Ayinu Diyi Mpinji Yatelayi Kutonda Muntu Chakekala Wumi Windi Kumbidi
“Nzambi yoleña muntu neyi chekalayi yomweni, chochekalayi Nzambi dichi chamuleñeliyi; wayileñeli niiyala nimumbanda.”—Kutachika 1:27.
AWA mazu awinimbu akutachikilahu amuBayibolu, ashimuna chuma chasweja kuwaha hakachi ‘kayuma yejima yalubanji yelayi dehi Nzambi muyilaaka yayu’—hakuleña iyala watachi nimumbanda, Adama naEvu. (Mukwakutaŋisha 3:11) Yehova Nzambi hakwikala Nleñi yawu, wayilejeli nindi: ‘Semununenu, muvuleña, muwanini heseki, mudovwahishi; ikalenu anyanta niawanshi amukaluñalwiji, niawatujila amuluzwizu, niyuma yayumi yejima yendaña hamaseki.’—Kutachika 1:28.
Nzambi washimwini nkeñelu yindi kudi antu ayedi akutachikilahu nanawa mazu. Ayilejeli kusemununa nikwakamena iseki, nakubalumuna iseki dejima kwikala mukala wawu waparadisa nawanyanawu. Nzambi hayitondeleleli mpinji yateleleluwu kufwaku. Ilaña, Nzambi wayikanini chuma chachiwahi chikupu. Neyi afuukwiluhu kwila nkeñelu yaNzambi, adi kushakama mukuwunda nimuzañalu waweni haya nyaka.
Ilaña afuukwili chatama, nawa chumichi chaletesha antu ejima ashinakajeña nikufwa. Kafwampi, nkakulula Yoba wetejeli nindi: “Muntu wakuvwala kudi mumbanda wamafuku antesha kwindi, wamona kwayihuñu.” (Yoba 14:1) Chumanyi chatamini?
Bayibolu yalumbulula nawu: “Kudi iyala wumu nshidi yeñilili mumpata yamunu mwishina, ninshidi yaleteli kufwa; chochenochu nawa nikufwa kwashikeneni antu ejima, muloña wejima wawu avulumwini.” (Aroma 5:12) Chakubula nikujina, iwu “iyala wumu,” wadiñi Adama, watondeluhu kufumpa nshimbi yaNzambi yapela mumushikila. (Kutachika 2:17) Adama wajimbesheli kukooleka kwakushakama haya nyaka muparadisa hanu hamaseki hamuloña wachuma chatondeliyi. Cheñi waleñeleli anyanindi kujimbesha wuswana wawuwahi nawa wayisambwishili ishiñu danshidi nikufwa. Chamwekeni neyi ajimbesheli yuma yejima. Komana chaswayi kuwana chuma chajimbeli?
Mpinji Yakubalumuna Yuma Yikali Yayiha
Chimwahitili yaaka yayivulu, ñimbi yamasamu amoneneni kusoneka nindi: “Akwakuloña akaswana ituña, akashakamamu haya nyaka.” (Masamu 37:29) Hakwila nawu tukuhweleli netu chikaninu chakaniniyi mwitempa daEdeni chikashikijewa, Izu daNzambi dalumbulula chikupu yuma yikukeña kwilayi nawu: “Wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila yinahiti dehi.” Nzambi wahosheli nindi: “Tiya, hinukubalumuna yuma yejima yiikali yayiha.”—Chimwekeshu 21:4, 5.
Chineli yuma yejima yikweti mpinji yayitoñwelawu, lwihu lwehulañawu dilwilwe: Indi mpinji yakubalumuna yuma yikali yayiha yakashika mwakanyi, kulonda yikaninu yayiwahi yakaniniyi Nzambi yikali yalala? Ansoneki ayinu magazini, aYinsahu jaYehova, adikitaña chikupu kulonda kukwasha antu eluki nawu tunakushakama mumpinji yatenañawu muBayibolu nawu, “mafuku akukuminina” nawa nawu mpinji yaNzambi ‘yakubalumuna yuma yejima yiikali yayiha’ yinashiki dehi kwakwihi. (2 Timotewu 3:1) Tunayikoleshi kutaña Bayibolu nikudiza hayikaninu yayiwahi yimunateli kudiluñisha. Cheñi tunayikoleshi kwiteja iwu mutambi wakwila nawu: “Mukeñakeñenu Yehova hachidiyi kumonewa, mutambikenu hachidiyi kwakwihi.” (Isaya 55:6) Chatela mufuukuleña nenu yuma yikamwekana muchihandilu chenu ayishimwineñahu dehi, kuchiñeja kwenu kwakushakama haya nyaka kwashindamena hadenu aweni.
[Mazu ekoku adi hefu 8]
“Tiya, hinukubalumuna yuma yejima yiikali yayiha”