November

Yehova watukwashaña munjila jamboka-mboka. Wukuyikwasha kwikala adiwunjika hampinji yinayikaaniwu mumudimu wakushimwina. Nateli cheñi kuyikwasha kwanuka Nsona yatelela yakuhanjeka namwiniitala. Nawa nayikwashi kutwalekahu kushimwina hela chakwila antu akeñaña wanyi kuhanjeka nenu. (Yere. 20:7-9) Yehova natumwekesheli cheñi kuwaha kwindi kuhitila mukutudizisha chakushimwina. Hakupompa kwetu kwamukachi kamulungu, twatiyililaña kunsañu yinakuhosha hachakuhanjeka nawantu, nawa atukoleshaña kuyizatisha mumudimu wakushimwina. Hakusambila, twatiyaña woma kuzatisha iji njila jajiha, ilaña neyi tujizatishi, jazatikaña chiwahi. Hakupompa kwachipompelu nihakupompa kwamaneni atukoleshaña kuzatisha njila jamboka-mboka jakushimwinamu jitwabula dehi kuzatishahu. Iji njila jinateli kututiyisha woma ilaña neyi tujizatisha Yehova nateli kutukiswila. w21.08 27 ¶5-6

Mumukanda windi wayisonekeleliyi aKorinda, kapostolu Pawulu wayifumbili chakola. Hanyima yakuyisonekela iwu mukanda, wamutemesheliku Titusa. Watiyili kuwaha nankashi chatiyiliyi nawu kufumba kwindi akwitejeli nawa akuzatishili! (2 Kor. 7:6, 7) Akulumpi atela kwikalañaku nampinji yakuhanjeka nawakwawu akakudifukula neyi chelileñayi Pawulu. Atela kwinzaña swayi nakupompa kulonda akolesheña amanakwawu. Kakavulu chakeñekaña hohu mpinji yantesha hakwila nawu mukoleshi manakwetu hela muhela. (Rom. 1:12) Mukulumpi wamwimbujolaña Pawulu wazatishaña Izu daNzambi kulonda ayituñi nikuyileja ochayikeñayi Nzambi. Wahanjekaña nawu mpinji yejima nawa wawanaña njila yejima kulonda ayihameki. Neyi mukulumpi nakufumbana kufumba kwindi kwashindamenaña Hezu daNzambi. Washikenaña hachikuma ilaña naluwi nawa wakeñaña nindi manakwindi hela muhela azatishi kufumba.—Ñal. 6:1. w22.03 28-29 ¶11-12

Makonu, Yehova wayinkaña antu jindi “ñovu yabadika hañovu jawantu” kulonda atwalekihu kumukalakela nakashinshi. Njila yimu mwatukoleshelañawu hikulomba. Neyi chashimunawu haAEfwesesa 6:18, kapostolu Pawulu watuleja kulomba kudi Nzambi “mpinji yejima.” Chikufumamu, Nzambi wukutukolesha. Mpinji jikwawu, tunateli kuzeya hela kukañanya kwiluka jitunakukeña kulomba. Ilaña Yehova nakukeña nindi tumulombeña hela chakwila chinakutukalila kumulejamu yitoñojoka yetu nichitunakutiya. (Rom. 8:26, 27) Watukoleshaña cheñi kuzatisha Bayibolu. Pawulu watañileña Nsona kulonda jimukoleshi nikumukundeja, ninetu twatela kutañaña Bayibolu. (Rom. 15:4) Neyi tutañaña Izu daNzambi nikutoñojokahu, Yehova nateli kuzatisha spiritu yindi yajila kulonda twiluki Bayibolu chiyinateli kutukwasha nakukala kutukweti.—Heb. 4:12. w21.05 22 ¶8-10

Twalemesha mudimu wetu wakudizisha hela chakwila tunakumona kukala kwamuchidinyi kunateli kutukañesha kuzata nañovu mumudimu wakwilisha atumbanji. Hadaha hitunateli kuzata neyi chitunakukeñaku. Chakutalilahu, akwakushimwina amakwawu anashinakaji hela akatakataña. Komana ninenu dichimudi? Neyi dimu, talenu chuma chimu chitunenzi nakuwana netu tunateli kulombola atudizi aBayibolu kuzatisha mafoni etu hela yozelu yikwawu. Dichi, munateli nikutachika kulombola kadizi waBayibolu iku mudi hetala denu. Kudi cheñi chuma chikwawu chalema. Amakwawu anateli kukeña kudiza Bayibolu, ilaña mpinji yatanjikawu amanakwetu nawu ashimwineña wena ekalañahu wanyi. Hadaha anateli kwikalahu nantetemena hela nawufuku. Kwila mudiza nawu Bayibolu haniji mpinji nehi? Yesu wamudizishileña Nikodemu nawufuku chineli diyi mpinji yakeñeliyi.—Yow. 3:1, 2. w21.07 5 ¶10-11

Atumbanji twaYowanu Mupapatishi ahayamini muloña atumbanji twaYesu ashakamineña wanyi chakadi kuda. Yesu wayilumbulwili nindi hiyateleli kushakama chakadi kuda iku yena wuchidi wamumiku. (Mat. 9:14-17) Hela chochu, aFwarisi niantu amudimbulwileña amwinkeleña Yesu nyiloña muloña yena walondeleleña wanyi tushidikilu twawu. Azuwili chokileñayi antu akata haSabata. (Maku 3:1-6; Yow. 9:16) Amwekeneña neyi alemesha Sabata; ilaña hampinji yoyimu, adiña nakulandishila mutembeli. Azuwili chelili Yesu yayihoshimu muloña wakulandishilamu. (Mat. 21:12, 13, 15) Nawa kudi ana ashimwininiyi Yesu musinagogi muNazareta ahilili chelili Yesu yazatishi yakutalilahu yansañu yawaIsarela nakumwekesha nindi adiña adikeña aweni nawa abula chikuhwelelu. (Luka 4:16, 25-30) Ichi chuma cheliliyi Yesu chaletesheli antu amavulu kuhukana.—Mat. 11:16-19. w21.05 5-6 ¶13-14

Njila jimu mwatusoñamishilañayi Yehova kutalisha hakudivwimba nilwisu hikutukolesha kulonda tudizili kuyuma yamwekanaña muchihandilu. Neyi tunakutoñojoka halwisu, Satana Diyabolu diyi wenzaña muyitoñojoka yetu. Chineli wadiña kañelu, Satana watela wadiña nanyidimu yayiwahi yayivulu. Ilaña wakeñeleleñahu yikwawu. Wakeñeleña nindi antu adifukuleña kudi yena, chuma chamutelela hohu Yehova. Satana wakeñaña twikali neyi yena, wafwilaña kutuluwañesha tubuleña kumona yuma yitukweti netu yinawanini. Mpinji yatachi yeliliyi mwenimu, himpinji yahosheliyi naEva. Yehova wamwinkeli Eva ninfumwindi yakuda yayivulu, “nyitondu yamwitempa yejima” kufumishahu hohu wumu. (Kutach. 2:16) Hela chochu, Satana wamudimbili Eva kutoñojoka nindi watela kuda kumutondu wayikaanishiliwu. Eva hamweni yuma yayinkeliwu nindi yinashikiliku; wakeñeleleñahu yikwawu. Tweluka chuma chafuminimu. Wavulumwini nawa nkumininaku wafwili.—Kutach. 3:6, 19. w21.06 14 ¶2-3; 17 ¶9

Adama naEva ayilejeli kuvwala anyana nikuhemba mukala wawu chiwahi. Neyi amwovwahilili Yehova nikuzatila hamu neyi chakeñeleñayi, Adama naEva nanyanawu adi kutwalekahu kushakama muchisaka chaNzambi haya nyaaka. Adama naEva adiña namudimu walema muchisaka chaYehova. Neyi chashimunawu haMasamu 8:5, Davidi washimwini chamuleñawu muntu kudi Yehova nindi: “Wunamwili wakukuminamu chanti hadi añelu, wunamuvwiki chibañula nichakulema.” Eña, antu hiyayileña nañovu, maana niwuswa neyi wayinkawu añeluku. (Mas. 103:20) Hela chochu, muntu “wakuminamu chanti” hadi añelu. Chawushona, Adama naEva afumini muchisaka chaYehova. Ichi chuma chaleteli kukala hadi anyanawu. Ilaña yuma yafuukulayi Yehova yahimpika wanyi. Nakukeña antu ovwahila akekali anyanindi haya nyaaka. w21.08 2-3 ¶2-4

Makonu, akakudifukula aYehova amavulu amonaña makañesha. Chakutalilahu amakwawu ashakamaña mumatuña mwakañeshawu mudimu wetu. nawa ayikasaña nawa “[ayitwalaña] kudi anguvulu nianyanta,” kulonda wiikali wunsahu kudi wena. (Mat. 10:17, 18) AYinsahu amakwawu amonaña nikañesha dambukaku. Ashakamaña mwituña mwekala kusubuka kwakudifukula kudi Yehova, ilaña antaña jawu ayikañeshaña kulonda aleki kumukalakela Nzambi yawu. (Mat. 10:32-36) Kakavulu, ana adimbululaña antaña jawu aYinsahu neyi amona nawu anakañanyi kuyidimbulula, alekaña kuyidimbulula. Nawa kakavulu ana adiña nakuyikabisha nankashi antaña jawu enza nakwikala aYinsahu adikita. Neyi anakuyikañesha, bayi muzeyaku! Ikalenu ahamuka. Mukweti Yehova nispiritu yindi yajila, dichi bayi muchiinaku! w22.03 16 ¶8

Bayibolu yashimunaña nawu Yehova wahela “mesu adinka wanta, idimi datwambaña, nimakasa apwekeshaña mashi akadi muloña.” (Yish. 6:16, 17) Cheñi, “wahela chikupu akamadombu niantu atwambaña.” (Mas. 5:6) Yehova wahela yilwilu yejimiyi chakwila wajilumwini antu ejima atama mumafuku aNowa muloña enzesheli iseki dejima namadombu. (Kutach. 6:13) Cheñi, kuhitila mudi kaprofwetu Malaki, Yehova wahosheli nindi waheleli antu ejima akwatilileña makasu añodijawu akadi muloña kulonda ayiseñi. Nzambi wakaanaña kudifukula kwawu nawa wakayisompesha hayilwilu yawu. (Mal. 2:13-16; Heb. 13:4) Yehova wakeñaña nindi “tuheli yuma yatama.” (Rom. 12:9) Izu dakwila nawu “kuhela” damwekeshaña chitwatiyaña daya mukwila nawu kuhela chuma chikupu, kuchitiya wunyeñu. Dichi, twatela kutiya wunyeñu nachuma chahoshayi Yehova nindi chatama. w22.03 4-5 ¶11-12

Katataka Tata yetu wamwiwulu yazatishi Wanta windi kulonda yatukiswili. Antu akumuchiñililaña Yehova akutambwila nkisu jajivulu makonu nimwituña dadiha. Neyi antu jaNzambi aneñili dehi mwituña dadiha, hiyakakamaña hela kumona kukala kunakumonawu chayinu mpinjiku. Wuñanji waheña wukamana nawa hikwakekala kukataku. (Chim. 21:4) Hitwakakamaña nakuchiñilila yuma yitunakukeñaku, muloña kwakekala yuma yayivulu. (Mas. 72:16; Isa. 54:13) Iyi yakekala mpinji yayiwahi chikupu! Yehova nakutudizisha chayinu mpinji hakwila tukashakami muchiyuulu chindi kuhitila mukutukwasha kuleka yilwilu yatama nakwikala nayilwilu yayiwahi yamuzañaleshaña. Bayi muneña chakwila muleka nikumukalakela Yehovaku. Yuma yayiwahi yinakwinza! Chineli tunakutalila chihandilu chachiwahi kumbidi, tutwalekenuhu kumuchiñilila Yehova nakudiwunjika kulonda yakamanishi mudimu windi. w21.08 13 ¶17-19

Hashimbwili wanyi hanyima yakutambwila mukanda waPawulu, akaKristu ashakamineña muYudeya ashili matala awu, nyidimu yawu yakuselujola, niantaña jawu abula kwitiya nawa ‘atachikili kutemukila kumapidi.’ (Mat. 24:16) Chakadi nikujina, iyi yadiña mpinji yalema yakudikwasha wumu namukwawu. Henohu ichi chuma chakutemukila kumapidi kanda chimwekani, neyi azatishileña kufumba kwaPawulu nikwanzañana yuma yadiñawu nayu nawakwawu, chakadi nikujina chayipeleleli kwila mwenimu. Bayi neyi mpinji yejima amanakwetu niahela akutulejaña yuma yinakukeña kwilawuku. Ikalenu aswayi kusolomoka. Chakadi nikujina, mweluka amanakwenu niahela muchipompelu chenu akwashanaña mpinji yejima. Hiyatuleteshaña etu kutiya neyi tunakuyikabishaku. Tweluka netu mpinji yejima yitudi mukukala anateli kutukwasha nawa tunakufwila kwikala neyi wena. w22.02 23-24 ¶13-15

Hadi yaaka yinahitihu yipompelu yayivulu nijiñinza anayibombi hamu. Neyi atuleja nawu tutachiki kupompela muchipompelu chikwawu, chinateli kutukalila kushiya amabwambu jetu nichisaka. Komana Nzambi diyi wayilejaña akulumpi kwatela kuyayi mukakushimwina wejima? Inehi. Nawa neyi Nzambi diyi wayilejaña wanyi chinateli kutukalila kwovwahila munatulejiwu. Ilaña Yehova wayikuhwelela akulumpi kufuukula muniyi njila, ninetu twatela kuyikuhwelela. Muloñadi chitwatela kwiteja munakutulejawu akulumpi nikulondela munafuukuliwu hela chakwila yuma yinafuukuliwu yinambuki nayuma yitunakukeña? Muloña neyi twila mwenimu, tukukwasha antu jaNzambi kwikala anuñañana wumu namukwawu. Yipompelu yayilañaku hambidi neyi antu ejima muchipompeli anakulondela mwejima munakufuukula izanvu dawakulumpi. (Heb. 13:17) Chuma chasweja kulema, twamwekeshaña kudi Yehova netu twamukuhwelela neyi tuzatilaña hamu nawantu enkayi mudimu wakutulombola.—Yilw. 20:28. w22.02 4-5 ¶9-10

Neyi mudi amanakwetu apapatishewa, mwatela kuzata nañovu kulonda mwikali anhoshi amawahi nawa antañishi amawahi. Muloñadi? Muloña neyi ‘mudinkamu’ mukutaña, mukuhosha nimukutañisha mukukwasha antu anakuyitiyilila. (1 Tim. 4:15) Imikenu chikokwanyi chakudiza nawa zatishenuña nsañu yejima yashimunawu mubroshuwa yaShenu Muchima Kukutaña nikuKutañisha. Dizenuña kudiza kumu hampinji yimu, hitulukenuñamu hampinji yimudi hetala nawa hampinji yimunakuhana mpanji zatishenuña yuma yimwadiza. Ihulenu mukwakufumba wahambadi hela akulumpi amakwawu “adikita nankashi mukuhosha nimukutañisha.” (1 Tim. 5:17) Bayi mushaña hohu muchima hakuzatisha yuma yimwadiza mubuloshuwaku, ilaña yikwashenuña cheñi antiyilili jenu kukolesha chikuhwelelu chawu hela kuyisañumuna kulonda azatisheña yuma yinakudizawu. Neyi mwilaña mwenimu, wejima wenu mukwikala namuzañalu. w21.08 24 ¶17

Neyi tuyimonaña akwetu netu atubadika, tukudesekejaña wanyi nawakwetu ekala nayawaana niwuswa kubadika etu. Ilaña tukuzañalelaña hamu nawu. Sweje-e neyi anakuzatisha wuswa wawu kumukalakela Yehova. Chikufumamu, tukuleta kuwunda nikunuñañana muchipompelu. Tunateli kutondolwela kutiyila manakwetu hela muhela lwisu neyi twiluka netu kudi yuma yimu yelukawu yitwabula kwiluka etu. Neyi twadizoza hitukutoñojokaña netu tweluka yuma kubadika akwetuku. Ilaña, tukukeñaña kudizila kudi akwetu atubadika. Chakutalilahu, twili netu manakwetu muchipompelu wahanaña chiwahi mpanji yawantu amavulu. Tunateli kumwihula chaloñeshañayi mpanji yindi. Neyi muhela watelekaña chiwahi, tunateli kumwihula chatelekañayi kulonda ninetu tudiziliku. w21.07 16 ¶8-9

Mumukanda waKuchinda twatañañamu Yehova chafuukwilihu nindi kaIsarela wayili nakuchaya nchawa haSabata amujahi. Mumukanda waSamweli wamuchiyedi, twatañañamu netu chimwahitili yaaka Yehova wamwanakeneni Mwanta Davidi hamuloña wakwila wuvumbi nikujahañana. (Kuch. 15:32, 35; 2 Sam. 12:9, 13) Tunateli kudihula netu, ‘Muloñadi Yehova chamwanakeneniyi Davidi hamuloña wakujahañana niwuvumbi, ilaña eteji kujaha ona iyala wadiña nakamuloña kanyanya?’ Bayibolu hiyashimunaña nsañu yejima hanoyu nsañuku. Chakutalilahu, tweluka netu Davidi wabalumukili chikupu mumuchima hayuma yakoñeliyi. (Mas. 51:2-4) Indi ona iyala wafumpili nshimbi yaSabata wadiña iyala wamuchidinyi? Komana watiyili kutama nayuma yakoñeliyi? Komana kunyima wadikañilihu nanshimbi jaYehova? Komana kunyima wadiwilihu kufumba hela kukaana mwamusoñamishiliwu? Bayibolu yashimuna wanyi. Hela chochu, tweluka yuma yayivulu hadi Nzambi netu yena “waloña munjila jindi jejima.”—Mas. 145:17. w22.02 2-3 ¶3-4

Muntu wadizoza hafwilaña yuma yikukañanya kuzatayiku. Watwalekañahu kwikala namuzañalu nawa wazataña nañovu. Muntu wadizoza tunateli kumwesekeja namuntu wunakwendesha motoka kwakanduka. Neyi ñendeshi nakukeña kukanduka, watela kuholola magiya mugiya yanyanya kulonda yatweshi kukanduka. Wukwendaña chovu-chovu, ilaña motoka yikutwalekahu kukanduka. Munjila yoyimu, muntu wadizoza welukaña mpinji “yakuholola magiya” kulonda yatwalekihu kukalakala mudimu waYehova. (Fwili. 4:5) Talenu chuma cheliliyi Bazilayi, wadiña nayaaka 80 hampinji yamutambikiliwu kudi Mwanta Davidi nindi yenzi yashakameña kuchipañu. Hamuloña wakudizoza, Bazilayi wakaanini mutambi wamwanta. Bazilayi welukili nindi wukutwesha wanyi kuzata muloña wawushinakaji, dichi wahosheli nindi mukwenzi weyala Chimihami yayi mwiluña dindi. (2 Sam. 19:35-37) Kufwana Bazilayi, atushinakaji awamayala etejaña anyikwenzi kuzata nyidimu yazatileñawu. w21.09 10 ¶6-7

Komana chayikalilaña kumumona Yehova nenu hiTata wukweti kukeña? Etu amakwawu chatukalilaña. Neyi atata jetu atukulishileña adiña atukeña wanyi chinateli kutukalila. Twakundejewaña muloña tweluka netu Yehova weluka chitwatiyaña nichaleteshaña tutiyeña chenochu! Wakeñaña kuswina kwakwihi nanetu. Dihafuma Izu dindi kutuleja nawu: “Swinenu kwakwihi naNzambi, niyena wukuswina kwakwihi nanenu.” (Yak. 4:8) Yehova watukeña nawa watulejaña nindi yena nateli kwikala Tata yetu wamuwahi chikupu. Yesu nateli kutukwasha kuswina kwakwihi naYehova. Yesu wamwiluka Yehova chiwahi nawa wembujolaña yilwilu yindi, dihafumini kuhosha nindi: “Muntu wejima wunamoni ami, dikwila nawu namoni niTata.” (Yow. 14:9) Kufwana yayetu, Yesu watudizishaña chitunateli kumulemesha nikumwovwahila Tata yetu, kubula kumuneñesha nichitunateli kumutiyisha kuwaha. Sweje-e chihandilu chaYesu chahamaseki chatukwashaña kwiluka chekalayi Yehova naluwi nikukeña. w21.09 21 ¶4-5

Antu jaYehova adifukulaña kudi Nzambi walala wumu hohu mukunuñañana. Yehova wayinka akulumpi mudimu weneni wakuhemba chipompelu chakadi majilu. Neyi mukaKristu nakoñi nshidi yeneni, Yehova wakeñaña nindi akulumpi ashinshikihu kulonda amoni neyi owu muntu watela kutwalekahu kwikala muchipompelu. Hakachi kayuma yikwawu yashinshikañawu, ashinshikaña chikupu kulonda amoni neyi iwu muntu nabalumuki chikupu mumuchima nayuma yeliliyi hela nehi. Nateli kuhosha nindi nabalumuki mumuchima, komana naheli chikupu yuma yeliliyi? Komana nadishiñi nindi hamba kafuntishahu cheñi nshidiku? Neyi kudikunda nawantu atama dikwamuletesheli kukoña nshidi, komana naleki kudikunda nawu? Akulumpi alombaña kudi Yehova, asandujolaña chikupu chahosha Bayibolu nawa amonaña neyi iwu muntu natiyi kutama nachuma chakoñeliyi. Nkumininaku, afuukulañahu neyi chakwila iwu muntu nateli kutwalekahu kwikala muchipompelu. Mpinji yikwawu, anateli kumuhaña.—1 Kor. 5:11-13. w22.02 5 ¶11-12

Hela chakwila hanahiti mafuku antesha kufuma hitwapapatisheweli hela yaaka yayivulu, wejima wetu tunakukeña kwikala nawuntu wakeñañayi Yehova. Hakwila twikali naniwu wuntu twatela kuyuulaña yitoñojoka yetu. Muloñadi? Muloña yitoñojoka yetu diyatuleteshaña kwikala nawuntu wawuwahi hela watama. Neyi tutoñojokaña mpinji yejima chitunateli kuditiyisha kuwaha etu aweni, tukuhoshaña nikwila yuma yatama. (Efwe. 4:17-19) Munjila yikwawu, neyi tutoñojokaña hayuma yayiwahi, tukuhoshaña nikwila yuma munjila yamutiyishaña kuwaha Tata Yetu Yehova. (Ñal. 5:16) Hela chochu, tukukañesha wanyi yitoñojoka yatama yejima kwiñila muyitoñojoka yetu. Ilaña tunateli kutondahu kubula kulondela yitoñojoka yeniyi. Henohu kanda tupapatishewi, twatela kuleka kuhosha nikwila yuma munjila yahelayi Yehova. Dichuma chatachi chalema chatela kwilayi muntu hakuvula wuntu wawukulu. Hela chochu, hakwila nawu tumuzañalesheña Yehova, twatela kuvwala wuntu wawuha. w22.03 8 ¶1-2

Chapela wanyi akulumpi kwiluka neyi chakwila muntu wunakoñi nshidi nabalumuki chikupu mumuchima. Muloñadi? Muloña akulumpi hiyamonaña mumuchima wamuntuku, azataña nañovu kulonda awani wunsahu wunakumwekesha nawu manakwawu welileña yuma yatama nahimpi chikupu. Akulumpi atela kumona wunsahu wunakumwekesha nawu iwu iyala nahimpi chikupu, muyitoñojoka, chinakutiyayi niyilwilu yindi. Hanateli kuhita mpinji hakwila nawu iwu iyala yekali nayilwilu yikumwekesha nawu nahimpi chikupu. Hakwila yamwekeshi nindi nabalumuki chikupu, muntu anahañiwu watela kuyaña nakupompa mpinji yejima nikulondelaña kufumba kwawakulumpi kwakulomba mpinji yejima nikudiza Bayibolu. Wukutondolwelaña yuma yamuletesheli kuvulumuna. Neyi yazata nañovu nakuwahisha wubwambu windi naYehova, watela kwiluka chikupu nindi Yehova wukumwanakena nawa akulumpi akumufuntisha muchipompelu. w21.10 6 ¶16-18

Chineli Yesu wamukeñeli nankashi Yehova, wadifukwileña kudi yena hohu, hampinji yadiñayi mwiwulu nihamaseki. (Luka 4:8) Wayilejeli niatumbanji twindi nindi adifukuleña hohu kudi Yehova. Yesu hela atumbanji twindi ashinshika hiyazatishileña yifwikija hakudifukulaku. Chineli Nzambi hiSpiritu, kwosi chuma chidi chejima chikutuñayi muntu chinateli kwesekana naYehovaku. (Isa. 46:5) Indi kutuña nyevulu yawantu atoñojokañawu antu amakwawu nawu ajila nikutachika kudifukula kudi wena? Mulushimbi lwamuchiyedi haNshimbi Ikumi, Yehova wahoshelimu mazu adi munsona yalelu. Antu akeñaña kumuzañalesha Nzambi eluka nawu hakeñaña nindi tudifukuleña kudi ankishiku. Antu adiza nsañu yakunyaaka ahoshaña nawu mumpinji yawapostolu akwaKristu adifukwileña hohu kudi Nzambi. Makonu, aYinsahu jaYehova alondelaña njila yazatishileña akwaKristu akusambila. w21.10 19-20 ¶5-6

Yesu wayisoñamishili akwaKristu alala ashakamineña muYudeya nindi mpinji yakenza ‘hakamuchikawu musumba waYerusalema kudi amashidika.’ (Luka 21:20-24) Neyi chumichi chimwekana, ateleli kutachika “kutemukila kumapidi.” Neyi ashiya musumba adi kupuluka, ilaña ateleli kushiya yuma yayivulu. Yaaka yinahitihu, Kaposhi Kakutalila kahosheli nawu: “Ashili maha awu nimatala awu, hiyasendelihu niyuma mumatala awuku. Amukuhweleleli Yehova nawu wukuyikiña nawa wukuyikwasha nawa alemesheli wubwambu wawu naYehova kubadika chuma chidi chejima.” Kabombelelihu nawu: “Kumbidi tukamona kweseka kukamwekesha neyi maheta alema kudi etu; maheta dichuma chalema kudetu ntahindi, ntahindi chuma chalema kudetu hikupuluka hamuloña wakwikala ashinshika kudi Nzambi? Neyi kukuma kunenzi chikakeñekaña kuumika nikushiya yuma yejima. Twatela kwikala adiloñesha kushiya yuma yejima.” w22.01 4 ¶7-8

Hashimbwili wanyi kufuma hafuminiwu aIsarela muEjipitu, Yehova wadimwekesheli kudi Mosi nakushimuna ijina Dindi niyilwilu yindi. Wahosheli nindi: “Yehova, Yehova Nzambi, wenzala nawushona, watoñaña antu, hazuwaña swayuku, wasweja niluwi, wavulisha ninsañu yalala; wahembaña luwi lwindi lwamakombakaji awantu, wayanakenaña nikuluwa, ninyiloña, ninshidi.” (Kwid. 34:6, 7) Munawa mazu amawahi, Yehova wamulejeli Mosi chuma chasweja kulema hakukeña Kwindi kwakashinshi. Chumanyi chenichi? Yehova hadilumbulula hohu yomwenindi nindi wukwetu luwiku ilaña “wasweja luwi.” Awa mazu ayishimuna mapampa kubadika ha 6 muBayibolu. (Kuch. 14:18; Nehe. 9:17; Mas. 86:15; 103:8; Yoweli 2:13; Yona 4:2) Kakavulu, awa mazu ayizatishaña hohu kudi Yehova bayi antuku. Chakadi nikujina, Yehova walemesha nankashi kukeña kwakashinshi. w21.11 2-3 ¶3-4

Antu adisumbula atela kudizila cheñi kudi kapostolu Petulu niñodindi. Kwakwihi natukweji 6 hanyima yakudimona naYesu katachi, kapostolu Petulu wafuukwilihu chuma chalema. Petulu wadiña chibinda chanshi nawa dimwahembeleleñayi chisaka chindi. Dichi chelili Yesu yamuleji Petulu nindi yekali kambanji kindi, Petulu watoñojokeli hadi ñodindi hampinji yafuukwileñayi. (Luka 5:1-11) Petulu watondelihu kuya nakushimwina naYesu. Chakadi nikujina, ñoda Petulu wetejeli mwafuukwiliyi. Bayibolu yamwekeshaña nawu chelili Yesu anamusañuli dehi, ñoda Petulu wayileña nanfumwindi mpinji jikwawu. (1 Kor. 9:5) Chakadi nikujina, chineli wadiña mumbanda mukwaKristu wamuwahi chamuletesheli Petulu kwikala wakasunuka kufumba amayala akwaKristu niañodi jawu. (1 Pet. 3:1-7) Petulu niñodindi akuhweleli muchikaninu chaYehova chakwila nawu neyi atwamijaku Wanta wukuyikwashaña muchihandilu chawu.—Mat. 6:31-34. w21.11 18 ¶14

Kapostolu Pawulu wayikeñeli amanakwindi. Wazatileña nañovu kulonda ayakameni. (Yilw. 20:31) Akwawu akakwitiya niwena amukeñeli nankashi Pawulu. Mpinji yimu akulumpi amuEfwesesa chelukiliwu nawu hiyamba kamumona cheñi Pawuluku, wejima wawu “adilili nankashi.” (Yilw. 20:37) Awa akulumpi adikita niwena ayikeña amanakwawu niahela nankashi nawa azataña nañovu kulonda ayikwashi. (Fwili. 2:16, 17) Hela chochu, akulumpi amonaña kukala mpinji yikwawu. Chumanyi chinateli kuyikwasha kushinda iku kukala? Awa akulumpi adikita atela kudizila kudi Pawulu. Hadiña nañovu neyi jikwetiwu añeluku. Pawulu wadiña muntu wabula kuwanina nawa mpinji yikwawu chamukalileña kwila yuma yaloña. (Rom. 7:18-20) Nawa wamweneña kukala kwakuvulu. Ilaña Pawulu hazeyeli hela kuneñaku. Neyi akulumpi amwimbujolaña Pawulu, akushinda kukala kunakumonawu nawa akutwalekahu kwikala namuzañalu iku anakumukalakela Yehova. w22.03 26 ¶1-2

Alevi 19:3 yahosha cheñi hakuhemba Sabata. AkwaKristu hiyekala muNshimbiku, dichi hitwahembaña Sabataku. Ilaña, tunateli kudizilaku yuma yayivulu kudi aIsarela chahembeleñawu Sabata nichiyayikwashileña. Sabata yadiña mpinji yakunooka kunyidimu nawa yadiña mpinji yakudifukwilamu kudi Nzambi. Dimuloña waweni, hanidi ifuku daSabata Yesu wayileña kuSinagogi yadiña mumukala wawu nakutaña Izu daNzambi. (Kwid. 31:12-15; Luka 4:16-18) Lushimbi lwaNzambi lwekala haALevi 19:3 lwakwila nawu “mwakahembaña nisabata [jindi]” lwatela kutukwasha ñahi kwikala nampinji yakudifukula kudi Nzambi muchihandilu chetu? Kwila muzatilahu nehi kulonda mwovwahileña ilu lushimbi? Neyi mudifukulaña kudi Nzambi mpinji yejima mukwikala nawubwambu wawuwahi nayena, chuma chikuyikwasha kwikala ajila. w21.12 5 ¶13

Hampinji yadiñayi hamaseki, Yesu wadikundileña nawantu ejima. Wadiileña hamu nawantu aheta, akweti wuswa nawa wadiña nampinji yakuhanjeka nawatuzweñi niantu akabakana. Kubombelahu, wayitiyilileña wushona antu amweneñawu nawu “akwanshidi.” Dichi antu adimweneña kuloña ahukeni nayuma yelileñayi Yesu. Ayihwili atumbanji twindi nawu: “Muloñadi chimwadiilaña nikunwa hamu nawakwakutambula nyisonku niakwanshidi?” Yesu wakwili nindi mazu adi munsona yetu yalelu. (Luka 5:29-31) Henohu Mesiya kanda yenzi, kaprofwetu Isaya washimwini nindi akamukaana kudi antu amukaayi. Iwu wuprofwetu washimwineñahu dehi nawu: “Amudiwili amuumbili kudi antu . . . amudiwili neyi muntu abutilañawu antu mesu awu hitwamumweni kulemaku.” (Isa. 53:3) Mesiya ateleleli kumudiwula “kudi antu,” dichi aYudeya amuyaaka nkulakaji yakusambila ateleli kwiluka nawu Yesu akamukaana. w21.05 8-9 ¶3-4

AkwaKristu akusambila amakwawu azatishileña swayi wanyi kufumba. (Yak. 1:22) Amakwawu alemesheleñaku antu aheta. (Yak. 2:1-3) Amakwawu niwena chayikalilileña kuyuula madimi awu. (Yak. 3:8-10) Awa akwaKristu adiña nakukala kweneni, ilaña Yakoba hazeyeli nakuyikwashaku. Wayifumbili munjila yayiwahi ilaña chakadi kuyihita mumbadi nawa wayikwashili awa antu kulomba wukwashu kudi akulumpi kulonda ahimpi yilwilu yawu. (Yak. 5:13, 14) Chuma chitunakudizilaku: Ilukenu nenu antu akweti kukala nawa ilukenu nenu anateli kuhimpa. Amavulu itwadizaña nawu Bayibolu chinateli kuyikalila kuzatisha kufumba kwekalamu. (Yak. 4:1-4) Hanateli kushimbula hakwila aleki yilwilu yawu yatama kulonda ekali nayilwilu yayiwahi yawakwaKristu. Twatela kwikala ahamuka kulonda tuleji atudizi etu hiyatela kuhimpawu. Twatela kukuhwelela cheñi netu Yehova wukukoka antu adizoza nawa wukuyinka ñovu yakuhimpa yilwilu yawu muchihandilu chawu.—Yak. 4:10. w22.01 11 ¶11-12

AkwaKristu ejima afwilaña kutiyila antu luwi neyi chekalayi Yehova. Muloñadi? Muloña Yehova hakatiyila luwi antu abulaña kutiyila akwawu luwiku. Wejima wetu twakeñaña netu Yehova yatiyilileña kukulomba kwetu, dichi twikaleña naluwi. Chatela tujikeña matu etu neyi mukwetu mukwaKristu nakwaba, mpinji yejima twatela kutiyilila “chakalokañayi kazweñi.” Munjila yoyimu, twatela kuzatishaña kufumba kwonenawu kwakwila nawu: “Muntu wukubula kutiyila akwawu luwi akumusompesha chakadi luwi.” (Yak. 2:13) Neyi twiluka netu ninetu tunakukeña atutiyileña luwi ninetu tukutiyilaña akwetu luwi. Twatela kumwekesha luwi sweje-e neyi muntu wunabalumuki nafunti muchipompelu. Yakutalilahu yamuBayibolu yinateli kutukwasha kusweja kutiyila antu luwi nikutondolwela kwikala akalisha. w21.10 12 ¶16-17

Hefuku dakukumishaku muchihandilu chindi chahamaseki, chamanineña mudimu windi, Yesu wayili cheñi nakukeña iluña damwena nakulomba nikutoñojoka chikupu. Nawa iluña denidi wadiwanini mwitempa daÑesemani. Haniyi mpinji, Yesu wayilejeli atumbanji twindi chuma chalema kutalisha hakulomba. Mpinji yashikiliwu mwitempa daÑesemani, kwadiña kweyila dehi, hadaha mukachi kawufuku. Yesu wayilejeli apostolu indi nindi “tonenuña” nawa wayili nakulomba. (Mat. 26:37-39) Ilaña hampinji yalombeleñayi, wena akupukilili mutulu. Chayiwaniniyi anakaami, Yesu wayilejeli nindi “tonenuña nawa lombenuña.” (Mat. 26:40, 41) Welukili nindi anazeyi. Muloña wakuyitiyila wushona, Yesu welukili nindi “mujimba wunazeyi.” Hela chochu, Yesu wayili cheñi mapampa kayedi nakulomba ilaña chafuntiliyi wayiwanini atumbanji twindi anakaami cheñi chatela alombeña.—Mat. 26:42-45. w22.01 28 ¶10-11