Yesu Natookeshi Tembeli

Muchaaka cha 30 C.E., hadaha muApril, Yesu wayili kuYerusalema. Antu amavulu enjili mumusumba kuChipandakenu. Neyi chelileñawu hachawija, alambwili nyilambu yayimuna hatembeli. Antu amakwawu enjileña nayimuna, ilaña amakwawu alandileña kuYerusalema.

Yesu hayiliyi kutembeli, wamweni antu anakulandisha yimuna kwenoku. Akwatileña mali kuhitila mukulandishila yuma mwitala daYehova dakudifukwila. Yesu welilidi? Washintili chikoti chanyonji nawa wahañili anyikoku niañombi mutembeli. Wahinwini mesa jawakakuhimpa mali nawa wamwañili mawayawaya awu hamaseki. Yesu walejeli owu alandishileña tupompa nindi: ‘Fumishenu iyi yuma munu! Bayi mwilisha itala daTata yami diikali iluña dakulandishilamuku!’

Antu adiña hatembeli ahayamini nayuma yeliliyi Yesu. Atumbanji twindi anukili wuprofwetu wahosha hadi Mesiya nawu: ‘Nakekala neyena chikupu netala daYehova.’

Mukuhita kwampinji, muchaaka cha 33 C.E., henohu Yesu waya dehi mwiwulu, Yesu watookesheli tembeli kamuchiyedi. Hetejeli muntu wudi wejima kubula kulemesha itala daTata yindiku.