Aspiritu Hiyashakaminuhu naKufwila haMasekuku

Aspiritu ekala kwoku. Muwanta wawaspiritu wabulaña kumwekana mwekala aspiritu atama niamawahi. Komana hiyantu ashakaminuhu nakufwila hamaseki?

Inehi, hiyantuku. Neyi muntu nafwi, hayaña mwituña dawaspiritu neyi chatoñojokañawu antu amavuluku. Tuneluki ñahi chumichi? Muloña dichahosha Bayibolu. Bayibolu himukanda wansañu yalala wafuma kudi Nzambi walala wumu hohu, ijina dindi diyi Yehova. Yehova waleñeli antu; weluka chiwahi chuma chayimwekenaña neyi anafwi.—Masamu 83:18; 2 Timotewu 3:16.

Bayibolu yahosha nawu Nzambi wamuwumbili Adama, muntu watachi, “nalunkuñu lwamaseki.” (Kutachika 2:7) Nzambi wamushili muParadisa, mwitempa daEdeni. Neyi Adama wovwahilili lushimbi lwaYehova, mutenowu hadi kufwaku; wadi kwikala wamumi nimakonu hamaseki. Ilaña chelili Adama yafumpi lushimbi lwaNzambi mumushikila, Nzambi wamwilili nindi: “Wamba kafunta cheñi mumaseki; muloña dihu hakufumishiluwu; muloña eyi wulunkuñu, nochu wakafunta cheñi mwomulunkuñu.”—Kutachika 3:19.

Indi mazu wenawa alumbulukadi? Indi Adama wadiña kudihi henohu Yehova kanda yamuleñi nalunkuñu? Wadiñi kwosi. Hadiñi spiritu wakubula kuvwalika mwiwuluku. Wadiñaku wanyi. Kafwampi neyi chahosheliyi Yehova nindi Adama, ‘wukufunta mumaseki,’ walumbulwili nindi Adama wukafwa. Hayili muwanta wawaspirituku. Chafwiliyi Adama, hekalili cheñi nawumuku, hadiña kwoku. Kufwa hikubula wumi.

Hanu dinu chekala ñahi kudi antu amakwawu afwa? Komana niwena hiyekala kwoku? Bayibolu yakulaña nawu:

• “Wejima wawu [antu nianyama] ayaña kwokumu hohu; wejima wawu afumini kulunkuñu, wejima wawu akabalumuka cheñi lunkuñu nawa.”—Mukwakutaŋisha 3:20.

• “Afu hiyeluka chumaku.”—Mukwakutaŋisha 9:5.

• “Nimwakeñelañawu, nimwahelelañawu, nimwatiyilañawu ichima mwajiya dehi.”—Mukwakutaŋisha 9:6.

• “Mwijamu muwukuya mwosi mudimu, mwosi kufuukula, mwosi kwiluka, mwosi maana.”—Mukwakutaŋisha 9:10.

• “[Muntu] hakufunta cheñi kwindi hamaseki indi; dodena ifuku odu mwafuukulayi munakisiki dehi.”—Masamu 146:4.

Komana iji nsona mwajimona kwikala jakala kwiteja? Neyi dimu, toñojokenu hachumiche: Muyisaka yayivulu iyala diyi wekalaña namali akukwasha nachu amwitala dindi. Neyi iyala nafwi, kakavulu chisaka chindi chayandaña. Mpinji yikwawu ñodindi nianyanindi hiyekalaña namali ashikila akulanda yakudyaku. Hekwawu ayilumbu janfumwindi anateli kuyikabisha. Dichi dihulenu nenu: ‘Neyi chakwila ona iyala wamumi mwituña dawaspiritu, muloñadi chabulilañayi kutwalekahu kukwasha chisaka chindi? Muloñadi chabulilañayi kukiña chisaka chindi kudi antu atama?’ Muloña nsona jahoshaña mwalala. Ona muntu wafwa nawa hakutwesha kwila chuma chidi chejimaku.—Masamu 115:17.

Komana chumichi chinakulumbulula nawu afu hiyamba kasañuka cheñuku? Inehi. Tukahanjeka hansañu yakusañuka kumbidi. Ilaña chalumbuluka nawu afu hiyeluka yuma yimwakoñañaku. Hiyanatweshi kuyimona, kuyitiya hela kuhosha nanenuku. Bayi muyichinaku. Hiyanatweshi kuyikwashaku, nawa hiyanatweshi kuyikatishaku.—Mukwakutaŋisha 9:4; Isaya 26:14.