Komana Mweluka?

Komana ana antu adiña nakulandisha anyama mutembeli muYerusalema ateleli kuyitena nawu “atupondu”?

KWESEKEJA naNsañu yayiwahi yasonekeliyi Matewu, “Yesu weñilili mutembeli nakuhañamu antu ejima alandishileña nikulanda yuma mutembeli, wahinwini nijimesa jawakwakuhimpa mali niyitwamu yawantu alandishileña tupompa. Nawa wayilejeli nindi: ‘Chasonekewa nawu, “Itala dami akaditena nawu itala dakulombelamu,” ilaña enu munakudibalumuna kwikala iyeñu dawatupondu.’”—Mat. 21:12, 13.

Nsañu yahosha hadi aYudeya yamwekeshaña nawu antu alandishilileña mutembeli adiña nakudiila antu kuhitila mukuyikandamishila wuseya. Chakutalilahu, mukanda waMishnah (Keritot 1:7) mwekala nsañu yamwekeni mumafuku awapostolu chelili wuseya wakulandisha tupompa wukandadimi nakushika mudinari yimu yasiliva. Awa mali esekeni namali azatilileña muntu wabula kukuluka yitembi hadi mafuku 25. Tupompa nituteela ditwalambwileñawu atuzweñi; ilaña, wuseya wanitu tujila waswejeleleliku. (Lev. 1:14; 5:7; 12:6-8) Rabbi Simeon ben Gamaliel, wahilili naniwu wuseya, wakehesheliku wuseya wanyilambu, chakwila wuseya watupompa tuyedi wakeheli kapampa 100 kufuma hawuseya wadiñaku.

Kwesekeja naniyi nsañu, chidi hohu chachiwahi Yesu kutena alandisheliña mutembeli nindi “atupondu” muloña akandamishili wuseya nawa adiña nalwisu.