Amayala—Hembenu Añodijenu Chiwahi

IYALA nateli kuhemba ñahi ñodindi? Antu amavulu akuhwelela nawu chuma chalema chatela kwilayi iyala hikukwasha chisaka chindi munsañu jamali. Hela chochu, ambanda amakwawu aheta nankashi aneñaña nikuchiina muloña ayihembaña chiwahi wanyi. Chakutalilahu, mumbanda wakuSpain wejina daRosa, wahosheli hadi nfumwindi nindi, “Nawantu acheñi himuntu wamuwahi, ilaña hetala hikapweli keyala.” Joy, wakuNigeria, wahosheli nindi, “Neyi nakaani kwila munahoshi nfumwami, welaña nindi, ‘Chiña wili yuma yejima yinahoshi muloña yami nfumweyi.’”

Indi iyala nateli kuzata ñahi mudimu windi chiwahi? Chumanyi chatela kwilayi iyala hakwila ‘ashakameña chachiwahi’ nañodindi?—Luti 1:9.

BAYIBOLU CHIYAHOSHA HAMUDIMU WUKWETI IYALA

Hela chakwila Nzambi wayimonaña eyala namumbanda nindi esekana, Bayibolu yahosha nawu wejima wawu akweti mudimu wambukaku muchisaka. Aroma 7:2 yahosha nawu, mumbanda wasumbuka wovwahilaña ‘nshimbi janfumwindi.’ Neyi chochatondañawu munyitayi muntu wakulombola yuma, Nzambi niyena watonda iyala kwikala mutu wamumbanda. (1 Akorinda 11:3) Amayala atela kulombola yisaka yawu.

Amayala, munatela kuzatisha ñahi mudimu wayinkayi Nzambi? Bayibolu yahoshaña nawu, “Keñenu añodi jenu neyi chakeñeliyi Kristu chipompelu.” (Aefwesesa 5:25) Hela chakwila wasumbwili wanyi, yuma yakoñeliyi Yesu Kristu yinatela kuyikwasha kwikala iyala wamuwahi. Tushinshikenu yumiyi.

CHIHANDILU CHAYESU—HICHAKUTALILAHU CHACHIWAHI CHAWAMAYALA

Yesu wakeñeleña kunookesha antu asendeli yiteli yalema. Yesu walejeli antu akabakeneña nindi: “Inzenu kudami, . . . ami nukuyinookesha.” (Matewu 11:28, 29) Wadiña nakukwasha antu akabakeneña nikuyitañisha kulonda akundami kwakwihi naYehova. Dichaleñeleli antu amavulu kwinza kudi Yesu, elukili nawu wukuyikwasha.

Amayala chiyatela kumwimbujola Yesu. Keñakeñenu njila mumwatela kukwashila añodijenu nyidimu. Ambanda amakwawu atiyaña neyi chatiyileñayi Rosa wahosheli nindi: “Nadiña tuhu neyi nduñu yamfumwami.” Ilaña, iyala wejina daKweku, washakamaña chiwahi muwulu, wahosheli nindi: “Namwihulaña ñodami chinatela kumukwashaku nyidimu. Chineli namukeña, natachikilañahu kumukwashaku nyidimu yahetala.”

Yesu watoñojokeleleñaku antu nikuyitiyila wushona. Mumbanda kazweñi wakabakeni namusoñu wakata hadi yaaka 12. Chatiyiliyi nawu Yesu nakukoña yihayamisha yañovu, “Welili nindi neyi nukukumina dakukunka kumahinindi nukukola.” Wahosheli mwalala. Wayili kudi Yesu, yakwata nikumahinindi, hohenohu yakola nikukola. Hela chakwila antu amumweneña ahosheli nawu iwu mumbanda namotoki lushimbi, Yesu welukili nindi wakabakeni.a Wamulejeli nindi: “Eyi mwanami, . . . musoñu weyi wukufumi.” Yesu hakeñeleña kumuzuwila hela kumutiyisha nsonyuku muloña welukili musoñu windi. Chumichi chamwekesheli nawu wadiña nawushona.—Maku 5:25-34.

Amayala chiyatela kumwimbujola Yesu. Neyi ñodenu nakati, mutoñojokelenuku nawa ikalenu adiwunjika. Hakwila mwili mwenimu fwikijenu neyi yenu munakati. Chakutalilahu, Ricardo walumbulwili nindi, “Chinamona nami ñodami nahili, hinahoshaña yuma yikuleñela yasweji kuhilaku.”

Yesu wahanjekeleña nawatumbanji twindi. Yesu wayilejeli atumbanji yuma yayivulu chikupu. Wahosheli nindi, “Nayileji dehi yuma yejima yinatiyili kudi Tata yami.” (Yowanu 15:15) Kafwampi, mpinji yikwawu Yesu wakeñeleña kwikala nkawindi nakulomba. Hela chochu Yesu wayilejeleña atumbanji twindi yuma yatoñojokeleñayi. Hawufuku wakukumishaku henohu kanda amujahi neyi mbaji, wayilejeli atumbanji hatooka nindi, “muchima wami wunaneñi chakubadika.” (Matewu 26:38) Hela chakwila yuma yeliluwu yamuneñesheli, Yesu halekeli kuhosha nawatumbanji twinduku.—Matewu 26:40, 41.

Amayala chiyatela kumwimbujola Yesu. Mulejenu ñodenu chimunakutoñojoka nichimunakutiya. Mumbanda nateli kuhosha nindi nfumwindi wahanjekaña nawantu acheñi ilaña neyi wudi hetala wekalaña wamwena. Kwambukaku, shinshikenu Ana chatiyañayi neyi nfumwindi yamuleja chinakutoñojokayi nichinakutiyayi. Wahosheli nindi, “nelukaña nami wankeña chikupu, nawa twadikunda.”

Bayi mumonaña nenu chimwamwena munakumubabesha ñodenuku. Mumbanda wumu wahosheli nindi, “Chahilili nfumwami walekeleña kuhosha nanami mafuku amavulu. Natiyileña kutama nawa namweneña neyi wandiwula.” Ilaña, Edwin wakeñaña kumwimbujola Yesu. Wahosheli nindi, “Neyi nahili hinashikenaña dakwakulaku, ilaña nahembelelaña mpinji yayiwahi yakuhosha.”

Joy, atenawu dehi kumatachikilu namoni chinahimpiyi nfumwindi kufuma tuhu hatachikili kudiza Bayibolu nawaYinsahu jaYehova. Wahosheli nindi, “Nahimpi nawa nakuzata nañovu kulonda yekali iyala wukweti kukeña neyi chekalayi Yesu.” Antu amavulu adisumbula anakuhetela muniji nshimbi jamuBayibolu. Ninenu munakukeña kuhetela muniji nshimbi jamuBayibolu? Lejenu Chinsahu chaYehova wudi wejima kulonda yayidizisheña Bayibolu chawana.