Yesu Namwakeshi Iyena Dakudifukula Kwalala

Chinamanishiwu chawija muKana, Yesu nayi kuKaperinamu. Mama yaYesu niamanakwindi akuwanamu, aYakoba, Yosefu, Shimona niYudasi anakuya hamu nindi.

Hanu dinu, muloñadi Yesu chinayiliyi kuKaperinamu? Iwu musumba wekala hazanduka kubadika Nazareta niKana nawa wekala weneni. Cheñi, atumbanji twaYesu amaha anatondiyi ashakamaña muKaperinamu hela kwakwihi. Kulonda Yesu ayidizishili mumukala wawu.

Hampinji yinakushakamayi muKaperinamu, Yesu nakukoña cheñi nyidimu yayiwahi. Dichi antu amavulu mumusumba nimumaluña amukamwihi anatiyi yuma yinakwilayi. Ilaña Yesu niamabwambu jindi, aYudeya adihana chikupu atela kuya kuYerusalema nakwanakana Chipandakenu mu 30 C.E.

Mpinji yidiwu hatembeli muYerusalema, atumbanji twaYesu anamoni chuma chineliyi Yesu chinayitiyishi kuwaha, chinambukiku nachamweniwu.

Nshimbi yaNzambi yayileja aIsarela kulambula anyama hatembeli, nawa antu anenzi atela kuyinka yakuda hampinji yinakushakamawu. Nshimbi yetejeli antu ayileña kuYerusalema kufuma kwakulehi kwinza namali atela kulandawu nachu “añombi, anyikoku, ampembi,” niyuma yikwawu yakuzatisha hampinji yinashakumawu mumusumba. (Kuhituluka 14:24-26) Chumichi chaletesheli, akakuselujola muYerusalema kulandisha anyama hela atuda mukachi mulubanza lweneni lwatembeli. Amakwawu anakuyidimba kuhitila mukuyilandisha hawuseya weneni.

Iku nahili nankashi, Yesu namwañi mawayawaya awakakuhimpa mali, kuhinuna jimesa nikuhañamu antu. Kuhiñahu Yesu nahoshi nindi: “Fumishenu iyi yuma munu! Lekenu kwilisha itala daTata yami diikali itala dakulandishilamu!”—Yowanu 2:16.

Atumbanji twaYesu chinamoniwu chumichi, ananuki wuprofwetu wahosha hadi Mwana kaNzambi nawu: “Iyena detala deyi dikañuda.” Ilaña aYudeya anamwihuli nawu: “Chinjikijilwinyi chiwukukoña kumesu etu, chineli wunakwila yumiyi?” Yesu nakuli nindi: “Sandenu iyi tembeli nawa ami nukuyinyamuna mumafuku asatu.”—Yowanu 2:17-19; Isamu 69:9.

AYudeya anakumona neyi Yesu nakutena Tembeli yidi muYerusalema, dichi anamwihuli nawu: “Iyi tembeli ayituñili hadi yaaka 46, eyi wukutwesha kuyinyamuna mumafuku asatu?” (Yowanu 2:20) Ilaña Yesu nakutena mujimba windi. Chimunahiti yaaka yisatu, atumbanji twindi anukili awa mazu mpinji yasañukiliyi.