Kusañuka kwaYesu Kwaleñela Antu Kuheta Wumi Wahaya Nyaka
BAYI neyi kusañuka kwaYesu hichuma chamwekeni hohu kushankulu chabula kulema kudi etu makonuku. Kapostolu Pawulu washimwini kulema kwakusañuka kwaYesu chasonekeliyi nindi: ‘Kristu amusañula dehi mudi afu, nekali dehi nyikabu yatachi yawenawa anakami tulu twakufwa. Muloña chaleteluwu kufwa kudi muntu, kudi muntu nawa diku kwenjili kusañuka kwawafu. Muloña chafwañawu antu ejima mudi Adama, dichi nawa antu ejima akayihandishila mudi Kristu.’—1 Akorinda 15:20-22.
Yesu amusañwili haNisani 16, 33 C.E., hefuku dodimu dahanineñawu aYudeya nyikabu yatachi yambutu yatachi kudi Yehova Nzambi hamalala atembeli muYerusalema. Hakumutena Yesu nindi nyikabu yatachi, Pawulu watwalili mukwila nindi kwakekala antu amakwawu akasañulawu mudi afu.
Mazu aPawulu adi heshina alumbulula chuma chikwawu chafuma mukusañuka kwaYesu. Pawulu wahosheli nindi: “Chaleteluwu kufwa kudi muntu, kudi muntu nawa diku kwenjili kusañuka kwawafu.” Wejima wetu twafwaña muloña wanshidi nikubula kuwanina kutwaswana kudi Adama. Hela chochu, hakuhana wumi windi wawanina neyi ifutu danyiloña, Yesu waleñela antu ayikuuli kuwunduñu wanshidi nikufwa kuhitila mukuyisañula. Pawulu wakunkulwili iyi nsañu chachiwahi chasonekeliyi haAroma 6:23 nindi: “Wufwetu wanshidi hikufwa, ilaña chamukunkulu chaNzambi hiwumi wahaya nyaka, mudi Kristu Yesu, Mwanta wetu.”
Yesu yomweni walumbulwili kufwa kwindi nikusañuka kwindi chikwalema kudi etu. Waditeneni yomweni nindi: ‘Dichi chakanyamunawu nawa niMwana kamuntu hewulu; kulonda muntu wukukuhwelela aheti mudi yena wumi wahaya nyaka. Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.’—Yowanu 3:14-16.
Fwikijenu wumi waya nyaka chakadi yikatu, kukabakana hela kuneña! (Chimwekeshu 21:3, 4) O kuchiñeja kuwaha! Muntu wumu wadiza chikupu wahosheli muniyi njila nindi: “Hela chakwila majamu atwanukishaña nawu wumi wekala wakapinji kantesha, kusañuka kwatulejaña chikupu nawu kufwa kwakapinji kantesha.” Eñañi, kusañuka kwaYesu kwaleñela antu kuheta wumi wahaya nyaka.