululi menji kwesekeja nachinakukeñawu. Munjila yoyimu, Yehova nateli kuzatisha spiritu yindi yajila kulonda yiteñululi yitoñojoka yawantu akweti yifulu yalema eli yuma kwesekeja nankeñelu yindi. Neyi chumichi chimwekana, akwawuswa afuukulaña yuma yikukwasha antu jaNzambi. (Esekejenu Ezera 7:21, 25, 26.) Chumanyi chitwatela kwila? Twatela kuyilombelañaku “nianyanta niantu ejima akweti yifulu yalema” neyi awa antu anakufuukulahu yuma yinateli kukwasha mudimu wetu. (1 Tim. 2:1, 2, tth; Nehe. 1:11) Kufwana akwaKristu akusambila, ninetu twayilombelañaku kudi Nzambi amanakwetu niahela adi mutuleya.—Yilw. 12:5; Heb. 13:3. w20.11 15 ¶13-14

Neyi yenu mwadizileña naniwu kambanji wamuha, mukutiya kuwaha nankashi hakumona nenu napapatishewi. (1 Tes. 2:19, 20) Atumbanji amaha anapapatishewi ‘hinyikanda yakuhameka nachu’ bayi kudi antu ayidizishileña hohuku, ilaña nichipompelu chejima. (2 Kor. 3:1-3) Hadi yaaka yiwana twatambwilileña lipoti yawatudizi aBayibolu mwahita kaayi kejima akushika 10,000,000 kakweji nikakweji. Nawa muyeniyi yaaka antu akushika 280,000 apapatisheweleña chaaka nichaaka nakwikala aYinsahu jaYehova nawa atumbanji twaYesu Kristu. Tunateli kukwasha ñahi amakwawu hakachi kanawa atudizi aBayibolu kulonda apapatishewi? Yehova nadiwunjiki nawa nayinki antu mpinji kulonda ekali atumbanji twaKristu, dichi twatela kuzata kwesekeja nahakumina ñovu jetu kulonda tuyikwashi swayi-swayi apapatishewi. Mpinji yinamani dehi.—1 Kor. 7:29a; 1 Pet. 4:7. w20.10 6 ¶1-2

Sawulu Mwanta Sawulu hamwovwahilili Yehovaku. Sawulu wakaanini kwiteja chiluwa chindi chelili kaprofwetu Samweli yamulejimu nindi naluwañeshi. Ilaña wadiyiñishili nindi waluwañesheli wanyi nawa wahosheli nindi antu diwu amukanjikijili kwila ichi chuma. (1 Sam. 15:13-24) Hakusambila Sawulu wamwekesheli chilwilu chochimu. (1 Sam. 13:10-14) Chawushona, wadivwimbili mumuchima windi. Hahimpili yitoñojoka yindiku, dichi Yehova wamufumbili nawa wamukaanini. Hakwila tudizili kudi Sawulu, twatela kudihula netu: ‘Neyi nitaña kufumba kudi Mwizu daNzambi, komana nadiyiñishaña ami aweni? Komana nadiwulaña yuma yinateli kufumamu? Komana natwikaña akwetu nyiloña hayuma yinelaña?’ Neyi twakula netu eña hakachi kanawa malwihu, twatela kuhimpa yitoñojoka yetu niyilwilu yetu. Muloña neyi tubula kuhimpa, tunateli kwikala adivwimba nawa Yehova wukukaana kwikala ibwambu detu. w20.11 20 ¶4-5

Tondenu muntu imukukalakelaña. Mwatela kwiluka chekalayi Yehova, kwiluka nkeñelu yindi nichimunateli kuyila muchihandilu chenu. (Rom. 12:2) Kuhiñahu mukufuukulahu chuma chasweja kulema muwumi wenu, kumukalakela Yehova. (Yosh. 24:15) Neyi mutañaña Bayibolu mpinji yejima nawa mudizaña, mukusweja kumukeña Yehova nawa chikuhwelelu chenu chikukola. Fuukulenuhu kwila nkeñelu yaYehova muchihandilu chenu. Antu amukaayi kaSatana ahoshaña nawu neyi wuzatisha chawana chiwukweti kwila jiwunakukeña, wukwikala namuzañalu. Ilaña tweluka netu antu ashaña maana hakwikala namaheta adipwikaña “nayihuñu yayivulu nzwa-a nikwishinadi.” (1 Tim. 6:9, 10) Hela chochu, neyi mumutiyilila Yehova nawa mufuukulahu kwila nkeñelu yindi, mukwikala nachihandilu chachiwahi nawa ‘mwakamona kuwaha.’—Yosh. 1:8. w20.10 30-31 ¶17-18

Mumafuku awakwaKristu akusambila. Nsañu yashimwinineñayi Yesu yayikwashili antu ejima kwikala nakuchiñeja. Wayilejeli atumbanji twindi kutwalekahu kuzata mudimu watachikiliyi, kuhana wunsahu “kwakumina iseki dejima.” (Yilw. 1:8) Hela chochu, hiyatwesheli kuzata iwu mudimu muñovu yawuku. Akeñekeleña “nkwashi” dikwila nawu spiritu yajila, yayishiikiliyi Yesu. (Yow. 14:26; Zek. 4:6) Atumbanji twaYesu atambwilili spiritu yajila haPentekosta 33 C.E. Nawukwashu waniyi spiritu, atachikili kushimwina nawa hashimbwili wanyi makombakaji awantu etejeli nsañu yayiwahi. (Yilw. 2:41; 4:4) Chatachikili ikañesha, atumbanji hiyatiyili womaku, ilaña alombeli kudi Nzambi kulonda yayikwashi. Alombeli nawu: “Yikwashi anduñu jeyi kulonda atwalekihu kuhosha izu deyi nakuhamuka.” Enzeli naspiritu yajila nawa atwalekelihu “[kuhosha] mazu aNzambi nakuhamuka.”—Yilw. 4:18-20, 29, 31. w20.10 21 ¶4-5

Muloñadi chitwatela kukuhwelela netu Yehova wamusañwili Yesu? Kwadiña antu amavulu amumweni Yesu hanyima yakumusañula nawa alejeliku amakwawu. (1 Kor. 15:5-7) Muntu watachi wateneniyi Pawulu nindi wamumweni Yesu wadiña Petulu (Kefwasi). Izanvu dawatumbanji dahosheli nawu Petulu wamumweni Yesu asañwiliwu. (Luka 24:33, 34) Kubombelahu, “apostolu 12,” amumweni Yesu hanyima yakumusañula. Kuhiñahu Kristu “wamwekeni kudi anakwetu akubadika ha 500 hampinji yoyimu,” hadaha hakubulakana kwadiña muÑaliliya, kwashimunawu haMatewu 28:16-20. Cheñi, Yesu “wamwekeni kudi Yakoba” manakwindi wakuwanamu, wabulili kumukuhwelela Yesu hakusambila nindi diyi Mesiya. (Yow. 7:5) Hanyima yakwila namumoni dehi Yesu asañwiliwu, Yakoba wamukuhweleleli. Kwakwihi na 55 C.E. hampinji yasonekeleñayi Pawulu iwu mukanda, antu amavulu amweni nawu Yesu amusañwili achidiña kwoku, dichi muntu wejima wajinokeleña nindi Yesu amusañwili wanyi wayileña nakuyihula. w20.12 3 ¶5, 7-8

Neyi twakata nawa tunakati hadi mpinji yayilehi chinateli kutukalila kuumika. Mulombenu Yehova yayikwashi. Hela chakwila hatuukaña muchihayamishaku, ilaña watukundejaña nikutwinka ñovu yakuumika. (Mas. 94:19) Chakutalilahu, nateli kusañumuna mukwetu mukwaKristu kwinza nakutukwashaku tunyidimu twahetala hela kuya nakutulandilaku yuma. Nateli cheñi kutemesha manakwetu kwinza nakutulombelaku. Hela nateli kutukwasha kwanuka nsañu yakukundeja yidi Mwizu dindi, chidi neyi kuchiñeja kwakushakama chakadi kukata mwituña dadiha. (Rom. 15:4) Hela chochu tunateli kuneña muloña wakwila tunakushimwina wanyi neyi chitunakukeña. Muhela amushili mwikina damukwashileña kwona datenañawu nawu iron lung hadi yaaka 37! Wakatili kansa, amuladikili kakavulu nawa wakatili nyisoñu yikwawu yahekowa. Hela chakwila wamweni iku kukala halekeli kushimwinaku. Wayishimwinineña anansi niantu enjileña nakumuhempula hetala dindi nawa wakwashili antu 17 kumwiluka Yehova! w20.12 24 ¶9; 25 ¶12

Kapostolu Pawulu wakeñekeleña kumukwasha. Kwakwihi na 56 C.E., Izaza dawantu damukokeleli hanji yatembeli muYerusalema nawu amujahi. Ifuku dalondelelihu, chelili Pawulu amuleti kuchota chaSanihedirini, akeñeleña kumutabola kudi ayilumbu jindi. (Yilw. 21:30-32; 22:30; 23:6-10) Haniyi mpinji, hadaha Pawulu watoñojokeli nindi, ‘Iku kukala kwakamana mpinjinyi?’ Yesu wamukwashili ñahi Pawulu? Nawufuku helili Pawulu amukasi, “Mwanta” Yesu wemeni kwakwihi naPawulu nawa wamwilili nindi: “Bayi wutiya womaku! Watela kushimuna wunsahu nimuRoma.” (Yilw. 23:11) Awa mazu amukolesheli chikupu Pawulu. Yesu wamuhamekeli Pawulu hamudimu wazatiliyi muYerusalema. Nawa wamukanini nindi Pawulu wakashika chiwahi muRoma nawa wakatwalekahu kushimwina. Hanyima yakumukana ichi chikaninu, Pawulu watiyili tuhu neyi chatiyaña mwana anakatiwu kudi tata yindi. w20.11 12 ¶1, 3; 12 ¶4

Kuchiñeja kwetu kwaWanta kudi “neyi chikuñu chakwimika nachu wumi wetu,” kwatukwashaña kuumika kukala kudi kwejima hela kwakama. Toñojokenuña hayikaninu yatukanayi Yehova kumbidi hampinji yitwakabulaña kwakama chuma chidi chejima. (Isa. 65:17) Fwikijenuña munakushakama mwituña dadiha mudi kuwunda, mwakabula yuma yejima yatama. (Mika 4:4) Mukutwalekahu kuchiñeja neyi mukulejañaku antu amakwawu yuma yimwachiñejaña. Zatenuña hanakumini ñovu jenu mumudimu wakushimwina nikwilisha atumbanji. Neyi mutwalekahu kushimwina nikwilisha atumbanji, ‘kuchiñeja kwenu kukutwalekahu ndo-o nikunsa.’ (Heb. 6:11) Chitunakuswina kwakwihi nakukuma kwanshakaminu yamakonu, tukumonaña kukala kwakuvulu kukutuleteshaña kwakama. Tukutwesha kushinda iku kukala nikutwalekahu kwikala adiwunjika, bayi muñovu jetu etu aweniku, ilaña kuhitila mukumukuhwelela Yehova. Tumwekesheña muyilwilu yetu netu twakuhwelela muchikaninu chaYehova chakwila nawu: “Ñovu jenu yowu kudiwunjika zo-o nakukuhwelela.”—Isa. 30:15. w21.01 7 ¶17-18

Yakoba 5:11 yanuñañesha wushona waYehova nachilwilu chikwawu chatuswijaña kwakwihi nayena, dikwila nawu luwi. (Kwi. 34:6) Njila yimu mwatutiyilañayi Yehova luwi hikutwanakena yiluwa yitwakoñaña. (Mas. 51:1) MuBayibolu, izu dakwila nawu luwi mwabombela yuma yayivulu kubadika hohu kwanakena. Luwi hichuma chekala mudi muntu chamukwashaña kukwasha mukwawu neyi yamona nindi nakukabakana. Yehova washimwini nindi kukeña kwatukeñayi kwabadika kukeña kukwetiyi mama yawantu namwanindi. (Isa. 49:15) Neyi tunakukabakana Yehova watukwashaña muloña waluwi lwindi. (Mas. 37:39; 1 Kor. 10:13) Neyi amanakwetu niahela anatuneñeshi tunateli kuyitiyila luwi kuhitila mukuyanakena nikubula kuyihembela nkunyi. (Efwe. 4:32) Ilaña njila yikwawu yalema mutunateli kuyitiyila amanakwetu luwi hikuyikwasha neyi anakumona kukala. Neyi twila mwenimu tukumwimbujola Yehova wamwekeshaña wushona kubadika muntu wudi wejima.—Efwe. 5:1. w21.01 21 ¶5

Mutu wachisaka kudi chuma chatela kubula kwilayi. Bayi yeñija mutu mumudimu wakumujimba chakwila yenda yakañanya kukwasha chisaka chindi kwikala nawubwambu naYehova nikuyikwasha kwikala akiñewaku nikuyidizisha. Yehova watudizishaña nikutubabesha kulonda yatukwashi. (Heb. 12:7-9) Kufwana Tata yindi, Yesu niyena wadizishaña antu adi mumakasa indi munjila yakukeña. (Yow. 15:14, 15) Wayifumbaña chakadi kuyihita mumbadi, ilaña nakukeña. (Mat. 20:24-28) Weluka nindi twawanina wanyi nawa kakavulu twaluwañeshaña. (Mat. 26:41) Mutu wachisaka wamwimbujolaña Yehova niYesu weluka nindi ñodindi nianyanindi awanina wanyi. ‘Halendumokelaña’ ñodindi hela anyanindiku. (Kol. 3:19) Ilaña wazatishaña chishina chekala haAñalija 6:1 nawa wayololaña “naspiritu yakwovwaha” nakwiluka nindi niyena wawanina wanyi. Kufwana Yesu, weluka nindi njila yayiwahi yatela kuyidizishilamu hikwikala chakutalilahu. w21.02 6-7 ¶16-18

Yehova walandili antu ejima ekala muchipompelu nefutu danyiloña, kushilahu tuhu niantu ejima amukuhwelelaña Yesu. (Maku 10:45; Yilw. 20:28; 1 Kor. 15:21, 22) Dichi chatelela chamutondeliyi Yesu kwikala mutu wachipompelu, muloña diyi wahanini wumi windi kwikala ifutu danyiloña. Chineli Yesu diyi mutu wetu, wukweti wuswa wakushaku nshimbi yatela kulondelawu antu ejima, yisaka nichipompelu chejima. (Ñal. 6:2) Yesu hakuminaña hohu dakutwinka nshimbiku. Watwakamenaña chachiwahi nawa watukeña hamuntu-hamuntu. (Efwe. 5:29) Ahela amwekeshaña nawu amulemesha Kristu, chovwahilañawu nshimbi yayinkañawu kudi amayala atondayi nawu ayakameneña. Amanakwetu amwekeshaña nawu eluka mwatalisha ntanjikilu yawumutu neyi ayilemeshaña ahela. Neyi ejima muchipompelu eluka nawa alemesha antu enkayi Yehova wuswa, chipompelu chikwikala mukuwunda. Chuma chasweja kulema, tukumuhamekaña Tata yetu wamwiwulu, Yehova. w21.02 18-19 ¶14-17

Hampinji yaswamujokeleñayi Davidi niantu jindi mumpata yawaFwilistinu, ashili yisaka yawu hamatala wena ayili kunjita. Iku wena achidi kunjita, ayilumbu alukukili mukala wawu nawa asendeli yisaka yawu muwunkoli. Davidi wadi kutoñojoka nindi chineli wadiña mushidika wañovu, wukuwana njila yayiwahi yakupulwishilamu yisaka yawu yatwaliliwu muwunkoli. Ilaña, Davidi wamulombeli Yehova kulonda yamukwashi. Davidi wayili nakumwihula Yehova, nindi: “Ichi chendu chawantu neyi nukuchilondela nakachiwana tahindi?” Yehova wamulejeli Davidi nindi watela kuya nawa wukumukwasha. (1 Sam. 30:7-10) Chumanyi chimukudizila kuniyi nsañu? Lombenu wukwashu henohu kanda mufukuulihu. Ihulenu anvwali jenu. Munateli cheñi kuhosha nawakulumpi akuluka yitembi. Yehova wayikuhwelela awamayala atondayi, nawa ninenu mwatela kuyikuhwelela. Yehova wayimonaña nindi “yaawana” muchipompelu. (Efwe. 4:8) Neyi mwimbujola chikuhwelelu chawu niyuma yikuyilejawu mukufuukulahu chiwahi. w21.03 4-5 ¶10-11

Yesu wahosheli nindi neyi tubulaña kuzatisha nsañu yitunakudiza tudi neyi muntu wunakutuñila itala hawusekulula. Wazataña nañovu ilaña ñovu yindi yayaña mumenji. Muloñadi? Muloña neyi kwinza nvula yampepela nidibaji itala dikuhumuka. (Mat. 7:24-27) Munjila yoyimu, neyi kuzatisha yuma yitunadizi nehi dikwila nawu ñovu yetu yikuya hohu mumenji. Neyi tumona yihuñu hela makabisha tukukañanya kuumika. Ilaña neyi tudiza nikuzatisha yuma yitunadizi tukufuukulaña chiwahi, tukwikalaña mukuwunda nawa chikuhwelelu chetu chikukola. (Isa. 48:17, 18) Hakwila tubuli kufumpa kashinshi ketu hampinji yitudi mukukala twatela kulombaña kudi Yehova nikudiza Izu daNzambi mpinji yejima. Nawa twatela kwanukaña mpinji yejima chuma chalema chitwatela kwila hikuleta kalemesha kudi Yehova. Twatela kwiluka netu mpinji yejima Yehova hamba katushiyaku nawa kwosi muntu hela chuma chinateli kutwambula kukukeña kwindiku.—Heb 13:5, 6. w21.03 15 ¶6; 18 ¶20