MUTU WUDI HAKAVA | YIMWENU YINAKULUMBULULA YUMA YAMUMAWULU
Malwihu Kutalisha Hayuma Yamumawulu
Mwadihulahu dehi kutalisha hamawulu niantu ashakamañamu? Neyi dimu, hiyenu hohuku. Hadi yaaka yayivulu, antu anafwikiji haniyi nsañu. Amakwawu akuhwelela nawu kaayi kakuspiritu hiluña mwashakamañawu ankakulula atela kulemeshawu. Amakwawu niwena afwikijaña nawu hiluña dadiwahi nawa dawunda datenañawu nawa iwulu mwenzala añelu niantu amawahi afwa dehi. Hela chochu, amakwawu amonaña kaayi kakuspiritu nawu himukala mwashakamawu anzambi amavulu.
Antu amavulu akaanaña nawu kwila twiluka chekala mwiwulu nehi muloña kwosi muntu wafumamu dehi mwiwulu kulonda yatuleji chimwekala. Yitoñojoka yamuchidiwu yakutwamba. Henohu Yesu Kristu kanda yenzi hamaseki, wadiña nakushama mwiwulu. Wahosheli hatooka to-o nawa munjila yayiwahi kudi anlomboli amunsakililu amuyaaka nkulakaji yakusambila nindi: “Chinasuluki mwiwulu hinalondi kwila muchima wamami awenuku, nalondi kwila muchima wayena wantemesheli.” Dichi Yesu wadiña nakuyileja apostolu indi nsañu yamweneñayi mwiwulu nindi: “Mwitala daTata yami mwakushakama mwekala mwamuvulu.”—Yowanu 6:38; 14:2.
Tata yaYesu, hiNzambi wukweti ijina dindi daYehova nawa “itala” daYehova dekala mumawulu. (Masamu 83:18) Dichi, kwosi muntu wunateli kulumbulula chachiwahi chekala mawulu neyi chinateli kulumbululayi Yehova Nzambi niYesu Kristuku. Anashimuni nsañu yayivulu kutalisha hamawulu kuhitila muyimwenu yayimwekesheleliwu antu ashinshika.
Chibaaba chinalondelihu chinashimuni nsañu yamuBayibolu yinakulumbulula yuma yamweniwu antu muyimwenu yayivulu. Chimukutañaña haniyi yimwenu, ilukenu nenu yuma yamwiwulu yakuspiritu bayi neyi hiyuma yitunateli kukwata hela kumonaku. Chatela yatulumbulwili nsañu mumazu akutiya hohu yileñaleña yakuspiritu, itukubula kutiya etu, Nzambi wamwekesheli yimwenu yamumawulu kuzatisha mazu apela itunateli kutiya. Yimwenu yikuyikwasha kwiluka antu ekala mwiwulu mwekala “mwakushakama mwamuvulu.”