July

Kuhaña muntu muchipompelu hintanjikilu yashaku Yehova. Nawa hinjila yayiwahi yakwashaña muntu wunaleki kumukalakela Yehova niantu ejima. Amakwawu anateli kuhosha nawu afuukula chiwahi wanyi hakumuhaña muntu. Ilaña mwatela kwanuka nenu, antu amuchidiwu hiyakeñaña kushimuna yuma yatama yakoñayi owu muntu wunavulumuniku. Tuneluki wanyi wunsahu walala wejima. Dichi mwatela kwiluka nenu akulumpi asompeli owu muloña, azatili nañovu kulondela yishina yamuBayibolu nawa adiña “nakumusompelaku Yehova.” (2 Kushi. 19:6) Neyi mwitejaña munafuukuliwu akulumpi, kuhaña ntaña yenu muchipompelu munateli kumukwasha kufunta kudi Yehova. Muhela Elizabeth wahosheli nindi: “Chineli twahanjekeleña wanyi namwanetu weyala, chatukalilili. Ilaña chelili nafunti dehi kudi Yehova, wahosheli nindi chawahili chamuhañiliwu. Chimwahitili mpinji, wahosheli nindi wadizililiku yuma yayivulu.” w21.09 28-29 ¶11-12

Toñojokenu hadi iwu nfwila. Chakadi nikujina, watoñojokeleña nindi wadi kumwinka Yehova yawana yayivulu. Hela chochu, wazatili nañovu kumwinka Yehova yuma yadiñayi nayu. Nawa Yesu welukili nindi yawana yahaniniyi yadiña yalema kudi Tata yindi. Ichi dichuma chalema chitunateli kudizilaku: Yehova watiyaña kuwaha neyi tumwinka hanakumini ñovu yetu, tumukalakela namuchima wetu wejima nawa nawumi wetu wejima. (Mat. 22:37; Kol. 3:23) Yehova wazañalalaña neyi yamona tunakuzata hanakumini ñovu yetu. Chumichi chinakundami kumpinji niñovu yitwazatishaña kukudifukula, mumudimu wakushimwina nihakupompa. Tunateli kuzatisha ñahi nsañu yahosha hadi iwu mumbanda nfwila? Toñojokenu hadi muntu imwatela kukolesha nenu Yehova watiyaña kuwaha nanyidimu yindi. Hadaha muhela wakula dehi wunakutiya kutama hela kuneña nindi nakukañanya kushimwina neyi chashimwinineñayi muloña wakukatakata nikubula ñovu. w21.04 6 ¶17, 19-20

Yehova weluka mpinji yatelela yakujilumwinamu kanu kaayi katama. Muloña wakudiwunjika Kwindi, antu amavulu anakumwiluka nawa izaza deneni dawantu dinakudifukula kudi yena. Wejima wawu azañalalaña muloña Yehova nadiwunjiki hadi mpinji yayilehi hakwila avwaliki, amukeñi nawa adihani kudi yena. Chakomikawu antu amavulu kushika nikunsa chikamwekesha nawu Yehova welili chiwahi hakufuukulahu kwikala wadiwunjika. Hela chakwila Satana waletaña yihuñu, Yehova natwalekihu kwikala “Nzambi wamuzañalu.” (1 Tim. 1:11) Ninetu tunateli kutwalekahu kwikala namuzañalu hampinji yitunakuhembelela Yehova kujilika ijina dindi, chiyuulu chindi, kufumishahu kutama kwejima niyihuñu yejima yitunakumona. Dichi tuumikenuña nikwiluka netu Tata yetu wamwiwulu niyena nakuumika. w21.07 13 ¶18-19

Antu amavulu mumafuku awapostolu amukuhweleleli wanyi Yesu. Wena atoñojokeleña nawu wadiña hohu mwana kamukwakusoña. Nawa wafumini kuNazareta, musumba wamweneñawu antu amavulu nawu walema wanyi. Nataneli wekalili kambanji kaYesu niyena hakusambila wahosheli nindi: “Komana muNazareta munateli kufuma chuma chachiwahi tahindi?” Watoñojokeleña hawuprofwetu wekala haMika 5:2, washimwineñahu dehi nawu Mesiya wakavwalikila muBetelemi bayi muNazaretaku. Kaprofwetu Isaya washimwineñahu dehi nindi ayilumbu jaYesu akasha wanyi maana ‘kunsañu yekiñu [daMesiya].’ (Isa. 53:8) Neyi chakwila awa antu ashiliku muchima wakukeñakeña nsañu yalala, mutenowu adi kwiluka nawu Yesu wavwalikilili muBetelemi nawa wadiña mwana kaMwanta Davidi. (Luka 2:4-7) Dichi, Yesu wavwalikilili kwiluña dashimunawu muwuprofwetu wudi haMika 5:2. Hanu dinu, kukala kwadiña hadihi? Antu akunkulwileña swayi. Hiyadiña eluka wunsahu wejimaku. Hamuloña wachumichi, amukaanini Yesu. w21.05 2-3 ¶4-6

MuBayibolu mwekala yakutalilahu yayiwahi yawantu akiswililiwu muloña wakwila etejeli mwayifumbiliwu. Toñojokenu hadi Yoba. Hela chakwila wamwakamineña Nzambi, wadiña wawanina wanyi. Hamuloña wakukala kwadiñayi naku, wahosheli yuma yatama. Nawa chafuminimu amufumbili chakadi kumuhita mumbadi, kudi Elihu niYehova. Indi Yoba welili ñahi? Wahosheli nindi: “Dichi nahosha, ilaña chakubula kwiluka . . . [na]ditoñeshi nachinahosha, Nawa nabalumuki mumuchima nawa nadivubi mulunkuñu nimumawuti.” (Yoba 42:3-6, 12-17) Wamwekesheli nindi wadiña wadizoza chetejeliyi kufumba kwamufumbiliwu kudi Elihu hela chakwila Elihu wadiña kansi hadi yena. (Yoba 32:6, 7) Neyi twikala adizoza tunateli kutambwila kufumba hela chakwila tunakutoñojoka netu hiyatela kutufumbaku hela neyi muntu wunakutufumba hikansi hadi etu. Wejima wetu twatela kusoña mukaabu wakuspiritu kulonda twikali mukwakushimwina hela ntañishi wansañu yayiwahi wakulukila. w22.02 11 ¶8; 12 ¶12

Antu ejima amuchipompelu adi namudimu wakuleta kuwunda nikumwekesha kukeña kudi antu ejima kulonda abuleña kuneña. Yuma yitwelaña niyitwahoshaña yinateli kukolesha antu amakwawu hela nehi. Munateli kukwasha ñahi antu akweti antaña jawu abula kwikala muchalala kulonda eluki nawu amanakwetu muchipompelu ayikeña? Kwatenuña wubwambu nawantu amaha. Tunateli kutachika nakuyitambwila amaha muchipompelu. (Rom. 15:7) Hela chochu, twatela kwilahu chuma kubadika kuyitambwila hohu. Hatela kuhita mpinji hakwila twikali nawubwambu wakola. Ikalenu naluwi nawa mwekeshenuña nenu mwayakamenaña antu amaha. Chatela muyihuleña malwihu anateli kuyitiyisha nsonyi, esekenu kwiluka kukala kunakumonawu. Amakwawu chinateli kuyikalila kuyileja chinakutiyawu, dichi bayi muyikanjikija kuhoshaku. Ilaña, yihulenu mukubabala nawa yitiyililenuña nakanañachima chinakwakulawu. Chakutalilahu, munateli kuyihula chadiziliwu chalala. w21.06 11 ¶13-14

Twasakililaña hakumukalakela Yehova mukunuñañana neyi “mukanka wumu” nawa wukweti “kabiña wumu.” Mukanda waAbateyanishiwa ku Kucita Ukufwaya Kwa Kwa Yehova, ifu 165, wahosha nawu: “Chineli mwatiyaña kuwaha kwikala anuñañana, ninenu mwatela kuzataña nañovu kulonda mutwalekihu kwikala anuñañana.” Dichi, twatela “kuyimonaña amanakwetu neyi chayimonañayi Yehova.” Kudi Yehova, etu “akehelamu” watulemesha wejima wetu. Komana dichimwayimonaña amanakwetu niahela? Yehova wamonaña nawa walemesha yuma yejima yimwelaña hakuyikwasha nikuyakamena. (Mat. 10:42) Twayikeña akwetu akwakudifukula. Dichi “[tunakufwila] kubula kusha chuma chakumuhukesha manakwetu hela chakumukañesha.” (Rom. 14:13) Twayimonaña amanakwetu niahela netu atubadika nawa tunakukeña kuyanakena chakufuma hamuchima. Dichi, bayi twitejeña akwetu atuhukesheñaku. Ilaña, “tufwileña yuma yaletaña kuwunda niyuma yatuleñelaña kudikolesha wumu namukwawu.”—Rom. 14:19. w21.06 24 ¶16-17

Neyi tudizaña nankashi nikuzatisha kufumba kwekala Mwizu daNzambi nikutwatambwilaña mukuloñesha kwindi, tukutachika kwikala nayilwilu neyi yaKristu chovu-chovu. Tukusweja cheñi kumwiluka Nzambi. Yesu wazatishili chakutalilahu hakulumbulula nsañu yaWanta yitwashimwinaña chiyekala neyi kalubutu kanyanya kakulaña chovu-chovu munyichima yawantu ashinshika. Wahosheli nindi: “Mbutu yamenaña nakukula chakwila [mukwakukuwa] wakañanyaña kwiluka chiyakulaña. Iseki nkawadu dasoñaña nyikabu chovu-chovu, kwatachikilaña kumena nsaachi, kuhiñahu mutu, nkumininaku nchacha hiyikumena mumutu.” (Maku 4:27, 28) Yesu walumbulwileña nindi neyi chochakulaña mutondu chovu-chovu, nimuntu wetejaña nsañu yaWanta niyena wahimpaña yilwilu yindi chovu-chovu. Chakutalilahu, atudizi etu aBayibolu chaswinañawu kwakwihi naYehova, twatachikaña kumona yilwilu yayiwahi mudi wena. (Efwe. 4:22-24) Ilaña twatela kwanukaña netu Yehova diyi waleteshaña kalubutu kanyanya kukula. w21.08 8-9 ¶4-5

Tunateli kwikala namuzañalu neyi tumonaña yuma munjila yatelela. Muntu washaña maana hayuma ‘yinakumonayi namesu’ watiyaña kuwaha nayuma yikwetiyi, chidi neyi chihandilu chindi chichidi hanoyu mpinji. Kwambukaku, muntu wafwilaña yuma yeñi nayeñi wafwilaña yuma yikabula kwikalayi nayu. Tunakudizilaku chumanyi? Hakwila twikali namuzañalu twatela kushaña maana hayuma yitukweti bayi hayuma yitwafwilaña netu tukekali nayuku. Komana chekala chaswayi kuzañalala nayuma yimukweti? Antu amavulu atoñojokaña nawu chaswayi wanyi muloña twakeñaña kudizilaku yuma yayiha ifuku nifuku. Ilaña chekala chaswayi. Tunateli kuzañalala nayuma ‘yamonaña mesu’ etu. Tunateli kwila ñahi mwenimu? Hakwila tuwani, talenu chishimu chaYesu chantalenta chekala haMatewu 25:14-30 nawa chitunateli kwikala namuzañalu nichitunateli kuzañalala namudimu wutunakuzata. w21.08 21 ¶5-6

Yehova wakamenaña nankashi antu “[akweti] muchima wachikeka, wadizoza.” Wejima wetu tunateli kuyikolesha amanakwetu niahela bayi akulumpi hohuku. Njila yimu mutunateli kuyikoleshela hikumwekesha netu twayakamenaña. Yehova wakeñaña tumwekesheña chayikeñayi anyikoku jindi. (Yish. 19:17) Tunateli cheñi kuyikwasha amanakwetu niahela kuhitila mukwikala adizoza nikubula kuditiya nayuma yitunakuzata. Hitunakukeña nankashi kudilemesha etu aweniku, muloña tunakukeña wanyi antu amakwawu kwikala nechima. Tunakukeña yuma yitunakuhosha niyitunakwila yikolesheña amanakwetu. (1 Pet. 4:10, 11) Yesu wayakameneneña akwakumulondela, ninetu twatela kudizilaku. Wadiña wabadika hadi antu ejima. Ilaña wadiña “[wadikehesha] nikudizoza mumuchima.” (Mat. 11:28-30) Neyi nakutañisha wazatishileña mazu apela niyakutalilahu yayishikileña antu adizoza hamuchima.—Luka 10:21. w21.07 23 ¶11-12

Yenuña nakuhanjeka nawatushinakaji. Hadaha analeki kumona chiwahi, anakwenda chovu-chovu nawa anakuhosha chovu-chovu, ilaña achidi adikita nawa anatuñi “ijina dadiwahi” naYehova. (Mukwa. 7:1) Anukenu chuma chaleteshaña Yehova yayilemeshi. Twalekenuhu kuyilemesha. Ikalenu neyi Elisha. Wamukakeleleli Elija hefuku dakukumishaku dakwikala hamu. Elisha wahosheli kapampa kasatu nindi: “Hinukukushiyaku.” (2 Anya. 2:2, 4, 6) Mwekeshenuña nenu mwayikeña atushinakaji kuhitila mukuyihula malwihu. (Yish. 1:5; 20:5; 1 Tim. 5:1, 2) Yihulenuña malwihu adi neyi: “Himwadiña kansi, chumanyi chayiletesheli mukuhweleli nenu munawani chalala?” “Yuma yayimwekeneni yayikwashili ñahi kuswina kwakwihi naYehova?” “Chumanyi chinayikwashi kutwalekahu kwikala namuzañalu mumudimu waYehova?” (1 Tim. 6:6-8) Dichi tiyilenuña neyi anakuyilumbulwila. w21.09 5 ¶14; 7 ¶15

Neyi muzata nañovu kwovwahila lushimbi lwakushimwina nikwilisha atumbanji, mukumwekesha nenu mwamukeña Nzambi. (1 Yow. 5:3) Toñojokenu hachumichi: Kumukeña Yehova dikwaleteshaña mushimwineña kwitala nikwitala. Komana chayipeleleli kwovwahila ilu lushimbi? Inehi mwani. Chimwayili nakushimwina katachi, mwatiyili woma? Eña mwawutiyili! Ilaña mwelukili nenu diwu mudimu wakeñeleñayi Yesu nindi muzateña, nawa mwovwahilili ilu lushimbi. Nawa hadaha mukuhita kwampinji, chayipelela kuzata mudimu wakushimwina. Indi kulombola kadizi waBayibolu? Komana mwatiyaña woma neyi mutoñojoka hakulombola kadizi? Hekwawu. Neyi mumulomba Yehova kulonda yayikwashi kubula kutiya woma nikwikala ahamuka kulonda mwikali nakadizi, nateli kuyikwasha kwikala namuchima wakwilisha atumbanji. w21.07 3 ¶7

Anduñu kunyima ayishileña chinjikijilu chakwilukilaku nachu muntu wayiheta. Munjila yoyimu, antu makonu atela kukuhwelela kuyilamika chinjikijilu chakwilukilaku nachu hamakasa awu hela hamahama awu. Yitoñojoka yawu niyuma yelañawu yikamwekesha nawu ekala amunfulumendi yamukaayi nawa diyi nfulumendi yiyahakwilañaku. Komana tuketeja ichi chinjikijilu nikukwasha nfulumendi jawantu? Antu akakaana kuyisha chinjikijilu akamona kukala nawa akekala muwubanji. Mukanda waChimwekeshu nawu: “Kubuli kwikala muntu hela wumu wukulanda hela kulandisha, chiña hohu muntu wukweti chinjikijilu.” (Chim. 13:17) Ilaña antu jaNzambi eluka chuma chikayimwekena antu akekala nachinjikijilu chashimunawu haChimwekeshu 14:9, 10. Chatela eteji chinjikijilu, chakekala neyi kwiji anayisoneki hamakasa awu nawu “wambala waYehova.” (Isa. 44:5) Ayinu diyi mpinji yakumwekesha chikupu netu twashinshika kudi Yehova. Chitwela mwenimu, Yehova wakatiya kuwaha hakututena nindi tudi antu jindi. w21.09 18 ¶15-16

Hakwila nawu tutweshi kushimwina chiwahi, twatela kwitejaña wukwashu wunakufuma kudi akwetu. Kapostolu Pawulu wamulejeli Timotewu njila jakushimwinamu nikutañisha, nawa wamukolesheli Timotewu kuzatisha iji njila kulonda yakwashi antu amakwawu. (1 Kor. 4:17) Kufwana Timotewu, tunateli kudizila kudi amakwetu apama amuchipompelu chetu. Twatela cheñi kumulomba Yehova kulonda yatukwashi. Mulombenuña Yehova kulonda yayikwasheña mpinji yejima yimunakushimwina. Chakadi wukwashu waspiritu yindi yajila, kwosi chuma chitunateli kuzata. (Mas. 127:1; Luka 11:13) Tenenuña chuma chimunakukeña neyi munakumulomba Yehova nenu yayikwashi. Chakutalilahu, mulombenu yayilomboli kudi muntu wunakukeña kudiza nawa wunakukeña kutiyilila. Twatela kwikalañaku cheñi nampinji yakudiza nkawetu. Izu daNzambi dahosha nawu: “[Ilukenu] nkeñelu yaNzambi nenu yayiwahi, wayiteja nawa yawanina chikupu.” (Rom. 12:2) Neyi twiluka chikupu netu twamwiluka Nzambi, tukulejañaku antu hadi Nzambi nawa akumona nawu twakuhwelela yuma yitunakuhosha. w21.05 18 ¶14-16

Mukwila ñahi neyi munazati nañovu nawa munamulombeliku kadizi wenu ilaña kadizi wenu nakuzatisha wanyi yuma yinakudizayi nawa mwatela kuleka kumudizisha? Indochu neyi kanda mudizishihu muntu yashika kuchipapatishu? Komana mukutachika kudinka muloña hadaha nikutachika kutoñojoka nenu Yehova nakiswili wanyi mudimu wenu? Talenu chumanyi chalemeshayi Yehova kutalisha hamudimu wakushimwina. Yehova wamonaña chitwazataña nichitomikaña. Yehova watiyaña kuwaha neyi tushimwina neyena muloña wakumukeña, hela chakwila antu anakukaana kwiteja nsañu yitunakuyishimwina. Pawulu wasonekeli nindi: “Nzambi waloña nawa hakavulamena mudimu wenu nikukeña kumwakeñeli ijina dindiku, nanochu chimwakalakeleli akwakujila ninochu chimunatwalekihu nakuyikalakela.” (Heb. 6:10) Yehova weluka chitwazataña nañovu nichitwamukeña, hela chakwila kanda tukwasheñahu dehi muntu nakushika hachipimu chakupapatishewa. Dichi, mwatela kuzatisha awa mazu adi munsona yetu yalelu alejeliyi Pawulu akwaKorinda. w21.10 25 ¶4-6

Luwi lwaYesu nikukeña kwamwekeneneña muyuma yayililileñayi atumbanji twindi. Welukili nindi adiña nawuswa nichihandilu chashiyashana. Dichi adi kuzata nyidimu yoyimu hela kushimwina chochimuku. Hela chochu, wayihamekeleña chazatileñawu nañovu hamuntu-hamuntu. Wamwekesheli chumichi, muchishimu chindi chantalenta. Munichi chishimu, mwanta wamwinkeli nduñu ninduñu mudimu “kwesekeja nahanakumini ñovu jindi.” Hadi awa anduñu ayedi adikita wumu wawaninihu jajivulu kubadika mukwawu. Ilaña nkaka yawu wayihamekeli wejima wawu, nindi: “Wuzataña, eyi nduñu wamuwahi nawa washinshika!” (Mat. 25:14-23) Yesu watutiyilaña luwi mpinji yejima nawa watukeña. Weluka nindi tukweti wuswa nichihandilu chashiyashana, nawa watiyaña kuwaha neyi tuzata hakumina ñovu jetu. Twatela kuyimonaña akwetu neyi chayimonañayi Yesu. w21.07 23 ¶12-14

Mpinji yikwawu Mwanta Davidi hatiyilileña antu luwiku. Chakutalilahu, chelili Nabali, iyala wakalisha yamuhoshi Davidi kasawuntu nawa yakaani kumwinka yakuda niamayala amwitala dindi, Davidi wahilili nankashi. Nawa wanyamukili nindi yakamujaha Nabali niamayala ejima amwitala dindi. Ilaña Abigayili ñoda Nabali, wadiña waluwi nawa wadiwunjika. Dichi wamutwalilili Davidi yakuda swayi-swayi nawa chafuminimu, Davidi hamujahili Nabali niamayala amwitala dindiku. (1 Sam. 25:9-22, 32-35) Hampinji yahililiyi Davidi, wafuukwilihu nindi Nabali niamayala indi ejima atela kuyijaha. Nawa chimwahitili mpinji, Davidi wahosheli nindi iwu muntu wamuchishimu chaNatani ateleleli kumujaha nachuma cheliliyi. Hanidi ipampa damuchiyedi, muloñadi Davidi chahosheleliyi nindi iwu iyala atela kumujaha henohu yena wadiña mukwaluwi? Talenu chuma chamwekeni muchihandilu chaDavidi. Haniyi mpinji, chinleji chindi chamukabishileña. Neyi muntu yasompesha mukwawu chatama chamwekeshaña nawu wubwambu windi naYehova wakola wanyi. w21.10 12 ¶17-18; 13 ¶20

Kunawa mazu adi munsona yetu yalelu, tunakudizilaku netu tunateli kumwimbujola Yehova wajila. Tunateli kwikala ajila muyilwilu yetu. Chinateli kumwekana neyi chakala muloña twawanina wanyi. Kapostolu Petulu waluwañesheli kakavulu ilaña chakutalilahu chindi chamwekeshaña nawu tunateli kwikala ajila. Neyi antu anakutoñojoka hadi muntu wajila amavulu atoñojokaña hadi muntu wabula muzañalu, wavwalaña munkukumba wakuchechi nawa wabulaña kuseha-seha. Ilaña dichekalawu antu ajila wanyi. Yehova, wajila, amulumbulula nawu “[hi]Nzambi wamuzañalu.” (1 Tim. 1:11) Antu adifukulaña kudi yena ayitenaña nawu ‘akooleka.’ (Mas. 144:15) Yesu wahishili antu avwalileña nyinkukumba nawa elileña yuma yayiwahi kulonda antu ayimoneña. (Mat. 6:1; Maku 12:38) AkwaKristu alala eluka mwatalisha kwikala ajila muloña wayuma yadizañawu muBayibolu. Dichi tweluka chikupu netu Nzambi yetu wajila nawa watukeña hanateli kutwinka lushimbi lwakala kulovwahilaku. w21.12 2 ¶1, 3

Hayuma yejima yatwinkawu kudi Nzambi, chawaana chasweja kulema hiwuswa wakudifukula kudi Nzambi. Twamwekeshaña netu twamukeña Yehova neyi “tuhembaña nshimbi jindi.” (1 Yow. 5:3) Lushimbi lumu lwatwinkeliyi Yesu lwakeñañayi Yehova nindi tulwovwahileña, hikwilisha atumbanji nikuyipapatisha. (Mat. 28:19) Watuleja cheñi nindi tudikeñi wumu namukwawu. (Yow. 13:35) Yehova wakelisha antu amwovu kwikala muchisaka chindi chawakwakudifukula alala mukaayi kejima. (Mas. 15:1, 2) Keñenuña akwenu. Kukeña dichilwilu chaYehova chabadika. (1 Yow. 4:8) Yehova watukeñeli henohu kanda tumwiluki. (1 Yow. 4:9, 10) Dichi twamwimbujolaña neyi tuyikeña akwetu. (Efwe. 5:1) Njila yimu mutwatela kumwekeshela antu kukeña hikuyikwasha kulonda amwiluki Yehova hikuchidi mpinji. (Mat. 9:36-38.) Neyi tuyikwasha, akwiluka yuma yatela kwilawu hakwila niwena ekali muchisaka chaNzambi. w21.08 5-6 ¶13-14

Chineli Yesu wamukeñeli chikupu Tata yindi chumichi chamuletesheli yadihani kukoola Tata yindi ninetu. (Yow. 14:31) Yesu wamwekesheli nindi wakeña nankashi antu kwesekeja nanochu chahandiliyi chihandilu chindi chahanu hamaseki. Ifuku nifuku, wamwekesheleña kukeña niwushona, hela chakwila antu amudimbulwileña. Njila yimu mwamwekesheleleñayi antu kukeña hikuyidizisha haWanta waNzambi. (Luka 4:43, 44) Yesu wamwekesheli cheñi nindi wamukeña Nzambi niantu kuhitila mukudihana kulonda yakabakani nikumujaha kudi akanshidi. Dichi watwenzunwinini njila wejima wetu kulonda twakekali nawumi wahaya nyaaka. Twadihanini etu aweni kudi Yehova nikupapatishewa muloña wakwila twamukeña Tata yetu wamwiwulu. Kufwana Yesu, twatela kumwekesha netu twamukeña Yehova kwesekeja nanochu chitwahandaña nawantu. Kapostolu Yowanu wasonekeli nindi: “Muntu wabula kukeña manakwindi amonañayi namesu, hakutwesha kukeña Nzambi abula kumonayiku.”—1 Yow. 4:20. w22.03 10 ¶8-9

Hela chakwila twatiyaña kuwaha kulomba nikudiza Bayibolu, chapela wanyi. Twakasikaña nankashi nanyidimu chakwila chatukalilaña kwikala nampinji yakudifukula kudi Yehova. Mudimu wakumujimba, kwakamena chisaka niyuma yikwawu yinateli kutudiila mpinji chakwila tunateli kutoñojoka netu tukutwesha wanyi kwikala nampinji yakulomba, kudiza nikutoñojokahu chikupu. Kudi cheñi yuma yikwawu yinateli kutudiila mpinji. Neyi kubabala nehi, tunateli kwilaña yuma yinakumwekana neyi yatama wanyi yikutudiila mpinji yitwatela kuzatisha kukoleshelamu wubwambu wetu naYehova. Chakutalilahu, chalema nankashi kwikala nampinji yakunooka hela kwila yuma yakumanishilamu wuudi. Ilaña neyi tuzatishaña mpinji yeneni kuniyi yuma, hitukwikalaña nampinji yakudifukwilamu kudi Yehovaku. Twatela kwiluka mpinji yakwililamu yuma yakumanishilamu wuudi.—Yish. 25:27; 1 Tim. 4:8. w22.01 26 ¶2-3

Yehova chayilejeliyi aIsarela kukeña akwawu, hayilejeli nindi atela kukeña hohu akwawu ekowa dimu hela akwawu aIsarela hohuku. Ateleleli kukeña cheñi enyi ashakamineña mukachi kawu. Diwu mazu ekala haALevi 19:33, 34. Mwenyi ateleleli kumumona neyi “mwenimbu,” nawa aIsarela ayilejeli ‘kumukeña’ neyi chadikeñawu aweni. Chakutalilahu, nshimbi yahosheli nawu aIsarela ateleli kuyiteja enyi niatuzweñi kunonojola mumaha awu. (Lev. 19:9, 10) AkwaKristu niwena makonu atela kwovwahila ichi chishina chakukeña enyi. (Luka 10:30-37) Munjilanyi? Kudi antu amavulu anafumi kumatuña acheñi hadaha amakwawu mwashakamaña nawu. Dichi twatela kuyilemeshaña awa amayala, ambanda nianyana. w21.12 12 ¶16

Dichi, neyi tumushindamenaña Yehova netu yatulomboleña chayinu mpinji, chikatukwasha kumukuhwelela kumbidi netu wukutwamwina. Twatela kumukuhwelela Yehova nikudihana hakwila nawu tutweshi kulomba kudi mukulumpi wetu wamudimu netu yatwinki mpinji yakuya nakupompa, hela kutukeheshelaku mafuku akuzata kulonda tupompeña mpinji yejima nikwikalaku nampinji yakuzataku mudimu wakushimwina. Twili netu mukulumpi wetu wamudimu natukaanini nawa mudimu wunatumani. Komana tukumukuhwelela Yehova netu hamba katushiyaku hela kutumbaku nawa wukutwinkaña yuma yejima yitunakukeña? (Heb. 13:5) Antu amavulu adi mumudimu wampinji yejima anateli kushimuna Yehova chayikwashiliyi sweje-e hampinji yakeñeleñawu nawu yayikwashi. Yehova washinshika. Chineli tudi naYehova hitwatela kuchina yuma yikatumwekena kumbidiku. Nzambi yetu hamba katushiyaku, chakala hohu tutwamijaku Wanta muchihandilu chetu. w22.01 7 ¶16-17

Chumanyi chinateli kuletesha chitukalili kuyikuhwelela akulumpi? Twili netu muntu anahañiwu hiibwambu detu nankashi. Hadaha tunateli kutoñojoka netu akulumpi ashinshikili wanyi hawunsahu wejima, hela netu afuukwili wanyi kwesekeja nachinateli kufuukulayi Yehova. Chumanyi chinateli kutukwasha kwiteja munafuukuliwu akulumpi? Twatela kwanukaña netu Yehova diyi washaku ntanjikilu yakuhaña muntu muchipompelu nawa yakwashaña chipompelu kushilahu nimuntu wunavulumuni. Neyi muntu wunabuli kubalumuka mumuchima abula kumufumisha muchipompelu, wukuluwañesha antu adi muchipompelu niwena akukoña nshidi. (Ñal. 5:9) Kubombelahu, nateli kudiwula nshidi yinakoñiyi, nawa wukuhimpa wanyi yitoñojoka yindi niyilwilu yindi kulonda Yehova yekali cheñi ibwambu dindi. (Mukwa. 8:11) Twatela kwiluka chikupu netu, akulumpi azataña nañovu kulonda amoni neyi muntu watela kuhañewa hela nehi. w22.02 5-6 ¶13-14

Chilwilu chakudiwunjika niluwi chakeñekaña sweje-e neyi muntu hakusambila wakaanini kufumba kwamuBayibolu. Mukulumpi watela kutondolwela chilwilu chakuhila swayi neyi kufumba kwindi anakukaani hohenohu hela anakuzatilihu wanyi. Dichi neyi nakulomba nkawindi, mukulumpi watela kumulomba Yehova kulonda amukwashi muntu anakukeña kufumbayi nikumukwasha kwiluka chuma chinaleteshi amufumbi nawa azatishi kufumba. Nawa manakwetu anafumbiyi watela kwikala nampinji yakutoñojoka hamazu ahoshawu. Neyi mukulumpi wudi nachilwilu chakudiwunjika niluwi, chikwikala chaswayi kudi muntu anakukwashayi kutiyilila nikuzatisha kufumba. Hela chochu, mpinji yejima kufumba kwatela kushindamena Hezu daNzambi. Tunakukeña kufumba kwetu kwikali kwakuwahi nawa ‘kwakuzañalesha muchima.’—Yish. 27:9. w22.02 18 ¶17; 19 ¶19

Neyi tunakulomba netu atwinki ñovu yikutukwasha kuumika kukala hela netu kuzeyazeya kwetu, tunateli kumona netu kulomba kwetu anakukwakula swayi wanyi kwesekeja nachitwakuhweleleli. Muloñadi Yehova chabulilañayi kushikena kwakula kulomba kwetu hohenohu? Wamonaña chitwalombaña chakufuma hamuchima nindi tukweti chikuhwelelu. (Heb. 11:6) Wakeñaña cheñi ochu chitwafwilaña kuhanda kwesekeja nachitwalombaña nikwila nkeñelu yindi. (1 Yow. 3:22) Dichi twatela kudiwunjika nikwila kwesekeja nachitunakulomba neyi tunakukeña kuleka yilwilu yatama hela kuzeyazeya kwetu. Yesu wahosheli nindi kulomba kwetu kukwawu hiyanateli kukwakula hohenohuku. Washimwini nindi: “Twalekenuhu kulomba, akayinkachu; twalekenuhu kukeñakeña, mwakawana; twalekenuhu kudondomwena, akayenzunwinaku; muloña muntu wejima walombaña, watambwilaña, muntu wejima wakeñakeñaña, wawanaña, nimuntu wejima wadondomwenaña, amwenzunwinañaku.”—Mat. 7:7, 8. w21.08 8 ¶1; 10 ¶9-10

Hakwila mutwalekihu kukolesha chikuhwelelu chenu mudi Nleñi, mwatela kutwalekahu kudiza Izu daNzambi. (Yosh. 1:8) Toñojokenu hawuprofwetu wejima nichiwanuñañana. Kwila mwenimu kukukolesha chikuhwelelu chenu nakwiluka nenu, Nleñi wukweti kukeña nimaana diyi watuleñeli nawa wonena Bayibolu. (2 Tim. 3:14; 2 Pet. 1:21) Neyi munakudiza Izu daNzambi, shinshikenu kufumba kwekalamu chikunateli kuyikwasha. Chakutalilahu, Bayibolu yashimwineñahu dehi nawu kusweja kukeña mali kwatama nawa kwaleteshaña muntu kwikala ‘muyihuñu yayivulu.’ (1 Tim. 6:9, 10; Yish. 28:20; Mat. 6:24) Dihafuma Bayibolu hiyikutusoñamisha nawu bayi mukeña maliku! Kudihu yishina yikwawu yamuBayibolu yinayikwashi? Neyi tulemeshaña chatulejaña Bayibolu, tukushindamenaña hamaana atulejañayi Nleñi yetu wukweti kukeña. (Yak. 1:5) Chikufumamu, tukwikalaña namuzañalu muchihandilu chetu.—Isa. 48:17, 18. w21.08 17-18 ¶12-13

Neyi himukushinakaja, anukenuña nenu Yehova wanukaña nyidimu yejima yimunamukalakeli yaaka yejimiyi. Munadikiti nankashi mumudimu wakushimwina. Munomiki kukala kwakuvulu kushilahu nikukala kwayineñesheli nankashi. Munatwalekihu kwovwahila nikuhakwilaku nshimbi jaYehova jaloña, munazati nyidimu yayivulu mukuloñesha kwaYehova nawa munadizishiku amakwawu. Munazati nañovu kulonda mwendeleña hamu nakuloñesha kwaYehova. Munakwashi nikukolesha antu amakwawu kulonda eñili mumudimu wampinji yejima. Yehova Nzambi wayikeña nankashi muloña mwekala ashinshika. Wayikana nindi, “hashiyaña antu indi ajilaku.” (Mas. 37:28) Wayikana nindi: “Kushika nikuwushinakaji wenu . . . Nukuyelekaña.” (Isa. 46:4) Dichi, bayi mutoñojokaña nenu chineli munashinakaji dehi kwosi mudimu wumwatela kuzata mukuloñesha kwaYehovaku. Mwalema nankashi! w21.09 3 ¶4

Yehova watiyilaña antu luwi muloña wukweti maana chikupu. Bayibolu yahosha nawu “maana afumaña mwiwulu” “enzala naluwi ninyikabu yayiwahi.” (Yak. 3:17) Kufwana nvwali wukweti kukeña, Yehova weluka nindi luwi lwindi lwakwashaña anyanindi. (Isa. 49:15) Hamuloña wakwila Yehova wayitiyilaña antu jindi luwi, akweti kuchiñeja hela chakwila awanina wanyi. Chineli Yehova wukweti maana wayitiyilaña antu jindi luwi neyi kudi chuma chikuletesha yeli mwenomu. Hampinji yoyimu, Yehova weluka mpinji yatela kubula kumwekeshayi luwi. Chineli wukweti maana, wamwekeshaña wanyi luwi neyi neluki nindi chumochu chikumwekesha nawu nakwiteja yuma yatama. Fwikijenu neyi kambuña aNzambi yafuukulahu kwila yuma yatama muchihandilu chindi. Tukwila ñahi? Pawulu amoneneni kusoneka nawu “muleki kudibomba” nindi. (1 Kor. 5:11) Antu abulaña kubalumuka ayihañaña muchipompelu. Ayihañaña kulonda akiñi amanakwetu niahela nikumwekesha kujila kwaYehova. w21.10 9-10 ¶7-8

Twadifukulaña kudi Yehova neyi tukwasha mudimu waWanta nayawaana yetu. AIsarela hiyateleli kwinza kudi Yehova makasa-kasaku. (Kuhit. 16:16) Ahanineña yawaana yawu kwesekeja nayuma yikwetiwu. Dichi amwekesheli kusakilila hayuma yejima yayilililiyi Yehova. Tunateli kumwekesha ñahi netu twamukeña Yehova nawa twasakililaña hayuma yakuspiritu yitwatambwilaña? Njila yimu hikuhanaku yawaana muchipompelu chetu nikumudimu wamukaayi kejima kwesekeja nahakumini wuswa wetu. Kapostolu Pawulu wahosheli nindi: “Nzambi wetejaña hohu chawaana chahanañayi muntu kufuma hamuchima, muloña yena wakeñaña muntu kuhana chuma chikutweshayi, bayi chikubula kutweshayiku.” (2 Kor. 8:4,12) Yehova walemesha chawaana chidi chejima chitwahanaña chakufuma hamuchima hichikweti muloña nakutoha kwachuku.—Maku 12:42-44. w22.03 24 ¶13

Akulumpi hiyanateli kutwesha kufumishahu kukala kunakumonawu antu jaYehovaku. Hela chochu, Yehova nakukeña nindi akulumpi azati nañovu kulonda akoleshi nikukiña nyikoku yindi. Indi akulumpi adi dehi nanyidimu yayivulu anateli kuwana ñahi mpinji yakuyikwasha amanakwawu niahela anakukeña kuyikwasha? Londelenu yuma yelileñayi kapostolu Pawulu. Pawulu wayikolesheleña amanakwindi nikuyituña. Akulumpi niwena atela kumwimbujola Pawulu kulonda ayimwekesheleña amanakwawu kukeña nikuyitiyila luwi. (1 Tes. 2:7) Pawulu wayilejeleña akwawu akakudifukula nindi wayikeña nawa Yehova niyena wayikeñeli. (2 Kor. 2:4; Efwe. 2:4, 5) Pawulu wayimweneña antu ejima muchipompelu nindi hiyamabwambu jindi nawa wadiña nampinji yakuhanjika nawu. Wamwekesheli nindi wayikuhweleleli kuhitila mukuyileja yuma yamwakamishileña nikuzeyazeya kwindi. (2 Kor. 7:5; 1 Tim. 1:15) Hela chochu, hashili muchima hakukala kwindiku. Ilaña wakeñeleña kuyikwasha amanakwindi. w22.03 28 ¶9-10