Komana Mwekala naSpiritu Yabulaña Kufwa?
KOMANA KWEKALA kuhanda hanyima yakufwa? Ilu lwihu lwanyeñumwisha muchidi wamuntu woñu hadi yaaka yayivulu nankashi. Hadi yaaka yayivulu, antu munyuza yejima atoñojokañahu nankashi haniyi nsañu nawa anekali nayikuhwelelu yashiyashana.
Mukaayi kejima antu amavulu akuhwelela nawu “spiritu” yahandaña hanyima yakufwa kwamuntu. Komana chalala mukachi kamujimba wamuntu mwafumañahu chuma chimu hampinji yakufwa nawa chatwalekañahu nakuhanda? Komana spiritu yamuchidinyi yekala mudi muntu wamumi? Chumanyi chamwekanaña kuniyi spiritu neyi tunafwi? Izu daNzambi, Bayibolu yonenawu, yahana ñakwilu yayiwahi nawa yalala kunawa malwihu.
Komana Spiritu Hichumanyi?
MuBayibolu, izu dabalumunawu nawu “spiritu” datalisha hohu ‘kumuuya.’ Ilaña ichi hichatalisha hohu kukwonaku. Chakutalilahu nsoneki waBayibolu Yakoba, wahosheli nindi: ‘Mujimba wakadi spiritu wafwa’. (Yakoba 2:26) Dichi dinu, spiritu hichuma chaleteshaña mujimba kwikala nawumi.
Iyi ñovu yahanaña wumi hiyatelela kwikala hohu muuya hela mpepela yahitaña mumapwapwaku. Muloñadi? Muloña hanyima yakuleka kwona, masewuzi amumujimba atwalekañahu kwikala amomi hampinji yantesha—kwesekeja nachahoshaña mukanda waThe World Book Encyclopedia nawu “hahitaña jiminiti jajivulu.” Haniwu muloña ñovu jakupwapula wunahwidili jinateli kuzatika, nawa yiidi yamujimba anateli kuyifumisha mumujimba wamuntu wumu nakuyisha mudi muntu mukwawu. Ilaña neyi ñovu yahanaña wumi yabulaña kumwekana yifumamu mumasewuzi amumujimba, hela kukwikala kuzata nañovu ñahi, wumi hiwukufuntamuku. Mpepela hela yikuvula ñahi hiyatela kuhandisha isewuzi nidimuku. Spiritu, yekala hiñovu yawumi yabulaña kumwekana—lusashi lwamuuya—lwaleñelaña masewuzi kutwalekahu amomi. Iyi ñovu yawumi yakoleshewaña namuuya.—Yoba 34:14, 15.
Komana iyi spiritu yazatikaña hohu mudi antu? Bayibolu yatukwashaña kuwana ñakwilu yaloña yanilu lwihu. Mwanta waMaana Solomoni wasonekeli nindi: ‘Wuneluki hinyi neyi spiritu yamuntu yayaña kwiwulu, nispiritu yakanyama neyi yayaña heseki?’ (Mukwakutaŋisha 3:21) Dichi dinu, anyama hohamu niantu ayitenaña neyi akweti spiritu. Chatela kwikala ñahi muniyi njila?
Spiritu, hela ñovu yawumi, tunateli kuyesekeja nakesi kawuneñu kahitaña mumakina hela makina azatikaña nakesi kawuneñu. Kenaka kesi kawuneñu kanateli kuzatika munjila yamboka-mboka, kwesekeja namudimu wanoyu yozelu yikanakwinka ñovu. Chakutalilahu, sitovu yinateli kutata, kompyuta yinateli kutuleja chakuchinda nikuwana nsañu, chisanji chanyivwimbimbi chinateli kumwekesha nyivwimbimbi nimazu. Ilaña aka kesi kawuneñu hikamwekanaña neyi kwiji iyi yozelu yikenkaña ñovuku. Yekalaña hiñovu hohu. Chochimu, ñovu yahanaña wumi niyena hiyabalumukaña nakwikala neyi chuma chiyinakwinka wumuku. Muloña hiyikweti yililu neyi yamuntuku, nawa hiyatoñojokañaku. Atunyama hamu niantu ‘akweti spiritu yoyimu.’ (Mukwakutaŋisha 3:19) Dichi dinu, neyi muntu nafwi, spiritu yindi hiyayaña kwiluña dacheñi nakutwalekahu kuhanda neyi chileñaleña chakuspirituku.
Hanu dinu afwa ekala ñahi? Nawa chumanyi chazatikaña kuniyi spiritu neyi muntu nafwi?
“Wakafunta Cheñi Mwomulunkuñu”
Chelili muntu watachi, Adama, yofumpi nshimbi yaNzambi mumushikila, Yehova wamulejeli nindi: “Kudya yakudya chiña wunasulwili kumesu eyi, nichiwamba kufunta cheñi mumaseki, muloña dihu hakufumishiluwu. Muloña eyi wulunkuñu, nochu wakafunta cheñi mwomulunkuñu.” (Kutachika 3:19) Indi Adama wadiña kudihi henohu Yehova kanda yamuleñi kufuma kulunkuñu? Chalala, hadiña kwokuku! Wadiña kwosi. Dichi Yehova Nzambi chahosheliyi nindi Adama ‘wakafunta cheñi mumaseki,’ walumbulwili nindi Adama wakafwa. Adama hadi kuya kwiluña dacheñi muwanta wawaspirituku. Hakufwa, hadikwikala cheñi nawumuku, hadi kwikala kwokuku. Wuloku windi wadiña hikufwa—kubula kwikala nawumi—bayi neyi kuya kwiluña dekwawuku.—Roma 6:23.
Chumanyi chamwekanaña kudi antu amakwawu afwa dehi? Mukwakutaŋisha 9:5, 10 yalumbulula chachiwahi mwekalilawu afu, twatañaña nawu: “Afu hiyeluka chumaku . . . Muloña mwijamu muwukuya mwosi mudimu, mwosi kufuukula, mwosi kwiluka, mwosi maana.” Dichi dinu, kufwa hikubula kwikalaku. Ñimbi wamasamu wasonekeli nindi, muntu neyi nafwi, “[spiritu] muuya windi wukwidikamu, hakufunta cheñi kwindi hamaseki indi; dodena ifuku odu mwafuukulayi munakisiki dehi.”—Masamu 146:4.
Chalala, afu hiyeluka chumaku, hiyazatañaku. Hiyelukahu chuma nichimuku. Hiyakutwesha kukumona, kukutiya, hela kuhosha naneyuku. Hiyakutwesha kukukwasha hela tuhu kukukatishaku. Chalala himwatela kuchina afu nihantiku. Komana chekalaña ñahi nawu “muuya” [spiritu] windi wukwidikamu neyi muntu nafwi?
Spiritu ‘Yafuntaña Cheñi Kudi Nzambi Walala’
Bayibolu yahoshaña nawu muntu neyi nafwi, ‘Spiritu yafuntaña cheñi kudi Nzambi walala wayiheni.’ (Mukwakutaŋisha 12:7) Komana ichi chalumbulula nawu spiritu yakasaña lwendu lwakuya kudi Nzambi? Nehi hidimuku! Njila yazatishilañamu Bayibolu izu ‘dakufunta’ hichatalisha mukwenda kwakweni kwakufuma heluña dimu nakuya kwiluña dekwawuku. Chakutalilahu, aIsarela, abulili chikuhwelelu ayilejeli nawu: ‘Yehova wamazaza nindi, Funtenu cheñi kudami, ami nawa nikufunta kudenu.’ (Malaki 3:7) ‘Kufunta’ kwawaIsarela kudi Yehova kwatalishili mukwila nawu abalumuki, nakuleka yililu yatama nakulondela njila yaloña yaNzambi. Nawa ‘kufunta’ kwaYehova kudi aIsarela kwatalishili mukwila nawu wadi kuyakamena antu jindi cheñi. Iku ‘kufunta’ kuyanateniwu kwejima kwabombelelumu yililu, bayi neyi hikwenda kwakufuma kwiluña dimu nakuya kwekwawuku.
Hohamu, hakufwa hikwekalaña kwenda kwakweni kwakufuma heseki nakuya mwiwulu hampinji ‘yafuntaña’ spiritu kudi Nzambuku. Ilukenu nenu, spiritu hiñovu yahanaña wumi. Dichi neyi iyi ñovu yifuma mudi muntu, chiña Nzambi hohu diyi wekala nañovu yakuyifuntishamu cheñi. Dichi spiritu ‘yafuntaña cheñi kudi Nzambi walala’ munjila yakwila nawu kuchiñeja kwanona muntu kwejima kwawumi wakumbidi kwashindamena hadi Nzambi.
Chakutalilahu, talenu chahosha Nsona kutalisha hakufwa kwa Yesu. Nsoneki wansañu yayiwahi Luka wahosheli nindi: “Yesu chanabileliyi nezu dañovu, hakwila nindi, ‘Tata, nashi spiritu yami mumakaseyi. Chanahoshiyi mwenomu yotula niwumi windi.” (Luka 23:46) Hampinji yelili spiritu yaYesu yinafumimu dehi mudi yena, hakasili lwendu lwalweni lwakuya mwiwuluku. Yesu hiyamusañwili kufuma mudi afuku, sampu hefuku damuchisatu. Nawa mwahitili mafuku 40 hakwila nawu yakandami nakuya mwiwulu. (Yililu 1:3, 9) Hela chochu, hampinji yakufwa kwindi, Yesu washili spiritu yindi mumakasa aTata yindi, wakuhweleleli chikupu muñovu yaYehova yakumufuntisha cheñi kuwumi.
Chalala, chiña Nzambi hohu diyi watela kufuntisha muntu kuwumi. (Masamu 104:30) Ichi chatwinka kuchiñeja kweneni nankashi!
Kuchiñeja Kwalala
Bayibolu yahosha nawu: “Bayi muhayama chumichuku, muloña mpinji yinakwinza yakela antu ejima adi mumajamu achanukishu akatiya izu [daYesu] nawa akedikamu. (Yowanu 5:28, 29 NW) Chalala, Yesu Kristu wakanini nindi antu ejima adi muyitoñojoka yaYehova akasañuka, hela akayifuntisha cheñi kuwumi. Mwiluña dakutiya mbila yawushona nawu antu anafwi, kwakatiyakana nsañu jakuzañalesha jikashimunewa hadi antu yakafuntisha kuwumi. Wenowu muzañalu wutukatiya hakutambwila antu yitwakeña akafuma kumajamu!
Munakukeña kwilukilaku jajivulu kutalisha hanochu chimwatela kuhetelamu muniku kuchiñeja kwatwinkayi Nzambi? Tunayilombi kusonekela kukeyala yidi heshina neyi munakukeña buloshuwa yaAspiritu zha Afwa—Anatweshi Kukukwasha ndi Kukukatisha? Kumana Ekala Kwoku?
Nsona jitunazatishi jinafumi muBayibolu yaLunda yamu 1962. Ilaña neyi mukuwana tunazatishi NW yinalondeli hansona, dikwila nawu nsonoyu yinafumi muBayibolu yawundeli yaNew World Translation of the Holy Scriptures—With References